Fagnan (Gasgian)

Quest articol chì l'è scrivuu in lombard, grafia milanesa.

Fagnan (Fagnano in italian) a l'è 'na frazion del comun de Gasgian, mittuda vers Cislian.

Fagnan a l'è in su 'na piana de origin alluvionala e 'l confina cont Gasgian a sud, cont Bestazz a nord , cont la Cassina a ovest e cont San Vit a est.

A l'è 'n territori a bass ris'c sismegh.

Giamò citaa in del 1346, el deventa important a la mità del 1400 quand che 'l deventa proprietà del Cicch Simonetta, secretari del Galeazz Maria Sforza. Quand che 'l Simonetta a l'è giustiziaa in del 1480 i sò ben in la zona passen a l'Ambroeus Vares, cont de Rosaa.

Finna del 1500 a l'è sed de 'na paròquia per volontà di Borromee, che ne devénten feudatari e voreven miôràll. In del '600 'sto dirizz chi a l'è passaa ai Medegh de Marignan.

In del censiment teresian del 1771 resulten 351 persònn, deventaa 305 a la proclamazion del Regn d'Italia in del 1806. In del 1809 el Napoleon el ghe tacca la Cassina, e in del 1811 a l'è taccaa a Gasgian.

Tornaa i austriegh el ripristinen ma in la provincia de Pavia. In del 1853 ghe tacchen an'mò la Cassina e in del 1859 a l'è rimettuu sotta Milan.

In del 1869 a l'è taccaa finalment a Gasgian.

In la città la gh'è la Gesa di Sant Andrea e Rocch, giamò citada del Goffred de Busser in del secol quell del 13. Arènt el gh'era on foppon, bonificaa in di agn '60 del 1900.

A nivell civil a l'è important el Palazz Doria Borromee Medegh, abitazion di sciori de la zona, cont ona cort ispirada a quèlla de la Piazza Ducala de Vigevan. Incoeu a l'è bandonaa.

• 
  El stemma di Medici
• 
  El campanin de la Gesa
• 
  La Gesa
• 
  El Palazz
• 
  L'ingress del Palazz
• 
  El palazz de lat
• 
  Ona cà

• Lombardia Beni Culturali