In Bruges

In Bruges (op platt so veel as „In Brügge“; dt. Titel: Brügge sehen… und sterben?) is de Titel vun en Filmdrama ut dat Johr 2008, dat Elementen vun Action un Tragikummedie bargt. De Hööftrullen speelt Colin Farrell un Brendan Gleeson. Speelbaas weer Martin McDonagh, de ok dat Dreihbook schreven hett. De Film speelt in de Binnenstadt vun Brügge mit ehr Hüüs ut dat Middelöller.

Kort vör Wiehnachten warrt de beiden irischen Opdragsmöörders Ray un Ken vun jemehrn Baas Harry vun London na Brügge schickt. Nadem se en Anslag maakt hett, schüllt se dor för en Tiet ünnerduken. In de Stadt is för jem en Dubbelkamer in en lütte Pension reserveert, woneem se nu op en Anroop vun Harry töven schüllt. Wiels Ray vun Anfang an nix mit de Lüttstadt antofangen weet, sik langewielt un anfreten is, versöcht Ken dat Beste ut de Situatschoon to maken. Üm sik de Tiet to verdrieven kiekt se sik also de Ooltstadt vun Brügge an un Ken is vun de Stadt un ehr Historie jpümmer mehr andoon. De junge Ray hett bito sien Lasten mit Schuldgeföhlen, vunwegen dat sien eersten Opdragsmoord vun Harry in de Büx gahn is. Blangen den Paster, den he an de Siet maken schüll, hett he ut Versehn ok en lütten Jungen doodschaten, de achter den Paster to’n Beden setten hett.

In de Stadt warrt to de Tiet jüst en Film dreiht. Dorbi dröpt Ray de inheemsche Chloë, de em ehr Visitenkoort dorlett. As sik de beiden to’n eersten mol in en Restaurant drapt, muckeert sik en kanaadsch Touristenpoor, dat Chloë mit Afsicht ehrn Zigarettenrook na jem röverblaast. Ray is foorts in de Brass un sleiht den Kerl un sien Fro daal. He geiht na den Twüschenfall mit na Chloë in ehr Wahnung, woneem se sik neger kamt. Dat stellt sik rut, dat Chloë mit Drogen hanneln deit un butendem tosamen mit ehrn Ex-Fründ Eirik Touristen utroovt.

Intwüschen warrt Ken vun Harry anropen, de as Choleriker bekannt is un bannig Weert op Prinzipien leggt. De Moord an den Jungen dör Ray verstött gegen den Ehrenkodex vun Harry, wat he Ray nich vergeven kann. Dorüm gifft he Ken nu den Opdrag, Ray dorför an de Siet to maken. Ray un Ken drapt sik den Avend in en Bar, woneem se den lüttwossen US-amerikaansch Schauspeler Jimmy drapt, de ok wegen de Dreiharbeitenin de Stadt is. Gemeensom verleevt se den Avend mit twee Horen un de Drogen, de Ray mitbröcht hett.

As Ken den nächsten Dag sien Partner in’n Koningin-Astrid-Park ümbringen will, warrt he Gewohr, dat de sik jüst sülvst en Pistool an’n Kopp holen deit un sik sülvst ümbringen will. Ken hinnert em doran un sett em lever in den nächsten Tog. Dorna schickt he en Beircht an Harry un nvertellt em, wat he doon hett. De is natürlich dull un reist nu sülvst ok na Brügge, üm de Saak sülvst in de Hand to nehmen.

Ray warrt intwüschen in’n Tog vun de Polizei fastnahmen un torüch na Brügge bröcht. He kummt aver wedder free, as Chloë för em en Kautschoon achterleggt. Harry is intwüschen in de Stadt ankamen un hett Kuntakt to Ken opnahmen. An’n Avend stiegt se beide den hogen Toorn vun’n Belfried hooch, woneem se sik to en Duell mit Pistolen stellen wüllt. Ken verkloort Harry sien Loyalität un sogor sien Leev för Harry un seggt em, dat he jede Straaf vun en annehmen, man nich gegen em kämpen wull. Harry schütt em dorophen in’t Been un stütt em aver op’n Weg na ünnen. As Eirik aver Ray opdecken deit neiht de de Trepp hooch un vertellt dat Harry. De is foort in de Brass un besehrt Ken mit en Schööt in’n Hals un löpt na ünnen, üm nu Ray an de Siet to maken.

