Nuwejaarsdag
Nuwejaarsdag val op 1 Januarie en is die eerste dag van die jaar volgens die Gregoriaanse kalender. Die dag word as 'n vakansiedag in Suid-Afrika en ander lande wat die Gregoriaanse kalender gebruik waargeneem, met die uitsondering van Israel.
1 Januarie op die Juliaanse kalender stem ooreen met 14 Januarie op die Gregoriaanse kalender. Volgelinge van die Oosters-Ortodokse Kerk vier nuwejaarsdag op die dag. In Westerse lande word Nuwejaarsdag op 1 Januarie, agt dae na Kersfees gevier.
Nuwejaarsdag word soms ingewag deur 'n aftelling na middernag. Dit gaan soms gepaard met die afskiet van vuurwerke en maak van nuwejaarsvoornemens. Christene bid ook soms vir 'n goeie nuwe jaar wat voorlê. Hulle bedank ook hul God vir 'n goeie jaar wat verby is en bid ook vir 'n komende goeie jaar. Veral stede rondom die wêreld wedywer om die pragtigste vuurwerke by bekende bakens, waaronder die Sydneyhawebrug in Sydney, die Brandenburgse Poort in Berlyn, die Eiffeltoring in Parys en die Sky Tower in Auckland. Ander tradisies sluit in swem in koue mere in die Noordelike Halfrond se winter en strandvakansie aan die kuste van byvoorbeeld Australië en Suid-Afrika gedurende die Suidelike Halfrond se somer.
In die voor-Christelike Rome onder die Juliaanse kalender was die dag gewy aan die god Janus, die god van poorte en begin, na wie ook die maand Januarie genoem is. Volgens die Gregoriaanse kalender word op 1 Januarie die Christelike Fees van die Naamgewing en die besnydenis van Jesus gevier, soos in die Anglikanisme en Lutheranisme.[1][2] Die Rooms-Katolieke Kerk herdenk op hierdie dag die Plegtigheid van Maria, die Moeder van God.
Hedendaags behoort, omdat die meeste lande die Gregoriaanse kalender as hul kalender gebruik, Nuwejaarsdag tot die mees gevierde openbare vakansiedae wêreldwyd, dikwels met vuurwerke op middernag om die nuwe jaar te verwelkom. Ander tradisionele gewoontes sluit in Nuwejaarsvoorneme en bel vir vriende en familie.[3]
Beide die Anglikaanse Gemeenskap en die Lutheraanse Kerk vier die Fees van die Besnydenis van Jesus op 1 Januarie, volgens die aanname dat Jesus op 25 Januarie gebore en volgens die Joodse tradisie agt dae (1 Januarie) na sy geboorte besny is. Die Rooms-Katolieke Kerk vier op 1 Januarie die Plegtigheid van Maria, die Moeder van God, wat ook 'n Heilige Dag van Verpligting is. In die Verenigde State is Nuwejaarsdag 'n postale vakansiedag.[4]
In sport
[wysig | wysig bron]Beide die Melbourne-krieketveld in Melbourne en Nuwelandstadion in Kaapstad is bekend vir hul tradisionele toetskrieketwedstryde rondom Nuwejaarsdag. Op Garmisch-Partenkirchen, Duitsland, se Groot Olimpiaskans word die tradisionele "Nuwejaarsskansspring" gehou, dit behoort tot die "Vierskanstoernooi" wat tussen Kersfees en Driekoningedag aangebied word.
Sien ook
[wysig | wysig bron]- 1 Januarie, eerste dag van jaar.
- 31 Desember, laaste dag van jaar.
- Chinese Nuwejaar
- Nouruz, Persiese Nuwejaarsfees
- Oujaarsaand, die vorige dag.
- Roosj Hasjana, Joodse Nuwejaarsfees
- Lys van openbare vakansiedae in Suid-Afrika
Verwysings
[wysig | wysig bron]- ↑ (en) McKim, Donald K. (1996). Dictionary of Theological Terms. Westminster John Knox Press. p. 51. ISBN 978-0-664-25511-4.
- ↑ (en) Hobart, John Henry (1840). A Companion for the festivals and fasts of the Protestant Episcopal Church. Stanford & Co. p. 284.
- ↑ (en) Mehra, Komal (2006). Festivals Of The World. Sterling Publishers. p. 69. ISBN 978-1-84557-574-8.
- ↑ (en) "2011-federal-holidays". Geargiveer vanaf die oorspronklike op 21 Februarie 2012. Besoek op 14 Desember 2022.
Eksterne skakels
[wysig | wysig bron]Wikimedia Commons het meer media in die kategorie Nuwejaarsdag.
Wikiwoordeboek het 'n inskrywing vir Nuwejaarsdag.
- (en) "New Year's Day". Catholic Encyclopædia. Besoek op 14 Desember 2022.
- (en) "New Year festival". Encyclopædia Britannica. Besoek op 14 Desember 2022.
