Veankel

Venkel (Foeniculum vulgare) is ne plante oet de skoarmbloomfamilie (Apiaceae). De plante smaakt noar anies, en wörd ezeen as een kroed (de täkke en et dröadige loof), mer ook as greunte (De verdikkige onderan 'n stellen van knolvenkel). Bladvenkel hef ginne knolle. De plante kan nen kearl boawn et heuwd gröaien.

De zöade zeent al eeuwenlange bekend um öare geneaskrachtige woarking. Leu gebroekt ze doarvuur op verskeidene wiezen. Et krachtigste medicien is venkelöllie, wat oet de zöade parst wördt. Mangs wörd der ook tee van etrökken.

Venkelzoad is good vuur de darmen en bie problemen met de menstruatie. Net bevöllene vrouwleu könt et gebroeken um de borstvoding op gang te brengen, umdat in de zoadöllie völle anethol inzit (n fyto-oestrogeen).^[1] Der wordt ook völle medicienen oet venkel emaakt.

Venkel kump van oorspronk oet Azië en wör al in de middeleeuwen oawer de olde handelsweagen noar Europa bracht. Vuural in Zuud-Europa doot ze völle venkel kweken. Et geet in nen hoop salades biej duur. Ook is der soep van te kokken.

Venkelzoad kauwen helpet tegen een hongergeveul. In vroger tieden atten de leu nog wal es venkelzoad onder 'n karkdeenst of -misse as et te lange doeren.^[2]