SOMUA S35

Lo SOMUA S35 es un carri de cavalariá francés desvolopat durant leis ans 1930. Foguèt produch a 430 exemplaris entre 1935 e 1937. Participèt a la Segonda Guèrra Mondiala.

Destinat a la cavalariá, lo SOMUA S35 èra un carri fòrça modèrne a sa sortida. D'efiech, èra dotat d'un blindatge relativament espés (47 mm), d'un armament anticarri eficaç còntra la quasi totalitat dei blindats existents (un canon de 47 mm e una mitralhièra de 7,5 mm). Avián tanben una autonòmia importanta (entre 120 e 280 km). Pasmens, defaut comun a totei lei carris francés dau periòde, son equipatge èra tròp reduch amb un conductor, un operator ràdio e un cap de carri que deviá tanben assegurar lo tir au canon^[1]. De mai, l'entretença dau veïcul èra relativament costosa, çò que limitèt lo nombre d'exemplaris produchs.

Lo SOMUA S35 es sovent considerat coma lo melhor carri de la campanha de França. D'efiech, sa poissança de fuòc, son blindatge, son autonòmia e sa velocitat èran ben adaptats a la guèrra de movement menada per leis Alemands. De mai, son canon li permetiá de batre lo blindatge de totei lei carris en servici dins la Wehrmacht mentre que son blindatge èra capable d'arrestar totei leis obús anticarri alemands franc d'aquelei tirats per lei canons de 88 mm. En causa de la situacion generala de l'armada francesa en 1940, la màger part dei S35 foguèron donc abandonats per lor equipatge en causa d'una manca de carburant. Leis Alemands ne'n capturèron 297 exemplaris que foguèron principalament utilizats per l'entraïnament e la lucha còntra lei partisans. Après 1944, lei Francés recupèron quauquei S35 per equipar sei divisions blindadas encargadas d'assegurar lo sètge dei pòchis alemandas de l'Ocean Atlantic.

• (fr) Pascal Danjou, L'Automitrailleuse de Combat SOMUA S 35, Éditions du Barbotin, 2004.
• (fr) Pierre Touzin, Les véhicules blindés français, 1900-1944, EPA, 1979.

1. ↑ Pasmens, la situacion èra melhora que per d'autrei modèls de carris francés car l'operator ràdio podiá ajudar au cargament dau canon.