lo jbobau

La .lojban. no'u lo jbobau cu runbau .i ly. se finti la .lojbangirz. lo za'i zasti fa su'o bangu poi se jicmu lo logji gi'e zifre selcpa gi'e se pilno ku'o de'i li 1987 .i lo na'e ralju te finti cu nu cipra lo ka lo nu pilno ce'u cu galfi lo tadji be lo nu pensi

la .lojban. se lidne la .loglan. noi no'e mulno se finti fo lo sidbo be fi la .djeims.kuk.braun. fi lo nu cipra fi lo se skesmadi be la .sapir. jo'u la .uorf.

ni'o de'i li 1987 so'o goi gy gunka be tu'a la .loglan. cu fendi lo girzu fo la .loglan. ki'u lo za'i dy ky by finca'i lo bangu gi'e djica lo nu dukse be fi ku jitro lo selci'a be bau .i gy. ganzu fi la .lojbangirz. mu'i lo nu finti lo cnino lojbau .i ba za bo la .lojban. co'a vajmau la .loglan .i la .lojban. ca ti noi nanca 2016 moi cu bangu ji'i 200 prenu

lo lojbo gerna cu se krasi lo bridi logji .i lo valsi cu se krasi lo xa bangu po'u lo jugbau jo'u lo glibau jo'u lo sanbau jo'u lo xinbau jo'u lo rabybau jo'u lo rukybau .i zmiku lo ka finti lo valsi poi traji lo ka simsa lo valsi be ro by.

la .lojban. se pagbu 27 ba'usle .e pa ba'urtadji jai galfi .i lo karsna cu se 6 mei fi me'o .a'y .e me'o .e'y .e me'o .i'y .e me'o .o'y .e me'o .u'y .e me'o iy'y .i 19 mei fa lo zunsna ku ne lo'u by cy dy fy gy jy ky ly my ny py ry sy ty vy xy zy .y'y denpa bu le'u .i me'o denpa bu sruri lo cmevla gi'e lamji lo karsna poi tolfa'o lo valsi ku'o .e me'o iy'y pe lo valsi fanmo .i me'o .y'y .e me'o slaka bu bi'ai se sepsi'u lo slaka .i me'o .u'y .e me'o .i'y vu'o poi lidne lo karsna cu xabykarsna

ni'o 26 da lojbo lerfu .i lo nu pilno lo na lojbo lerfu tu'a lo cmavo pe lo mekso .a lo namcu .a lo lerfu cu jai cafne .i ca'irselzau fa lo nu basti lo namcu cmavo

ni'o lo karsna cu midju lo slaka gi'e kakne lo nu bacru se basna .i lo slaka midju cu ka'e re mei karsna .i lo relkarsna cu re mei lo karsna poi se gunma lo pa mei slaka

ni'o ro slaka cu karsna slaka gi'a zunsna slaka gi'a cmevlafa'o slaka

ni'o lo karsna slaka cu se pagbu ci da .i lo slakykra noi pa moi pagbu cu pa mei zunsna (to lo galxe spoja zunsna cu jai cumki toi) gi'a me pa lo selcurmi ke slakykra zunsnapoi .i lo slakymidju noi re moi pagbu cu pa mei karsna gi'a pa mei relkarsna .i lo slakyfa'o noi ci moi pagbu cu pa mei zunsna gi'a kunti

ni'o lo zunsna slaka cu na vasru lo karsna gi'e se pagbu re da .i lo pa moi pagbu cu pa mei zunsna .i lo re moi pagbu cu pa mei karsnasmi zunsna

ni'o lo cmevlafa'o slaka cu se steci lo ka lo slakyfa'o cu porsi lo zunsna jo'u lo galxe spoja zunsna

ni'o ro lojbo valsi cu cmima pa lo mu tarmi klesi no'u lo cmavo jo'u lo gismu jo'u lo lujvo jo'u lo zi'evla jo'u lo cmevla

ni'o lo cmavo cu tordu valsi to zo cmavo cu se krasi lu cmalu valsi li'u toi gi'e se krasi pa zunsna .i ro su'o re moi slaka pe lo relslaka cmavo cu ro roi se krasi .y'y .i cmavo mupli fa zo .a .e zo ue .e zo bi .e zo coi .e zo dy .e zo fa'a .i zasti fa lo ji'i 630 cmavo .i ku'i lo zasti cumki cmavo cu ci'i mei .i ji'a cmavo tarmi mupli fa zo mu'ei .e zo poi'i vu'o noi nu'o catni se zanru cmavo .i lo cmavo cu se pilno fi lo nu stura lo jufra

