Hoants

hoants
	mantsjes yn pearingsfearren oan it tsieren; wyfke
taksonomy
ryk	dieren (Animalia)
stamme	rêchstringdieren (Chordata)
klasse	fûgels (Aves)
skift	wilstereftigen (Charadriiformes)
famylje	snipfûgels (Scolopacidae)
skaai	grillen (Calidris)
soarte
Calidris pugnax
	Linnaeus, 1758
	IUCN-status: gefoelich
ferspriedingsgebiet
	stânfûgel ; simmerfûgel; wintergast

De hoants (Calidris pugnax, foarh. Philomachus pugnax) is in fûgelsoarte út de famylje fan de snipfûgels.

Oare nammen

Oare Fryske nammen foar de hoants binne de foddebosk, maaisnip en wylsterhoanne.

Foarkommen

De hoants is in sa'n 30 sm grutte greidefûgel. Yn harren briedkleed sitte de mantsjes opfallend yn de fearren mei in grutte kraag fan fearren dy't per fûgel bot ferskille kin. Fan hiele donkere, suver swarte kragen, nei brune en sels wite kragen.
By winterdeis hawwe de mantsjes itselde kleed as de wyfkes. Unopfallend brune fearren mei wat donkere skobben. De wyfkes binne ek dan wol fan de mantsjes te underskieden omdat se opfallend lytser binne.

Fersprieding

De hoants breidt foaral op de noardlike toendra's mar ek wol sompige gebieten yn de rest fan Jeraazje. De fûgels dy't yn it noardwesten fan Jeropa briede oerwinterje meist yn it binnelân fan West-Afrika, sa as bygelyks de Nigerdelta yn Maly. Op de trek nei harren briedgebieten binne de fûgels ek yn Fryslân te sjen.
As briedfûgel komt de Hoants hast net mear yn Fryslân foar. Wylst it yn de jierren fyftich noch wol aardich wat fûgels brieden binne der no noch mar inkele briedgefallen per jier.

Fuortplanting

De hoants hat in tige opfallende balts. Derfoar hawwe de fûgels aparte plakken ynjochte om skyngefjochten te hâlden, de saneamde hoantseridden. Dêrby ferdigenje guon fan de mantsjes in eigen stikje grûn tsjin de oare mantsjes. De wyfkes rinne der wat omhinne om in mantsje út te sykjen. De mantsjes kinne bot aggresyf tsjininoar wêze wêrby se mei harren opsette krage inoar oanfleane.
Nei it pearjen leit it wyfke fjouwer aaien yn in kûltsje op de grûn. De aaien wurde troch allinne troch it wyfke útbret.

Hoants mei in wite krage
Hoants yn winterkleed