Wilhelm Ostwald
| Friedrich Wilhelm Ostwald | ||
| ||
| Profesiono: | kemiisto | |
| Lando: |  Germania
| |
| Naskodato: | 21 di agosto 1853, 2 di septembro 1853 | |
| Nasko-loko: | Rīga, Latvia | |
| Mortodato: | 4 di aprilo 1932 | |
| Morto-loko: | Leipzig, Saxonia, Germania | |
Friedrich Wilhelm Ostwald (Vilhelms Ostvalds), (1853 til 1932) esis Germana kemiisto e filozofo qua ganis Nobel-premio en 1909 pro sua studii pri katalizo.
Ostwald konsideresas kom la patro di fizikokemio. Ilu laboris pri katalizo, kemial equilibro, rapideso di kemiala reakti ed inventis tale nomizita Ostwald-procedo.
En 1907 il prezidis la kunsido dil komitato qua havis la tasko selektar la maxim apta helpolinguo por internaciona komunikado. La komitato rekomendis multa revizi ad Esperanto, e ta rekomendi duktis a developo di Ido. Pose Ostwald esis i.a. honorumala prezidinto dil Ido-Akademio.
Biografio
[redaktar | redaktar fonto]Ilu naskis ye la 2ma di septembro 1853 en Rīga, filiulo di la kuvifisto G. W. Ostwald. Ilu recevis l’unesma instruktado en la Kronsknabenschule, pose ilu lernis de 1864 til 1872 en la urbana Realgymnasium. Esas interesanta ke ja en ta periodo di sua vivo Ostwald komencis editar “jurnalo”, manue skribita por sua kamaradi. Il ipsa facis la texto e la figuri, e ta okupo havis balde la konsequo ke la preskriptata tempo di la gimnazio longijis de kin yari a sep. En 1872 Ostwald komencis studiar en la universitato Dorpat kemio kontre la deziro di sua patro qua volis facar injenioro ek il. Lore il avancis rapide en lua studii. Du triimi de l’exameni preskriptata duris dum preske tri yari; sed lasta triimo facesis segun pario en nur un monato. En 1875 Ostwald ricevis l’ekmatrikulizuro di l’universitato. En ta yaro aparis la kandidatala verko di la futura maestro di kemio: Pri l'Efiko di la Maso di l’Aquo. En 1875 Ostwald divenis asistanto che la konocata fizikisto prof. de Oettingen. En rapida sequo Ostwald publikigis sua konocata e klasika studii pri la kemiala volumeno e la kemiala optiko. Ostwald uzis oli en 1871 por sua magistrala tezi e ye la 20ma di decembro 1878 por recevar la doktorala promoco. Nun Ostwald komencis sua universitatala kariero kom privatdocento kun kurso pri la "kemiala afineso", e samyare ilu divenis asistanto che la tre konocata kemiisto prof. Carl Schmidt en Dorpat. Ja du yari pose (1881) Ostwald recevis la profesoreso di kemio en la Politekniko en Rīga, ube il restis dum sis yari; pose il obtenis en 1877 la profesoreso di fizikala kemio en Leipzig, ube il fondis l’unesma famoza laboreyo di fizikokemio, ed ube il formacis sua famoza skolo kun tanta dicipuli ek omna landi di la mondo.
Citaji
[redaktar | redaktar fonto]| Disipez nula energio, profitez olu! |