Diake

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

'ne Diake ies in de katholieke kèrk emes dae assisteert. Hae haet de ièrsjte van de drie hoager wiejinge (diaconaat) gehad, die 'ne preester krieg. 'ne Diake maog, in tegesjtèlling mèt ander geistelike, waal getrouwd zin.

't Woord diake kump van 't Griekse woord diakonos (διακονος), dat dener beteikent. De term woort al in de biebel toegepas: de vreugste christelike gemeinsjappe houwe diakes.

't Twiède Vaticaans Concilie haet 't diakesjap veur ouwer, getrouwde manne opnuuj toegesjtange. Paragraaf 29 van de Dogmatische Constitutie euver de Kèrk, Lumen Gentium handelt euver dees vernuujde vörm van 't diake-ambt.

De diakewiejing deent ouch es veurbereijing op de hoag wiejing tot preester. Zoa-emes weurt, saer 't Twiède Vaticaans Concilie, dèks transeunt diake of euverganksdiake geneump. Aan de diakewiejing ging veur 1967 de wiejing tot subdiake veuraaf.

De diake maog katecheselèsse geve, duipe en es kerkelike getuge optrae bie 't sacrament van 't huwelik. Hae maog de pesjtoar assistere in de eucharistievieringe, hae maog praeke en de communie oetdeile.

De dalmatiek ies 't liturgisch kleid wat speciaal bedoeld ies veur de diake. Onder de dalmatiek dreug hae de sjtola sjuuns euver ziene sjouwer.

In de protestantse kèrke ies de diake emes dae ziech inzèt veur de erm luuj. Same mèt de ouderlinge en de dominee vörme zie 't dageliks besjtuur, de kèrkeraod, van de kèrk.