Grace Murray Hopper

Anformàtica. Grace Murray Hopper a l'ha contribuì al passage dai sistema ëd programassion an lengage d'angign ai compilator e ai lengage bel fé a dovré.

Grace Hopper a l'era nàita a New York dël 1906. A l'é laureasse an matemàtica e fìsica ant ël 1928 e a l'ha pijà ël dotorà an matemàtica aplicà dël 1934.

Passà un perìod tanme professor associà a l'Università ëd Vassar, dël 1943 a l'é ufrisse ëd travajé al sènter ëd càlcol ëd la marin-a militar merican-a. A l'ha travajà për la marin-a fin-a al 1986 e a l'ha otnù ël tìtol d'amiraj e peui col ëd contramiraj.

Dal 1946 a l'é intrà a fé part ëd l'echip técnica ch'a l'ha progetà j'ordinator ëd la serie Mark (I, II e III) a l'Università ëd Harvard; peui a l'ha travajà tanme consulenta a la Eckert-Mauchly Computer Corporation, a la Remington Rand e për finì a la Sperry Corporation. Finì 'd travajé për l'esèrcit, dal 1986 al 1990 a l'é stàita consulenta a la Digital Equipment Corporation.

A l'é mòrta dël 1992.

Dël 1969, Grace Hopper a l'ha otnù l'Arconossiment d'òm ëd l'ann për ël process dij dàit; dël 1973 a l'é stàita la prima a ven-e Amis distint ëd la British Computer Society.
A chila a l'é dedicà la Grace Hopper celebration of women in computing, dont la prima edission a l'é stàita dël 1994.

La paròla bigat ch'as deuvra an anformàtica a ven da n'episòdi ancapità dël 1954, cand Hopper a l'avìa trovà për da bon na bòja ant ij sircùit dël Mark II, lòn ch'a l'avìa provocà dij problema ëd fonsionament al sistema.