Venjamin Soldatenko

Venjamin Vasiljevitsj Soldatenko (fødd 4. januar 1939) er ein tidlegare friidrettsutøvar frå Sjkurovka i Kasakhstan som vart europameister 1971 og verdsmeister 1976 i 50 km kappgang. Han vann elles OL-sølv 1972, EM-sølv 1978 og EM-bronse 1969 på same distansen. Soldatenko tevla for Sovjetunionen.

Soldatenko vart tredjemann då han fekk sin internasjonale meisterskapsdebut ved EM 1969 i Aten, åtte og eit halvt minutt bak vinnaren, Christoph Höhne frå Aust-Tyskland. To år seinare vann Soldatenko den same distansen då EM 1971 fann stad i Helsinki, over to minuttar framom Höhne på sølvplassen. Under dei olympiske sommarleikane 1972 i München kom Soldatenko i mål til sølvmedalje, vel to minuttar bak vinnaren.

I 1976 fjerna Den internasjonale olympiske komiteen 50-kilometeren frå OL-programmet. Det internasjonale friidrettsforbundet valde då å arrangere eit eige verdsmeisterskap for øvinga, avvikla i Malmö i Sverige 18. september 1976. Soldatenko vann ein klar siger i tevlinga, 37 år gammal. Under europameisterskapen 1978 kompletterte han samlinga med EM-medaljar ved å vinne sølv, dermed hadde han EM-medaljar i alle valørar.

• EM 1969 i Aten: Bronsemedalje – 4.23.04
• EM 1971 i Helsinki: Gullmedalje – 4.02.22, framom Christoph Höhne (4.04.45)
• OL 1972 i München: Sølvmedalje – 3.58.24, bakom Bernd Kannenberg (3.56.11)
• EM 1974 i Roma: Nr 5 – 4.09.31
• VM 1976 i Malmö: Gullmedalje – 3.54.40, framom Enrique Vera (3.58.14)
• EM 1978 i Praha: Sølvmedalje – 3.55.12, bakom Jorge Llopart (3.53.29)