Ferganski doł

Ferganski doł (uzbeksce Fargʻona vodiysi; kirgisce Фергана өрөөнү/Fergana öröönü; tadźikisce водии Фарғона/wodii Farghona; rusce Ферганская долина/Ferganskaja dolina) je husće wobsydlena dolina mjez horinami Tienšan a Alaj w srjedźnej Aziji. Přez wudolinu ćeče z wuchoda do zapada rěka Syrdarja, jedna z dweju najwjetšeju rěkow tutoho regiona.

W 300 kilometrow dołhim a hač do 110 kilometrow šěrokim dole bydli wjace hač dźesać milionow ludźi, štož wotpowěduje 20 % ludnosće cyłeje srjedźneje Azije. Politisce je Ferganski doł rozdźěleny mjez Uzbekistanom, Kirgiskej a Tadźikistanom. Ludnosć wobsteji z Uzbekow, Kirgizow, Tadźikow, Tatarow a wjacorych etniskich mjeńšinow. Wjetšina wobydlerstwa je muslimska.

Dolina je pomjenowana po měsće Fergana, dźensa uzbeksce Fargʻona.

 Commons: Ferganski doł – Zběrka wobrazow, widejow a awdiodatajow