Orea interna
La orea interna reseta vibras transmeteda par la tre osetas en la orea media - la martel, la inco, e la stribo, en esta ordina - de la timpan a la coclea, en cual los es convertida a un sinial neuronal en la coclea e transmeteda plu tra la nervo vestibulococleal a la serebro. La osetas aida en aumenta la ondas de sona par tan multe como 15 a 20 veses.
A la fini de la stribo es la fenetra oval. Cuando la stribo vibra, la vibras es transmeteda tra la fenetra oval, cual causa move de la fluenta en la coclea. Prosima a la fenetra oval es la fenetra ronda, cual permete ce la fluente en la coclea pote move. La fluente en la coclea moves e puxa la membrana de la fenetra ronda par un grado corespondente a la fenetra oval.
La orea interna es locada en la oso tempal en un caveta complicada nomida la labirinto ososa. Un area sentral nomida la vestibulo conteni du alcovas peti plenida con fluente - la utriculo e la saculo. Esta lia a la canales semisirculal e la coclea. On ave tre canales semisirculal angulida a 90° de lunlotra cual furni ecuilibria dinamica. La coclea es un organo spiral como un conca cual furni la sensa de oia. Estra strutures crea la labirinto membranosa.
La coclea es composada de tre spasios longa plenida con fluente: la duto vestibulal, la duto cocleal, e la duto timpanal. Selulas capelin encargada con la cambia de ondas mecanical a la stimulas eletrical es presente en la organo de Corti en la coclea.
La fluente puxa la filetas de la selulas individua; la move de la filetas causa ce la selulas deveni abrida per reseta la endolimfa rica con potasio. Esta causa ce la selula depolari e crea un potensia ativa cual es transmeteda longo la ganglio spiral, cual envia informa tra la parte oreal de la nervo vestibulococleal a la lobo tempal de la serebro.