ni'o lo gismu cu lerfu mu mei je slaka bo re mei valsi .i ro gismu cu se tarmi la'e zoi .tam. ZZKZK .tam. lu'u .a la'e zoi .tam. ZKZZK .tam .i gismu mupli fa zo mlatu .e zo gerku .i ca zasti fa lo ji'i 1400 ca'irselzau gismu

ni'o lo lujvo cu gunma lo su'o re rafsi to zo lujvo cu se krasi lu pluja valsi li'u toi .i lujvo mupli fa zo zi'evla noi lujvo fo lu zifre valsi li'u .i lo tersu'i stura pe lo lujvo cu te javni .i ka'e ku se pi'o lo lujvo cu zbasu ci'i valsi .i lo nu zbasu gi'e jmina vau lo cnino lujvo cu frili gi'e di'i fasnu

ni'o so'i lo zi'evla ku goi lo fu'ivla pe'a fukpi lo valsi be fi lo drata bangu .i ku'i lo lojbo valsi ku ji'a se galfi fi lo zi'evla .i lo javni be lo du'u ta'i ma kau zbasu lo zi'evla cu na sampu .i lo valsi tarmi poi se fanmo lo karsna gi'e na ka'e porpi lo cmavo jo'u lo gismu jo'u lo lujvo cu zi'evla tarmi .i cafne fa lo nu lo zi'evla cu valsi lo danlu .a lo spati .a lo cidja .i zi'evla mupli fa zo djirafa

ni'o lo cmevla cu se pilno fi lo ka te cmene .i ro cmevla cu se sruri lo depybu'i gi'e se fanmo lo zunsna .i cmevla mupli fa zo .lojban .i lo cmevla cu jai se vlipa fai lo ka sutra se finti fi lo nu tercme fi vo'a

ni'o ji'a cumki fa lo nu sitna ja pilno lo fange bangu valsi bau la .lojban. .i zo zoi fa'u zo la'o se pilno fi lo nu sitna fa'u pilno .i mu'a zoi gy. quark .gy cu fange bangu valsi

lo gerna be la .lojban. cu se jicmu lo bridi logji .i ro lojbo valsi cu cmima pa lo za'u panono gerna klesi be lo lojbo valsi .i gerna klesi fa lo brivla .e lo cmevla .e ro selma'o .i lo cmevla cu tarmi je gerna klesi .i ro gismu .e ro lujvo .e ro zi'evla cu brivla to ro cmavo be zo go'i cu simsa lo brivla lo ka ka'e selbri kei gi'e ku'i na brivla toi .i ro cmavo cu cmima pa selma'o

ni'o lo selsku cu ta'e gunma lo jufra .i ku'i me'i ro selsku cu jufra .i mu'a lu coi pendo li'u .e lu .ui sai li'u .e lu gi'e li'u cu gendra selsku gi'e nai mulno jufra .i lo jufra cu se jicmu lo bridi .i lo bridi cu se jicmu lo selbri .i lo selbri cu se sumti .i va'o lo mulno bridi lo selbri cu ro roi se cusku .i na gerna bilga lo nu cusku ro sumti be lo selbri .i ji'a cumki fa lo nu jmina no sumti .i lo jufra ka'e vasru lo li'erpau noi lidne lo bridi gi'e vasru lo sumti .e nai lo selbri .i zo zo'u cu te sepli lo li'erpau lo bridi

ni'o lo saprai selbri cu valsi pamei gi'e ga brivla gi cmavo be zo go'i .i ji'a lo brivla porsi noi tanru cu selbri .i lo smuni be lo tanru cu se jicmu lo te tanru noi ro moi pagbu be lo tanru .i lo se tanru noi lidne lo te tanru cu jai galfi lo smuni be lo te tanru .i ji'a lo mulno jufra .e lo sumti .e lo namcu ka'e binxo lo selbri .i lo cmavo be zo nu ku fa'u zo me fa'u zo moi cu jai galfi lo selyli'e ke bridi fa'u sumti fa'u namcu lo selbri .i lo cmavo be zo moi ka'e ji'a se lidne lo zo me selbri

ni'o lo saprai sumti cu valsi pamei gi'e cmavo be zo ko'a .a zo by .i ji'a lo lerfu porsi cu sampu sumti .i lo selbri poi se lidne lo gadri .a lo namcu cu sumti .i lo cmevla poi se lidne lo cmavo be zo la cu sumti .i lo cmavo be zo li cu jai galfi lo namcu lo sumti .i ji'a lo vrici ke sitna valsi cu se pilno fi lo nu zbasu lo sumti

so'o da te finti la .lojban .i di'e mupli .i tu'e

• .i cipra lo se skesmadi be la .sapir. jo'u la .uorf.

• .i zmadu jimpe fi lo bangu

• .i xagzengau lo nu lo prenu cu tavla lo skami

• .i tutci lo nunctu

• .i larcu ve finti

tu'u