Bochum
Bochum (distaget [ˈboːxʊm] en alamaneg) zo ur gêr eus Nordrhein-Westfalen, e kornôg Alamagn. E rannvro ar Ruhr emañ, etre kêrioù Essen, Herne, Dortmund ha Witten.
Betek kreiz an XIXvet kantved ne oa nemet ur gêrig vihan. D’ar mare-se e kreskas poblañs kêr abalamour da gresk greanterezh ar glaou e kornad ar Ruhr. E 1905 e voe tizhet 100 000 annezad ha neuze e krogas Bochum da vezañ ur gêr vras. Ar 16vet kêr vrasañ eo en Alamagn bremañ, gant tost da 365 000 a annezidi.
Distrujet e voe ul lodenn vat eus kêr gant bombezadegoù dibenn an Eil Brezel-bed : da neuze e oa bet distrujet 38% eus Bochum ; diwar an 90 000 ti a oa e kêr ne chome nemet 25 000. Tri-ugent vloaz goude ar brezel e kaver bombezennoù c’hoazh e Bochum, pa vez graet labourioù da sevel savadurioù nevez. Goude enkadenn ar mengleuzioù glaou er bloavezhioù 1950 ha 1960, e emdroas ar greanterezh e Bochum ha savet e voe ul labouradeg vras gant ar gompagnunezh kirri Opel.
E Bochum ez eus 6 skol-veur pe skol uhel, evel Skol-veur ar Ruhr (Ruhr-Universität Bochum), unan eus brasañ skolioù-meur Alamagn, gant ouzhpenn 30 000 a studierien. Savadurioù all zo brudet ivez : mirdi ar mengleuzioù alaman, mirdi an hentoù-houarn alaman pe c’hoariva Bochum.
Kêrioù gevellet
[kemmañ | kemmañ ar vammenn]Gevellet eo Bochum gant ar c’hêrioù-mañ:
Sheffield (Bro-Saoz), abaoe 1950
Oviedo (Spagn), abaoe 1980
Donetsk (Ukraina), abaoe 1987
Nordhausen (Alamagn), abaoe 1990
Xuzhou (Sina), abaoe 1994
| ||||||||||||||||
