Richard E. Taylor

Richard Edward Taylor
Fødd	2. november 1929 Medicine Hat i Alberta
Død	22. februar 2018 Stanford
Nasjonalitet	Canada
Område	fysikk
Yrke	fysikar, universitetslærar
Institusjonar	Stanford University Lawrence Berkeley National Laboratory École normale supérieure
Alma mater	Stanford University of Alberta
Doktorgradsrettleiar	Robert F. Mozley
Medlem	Royal Society National Academy of Sciences Royal Society of Canada American Association for the Advancement of Science American Academy of Arts and Sciences American Physical Society

Richard E. Taylor (2. november 1929–22. februar 2018) var ein canadisk fysikar.

Taylor mottok Nobelprisen i fysikk i 1990, saman med amerikanarane Jerome I. Friedman og Henry Way Kendall, for deira banebrytande undersøkingar om sterk uelastisk spreiing av elektron mot proton og bundne nøytron, som spelte ei avgjerande rolle i utviklinga av kvarkmodellen innan partikkelfysikken.

Forskinga som førte til Nobelprisen vart i fellesskap utført ved Stanford Linear Accelerator Center (SLAC) ved Stanford i California. Fleire eksperiment mellom 1967 og 1973 brukte dei partikkelakseleratorar for å rette ein stråle av elektron med høg energi mot proton og nøytron. Dei fann at den måten elektrona vert spreidd på ved kollisjonane indikerte at både proton og nøytron består av små elektrisk ladde partiklar. Etter kvart vart det klart at desse partiklane motsvarte kvarkane som hadde blitt foreslått av Murray Gell-Mann og George Zweig i 1964.

Taylor tok doktorgrad ved Stanford University i 1962, og fram til 1968 inngjekk han i forskarlaget ved Stanford Linear Accelerator Center. Han vart professor ved Stanford i 1970.