Billy Sherwood

Billy Sherwood
Billy Sherwood i 1998
Fødd	14. mars 1965 (59 år)
Fødestad	Las Vegas
Fødenamn	William Wyman Sherwood
Opphav	Las Vegas, Nevada
Aktiv	1980 til i dag
Sjanger	Progressiv rock
Instrument	Gitar, tangentinstrument, vokal
Tilknytte artistar	Lodgic Yes Toto Circa Yoso
Plateselskap	Frontiers Records
Verka som	Lydteknikar, produsent, låtskrivar, gitarist

William «Billy» Wyman Sherwood (fødd 14. mars 1965) er ein multi-instrumentmusikar, produsent og lydteknikar frå USA. Han er mest kjend for tida si som medlem av progressiv rock-bandet Yes og for arbeidet sitt som produsent for ei rekkje kjende grupper og artistar som til dømes Yes, Motorhead og Toto.

Han vart først kjend som bassist og vokalist i bandet Lodgic, der han spelte saman med broren sin Michael. Dei gav ut éit album i 1985 kalla Nomadic Sands. Seinare starta Billy bandet World Trade som gav ut albumet med same namn i 1989. Han vart no kjend med Chris Squire frå Yes, og vart invitert til å spele saman med bandet. Jon Anderson og Trevor Rabin hadde på dette tidspunktet forlate Yes, og bandet trong ein gitarist og vokalist. Planen var at multi-instrumentale Sherwood skulle fylle begge rollene. Men så kom Rabin tilbake, og samstundes var samanslåinga mellom Yes og Anderson Bruford Wakeman Howe på trappene. Sherwood var med i avgrensa grad på det påfølgjande albumet Union, men han heldt kontakten med Squire.

Sherwood vart kontakta av Chris Squire eit par år seinare, då Yes-bassisten hadde starta prosjektet Chris Squire Experiment. Dei skreiv nokre låtar saman og spelte inn nokre demoar, men dette vart ikkje utgjeve før i 1997. I 1994 var han med som ekstra musikar då Yes turnerte etter utgjevinga av albumet Talk.

Etter turneen med Yes, starta han opp World Trade igjen, og gav ut albumet Euphoria i 1995, før han var med som produsent for Yes i 1996 og 1997 på studio-låtane på utgjevingane Keys to Ascension og Keys to Ascension 2.

Etter desse utgjevingane forlét Rick Wakeman Yes og bandet trong ein ny keyboardist, og Sherwood var førstevalet som erstattar. Samstundes freista han å spele inn nytt material med World Trade, men det viste seg håplaust, og bandet vart oppløyst. Mykje av dette materialet dukka opp på soloalbumet The Big Peace som vart utgjeve i 1999.

Som nytt medlem i Yes var han med som klaverspelar og gitarist på det nye albumet Open Your Eyes i 1997. Yes ville ha ein klassisk skolert klaverspelar, og fekk inn Igor Khorosjov. Sherwood fortsette i bandet, men no som andregitaristen og korist. Han var med på ein kort turné, så gjekk Sherwood og Yes inn i studio for å spele inn albumet The Ladder som vart utgjeve i 1999. Etter den påfølgjande turneen vart det annonsert at Sherwood ikkje lenger var medlem av Yes.

Seinare jobba han saman med Chris Squire for å ferdigstille Chris Squire Experiment-albumet Conspiracy i 1999. I 2003 spelte han inn albumet The Unknown med bandet Conspiracy med Chris Squire på bass. Soloalbumet At the Speed of Life vart utgjeve i 2008, og Sherwood er òg medlem av bandet Circa: saman med Jay Schellen, Tony Kaye og Jimmy Haun. Bandet har per 2009 gjeve ut to album.

Han spelar òg i bandet Yoso saman med Kaye og tidlegare vokalist i Toto, Bobby Kimball. Yoso gav i 2010 ut albumet Elements, og har fått med seg Scott Connor på trommar og gitaristen Johnny Bruhns. Under turneen til bandet sommaren 2010 spelte bandet gamle Yes- og Toto-låtar i tillegg til songar frå sitt eige album.

• Offisielt nettsted
• Billy Sherwood på MySpace
• Billy Sherwood diskografi
• Fanside Arkivert 2008-05-09 ved Wayback Machine.