白粥

白粥係冇加入任何其他食材嘅廣東粥，（有啲食肆會叫齋粥、米皇或靚女）。優質嘅白粥，用絲苗白米明火煮幾個鐘頭而成，講求軟、綿、滑。通常白粥都係冇味，食嗰陣可以加啲食鹽調味。部分食肆會用上湯煲粥（上湯通常用大地魚之類熬成），因此嗰啲食肆嘅「白粥」食起嚟嘅味道亦會比較濃。

煮白粥嘅時候，有啲人亦會加入腐竹、白果等嚟調味。

白粥配油炸鬼係傳統嘅廣東早餐。白粥有下火、清熱氣作用，啱捱夜人士食。白粥容易入口，所以有病嗰陣，無胃口，可以食白粥代替正餐。不過糖尿病患者食粥就要小心，因為食完血糖會升得好快。