Ley

Ley (den Latin: lex, legis) of lèi (na Corsou of Boneiro) of tambe yama legislacion of edicto, ta regla di derecho skirbi. Cada ley ta parti di e derecho, pero derecho ta mas amplio cu un solo ley. Tambe huridiccion (hurisprudencia), doctrina huridico y derecho comun tambe ta fuente legal.

Ley ta un proceso of un producto di inscribi, determina of promulga ley pa un legislado, parlamento of organo di gobierno analogo.^[1] Prome cu articulo di ley bira un ley, e ta ser referi prome como proyecto di ley of proposicion di ley mientras ta considera pa distingui di otro asunto. Ley por tin diferente meta: regula, autorisa, ilegalisa, proporciona fondo, sanciona, otorga, declara of restringi. Nan por tin discrepancia cu un ley no-legislativo traha pa un organo ehecutivo of organo administrativo bou di e poder di un acto legislativo.

Legislacion ta rekeri pa traha of cambia un proyecto di ley identifica un tema concreto di un manera integral. E redactor di ley y dirigente politico mester tene cuenta cu e miho manera posibel pa aborda e area problematico. E posibel solucion den un proyecto di ley ta entre otro implementa sancion, atende comportacion indirecto y autorisa accion di instancia.^[2]

Ley ta wordo considera como un di e tres funcion principal di gobierno cual hopi biaha ta wordo diferencia bou di e doctrina di separacion di poder. Esnan cu tin e autoridad formal pa crea ley ta yama legislado; e poder legislativo (huridiccion) ta interpreta e ley y e poder ehecutivo di gobierno por actua solamente denter di e autorisacion y e limite cu ta estableci pa ley. Esaki ta un instrumento caminda e autorisacion fundamental ta stipula. Sinembargo tin situacion caminda e ley ta wordo promulga pa otro medio ora ta stipula derecho constitucional manera referenda y reunion/convencion constitucional. E termino 'legislacion' ta uza pa describi situacion asina, pero tin biaha ta uza pa distingui e actonan di e poder legislativo di otro forma legislativo aki.

E termino general pa ley por tin dos nificacion:

• ley den sentido formal

E ta un decision hunto tuma y anuncia publicamente di acuerdo cu e procedura stipula pa e organo competente cu ta e legislado.

• ley den sentido material

E ta un instruccion general obligatorio pa suheto huridico y ta aplicabel pa un unidad teritorial specifico.

Leynan por ta tanto material como formal, pero hopi biaha no ta asina. E distincion ta dobel. Un ehempel di esaki ta e principio di teritorialidad cu su competencia asocia. E ta un decision tuma den e sentido di ley formal y ta alabes un ley material cu ta conta pa hende como instruccion general. Aunke e diferencia aki ta parece basta teoretico, toch tin diferencia cla den bida diario.

E derecho penal ta un ley den sentido formal y tambe como un ley den sentido material. E ley ta traha y anuncia publicamente pa e legislado formal y ta contene instruccion cu ta conta entre otro pa tur hende cu ta encontra dentro di e teritorio.^[3]

Un otro ehempel cu ta ilustra un distincion entre ley formal y ley material cu ta aplicabel na Hulanda, Belgica y tambe na Aruba, Corsou y Sint-Maarten ta ley tocante consentimento pa casa cu un miembro di Cas Real Hulandes. Parlamento ta dicidi encuanto e cuestion aki y ta tuma un decision door di bin cu un ley cu ta wordo anuncia publicamente pa e minister di asunto exterior. Esaki ta un ley formal, y no ley material, pasobra e no ta aplicabel pa tur hende. Un decreto administrativo general ta un regla imponi pa gobierno sin cooperacion di parlamento, pues esaki no ta un ley den sentido formal. Si esaki ta ley general vincula e ora e por ta un ley den sentido formal.

E termino ley na e islanan di Aruba, Corsou y Sint-Maarten ta yama en realidad ordenansa nacional (landsverordening). Un ordenansa nacional ta un ley cu ta wordo traha hunto cu gobierno y parlamento. Un ordenansa nacional tin e mesun forsa como ley den sentido formal na Hulanda.^[4]

E legislado formal ta e organo competente cu por redacta y aproba ley, tambe ora otro organo cu mester actua den e notificacion. E poder pa stipula ley den sentido material ta semper deriva di un ley di sentido formal.

• Na Hulanda e legislado formal ta componi di gobierno (gobierno ta wordo forma pa e rey y e ministernan, mira articulo 43 di e Constitucion Hulandes) y pa Parlamento-General (Camara di Representante y Prome Camara di Parlamento-General) di acuerdo cu articulo 81 di Constitucion Hulandes. Ambos camara di Parlamento-General ta aproba e ley y despues e ta wordo ratifica pa e rey y ta wordo anuncia publicamente.

