Antigua un Barbuda

Vun um un bi 10.000 v. Chr. af an hefft sik Indianers vun den „Siboney“-Stamm („Steenminschen“) up de Eilannen ansiedelt. Later sünd Arawak-Indianers vun de Gemarken um den Orinoco-Stroom kamen. Bit 1200 rüm harrn se de Siboney an'e Kant schaven. Later sünd denn Kariben ut Süüdamerika kamen un hefft sik dor breet maakt. In dat Johr 1493 is Christoph Kolumbus in Antigua an Land gahn. In de Johren dornah sünd de Indianers, de dor tohuse weern, wegsleept wurrn na Hispaniola un na de annern spaanschen Kolonien. Se mössen dor as Slaven puckeln. Vunwegen düsse Arbeit, man ok vunwegen allerhand Süken is en groten Deel vun de Indianers in korte Tied ingahn. Na 1500 hefft sik Spaniers, Franzosen un Briten dor bi afwesselt un versöcht, sik up de Inseln an to siedeln, man dor is nix vun wurrn. In düsse Johren hefft sik Piraten ok geern up de Eilannen versteken.

1628 hefft de Briten Barbuda in de Hand kregen. Veer Johre later sünd brittsche Siedlers vun St. Kitts and Nevis röver kamen un hefft up Antigua leevt. Toeerst hefft se dor Tabak anplant. De eerste duerhaftige Oort up de Inseln, wo Europäers in leven döen, is Saint John's ween. 1663 sünd dor de eersten Siedlers vun England ut kamen. Ok up Barbuda hefft se sik vun 1666 af an duerhaftig dallaten.

1680 sünd grote Delen vun Barbuda Besitt vun de Familie Codrington wurrn. De hett dor ok as Zentrum för de Verwaltung den Oort anleggt, de ehren Naam driggt. Fief Johre later sünd up de Eilannen Zuckerrohr-Plantagen anleggt wurrn. De Arbeit dor is to'n groten Deel vun Slaven ut Afrika övernahmen wurrn.

 

Admiral Horatio Nelson hett up Antigua vun 1784 af an en Quartier för de brittsche Flott anleggen laten. Vunwegen, datt de Schepe in English Harbour ok bi Storm seker weern, is de Oort to'n Hööftquartier vun de Flott up de Antillen wurrn. Dormols sünd vunwegen de Flott ok de lesten Piraten utknepen.

As de Slaveree an'n 1. August 1834 mit dat Slavery Abolition Act för de meisten Länner vun dat Brittsche Empire afschafft wurrn is, güng dat mit de Plantagenweertschop nich mehr fudder. Nu keem en swaare Tied för de Inseln ehre Weertschop un dat güng eerst mol bargdal, ehr en anners Kurs anstüert wurrn is. Man eerst 1972 is de Zuckerrohr-Weertschop endgüllig upgeven wurrn.

1860 sünd Antigua un Barbuda tohopenleggt wurrn, de Naam weer nu bloß Antigua. Vere Cornwall Bird weer vun 1940 af an de Baas vun en Grupp, de na Unafhängigkeit för de Inseln streven dö. Later is he Premierminister wurrn. Al sess Johre later hett dat up Antigua en egen Parlament geven. Antigua un Barbuda sünd 1956 as en Sülvstännige Kolonie ankeken wurrn. Vun 1958 bit 1962 hefft se to de Provinz vun de Westindische Föderatschoon tohöört. 1967 sund se bitreden to de Grupp vun de Westindischen Assozieerten Staten. Dor sünd se denn in de Binnenpolitik ganz unafhängig dör wurrn. De Butenpolitik hett dormols noch Grootbritannien för de Eilannen övernahmen. In'n Mai 1968 sünd Antigua un Barbuda Liddmaat vun de Caribbean Free Trade Association (CARIFTA) wurrn. Un denn is an'n 1. November 1981 de Dag vun de Unafhängigkeit kamen.

De tein gröttsten Städer vun Antigua un Barbuda liggt all up dat Eiland Antigua. Dor hannelt sik dat um düsse Städer bi:

De grottste Oort up Barbuda is Codrington (980 Inwahners in dat Johr 2001).

Dat Eiland vun Antigua is updeelt in sess Parishes. Barbuda un Redonda sünd depedencies.

Mehr as 75% vun de Inwahners sünd Christenlüde. De gröttern christlichen Karken sünd:

• Anglikaansche Kark (32, 1%)
• Herrnhuters (12%)
• Röömsch-kathoolsche Kark (10,8%)
• Methodisten (9,1%)
• Adventisten (8,8%)
• Jehova siene Tügen (1,2%)
• Rastafari (0,8%)

• Offizielle Websteed van dat Land
• Offizielle Webstäe vun dat Ministerium vun Tourismus in Antigua un Barbuda