Mark Kirchner

Mark Kirchner (fødd 4. april 1970) er ein tysk tidlegare skiskyttar og langrennar frå Neuhaus am Rennweg i Thüringen. Han har vunne fire individuelle VM-gull og eitt individuelt OL-gull, tre VM-gull i stafett og lagtevlingar, samt eitt OL-gull i stafett. I alt vann han 14 VM- og Ol-medaljar.

Kirchner vart juniormeister individuelt allereie i 1988. To år seinare, før han var ute av junioralderen, vart han verdsmeister på 10 km under verdsmeisterskapen i skiskyting 1990 i Oslo. I same meisterskapen tok han ein gullmedalje i lagøvinga med DDR-mannskapen. Året etter sigra Kirchner i alle tre tevlingane under VM 1991 i Lahti.

Kirchner tok også medaljar i samtlege tre øvingar under vinter-OL 1992 i Albertville. Han vann gullmedaljen på 10 km og på stafetten gjekk han for det tyske vinnarlaget, dessutan tok han sølv på 20 km. I 1993 vann han 10-kilometeren i fjerde meisterskapen på rad. Under OL på Lillehammer i 1994 deltok Kirchner på det vinnande tyske stafettlaget, sameleis i VM 1995. Men korkje i 1994 eller -95 nådde han opp i medaljestriden i dei individuelle øvingane. I 1997 tok han si 14. og siste OL- eller VM-medalje, då han deltok på Tyskland sitt lag i lagøvinga.

Kirchner vann fem individuelle renn i verdscupen i skiskyting. Sesongane 1991 og 1993 kom han på andreplass i verdscup-turneringa, bakom høvesvis Sergej Tsjepikov og Mikael Löfgren.

• VM i skiskyting 1990 i Oslo: Gullmedalje på 10 km og i lagøvinga
• VM i skiskyting 1990 i Kontiolax: Bronsemedalje i stafett
• VM i skiskyting 1991 i Lahtis: Gullmedalje både på 10 km, 20 km og i stafett
• Vinter-OL 1992 i Albertville: Gullmedalje både på 10 km og i stafett, sølvmedalje på 20 km
• VM i skiskyting 1993 i Borovets: Gullmedalje på 10 km, bronsemedalje i stafett
• Vinter-OL 1994 på Lillehammer: Gullmedalje i stafett, nr 7 på 20 km
• VM i skiskyting 1995 i Antholz: Gullmedalje i stafett, nr 15 på 20 km
• VM i skiskyting 1997 i Osrblie: Sølvmedalje i lagøvinga

Kirchner deltok i langrenn i eit par sesongar etter han slutta å satse på skiskyting. Mellom anna gjekk han sisteetappen for Tyskland på 4 x 10 km stafett under Ski-VM 1999 i Ramsau, og kom på fjerdeplass.

• Sportsboken, aktuelle årgangar

Commons har multimedium som gjeld: Mark Kirchner

• «Mark Kirchner» (på engelsk). olympedia.org. Henta 11. februar 2023.