• Na Aruba, Corsou y Sint-Maarten e legislado formal ta casi igual di Hulanda, menos cu e rey no ta ratifica e ordenansa nacional sino su representante cu ta e gobernador. Ademas na e islanan conoce un solo parlamento y no dos diferente manera Hulanda tin.

• Na Belgica, e legislado formal (federal) ta e rey, e Camara di Representante y e Senado (segun articulo 36 di Constitucion Belgico). E Parlamento Federal (e Camara di Representante y e Senado) ta aproba ley, caminda e derecho di iniciativa ta den man di miembro di parlamento y gobierno. Pa ley ta legalmente balido, e ley tin cu wordo firma y promulga pa e rey (bou su responsabilidad di su gobierno) segun stipula pa articulo 74 cu ta trata e poder legislativo y articulo 85 cu ta trata poder di e rey di Constitucion Belgicano. E principio cu ta riba nivel federal ta aplicabel tambe riba parlamento regional y comunitario y riba autoridad local (nivel di provincia y di municipio).

E poder di traha y decreta ley den sentido formal y material ta ser otorga na un organo; e poder aki yama atribucion. Ora e poder adkiri caba ta wordo traspasa pa un otro organo (inferior) ta yama esaki delegacion. E ultimo aki ta permiti solamente si e ley formal caminda a ortoga e poder legislativo ta permitie exclusivamente.

Tanto na Aruba, Corsou y Sint-Maarten como Hulanda y Belgica e constitucion ta establece cu traha ley ta un derecho prerogativo di e poder legislativo y cu e organo legislativo superior ta e parlamento. E emiti un decreto ta tarea di poder legislativo. Ainda no ta existi un unidad supranacional cu autorisacion legislativo pa paisnan rond mundo. Sinembargo Parlamento Europeo ta decreta regulacion cu un pais mester convertie den un ley nacional conforme e tratado firma pa pais cu ta forma parti di Union Europeo manera Hulanda of Belgica.^[5]

Na Aruba, Corsou y Sint-Maarten y tanbe Hulanda ta aplica e principio di separacion di poder; tin poder legislativo, poder ehecutivo y poder hudicial.

E separacion di poder:

• Poder legislativo: parlamento y gobierno (gobernador y e ministernan) (Na Hulanda: Prome Camara y Camara di Parlamento-General y gobierno (rey y e ministernan)

• Poder ehecutivo: gobierno

• Poder hudicial: hues independiente y imparcial

Un ley apropia ta establece y decreta pa un gobierno legitimo por ehempel un parlamento scogi democraticamente den un democracia parlamentario of pa un monarca absoluto den un monarkia absoluto. Un ley cu ta wordo decreta pa un gobierno ilegitimo, esey kiermen no ta den liña cu e reglanan vigente pa introduci y enmenda ley por ehempel door di violencia, revolucion etc ta un ley impropia.

E norma legal halto ta regla e procedura con un ley ta bin na existencia. Na Hulanda y Beligica esaki ta para den nan constitucion. Na Aruba, Corsou y Sint-Maarten e procedura aki ta para den e areglo di estado (staatsregeling) of constitucion.^[6] E areglo di estado ta forma e constitucion di Aruba, Corsou y Sint-Maarten. Den un estado constitucional democratico un ley ta traha door cooperacion di e poder legislativo y e poder ehecutivo. Importante ta cu ley proponi tin cu haya semper aprobacion pa e autoridad legislativo cu ta rekeri un mayoria pa hacie.

E ley aproba ta wordo anuncia publicamente pa e poder ehecutivo. Un ley ta solamente ehecutabel na momento cu ta publica den e gazeta oficial di gobierno. E principio cu cada ciudadano mester asumi di sa di ley no kiermen mester sa kico tur ta para den un ley. Simembargo esaki ta un ficcion huridico cu despues di emiti un ley cada ken ta supone di a tuma conocemento di e ley. Ignorancia di e existencia di of di e contenido di e ley no ta duna dispensacion pa violacion di e ley ey y tampoco den caso penal no por duna impunidad.

Tin biaha ley por tin norma den conflicto por ehempel ora un ley prohibi algo y un otro ley ta permitie. Tin dos posibel solucion. Den un derogacion explicito un disposicion tercero legal ta determina cua ley tin perferencia. E otro solucion ta cua ley tin preferencia a base di su orden mutuo; un ley superior di organo halto ta bay ariba di un organo inferior (regla di superioridad), un ley specifico riba un ley general y mas nobo (regla di specialidad) ta bay ariba un ley anticua (regla di posterioridad). Esaki ta yama e tres regla di conflicto.^[7]

Na Hulanda e orden aki (asina yama herarkia di norma) por uza pa aplica e regla di superioridad:

