癮

  想搵第二個意思嘅話，請睇癮 (搞清楚)。

癮（addiction）即係心思思好想再做返嗰樣嘢，好似有人迫噉，再做返會開心，但係好難戒，如果夾硬戒就會悶或者唔舒服，就算戒咗做嗰樣，心癮都重喺度。精神學上係叫依賴症。例子有食煙、賭錢、打機、手淫、唱歌。有啲癮係有藥物成份，例如毒品同煙仔，就係令個腦有快感。

醫學上稱癮，係偏重於藥理之上。戒藥癮有啲會有好強烈嘅身體反應。

有多個犒賞系統（reward system）嘅腦區都俾人指同上癮有關係：

• 腹側被蓋區（VTA）：VTA 負責透過中腦邊緣通道等嘅管道射多巴胺（dopamine）訊號，話俾犒賞系統嘅其餘部份知「有犒賞出現」，而常見嘅毒品差唔多冚唪唥都會一吸就提升中腦邊緣通道嘅多巴胺濃度（令到毒品有可能帶嚟快感）^[1]；
• 伏隔核（NAc）：NAc 會由 VTA 嗰度收輸入，而 NAc 會幫手習得行為同埋引起學咗嘅行為，而研究發現，隨住一個人吸毒吸到愈嚟愈上癮，佢嘅 NAc 會對佢吸嗰隻毒品愈嚟愈敏感，對嗰隻毒品有愈嚟愈勁嘅反應（可能搞到個人吓吓都一見到隻毒品就做「去吸」呢樣通過操作制約學返嚟嘅行為）^[2]；
• 前額皮層，包括埋扣帶皮層前部同眶額皮質：呢啲腦區都識得由中腦邊緣通道嗰度接收訊號；除咗掌管（會幫個人抵抗毒品嘅誘惑嘅）自控能力之外，前額皮層嘅結構仲會幫手產生環境提示（environment cue）同吸毒行為之間嘅連繫^[3]－例如家陣個人有好幾次都係一去到酒吧就吸毒，前額皮層會幫手令佢將「酒吧嘅環境」（環境提示）同「又夠鐘吸毒」（行為）聯想埋一齊，搞到佢次次一去到酒吧就有股癮想去吸毒，而研究指呢種環境提示同行為之間嘅連繫係吸毒上癮嘅主因之一，仲可以搞到一個人喺戒咗毒多耐之後先至毒癮返發，例：明明戒咗毒成幾年咁耐，但一返去第一次接觸毒品嗰間酒吧就毒癮返發^[4]。

• 強迫症
• 快感
• 毒品
• 賭錢
• 酗酒
• 性成癮

維基同享有多媒體嘅嘢：
Addictions

• Laterality of Brain Activation for Risk Factors of Addiction
• Kyoto Encyclopedia of Genes and Genomes (KEGG) signal transduction pathways:
  • KEGG – human alcohol addiction.
  • KEGG – human amphetamine addiction.
  • KEGG – human cocaine addiction.