Sex

Sex is dat, wenn twee oder mehr Minschen gemeensam körperliche Handlungen utföhrt, de de Geslechtsdelen involveert. Sex, oder bi Deerten meist Poorung nöömt, twischen Mann un Fro oder Heken un Seken deent dat Foortplanten, dat Kinner- oder Jungekriegen. Bi’n Minsch is de Sex faken vun dat Foortplanten afkoppelt. De Minsch maakt dat mehrsttiets för’n Spaaß. Denn bi den Sex schütt de Körper Glückshormone ut. Dat hett de Evolutschoon so inricht, vun wegen dat de Organismen sik beter foortplanten doot, wenn se an’t Nawuss kriegen Spaaß hebbt.

Bi’n Minsch gifft dat ditwegen ok vele Speeloorden vun Sex, bi de de Minsch sik gor nich foortplanten kann.

Wenn Mann un Fro sik eenig sünd, dat se Sex hebben wüllt, denn geiht dat ganze faken mit en Vörspeel loos. Dat is allens sowat as Küssen, Striekeln, Kuscheln, wat noch keen Sex is. För’n Sex schall de Penis vun’n Mann hart wesen, de Körper mutt dor bannig veel Blood rinpumpen. Dat dat passeert, mutt he eerstmaal en beten erregt wesen. Dor is dat Vörspeel ok för. Bi de Fro warrt dör de Erregung de Vulva un Vagina fuchtig. Wenn dat denn sowiet is, denn stickt de Mann sien hart Penis bi de Fro in de Vagina. Denn bewegt he em vör un trüch. Dör dat Rieven warrt de Nervenennen in Penis un Vagina reizt un bi Mann un Fro schütt de Körper Hormone ut. Wenn dat mit de Hormone jümmer mehr warrt, denn kummt irgendwann de Orgasmus. De Orgasmus is mit en dull Glücksgeföhl verbunnen. Bi den Mann sprütt denn dat Spermien, dat in de Klöten produzeert warrt, ut’n Penis rut. Disse Spermien kamt nu in de Vagina. Dor maakt se sik denn op’n Padd in de Boormudder un wenn dor graad en Eizell binnen is, denn vereent sik de Saatzell, de toeerst dor is, mit disse Eizell un binnen negen Maanden kann dor en lütt Baby rutkamen.

Bi’n Analsex löppt dat en beten anners. Dor stickt de Mann sien Penis nich in de Vagina, he stickt em bi de Fro oder bi en annern Mann in’t Oorslock. Bi’n Oralsex nimmt de een den Penis vun’n annern in’n Mund un lutscht dor an oder lickt an de Puus vun en Fro. Dat gifft ok noch en ganz Reeg annere Methoden, woans de Geslechtsdelen reizt warrn köönt. All disse annern Formen sünd rein för’n Spaaß an Sex, de bioloogsche Zweck, Kinner to kriegen, geiht bi disse Formen verloren.

Dat gifft verschedene sexuelle Orientierungen. ’Keen Sex mit een Minsch vun dat annere Geslecht hett, de warrt heterosexuell nöömt. Minschen, de sexuell op Lüüd vun dat sülve Geslecht orienteert sünd, warrt homosexuell nöömt. Wenn een sexuell an beid Geslechter intresseert is, denn is he bisexuell, is de Person nich an Froonslüüd un nich an Mannslüüd intresseert, denn is se asexuell. Blangen de Orientierungen op Geslechter gifft dat noch Orientierungen op bestimmte Objekte oder sexuelle Speeloorden. Dat sünd Fetischismen, wenn to’n Bispeel en Minsch Fööt oder bestimmte Klamotten afsünnerlich sexuell erregend finnt.

Normalerwies warrt Sex vun Mann un Fro maakt, wenn de sik geern hebbt. Bi de Moral gifft dat aver ganz verschedene Ansichten in verschedene Kulturen oder ok binnen de Sellschop. De mehrsten Kulturen, de de Entwicklungen in de westliche Sellschop in de lesten poor Johrhunnerten, de dorto bidragen hebbt, dat in Europa un Noordamerika de Sexualmoral lockert oder tominnst Privatsaak is, nich mitmaakt hebbt, hebbt faste Regeln, wat Sex angeiht. ’Keen sik an disse Regeln nich hollen wull, de müss dor mit reken, dat he sien Status in de Sellschop verlieren dee. Faken weer de Norm, dat een Mann un ene Fro heiraden doot (Monogamie) un eerst na de Heiraat Sex hebben dröfft. Annerwegens geev dat ok vele Kulturen, bi de een Mann mehr Froon heiraden dröff (Polygamie). Dat de Fro mehr as een Mann heiraden dröff, weer ganz roor. Dat weer aver meist jümmer so begäng, dat Sex eerst okay weer, wenn se sik verspreken deen.

De Kultur in’t Avendland hett disse Regel afleggt. Sex vör dat Heiraden is begäng. Dör de opkamenen Methoden, dat swanger warrn to verhinnern (Kondome, de Antibaby-Pill etc.) is ok de Gefohr lütter worrn, dat de Fro swanger warrt. Vördem weer de Dreevkraft achter de Sexualmoral dat Problem, dat de Fro jümmer dat ökonoomsche Risiko harr, swanger to warrn. Se müss jümmer oppassen, dat se nich mit den verkehrten Mann Sex harr, dat se villicht naher alleen mit en Kind is. As dit Risiko wegfüll oder tominnst ringer worrn is, de Fro kunn jo nu planen, dor weer ok en Sexualmoral mööglich, de mehr toleet.

Ene Sünnerform is de Prostitutschoon. De Fro (oder weniger faken de Mann) kriggt Geld dorför, dat anner Lüüd mit ehr Sex hebben dröfft. Dit Gewarv weer aver to meist all Tieden nich good ansehn, aver tominnst faken geduldet.

Intress för un de Fähigkeit to reproduktiv Sex fangt in’e Pubertät an. De liggt so wat groff bi en Öller vun 12 bet 16 Johr. Dat hingt aver ganz dull vun Geslecht, Afstammung un Ernährung af un de Tiet kann stark varieren. Bet to’n eersten Sex duurt dat denn noch meist en beten, de Dörsnitt liggt bi üm un bi 16 Johr.

In Düütschland is Sex mit Kinners ünner 14 Johr na § 176 StGB (Sexuell Missbruuk vun Kinner) verbaden. § 182 StGB regelt den Sexuellen Missbruuk vun Jugendliche. Dat is denn de Fall, wenn de een öller as 18 Johr is un de annere 14 oder 15 Johr is un de öllere de jüngere Person ehr Unerfohrenheit utnütt. Alle annern Konstellatschonen sünd verlööft.

In vele Länners gellt ok annere Schuulöllers bi gliekgeslechtlichen Sex. In Düütschland worr dat Schuulöller för de Homosexuellen eerst 1994 an dat Öller vun de Heterosexuellen angleken.

Sex. Mehr Biller, Videos oder Audiodateien to’t Thema gifft dat bi Wikimedia Commons.