Trine Skei Grande

Trine Skei Grande
Fødd	2. oktober 1969 (55 år) Overhalla i Trøndelag
Statsborgar av	Noreg
Parti	Venstre
Yrke	Lærarinne, politikar
Utdanna ved	Universitetet i Oslo Universitetet i Trondheim
Far	Helge Grande
Medlem	Norsk Kvinnesaksforening
Verv	Norsk kunnskaps- og integreringsminister 24. januar 2020– 13. mars 2020
Føregangar	Jan Tore Sanner
Verv	Norsk kultur- og likestillingsminister 22. januar 2018– 24. januar 2020
Etterfylgjar	Abid Raja
Verv	Norsk kulturminister 17. januar 2018– 22. januar 2019
Føregangar	Linda Hofstad Helleland
Verv	Partileiar i Venstre 2010– i dag
Føregangar	Lars Sponheim
Verv	Stortingsrepresentant 2001– i dag
Alle verv	stortingsrepresentant (2017–2021) Norsk kulturminister (2018–2020) vararepresentant til Stortinget (2001–2005) stortingsrepresentant (2005–2009) stortingsrepresentant (2009–2013) stortingsrepresentant (2013–2017) stortingsrepresentant (fast møtande vararepresentant, 2001–2005) Norges kunnskapsminister (2020–2020) leder for Venstre (2010–2020)

Trine Skei Grande (fødd 2. oktober 1969 i Overhalla) er ein norsk politikar frå partiet Venstre. Ho har vore stortingsrepresentant frå Oslo sidan 2001, først som fast møtande vararepresentant for statsråd Odd Einar Dørum, deretter som vald stortingsrepresentant frå 2005. Grande var partileiar i Venstre i perioden 2010–2020 og var parlamentarisk leiar 2001–2005 og 2009–2018.

Grande vart norsk kulturminister frå 17. januar 2018, etter at Venstre valde å gå inn i regjeringa Solberg.^[1] Frå 22. januar 2019 til 24. januar 2020 var ho kultur- og likestillingsminister, etter å ha teke over ansvaret for likestillings- og diskrimineringsspørsmål frå Barne- og likestillingsdepartementet.^[2] Ho var kunnskaps- og integreringsminister frå 24. januar til 13. mars 2020.

Skei Grande voks opp i Nord-Trøndelag, men har budd fast i Oslo sidan 1994. Ho tok eksamen i samfunnsøkonomi grunnfag ved Universitetet i Trondheim 1989. Ho tok statsvitskap mellomfag ved Universitetet i Oslo 1990–1991 og historie grunnfag same stad 1991–1992.

Yrkeskarrieren starta som frilansjournalist i Namdal Arbeiderblad 1984–1988. Ho var i 1989 valkampsekretær i Nord-Trøndelag Venstre og lærarinne ved Hunn barneskole ei kort tid same året. I 1990 arbeidde Skei Grande som sekretær i Venstres hovudorganisasjon og i Unge Venstre.

Ho var adjunkt ved Levanger vidaregåande skole 1992–1994 og forelas i sosialfag ved Høgskolen i Levanger i 1993. I 1994–1995 var ho informasjonssekretær i Norsk Studentunion og generalsekretær i Norges Bygdeungdomslag 1995–1997. Ho var generalsekretær i Landsrådet for Norges barne- og ungdomsorganisasjoner 1997–1999.^[3]

Skei Grande var leiar i Nord-Trøndelag Unge Venstre 1987–1989, medlem av sentralstyret i Unge Venstre 1989–1991, leiar i Norges Venstrekvinnelag 1990–1992 og leiar i Oslo Venstre 1997–2000. Skei Grande var nestleiar i Venstre 2000–2010. Etter valnederlaget i 2009, da stortingsgruppa til Venstre vart redusert frå ti til to representantar, var hovudoppgåva til Skei Grande å atterreise tilliten til partiet. Ho tok over leiarvervet etter Lars Sponheim våren 2010. I åra etterpå stod ho fram som ein meir samlande leiarfigur i Venstre enn forgjengaren.^[4]

Ved stortingsvalet 2013 gjekk Venstre fram frå 3,8 til 5,2 prosent og fekk ni representantar. Venstre hadde i perioden 2013–17 ein samarbeidsavtale med Høgre, Framstegspartiet og Kristeleg Folkeparti som sikra regjeringa fleirtal på Stortinget, men Venstre deltok ikkje sjølv i regjeringa. Ved stortingsvalet 2017 gjekk Venstre tilbake til 4,4 prosent, men partiet kom over sperregrensa og sikra framleis Høgre/Frp-regjering. Deretter gjekk Venstre i forhandlingar med sikte på ei utviding av regjeringa, og frå januar 2018 vart Grande kulturminister i den utvida regjeringa Solberg. Venstre har i alt tre statsrådar i regjeringa i tillegg til ein ekstra statssekretær ved statsministerens kontor, i Finansdepartementet og Justisdepartementet. Etter regjeringsutvidinga i 2019 fekk Skei Grande også ansvar for likestillings- og diskrimineringsspørsmål.^[4]

Som folkevalt starta Skei Grande som varamedlem til Overhalla kommunestyre 1987–1991. Ho var medlem av fylkestinget i Nord-Trøndelag 1991–1995, medlem av Oslo bystyre 1997–1999 og 1999–2003. 2000–2001 var ho byråd for kultur og utdanning i Oslo.

Som stortingsrepresentant 2001–2005 var Skei Grande medlem av kyrkje-, utdannings- og forskingskomiteen. I perioden 2005–2009 var ho medlem av familie- og kulturkomiteen. I perioden 2009–2013 var ho medlem av både kontroll- og konstitusjonskomiteen, kyrkje-, utdannings- og forskingskomiteen og den utvida utanriks- og forsvarskomiteen. Ho var parlamentarisk leiar for Venstre 2001–2005 og frå 2009 til ho gjekk inn i regjeringa Solberg i 2018.

Skei Grande har hatt ei rekkje andre verv. Ho var nestleiar i Norske 4H 1996–1997, leiar i styret for Oslo Konserthus 2008–2010 og leiar i styret for Oslo Kino AS i same perioden.^[3]

• 2009–2013 medlem i Kyrkje-, utdannings- og forskingskomiteen
• 2009–2013 medlem i Den utvida utanriks- og forsvarskomiteen
• 2009–2013 medlem i Kontroll- og konstitusjonskomiteen
• 2009–2013 medlem i Valkomiteen
• 2009–2013 medlem i Fullmaktskomiteen
• 2005–2009 medlem i Familie- og kulturkomiteen
• 2005–2009 medlem i Valkomiteen
• 2005–2009 medlem i Fullmaktskomiteen
• 2001–2005 medlem i Kyrkje-, utdannings- og forskingskomiteen
• 2001–2005 medlem i Den utvida utanrikskomiteen
• 2001–2005 medlem i Valkomiteen

• «Trine Skei Grande». Stortinget.no. 

Wikifrasar har ei sitatsamling som gjeld: Trine Skei Grande