Kim Jong-il

Kim Jong-il, (Hangul: 김정일; Hanja: 金正日),in zinne jeugnd bekeand as Joeri Irsenovitsj Kim (Russisch: Юрий Ирсенович Ким) (Vjatskoje, n 16den februwoari 1942 (Juche 31)^[1]) - Pyongyang^[2] n 17den dezember 2011^[3]) was de fakto^[4] n leader van Noord-Korea; hee nöm de taakn as stoatsheuwd van zin vaa Kim Il-sung oawer. Doarnöast was Kim Sekretoaris-Genneraal van de Koreaanse Arbeiderspartieje, vuurzitter van de Nasjonale Defeansiekommissie en Opperbevelhebber van de Noord-Koreaanse striedkrachtn. In al disse feunksies volgen he zin vaa op.

Jong-il wör in t laand n Geleewden Leaider of de Genneraal eneumd. Skoonwal hee in binn- en boetnlaand ezeen wör as n machtigsten kearl van t laand, was Jong-il nit t stoatsheuwd van Noord-Korea: offisjeel is nog aait Kim Il-sung presideant van t laand, den't in 1994 oet de tied is ekömn. Choe Yong-rim is seend 2010 premier van t laand.

Jong-il was wal n vuurzitter van de Nasjonale Defeansiekommissie, wat nen belangriekn plek was, umdet in Noord-Korea alns um t leager dreeit. Doarnöast was he sekretoaris-genneraal van de Koreaanse Arbeiderspartieje en lid van t politburo van de partieje. t Is biezeunder at Jong-il n ennigsten leaider in de hele kommunistiese wearld was den't zin vaa opvolgen.

Leawnsloop

De meeste geskiedkeundigen meant at Jong-il n joar earder in 1941 geboorn wör in n leagerkaamp noabie de stad Gabarovsk in t Russiese Verre Oostn. Zin vaa Kim Il-sung was nen belangriekn persoon oonder de Koraanse opstaandelingn dee't noar Ruslaand verbann of evluchet warn. De moo van Kim was Kim Il-sungs eerste vrouwe, Kim Jong-suk.

De Noord-Koreaann leart op skole n heel aander verhaal. Volgens de stoat wör Jong-il geboorn op 152 meter op de flaankn van Korea's heugsten boarg, de (vulkaan) Paektu. Op t oognblik at he op de wearld köm zol dr vuur de kuste bie Pyongyang n zeemoonster an de oppervlakte wean ekömn wat begun te zingn. Doarnöast zol dr ne dubbele reagnboage boawn de stad wean ekömn en gungn duur t hele laand, midln op n weenterdag, de bloomn blöain. Doarbie zol dr nen niejn stearn an n hemmel wean ekömn.

Doo't n Tweedn wearldoorlog vuurbie was in 1945, was Jong-il dree joar oold. Zin vaa köm in september van det joar noar Pyongyang wierumme en Jong-il köm wat later met de rest van t gezin wierumme. n Zetjen hebt ze in de heuwdstad ewoond, woer't in 1947 zin jungere breurkn Shura Kim verdreunk en in 1949 zin moo Jonk-suk bie ne bevalling oet de tied köm.

Ook wat zinne skoling angeet is dr wier oonderskeaid tusken t verhaal van geskiedkeundigen en t offisjele stoatsverhaal. De eerstn meant at he in Volksreppubliek Sjina oonderwies kreeg, terwiel de Noord-Koreaann zelf zegnt at he in Pyongyang noar de skole hef ewest. Doarnoa zol he an de Kim Il-sung-Universiteat pollitieke ekonomie studeerd hebn. Doo't he doar in 1964 Met Lof ofstudeern, was zin vaa al n Grootn Leader van t laand. Later zol Jong-il op Malta nog Engels hebben studeerd.

n Jongkearl Jong-il klum rap op bie de Koreaanse arbeiderspartieje, woer't he oonder mear woarken bie t politburo van de partieje. Zin vaa was oonderwier vanniejs trouwd en har ne tweede zönne, Kim Pyong-il, kreegn. Doar kon Jong-il t nog nit heel best met veendn. Oeteandelik wun t Jong-il en Pyong-il wör "vortpromoveerd" noar ne ambassade in t boetnlaand. Seend 1998 is he ambassadeur vuur Noord-Korea in Pooln.

