Johann Philipp Adolph Schönian
Johann Philipp Adolph Schönian (* 10. September 1814 in Clausthal; † 11. Februar 1886 in Hannover) weer en düütschen Verwaltungsbeamten.
Schönian is 1814 in Clausthal boren. Von’n 23. April 1830 bet to’n 28. Februar 1833 weer he op de Kloosterschool Ilfeld. He hett denn an de Universitäten Göttingen un Heidelbarg Juristeree studeert.
He is 1839 Auditer in dat Amt Rodenborg ween, 1840 in dat Amt Ahlden, 1841 in dat Amt Niestadt un 1842 wedder in dat Amt Ahlden. Von 1843 bet 1846 weer he Amtsassesser in dat Amt Wenngessen un hett 1847 bet 1851 bi de Landdrostie Stood arbeidt. 1851 is he Gehemen Regerungsraad worrn un is 1856 as Amtmann von dat Amt Dustadt insett worrn. Schönian weer von’n 1. Oktober 1857 bet 1869 as Amtmann in dat Amt Leh un harr den Rang von en Regerungsraad. As Amtmann hett he ünner annern Reisen na England un Holland maakt, üm sik dor Havens antokieken, denn in dat Amt Leh is in disse Tied de Haven Geestmünn nee anleggt worrn. Schönian hett dorbi ünner annern de Verhandlungen mit Bremen un Ollnborg föhrt. Nadem Prüßen 1867 dat Königriek Hannover annekteert hett, hett Schönian sien Amt Amtshauptmann heten.
In’n Winter 1864/1865 hett Schönian de öösterrieksche Kriegsflott in Empfang nahmen, de vör de Küst ankert hett. 1867 is he Kreishauptmann von’n Kreis Leh worrn, wat he bet 1869 bleven is.
1869 is he Böverregerungsraad worrn un weer denn för dat Binnenafdeel in Königsbarg tostännig.
