Kinezo simplifikado
Se yama kinezo simplifikado (简体中文 o en kinezo tradisional: 簡體中文; en pinyin jiǎntǐ zhōngwén) o hans asigún ISO 15924 al kondjunto de karakteres uzados para eskrivir la lingua kineza, diskués de los trokamientos echos por el governo de la Repuvlika Popular de Kina enel anyo 1956.
Basikamente, la simplifikasion de la eskritura tradisionala kineza era kitar trazos i trokar las formas de akeyos karakteres espesialmente kompleksos por unos mas kolay de eskrivir. Alkunos karakteres fueron simplifikados uzando normas; por enshemplo, trokando alkunos radikales (subdivizión de un karakter) por una variante menos kompleksa. Otros karakteres fueron simplifikados de otras formas i akeyos ke tienen pokos trazos no fueron simplifikados, por lo ke son eskritos de la misma manera en las dos eskrituras.
Diskués de estos trokamientos, egzisten dos sistemas de eskritura standard para la lingua kineza: mientres ke en la Kina kontinentala se uza el kinezo simplifikado, el kinezo tradisional es ainda uzado en Taiwan, Hong Kong i Makao.
La eskritura simplifikada es yamada en lingua kineza jiǎntǐzì o 简体字 (en kinezo tradisional 簡體字), biervo ke sinyifika "karakteres kon forma simple". También son yamados jiǎnhuàzì o 简化字 (en kinezo tradisional 簡化字), "karakteres simplifikados".