Germanium

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Germanium is e sjemisch element mit es symboeal Ge en atoeamnómmer 32. 't Is 'n vrie hel grieswitte metalloied, die behuuertj toete kaolstofgroep. Zuver germanium is 'nen halfgeleier.

Juus wie 't vergeliekbaar element silicium kump 't inne netuur neet inne zuver vorm veur, meh gebónjen aan anger elemente, wie zoerstof, waal. 't Kump veur in versjillige minerale, wie argyrodiet, germaniet en renieriet. De abundantie van 't element op aerd is vrie lieëg: de wieväölheid inne aerdkoosj bedruueg 1,4 toet 1,5 ppm. Inne oceaan kump 't veur in concentraties van 50 nanogram de liter. Det is de raeje woveur germanium pas anen ènj vanne neugetieëndjen ieëf óntdèk is gewaore.