1. Tratado internacional cu tin disposicion obligatorio y decision di organisacion di derecho internacional
2. Statuto di Reino Hulandes
3. Constitucion di Hulanda
4. Ley den sentido formal
5. Decreto general administrativo
6. Decreto ministerial
7. Ordenansa provincial
8. Ordenansa municipal
9. Ordenansa di autoridad di awa y ordenansa di hunta di producto, hunta principal di empresa y di hunta industrial
10. Maneho di gobierno (hopi biaha traha a base di ley)

Na Hulanda conoce tres nivel di gobernacion: Gobierno Hulandes (nacional, gobierno na Den Haag), provincia y municipio (inclui tambe municipio di Boneiro, Sint-Eustatius y Saba). Aruba, Corsou y Sint Maarten cononce un nivel di gobernacion: pais.^[8] Un areglo inferior no mag di contra cu por ehempel e derecho fundemental cu ta para den areglo di estado of cu un tratado cu Reino Hulandes a cera cu otro pais manera Tratado di Refugiado. E areglonan di pais Aruba, Corsou y Sint Maarten ta ordena di ariba bay abou como lo siguiente:

1. Tratado internacional cu tin disposicion obligatorio y decision di organisacion di derecho internacional
2. Statuut pa Reino Hulandes
3. Constitucion di Hulanda (un parti)
4. Ley di Reino Hulandes
5. Areglo di Cooperacion di Reino Hulandes
6. Areglo di estado (constitucion)
7. Ordenansa nacional
8. Decreto nacional cu medida general
9. Decreto nacional y areglo ministerial
10. Maneho di gobierno

Den e areglo di estado of constitucion ta para tur e stapnan cu un proyecto di ordenansa nacional mester pasa prome cu al fin e bira un ordenansa nacional. Tur esaki pasobra ordenansa nacional ta trata asunto cu ta delicado.^[9]

• Riba peticion di un minister e ambtenarnan ta traha un proyecto di ley;
• Si Conseho di Ministro bay di acuerdo, e proyecto di ley ta bai Conseho di Consulta pa conseho;
• Conseho di Consulta ta trata e proyecto di ley;
• E minister por defende su punto di bista den un rapport y por trece cambio den e proyecto di ley. E ministro ta manda e proyecto di ley pa Parlamento;
• Un comision di miembro di Parlamento ta trata e proyecto di ley. E comision ta duna nan comentario skirbi despues di cual e ministro por trece cambio atrobe den e proyecto di ley;
• Parlamento ta trata e proyecto di ley den un reunion publico caminda e ministro ta haya oportunidad pa defende su proposicion;
• Ta cera e reunion cu votacion riba e proyecto di ley cu eventual cambio;
• Gobernador ta firma e ley (e ordenansa nacional) nobo;
• Ministro di Husticia ta percura pa publica e ley den e Gazeta Oficial, pa asina tur hende por ta na altura di e ley;
• Den e ley ta stipula ki ora e ta drenta na vigor. Drentamento na vigor por sosode tambe pa medio di un decision of regulacion apart.

E procedura ta casi igual ora ta trata proyecto di ley (ordenansa nacional) cu un miembro di Parlamento ta inicia.

Banda di e ley secular tambe tin ley eclesiastico. Ley secular ta semper prevale riba esun di misa den un sociedad secular caminda e misa y estado ta separa di otro. Thomas van Aquino tabata e prome teologo cu a haci diferencia entre derecho divino (di Dios) y derecho humano denter di e poder spiritual y mundano.

Mayoria di religion ta defini nan propio ley moral. Ehempel di esaki ta:

• E dies mandamento (hudaismo, cristianismo; den otro forma tambe islam.
• E sharia (islam)
• E cinco percepcion (pa laico den budismo)
• E Vinaya (pa monha budista)

Fuente, nota i/òf referensia ↑ Mira articulo 289 inciso 3 di Tratado di Funcionamento di Union Europeo ↑ (en) APKN Legislative Handbook ↑ Mira articulo 2 di Codigo Penal di Hulanda: "E ley penal Hulandes ta aplicabel pa cada un cu ta comete un delito den Hulanda". Mira tambe articulo 2 Codigo Penal di Aruba, Corsou y Sint-Maarten. ↑ Mira articulo 41 en adelante di Statuto di Reino Hulandes ↑ (nl) Richtlijn, Europa Nu ↑ Mira articulo 42 di Statuto di Reino Hulandes ↑ F.H. Kistenkas, Problemen van regelgeving, Koninklijke Vermande, Lelystad 1994, ISBN 90 5458 091 7 ↑ https://web.archive.org/web/20211227170806/https://www.gobierno.aw/gobernacion/legislacion_41575/ ↑ https://web.archive.org/web/20211227172331/https://www.gobierno.aw/gobernacion/creacion-di-ordenansa-nacional-ley_41967/