Containerterminal

En Containerterminal (CT) oder Containerhabens sund Seehabens oder Binnenhabens, wo sunnerlich Containers in umslahn weert. En Containerhaben hett en oder en ganze Reeg vun Terminals mit ehre Bruggen. De Habens weert vun lüttjere Tobringers (Feederscheepe), man ok vun de groten Containerscheepen anlopen. Up dat Terminal weert denn de Containers, de vun de Scheepen na den haben brocht wurrn sund, lagert un wieter transporteert, meist mit Hölp vun Iesenbahn oder Lastkraftwagens. De gröttsten Containerhabens in Düütschland sund Bremerhaben un Hamborg. Containers, mit Hölp vun Containerbruggen, umladen („umslahn“) weert twuschen Containerscheepe (ok Feederscheepe), de in'n Containerhaben ankaamt, un Landfohrtüge, as Lastkraftwagens oder Iesenbahnen, oder blot man twuschen Iesenbahnen un LKWs. Up'n Terminal weert se ok twuschenlagert, wenn dat mit de Wieterfohrt noch wat duert. Containerterminals speelt en sunnerliche Rull in de natschonalen un internatschonalen Transportkeden. Se sund de Knutten, wo de Transportwege tohopenlopen doot. To de Upgaven vun so en Terminal höört ok, datt Fracht in Containers tohopenfaat warrt un datt de Containers dor lagert un verdeelt weert.

De ganz unnerscheedliche Tied för den Transport up de Straten oder up de Scheenen un de langen Fohrtieden mit Scheepe maakt dat nödig, dat de Containers in en Terminal over de Tied hen so verdeelt un wietergeven weert, datt jummers Containers dor sund, de afhoolt weern könnt. De Containerterminals sund up düsse Aart en Pufferspieker, de dat mit sien groten Lagerplatz mööglich maakt, dat keen Stau up kummt, man ok keen Tied, wo nix los is.

So is dat nich nödig, datt de verschedenen Transport-Fohrtüge för Land- un Seeverkehr een up dat annere töven mütt. Wenn de Terminalplatz mit System bedreven warrt, denn is dat jummers in Sicht, wo de Scheepe liggen doot, wo de Containers in dat Schipp staut sund un wo se achterher hen mütt. Blots, wenn dat allens plaant is, könnt de Kraans bitieds de richtige Positschoon innehmen un de Scheepe könnt den haben slank wedder verlaten.

Just so is dat in en leifigen Bedriev kloor, datt de Töge in dat Terminal so gau, as man mööglich so vull as man mööglich laden weert. Denn sund de Schenen, wo dat ja man ok nich unbannig veel vun gifft in so'n Terminal, slank wedder free un könnt för den neegsten Transport bruukt weern.

Containerumslag in 1000 TEU^[1]

1. ↑ Hafen Hamburg Marketing e.V.

• Multimodal Verkehr
• Intermodal Verkehr