Jong-il rees al heuger in raank, woerbie't he oonder mear minister van Kultuur wör. In 1977 wör Kim Jong-il anweezn as opvoolger van zin vaa. Doo't in 1980 t zesde partiejkongres eheuldn wör, har Jong-il de töwkes stewig in de haandn, met belangrieke plekn in t sekretariaat en t politburo.

Vanof t begin van de joarn 1980 begun de regearing n verhearlikingsverhaal op te bouwn roond n "Geleewden Leader" en zodöanig gröaidn he verdan töt n onmeundig machtig figuur in t laand.

Skoonwal he nooit bie t leager hef ewest, beneumn ze um in 1991 as heugsten offisier. In 1992, verkloarn zin vaa at Jong-il de leaiding har oawer alle inlaandse zaakn.

n 19den Dezember 2011 maakn de Noord-Koreaanse Niejsumroop KCNA bekeand at Jong-il n 17den dezember 's morns bie ne reaize met n trein n hartinfarkt kreegn hef en doar um half achte an estörven was. De macht wör oawer edreagn an zinne jungste zönne Kim Jong-un, den't al twee joar metleup met zin vaa.

Verwiezings

Bronnen / wellen:

↑ In Noord-Korea hebt ze de Juche-kalender, den't begeent met t geboortejaar van Kim Il-sung as joar 1, in 1912.
↑ Noord-Koreaanse leider Kim Jong-il overleden, Algemeen Dagblad
↑ North Korea leader dead, CNN
↑ t Anwiezn van t Stoatsheuwd van de Demokratiese Volksreppubliek Korea is op dit oognblik nit helemoal dudelik, umdet de umstandigheedn in t laand noargns aanders vuurkomt. In de groondwet steet at Kim Il-sung nog aait stoatsheuwd is. Zodöanig is he t ennigste stoatsheuwd wat al oet de tied is, mer nog aait regeart. Van de machthebbers dee't nog leawt köant verskeaidene as stoatsheuwd ezeen wordn. As eerste Kim Jong-nam, t heuwd van n vuurzittersroad van de Opperste Volksvergoaring. In nen gebroekeliken kommunistiesen stoat is dee vergoaring normaal de heugste autoriteat van t laand. In Noord-Korea is skoonwal in de groondwet vaste legd at de Nasjonale Defeansiekommissie t heugste gezag. n Vuurzitter van disse kommissie, Jong-il wör doarumme meestentieds ezeen as de leader van Noord-Korea. Kim Jong-il dee feaitelik niks met politiek, mer allene militeare dinge.

[1] In Noord-Korea hebt ze de Juche-kalender, den't begeent met t geboortejaar van Kim Il-sung as joar 1, in 1912.

[2] Noord-Koreaanse leider Kim Jong-il overleden, Algemeen Dagblad

[3] North Korea leader dead, CNN

[4] t Anwiezn van t Stoatsheuwd van de Demokratiese Volksreppubliek Korea is op dit oognblik nit helemoal dudelik, umdet de umstandigheedn in t laand noargns aanders vuurkomt. In de groondwet steet at Kim Il-sung nog aait stoatsheuwd is. Zodöanig is he t ennigste stoatsheuwd wat al oet de tied is, mer nog aait regeart. Van de machthebbers dee't nog leawt köant verskeaidene as stoatsheuwd ezeen wordn. As eerste Kim Jong-nam, t heuwd van n vuurzittersroad van de Opperste Volksvergoaring. In nen gebroekeliken kommunistiesen stoat is dee vergoaring normaal de heugste autoriteat van t laand. In Noord-Korea is skoonwal in de groondwet vaste legd at de Nasjonale Defeansiekommissie t heugste gezag. n Vuurzitter van disse kommissie, Jong-il wör doarumme meestentieds ezeen as de leader van Noord-Korea. Kim Jong-il dee feaitelik niks met politiek, mer allene militeare dinge.

[1]

[2]

[3]

[4]