Säs'stroi

Amuine Säsin Rädkid-eländpunkt (ven.: Сясьские Рядки) mainitase kirjutadud purtkiš ezmäižen kerdan vl 1572, sigä torguihe kalad da mecad.

Nügüdläižen eländpunktan aluz om pandud vl 1927 radnikžiloks sauvomha Säsin cellülozbumagašt kombinatad (saudihe vozil 1926−1928, alištui rekonstrukcijale vl 2008). Arni sil kombinatal pästaškanzihe ezmäšt nevondkundališt tualetbumagad vl 1969. Vl 1992 žilo sai lidnan statusad.

Säs'stroin ižandusen päsarak om cellülozbumagaine tegimišt, kombinat^[1] seižub Valgomkan hural randpolel. Toižed edheotandad oma il'mvenehiden tegim, leibänceh, änikoiden kazvatusen ferm.

 

Lidn sijadase rajonan keskuzpalan pohjoižes, Säs'-jogen oiktal randal, Valgomk-jogen (ven.: Валгомка 44 km pitte) lanktendan sijas, Ladoganjärven randpolel (nell' kilometrad randhasai), 25 m ü.m.t. keskmäižel korktusel.

Matkad Volhov-rajonkeskushesai om 35 km suvipäivlaskmha. Matkad Piterihesai om 152 kilometrad päivlaskmha. Lähembaine lidn om Uz' Ladog 20 km päivlaskmha «Kol»-trassadme. Lähembaine raudtestancii om Lungači vides kilometras lidnaspäi.

Avrovo-žilo (332 rist. vl 2010) da ühesa küläd mülüdas lidnankundha Säs'stroin ližaks. Lidnankundan pind — 116 km².

Lidnankundan tobmuden pämez' om sen Deputatoiden nevondkundan ezimez'. Edeline ezimez' om Vladimir Ivanov (reduku 2014 — sulaku 2023). Julija Grigorjeva radab lidnankundan Administracijan pämehen vn 2023 vilukuspäi. Edeline Administracijan pämez' om Julija Stolärova (kezaku 2018 — viluku 2023).

Vn 2010 Venäman rahvahanlugemižen mödhe lidnan eläjiden lugu oli 13 745 ristitud, lidnankundan — 14 409 ristitud, rajonan seičemendez, vn 2021 — 12 566 ristitud. Vl 2017 kaik 13 006 ristitud elihe lidnas i 13 626 ristitud kaikes lidnankundas. Kaikiš suremb lidnan ristitišt oli 18 tuhad eläjid vl 1988.

Pühän Jumalanmaman Emäganpäivän kaks' pühäpertid^[2] oma avaitud lidnas (ortodoksine hristanuskond): jumalanpert' vspäi 1751 (kellčuhunduz 1810−1816) i časoun' (18. voz'sadan lopuspäi).

Säs'stroin lapsiden opendusen aluzkundad oma nell' päivkodid, kaks' keskškolad, sportškol, čomamahtoiden škol. Volhovan äiprofil'žen tehnikuman^[3] lavut nomer nell' om lidnan profopendusen aluzkundaks.

Federaline «Kol»-avtote läbitab lidnad suvipäivlaskmaspäi pohjoižpäivnouzmha i jagab sidä läz poleti.

Lähembaine passažirraudtestancii om Lungačid vides kilometras suvipäivnouzmha lidnan keskusespäi «Volhov — Pöud»-keskustal.

•  
  Suren sodan nevondkundaližiden sodamehiden velleskaum (2018)
•  
  Jumalanmaman Emäganpäivän pühäpert', vn 2020 nägu
•  
  Profškol vl 2018
•  
  Kul'turkeskuz (2018)

1. ↑ Säsin cellülozbumagaižen kombinatan sait (syas.ru). (ven.) (angl.)
2. ↑ Säs'stroin pühäpertid sobory.ru-saital. (ven.)
3. ↑ Volhovan äiprofil'žen tehnikuman sait (volhovmt.ru). (ven.)

• Lidnankundan tobmuden aluzkundoiden oficialine sait (администрация-сясьстрой.рф). (ven.)