Verbrenning

Dit artikel is gesjreve (of begós) in 't Bergs (Roerdale). Laes hie wie v'r mit de versjillende saorte Limburgs ómgaon.

'n Verbrenning is e complex geheel van veurnamelik exotherm chemische reacties tösse 'n brandjsjtof en 'nen oxidator (meistal e zoersjtofgaas) wobie wurmde en leech óntsjteit ónger de vorm van 'n vlam of 'ne gleuj. Verbrenning kan zowaal mit veste, vleujbaar en gaasvörmige brandjsjtoffe optraeje.

Boete 'n brandjsjtof en 'nen oxidator is meistal ouch 'n óntstaekingsbrón neudig veur de verbrenning in geng te sjtèlle. Det kan 'ne zjwaegel of 'nen aansjtaeker zeen óm e vuur aan te sjtaeke, verhitsing door wrieving veur 'ne zjwaegel aan te make, 'ne piëzo-lektrische vónk veur 't gaas van 'nen aansjtaeker of 'ne gaasbrenner aan te sjtaeke, 'ne lektrikvónk veur 'ne benzienmotor of samedrökking veur 'ne dieselmotor.