Don Quixote
Don Quixote de La Mancha (Don Quijote de la Mancha an castelhano ye un lhibro scrito pul scritor spanhol Miguel de Cervantes y Saavedra (1547-1616). L títalo i ourtografie oureginales éran El angenioso hidalgo Don Quixote de La Mancha, cun sue purmeira eidiçon publicada an Madrid ne l anho de 1605. Ye cumpuosto por 126 capítulos, debedidos an dues partes: la purmeira aparecida an 1605 i la outra an 1615.
L lhibro apareciu nun período de grande einobaçon i dibersidade por parte de l scritores ficionistas spanholes. Parodiou ls remanses de cabalharie que gozórun de eimensa popularidade ne l período i, na altura, yá se ancuntrában an declínio. Nesta obra, la paródia apersenta ua forma ambulgar. L portagonista, yá de cierta eidade, antrega-se a la lheitura desses remanses, perde l juízo, acradita que téngan sido storicamiente berdadeiros i decide tornar-se un cabalheiro andante. Por esso, parte pul mundo i bibe l sou própio remanse de cabalarie. Anquanto narra ls feitos de l Cabalheiro de la Triste Figura, Cervantes faç caçuada de ls cunceitos que defenian las stórias fantasiosas daqueilhes heiróis. La stória ye apersentada na forma de remance rialista.
Ye cunsidrada la grande criaçon de Cervantes. L lhibro ye un de l purmeiros de las lhénguas ouropeias modernas i ye cunsidrado por muitos l spoente mássimo de la literatura spanhola. An percípios de maio de 2002, l lhibro fui scolhido cumo a melhor obra de fiçon de todos ls tiempos. La botaçon fui ourganizada pul Clubes de l Lhibro Noruegueses i partecipórun scritores de recoincimiento anternacional.[1]
Anredo
[eiditar | eiditar código-fuonte]
L portagonista de la obra ye Don Quixote, un pequeinho fidalgo castelhano que perdiu la rezon pula lheitura assídua de l remanses de cabalharie i quier eimitar sous heiróis prediletos. L remanse narra las sues abinturas an cumpanha Sancho Pança, sou fiel amigo i cumpanheiro, que ten un perfil más rialista. La açon gira an torno de las trés ancursones de la dupla por tierras de La Mancha, de Aragon i de Catalunha. Nessas ancursones, el se ambolbe nua série de abinturas, mas sues fantasies son siempre zmentidas pula dura rialidade. L eifeito ye altamente houmorístico.
L berdadeiro nome de l pobre fidalgo ye Alonso Quijano (Quixano), chamado puls bezinos de l Buono. Yá de cierta eidade, antrega-se a la lheitura desses remanses i sue lhoucura ampeça quando toma por rialidades stóricas ançcutibles las façanhas de las personaiges de ls lhibros, que comenta culs amigos, l cura i l barbeiro de l lhugar. Quijano ambiste-se de l eideales cabalheirescos de amor, de paç i de justícia, i purpara-se para salir pul mundo, an lhuita por tales balores i por bibir l sou própio remanse de cabalharie. Scuolhe un títalo para el mesmo, l de Don Quijote de la Mancha, apelhida un cabalho bielho i çcarnado cul nome de Rocinante i scuolhe cumo dama eideal de sous sentimientos ua simples camposina la quien dá l nome de Dulcinea del Toboso, supuosta dama de alta nobreza.
Análeze
[eiditar | eiditar código-fuonte]
L lhibro ye struturado an dues partes, la purmeira maneirista, anquanto la segunda ye más barroca. Anquanto la purmeira parte de la obra deixa la ampresson de lhiberdade mássima, la segunda parte produç la sensaçon custante de mos ancuntrarmos ancerrados an lhemites streitos. Essa sensaçon ye sentida más antensamente quando cunfrontada cula purmeira parte. Se antes, la eironie era, subretodo, ua spresson amarga de la ampossiblidade de dar rialidade a un eideal, cula segunda parte nace muito mais de la cunfrontaçon de las formas de la eimaginaçon culas de la rialidade. Cervantes dá la sue própia definiçon de la obra: "orde zuordenada (...) de maneira que el arte, eimitando a la Naturaleza, parece que allí la bence". L porcesso adotado por Cervantes - la paródia - deixa dar relebo als cuntrastes, atrabeç de la deformaçon grotesca, pula çlocaçon de l patético pa l burlesco, fazendo cun que l burlesco apague por sfregantes la eimoçon, stablecendo un antrelaçado spontáneo de picaresco, de burlesco i de eimoçon. L cunflito aparece de l cunfronto antre l passado i l persente, l eideal i l rial i l eideal i l social.
Don Quixote i Sancho Pança reperséntan balores çtintos, ambora séian partecipantes de l mesmo mundo. Ye amportante cumprender la bison eirónica que l remancista ten de l mundo moderno, l fondo de alegrie que stá por detrás de la bison melancólica i la busca de l absoluto. Son mundos cumpletamente defrentes. Sancho Pança l fiel scudeiro de Don Quixote ye definido por Cervantes cumo "Home de bien, mas de pouco sal na moleirica". Ye l repersentante de l bun senso i ye pa l mundo rial aqueilho que Don Quixote ye pa l mundo eideal. Por fin, la stória tamien ye apersentada na forma de nobela rialista: al retornar al sou poboado, Don Quixote percebe que nun ye un heirói, mas que nun hai heiróis.
Anterpretaçones i anfluéncias
[eiditar | eiditar código-fuonte]Las figuras de D. Quixote, de Sancho Pança i de l cabalho de Don Quixote, Rocinante, debrebe cunquistórun la eimaginaçon popular. Inda assi, ls críticos cuntemporáneos de la obra nun la lhebórun tan a sério cumo las geraçones seguintes. Ne l seclo XVII, por eisemplo, cunsiderou-se que l remanse cuntenie an si pouco más que l ton de buono houmor i de diberson, cun Don Quixote i Sancho Pança la ancarnáren respetibamente l grotesco i l pícaro. L seclo XVIII fui pródigo an eilogios a D. Quixote, nun solo an Spanha i an Pertual, cumo tamien por parte de grandes románticos de l centro de la Ouropa.
Na stória de l remanse moderno, l papel de Don Quixote ye recoincido cumo seminal. La eibidéncia desso puode ser bista an Daniel Defoe, an Henry Fielding, an Tobias Smollett i Laurence Sterne i, tamien, an personaiges criadas por alguns remancistas clássicos de l seclo XIX, cumo ye l causo de Waltener Scott, de Charles Dickens, de Gustave Flaubert, de Benito Pérez Galdós, de Herman Melbille i de Fiódor Dostoiévski. L mesmo acuntece ne l causo de alguns outores pós-rialistas de l seclo XX, cumo James Joyce i Jorge Luis Vorges. Don Quixote probou ser ua notable fuonte de anspiraçon pa ls criadores an outros campos artísticos. Zde l seclo XVII que se ténen rializado pieças de triato, óperas, cumposiçones musicales i beilados baseados ne l Don Quixote. Ne l seclo XX, l cinema, la telbison i ls cartoons anspirórun-se tamien nesta obra. Don Quixote anspirou inda artistas cumo William Hogarth, Francisco Goya, Honoré Daumier i Pablo Picasso.
Refréncias
[eiditar | eiditar código-fuonte]- ↑ Reuters,"Don Quixote ye eileito l melhor lhibro de todos ls tiempos." Fuolha Online, Oslo, 07 de maio de 2002.
