Dados

Dados es cosas peti e lansable con lados marcada cual pote resta en posas multiple. Los es usada per jenera numeros acaso, tipal como un parte de juas de table e juas de acaso.

La dado tradisional es un cubo con cada de sua ses lados marcada con un cuantia diferente de puntos, de un a ses. Cuando lansada e la dado para, lo mostra un numero acaso de un a ses a sua surfas alta, con cada valua egal probable. Dados pote ance ave formas poliedro o noncoerente, e pote ave lados marcada con numeros, leteras, o simboles en loca de puntos. On ave ance dados "cargada", cual es desiniada per favore alga resultas, usada per engana o broma.

Dados ia es usada de ante istoria arcivida, e lo no es serta do los ia orijina. On suposa ce dados ia developa de la pratica de predise usante la talo de animales con ungulas. La jua egiptian nomida senet ia e juada con du pesos plata de lenio con du lados cual ia indica la cuantia de cuadros la juor pote move. En esta modo, los servi como dados, simil a la lansa de un moneta. Senet ia es juada ante 3000 aec asta la sentenio 2 ec.

Posible la dados la plu temprana conoseda ia es escavada como un parte de un jua simil a trictrac a la "Site Ardeda" (Shahr-e Sukhteh), un loca arceolojial a Iran sude-este, estimada como entre 2800 e 2500 aec. Dados de oso de Skara Brae en Scotland ia es datida a 3100 a 2400 aec. Escavas de enteras a Mohenjo-daro, un sivilia en la vale de la Rio Indo, ia descovre dados de teracota datida a 2500 a 1900 aec.

Juas cual envolve dados es notada en la Rigveda e Atharvaveda antica, e en listas de juas de budistes. On ave alga referes en la biblia de "lansas acaso" (ivri: יפילו גורל‎ yappîlū ḡōrāl), como en salmo 22, cual indica ce la usa de dados ia es comun cuando la salmo ia es composada. Un jua de nocas ia es videda como un jua destrosa en Elas antica, con la cuatro lados de la osos marcada con valuas diferente.

An si juas de aposta no ia es legal, multe romanes ia es apostores zelosa ci gusta la juas con dados, conoseda como aleam ludere ("juante con dados". On ave du grandias de dados roman. Tali ia es dados grande con la numeros 1, 3, 4, e 6 a sua cuadro lados. Tesserae ia es dados plu peti con lados marcada de un a ses. Dados con 20 lados dati a la sentenio 2 ec e de Egipte ptolemean es datida tan temprana como la sentenio 2 aec.

Dominos e cartas de jua ia orijina en Xina como developas de dados. La move de dados a cartas ia aveni en Xina en la dinastia Tang, e coresponde con la move tecnolojial de enrolas de manoscritos a libros primida. En Japan, dados ia es usada per un jua popular nomida sugoroku, cual ave du formas: Ban-sugoroku es simil a trictrac e dati a la periodo heian; e-sugoroku es un jua de corsa.

Alga juas usa no cosa otra ca dados. Un esemplo moderna (an si simil a multe juas antica) es craps.