Bernd Rupp

Bernd Rupp (* 24. Februar 1942 in Burgsolms) is en ehmalger düütsch Footballspeler, de van 1965 bit 1974 in de Football-Bundsliga as Störmer bi de Vereens Borussia Mönchengladbach, Werder Bremen un 1. FC Köln all tosommen 274 Spelen maakt un dorbi 119 Doren schaaten hett.

De lütt Middelstörmer, de bi den hessischen Post-SV Phönix Kassel^[1] mit dat Footballspelen anfungen harr, is vun de "Spähern" vun den grooten Nahber KSV Hessen Kassel nich opdeckt wurrn un is later vun den FC Burgsolms (nich wiet af vun Wetzlar) över de Statschoon SV Wiesbaden nah dat Finale um de Düütsche Amateurmeesterschap in den Profifootball wesselt. He fung sien Loopbahn 1964 in de Regionalliga West ünner Trainer Hennes Weisweiler bi Borussia Mönchengladbach an. Gliek in sien eerst Saison dor steeg he in de Football-Bundsliga up. Mönchengladbach wurr in de Regionalliga West mit dat beachtlich Doorverhältnis vun 92:39 Doren Meester vör Alemannia Aachen un Fortuna Düsseldorf. Rupp hett as eenzig Gladbacher all 34 Spelen bestreeden un reck dorbi mit 24 Doren ok de meest Doren vun all Speler^[2]. In de Upstiegsrunn gegen SSV Reutlingen, Holstein Kiel un Wormatia Worms keemen noch wiedere veer Doren dorto.

In sien eersten Saison in dat düütsche Footballböverhuus, 1965/66, hett he ok all veer Spelen bestreeden un dorbi 16 Doren schaaten. Enn' Mai 1966 wurrr he in de 40er-List vun den DFB an de FIFA in' Kreis vun de Angreepspeler för de Weltmeesterschap meld, wurr aber up letzt nich mit to de Weltmeesterschap mitnommen. Nah de WM 1966 hett Bundstrainer Helmut Schön eenig nee Speler utprobeert. So keem Bernd Rupp an' 12. Oktober 1966 to sien eenzig Lännerspeel in sien Karriere gegen de Mannschap vun de Törkie. De düütsch mannschap wunn mit 2:0 un Rupp hett dat 2:0 in de 85. Minüüt schaaten. In dat glieker Lännerspeel harr ok Gerd Müller sien Natschonalmannschapsdebüt. De nahderhen spoodriekst Doorschütt vun den düütschen Football bleev in dit Speel aber ahn Spood.

1967 wessel Rupp to Werder Bremen, wo he twee Johr lang speel. 1969 keem he to'n 1. FC Köln un speel weer in dat Rhienland. To'n Afsluss vun sien Loopbahn speel he tüschen 1972 un 1974 weer bi Borussia Mönchengladbach. 1973 reck he mit de Gladbacher den gröttsten Erfolg in sien Loopbahn. He wunn dat Finale - dat as een vun de "besten, spielerisch hoch stehendsten und spannendsten in der Geschichte dieses Wettbewerbs" in de Annalen ingahn dee^[3] - in den DFB-Pokal gegen sien ehmalgen Club 1. FC Köln mit 2:1. Bernd Rupp hett all tosommen 274 Bundsliga-Spelen maakt un 119 Doren schaaten.

Rupp wurr tweemal Düütsch Viezmeester - 1968 mit SV Werder Bremen un 1974 mit Borussia Mönchengladbach. Mit den 1. FC Köln stunn he 1970 un 1971 jewiels in dat DFB-Pokalfinale. Ok in de beid UEFA-Cup Finalspelen an' 10. un 23. Mai 1973 gegen den FC Liverpool weer he för Borussia Mönchengladbach in' Insatz. Sien letzt Bundsligaspeel hett de flink un dribbelstark Störmer an' 34. Speeltag vun de Saison 1973/74 an' 18. Mai 1974, bi den 5:0-Heimsieg gegen den FC Bayern München maakt. Mit Allan Simonsen un Jupp Heynckes bill he den Dreeer-Angreep vun de Borussen, de 1974 blots een Punkt achter den Düütschen Meester bleeven.

1974 kehr he to den Hessenligisten SV Wiesbaden torüch.

• Post-SV Phönix Kassel
• FC Burgsolms
• SV Wiesbaden
• 1964 - 1967 Borussia Mönchengladbach
• 1967 - 1969 Werder Bremen
• 1969 - 1972 1. FC Köln
• 1972 - 1974 Borussia Mönchengladbach
• 1974 – ? SV Wiesbaden

• 1 Lännerspeel (1 Door) för Düütschland

• 1. Bundsliga

  119 Spelen; 50 Doren Borussia Mönchengladbach

  58 Spelen; 22 Doren Werder Bremen

  97 Spelen; 46 Doren 1. FC Köln

• DFB-Pokal

  20 Spelen; 9 Doren 1. FC Köln

• UEFA-Pokal

  14 Spelen; 3 Doren 1. FC Köln

• 1968 Düütsch Viezmeester
• 1970 DFB-Pokal-Finale
• 1971 DFB-Pokal-Finale
• 1973 UEFA-Pokal-Finale
• 1973 DFB-Pokal-Sieger
• 1974 Düütsch Viezmeester

1. ↑ Biese/Peiler: Flanken, Tore und Paraden. 100 Jahre Fußball in Kassel. Agon-Verlag, Kassel 1993, ISBN 3-928562-37-1, Siet 184
2. ↑ Merk/Schulin/Großmann: Mein Verein: Borussia Mönchengladbach. Chronik der 60er Jahre. Agon-Verlag, Kassel 2007, ISBN 978-3-89784-293-9, Siet 46
3. ↑ Weinrich/Grüne: Enzyklopädie des deutschen Ligafußballs. Deutsche Pokalgeschichte seit 1935. Agon-Verlag, Kassel 2000, ISBN 3-89784-146-0, Siet 272