Pemento da Arnoia

Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo.

O pemento da Arnoia é unha variedade de pemento (Capsicum annuum L.) con Indicación Xeográfica Protexida, orixinaria do concello ourensán da Arnoia e cultivada principalmente ao longo da comarca do Ribeiro. Unha cooperativa comezou a comercializalos no ano 1969, e aproveitando a concentración da oferta, celébrase dende entón a festa do pemento da Arnoia, declarada de interese turístico, a primeira fin de semana (de xoves a domingo) do mes de agosto.

Os pementos da Arnoia son dunha forma cónica e grandeira. A súa cor é verde-amarelenta clara cando son destinados ao consumo en fresco e de cor vermella intensa nos froitos maduros destinados principalmente á transformación. O seu sabor e arume é suave e senlleiro, a diferenza dos pementos de Padrón, carecen de comechón algunha.

Adoitan ter un peso de entre 50 e 90 gramos por unidade cando o froito é verde e entre 120 e 145 gramos cando o froito é maduro. A súa lonxitude é de entre 7,5 e 11 cm no froito verde e 11,5 e 13,5 no froito maduro, o espesor da súa parede ou carne é de entre 2,6 e 7,7 mm para o froito verde e de entre 2,8 e 9,5 mm no froito maduro.

A zona de produción coincide coa de acondicionamento e envasado, estando constituída polo termo municipal da Arnoia e pola parroquia de Meréns, pertencente ao concello de Cortegada. A calidade do produto está avaliada por un consello regulador provisorio, presidido por Rodrigo Aparicio Santamaría.

Grazas ao seu tamaño, aínda que poden servir de acompañamento en calquera prato, asados, pelados ou fritidos na tixola, admiten recheos de diversas mesturas.

• Gastronomía de Galicia