Ken sleept sik mit letzte Knööv torüch op’n Toorn un springt vun dor rünner. Noch vördem he doodblifft, kann he Ray vertellen, dat he op Harry Acht geven schall. Ray neiht ut in’t Hotel, man Harry is em op de Spoor. Buten schütt he op Ray un besehrt em. Jüst op den Filmset warrt Ray vun Harry stellt, de wieter op em scheten deit. Dorbi dröpt nu aver Harry ut Versehn den lüttwossen Jimmy in’n Kopp, de för sien Filmrull de Uniform vun en Schooljungen driggt. Dör de Dum-Dum-Munitschoon is Jimmy sien Gesicht kuum mehr to kennen, so dat Harry glöövt ok en Kind ümbröcht to hebben. Na sien egen Prinzipien sütt he sik nu in de Plicht, sik sülvst to richten un stickt sik de Pistool in’n Hals. Ray kummt swoor besehrt in en Krankenwagen. De Film geiht to Enn mit Ray sien Wöör, dat he sik so wünscht harr, nicht doodtogahn. Wat he överleevt oder nich, blifft apen.

• Dat Lexikon vun’n internatschonalen Film schrifft vun en bannig originell vertellten un konstruerten Gangsterfilm üm dat Thema Ahr un Loyalität, de in de Form vun en swarte Kummedie dank de go’en Schauspelers un den grandiosen Dreihoort wunnerbest ünnerholen deit.^[1]

• Op filmspiegel.de schreev Rudolf Inderst, dat de Film en grootordige lütte Produkschoon weer. He stell dorbi vör allen dat Gliekgewicht twüschen de lustigen un de traagschen Phasen rut.^[2]

• In Die Tageszeitung vergleek Jan Kedves In Bruges mit Quentin Tarantino sien Pulp Fiction un fünn dorbi, dat de Minschen in dissen Film veel to normal weern un den Film de Ironie fehlen de, de Pulp Fiction utmaken de. För den Film weer dat nich goot, meen he, vunwegen dat nich veel to’n Ünnerhollen över bleev, wenn een melancholische Möörders in en malerische Kulisse to’n Nixdoon afstellt.^[3]

In Bruges is en spoodrieken Film wesen, de för tohopen föfftig Filmpriesen vörslahn worrn is, dorünner ok för den Oscar in de Kategorie Best Originaldreihbook. Ehrt worrn is de Film mit 14 Priesen, dorünner:

• 2008: de PFCS Award in de Kategorie Best Originaldreihbook för Martin McDonagh
• 2008: de PFCS Award in de Kategorie Utbrook achter de Kamera för Martin McDonagh
• 2009: de Golden Globe in de Kategorie Best Hööftdorsteller – Kummedie oder Musical för Colin Farrell
• 2009: de Golden Reel Award in de Kategorie Best Toonsnitt – Best Tooneffekten för Julian Slater u.v.a.
• 2009: de Edgar in de Kategorie Best Speelfilmdreihbook för Martin McDonagh
• 2009: de BAFTA Film Award in de Kategorie Best Originaldreihbook för Martin McDonagh
• 2009: de British Independent Film Award in de Kategorie Best Dreihbook för Martin McDonagh

För Martin McDonagh weer dat de eerste lange Speelfilm na sien Kortfilm Six Shooter. He sülvst hett dat Projekt as en wohrschienlich eenmolige Chance ansehn, sik as Speelbaas un Dreihbookschriever vun Langfilmen en Naam to maken.^[4] De Grundidee to den Film weer McDonagh kamen, as he sülvst een poor Daag in Brügge tobröcht hett. He fünn de Stadt to’n een langwielig weer aver lieker andoon vun de Bosubstanz ut dat Middelöller. För disse beiden verschedenen Indrück staht de beiden Figuren Ray un Ken: Wiel Ray sik langwielt befaat sik Ken mit de Bowarken in de Stadt^[4]

Dreiht worrn is de Film blots an Originalöörd in Brügge in de Tiet vun’n 2. Februar 2007 bit to’n 28. März 2007. De Weltpremiere weer denn an’n 17. Januar 2008 op dat Sundance Film Festival. In Düütschland weer de Film af den 15. Mai 2008 to sehn.^[5] De Produkschoon hett üm un bi schätzte 15 Millionen US-Dollar köst.^[6] Inspeelt hett de Film dorgegen weltwiet ruchweg 33 Millionen US-Dollar.

1. ↑ Filmkritik im Lexikon des Internationalen Films
2. ↑ Filmkritik vun Rudolf Inderst
3. ↑ Filmkritik vun Jan Kedves
4. ↑ ^{a b} Bonusmaterial vun de düütschen DVD: Interview mit den Speelbaas Martin McDonagh
5. ↑ Startterminen na Internet Movie Database
6. ↑ Budget na Internet Movie Database

• In Bruges in de Internet Movie Database (engelsch)
• Kritiken to’n Film op Rotten Tomatoes
• Sammelte Dagblatt-Kritiken op Metacritic.com
• offizielle düütsche Websteed