Eest

Eest
Laag	Neddersassen
Stroomsystem	Elv
Läng	44,7 km
Afströömrebeed	364,2 km²
Born	bi Ehrhoorn (op 60 m över NN)
Münn	bi Cranz in de Elv (op 0 m över NN)
Water je Sekunn	3,21 m³/s
linke Blangenströöm	Fuhlaubeek, Langeloher Beek, Glüser Beek, Duhrner Möhlenbeek, Beek, Pardelbeek, Starsbeek, Guldbeek, Vogelsanger Wettern
rechte Blangenströöm	Smookbeek, Sprötzer Beek, Kakenstörper Beek, Dreester Beek, Rollbeek, Aarbeek, Appelbeek, Mesborger Beek, Buxthuer Fleet, Viver, Weidbeek, Landwettern, Ole Hover Wettern, Moorenner Wettern
schippbor	von de Münn bet Buxthu (12,5 km)[1]
Seen	-
Havens	Buxthu

De Eest is en linken Blangenstroom von de Elv un is 44,7 km lang. Se liggt to’n gröttern Deel in Neddersassen un to’n lütten Deel in Hamborg.

De Eest hett de Watergöödklass II: beten belast^[2][3].

De Born liggt an’n Westrand von dat Naturschutzrebeed Lümbörger Heid in Ehrhoorn. Von dor flütt se över Wintemaur an de Chaussee un Wintemaur-Gäbesdörp na Noorden na Will. Dor flütt se twischen de Horborger Bargen in’n Oosten un’n Otterbarg in’n Westen dör. Stännig Water hett de Eest eerst vonaf Cordshagen. Denn löppt se wieder na Kakenstörp, Hullnst, Mesborg un Buxthu. Poor Kilometer wieder na Noordoosten geiht de Eest dör Oolland un flütt bi twee Kilometer achter de Grenz na dat Bundsland Hamborg bi Cranz in de Elv (Möhlenbarger Lock, Elvkilometer 634,4).

Vör Buxthu is de Eest en sommerkolen Heidbeek mit veel Salmoniden. In Buxthu gifft dat twee Dwarsbowarken, de Fischtreppen hebbt. In Mesborg hett de Möhl ok en Fischtrepp.

Twischen Hullnst un Mesborg warrt de Eest veel von Kanufohrers bruukt.

De Eest is von de Münn bet na dat Ünnerwater von de Slüüs (km 0,25) an’n Buxthuer Haven en Bundswaterstraat^[4] von de Klass I, op de de Seeschippfohrtsstraten-Ordnung gellt. Tostännig is dat Water- un Schippfohrtsamt Hamborg.

De Deepgang hängt stark von de Tieden af. Utbaggern deit dat Water- un Schippfohrtsamt nich mehr. Dor gifft dat to wenig Verkehr för op de Eest.

Fröher hett dat op de Eest veel Verkehr geven, besünners twischen 1910 un 1939. In Buxthu hett dat veel Industrie geven, de jemehr Woren över Water transporteert hebbt. Besünners de Woren von de Möhlen un Tegeleen, aver ok dat Aavt ut Oolland. De Stadt Buxthu weer al opminnst siet 1363 in de Hanse, siet dat 17. Johrhunnert harrn de Reeders an de Eest Hoochseeschipperee bedreven. Veel Egeners harrn jemehr Scheep glieks achter’t Wahnhuus an de Eest liggen. Ok vondaag noch gifft dat in Buxthu un ümto noch veel Reedereen, op de Eest sülvs gifft dat aver keen Göderverkehr mehr.

An de Eest geev dat fröher veel Warften, von de nu blot noch de Sietas-Warft in Ne’enfellen över is. Dor warrt vör allen lütte un middelgrote Containerscheep boot.

De eerste Fähr twischen Cranz un Blanknees op de anner Elv-Sied kummt 1301 toeerst in de Oorkunnen vör, en Lien von Buxthu na Blanknees is 1575 inricht worrn, toeerst mit Evers, von 1853 af an mit Dampscheep. To Enn von dat 19. Johrhunnert hebbt sik de Reeders tohoopslaten; toeerst ahn Naam, later as Hamborg-Blanknees-Eest-Lienen (HBEL). De Tall von Anleegsteden twischen Buxthu un Cranz weer nu op 17 wussen, alleen fiev in Eestbrügg. 1902 is de Schüffelraddamper Primus sunken, de to de Eest-Lienen hören dee. 103 Lüüd sünd dor bi doodbleven. Nadem de Nedderelvbahn un de Postbusdeenst kamen sünd, sünd de Fohrgasttallen dalgahn un 1915 hebbt se de Fohrten twischen Buxthu un Cranz instellt. 1963 hett de HADAG de HBEL övernahmen, de nu den Fährverkehr twischen Cranz un Blanknees bedrifft.

Siet dat Middelöller weer de Brügg bi Eestbrügg de eenzige Weg över den Ünnerloop von de Eest un hett Eestbrügg veel Wollstand bröcht. Fröher hett dat en Hollanner-Togbrügg geven, nu gifft dat en Dreihbrügg twischen Eestbrügg un Moorenn. 1875 hebbt se as Deel von de ne’e Schossee Stood-Francop en twete Brügg twischen Hoov un Königriek boot. De Footgänger-Rullbrügg twischen Cranz un Ne’enfellen is 1961 tohoop mit dat binnere Sperrwark boot worrn. Ok twischen Cranz un Ne’enfellen gifft dat siet 1967 800 m wieder, kort vör de Münn dat bütere Sperrwark, dat von en grote Klappbrügg överspannt warrt. Ut Rüggsicht op de Sietas-Warft hett dit Sperrwark en Breed von 40 m, wat denn ok de maximale Breed von de Scheep is, de bi Sietas boot warrn köönt.

De as Fleet utbillt Haven is de öllste Haven in Noorddüütschland, de as en Kanaal utboot is. De twete Haven is toeerst as Reed bruukt worrn, he leeg vör de ole Stadtmuur.

Nadem dat mit de Schipperee op de Eest bargdal gahn weer, hebbt se an’n Haven nich mehr veel maakt. De Haven is vör allen von Sportbööd un en poor Utfloogsscheep bruukt worrn.

De A 26, de opstunns boot warrt, schall över de Eest mit ener Flachbrügg rövergahn. Dat dee den Buxthuer Haven von’n Ünnerloop von de Eest aftrennen.

Bi’n Haven gifft dat ok en lütt Bohaven von dat Water- un Schippfohrtsamt Hamborg.

1. ↑ Längen der Hauptschifffahrtswege der Binnenwasserstraßen des Bundes, Wasser- und Schifffahrtsverwaltung des Bundes
2. ↑ Gewässergüte der Este-Süd
3. ↑ Gewässergüte der Este-Nord
4. ↑ Verzeichnis E, Lfd.Nr. 15 der Chronik, Wasser- und Schifffahrtsverwaltung des Bundes

Eest. Mehr Biller, Videos oder Audiodateien to’t Thema gifft dat bi Wikimedia Commons.

• Infos för de Schipperee op de Eest (PDF-Datei; hoochdüütsch)
• Este-Radweg (hoochdüütsch)

Koordinaten:53° 32′ N, 9° 47′ O