Giacomo Puccini

Giacomo Puccini
Profesiono:	kompozisto di opero
Lando:	Italia
Naskodato:	22 di decembro 1858
Nasko-loko:	Lucca, Toskania, Italia
Mortodato:	29 di novembro 1924
Morto-loko:	Bruxelles, Belgia

Giacomo Puccini (n. ye la 22ma di decembro 1858 en Lucca, Toskania til la 29 di novembro 1924) esis un ek la maxim konocata Italiana kompozisti di opero. Lua maxim konocata operi esas La Bohème e Tosca.

Plura de lua ancestri esis muzikisti. Ilua patro Michele esis muziko-docisto. La patro di Michele esis Domenico Puccini (1772–1815), qua kompozis plura verki, precipue por piano. Avulo di Domenico esis Giacomo Puccini (1712–1781) qua rezidis en Lucca, ube ye la katedralo di St Martin il esis orgenopleisto e plu tarde kapel-maestro; il esis kompozanto di multa verki dramatala e sakra.

Ye la 1ma di februaro 1896. ilua opero La Bohème esis unesmafoye pleata, en la Teatro Regio en Torino, direktata da Arturo Toscanini. La evento esis sucesoza; la verko esis balde pleata da operala kompanii en Italia ed altra landi. La fonto di la rakonto esis Scènes de la vie de bohème da Henri Murger, kolekturo de rakonti pri vivado en la Quartier latin de Paris en la 1840-yardeko; anke utiligata esis la dramato La Vie de la bohème, da Murger e dramatisto Théodore Barrière; tamen multo en la opero esis originala.

Ye 10 di decembro 1910, ye la Metropolitan Opera en New York, ilua opero La fanciulla del West esis unesmafoye pleata, kun Enrico Caruso en chefa rolo. Ol esis komisata da Metropolitan Opera, e fondesis sur la dramato The Girl of the Golden West da Usana skriptisto David Belasco, qua anke skribis la dramato sur qua la antea opero da Puccini, Madama Butterfly, fondesis. La rakonto eventas en 1849, en areo di oro-mineyo en Kalifornia.

En New York ye 14 di decembro 1918, Il trittico (la triptiko) esis unesmafoye pleata. Ol esas grupo de tri operi di un akto: la tragediala Il tabarro; Suor Angelica, lokizata en kuvento; e la komika Gianni Schicchi. Kritikisti di la pleado opinionis ke Gianni Schicchi esas la maxim bona de la tri. Malgre ke Puccini deziris ke la tri operi esez kune pleata, il eventuale konsentis a separita pleadi, e ta lasta opero divenis la maxim populara. Ol kontenas la bone konocata ario "O mio babbino caro".

Konstatesis ye la fino di 1923 ke Puccini sufras pro kancero di la guturo. Il mortis ye 29 di novembro 1924, evante 65 yari. Ilua lasta opero Turandot esis ne-kompleta ye ilua morto; ol esis kompletigata da la kompozisto Franco Alfano. La opero esis unesmafoye pleata ye La Scala, Milano, sen la kompletigo, ye 25 di aprilo 1926, direktata da Arturo Toscanini. Meze di la triesma akto, Toscanini cesigis la pleado, e dicis a la audantaro, "Hike la opero finas, nam ye ca punto la maestro mortis."