Transit

Transit foi unha serie de satélites artificiais dos Estados Unidos.^[1]

Os satélites Transit foron satélites desenvolvidos inicialmente pola Armada dos Estados Unidos para servir de axuda á navegación. O desenvolvemento comezou en 1958 e foron pensados para dar principalmente servizo aos submarinos Polaris aínda que despois comezaron a ser usados por axencias civís. O servizo prestado polos Transit deixou de funcionar como tal en 1996, substituído polos máis modernos GPS e Navstar. Lanzáronse entre 1959 e 1988.^[1]

Os dous primeiros satélites Transit tiñan forma aproximadamente esférica e 119 kg de masa e estabilizábanse mediante xiro, producindo a súa enerxía mediante células solares na súa superficie. Transit 1A foi lanzado mediante un Thor Able 2 o 17 de setembro de 1959, pero non chegou a órbita por un fallo no foguete. Transit 1B foi lanzado exitosamente o 13 de abril de 1960 usando un Thor Ablestar. Foi o primeiro satélite que fixo un reacendido dos seus motores no espazo e demostrou a viabilidade de usar satélites como axuda á navegación.^[2][1]

Transit 2A foi lanzado con éxito o 22 de xuño de 1960 a bordo dun Thor Ablestar, mentres que Transit 2B non chegou a ser lanzado nunca. Transit 2A, similar aos Transit 1, levaba entre os seus instrumentos, ademais dos transmisores de radio para navegación, un radiómetro para medir o ruído cósmico, un medidor infravermello e sensores de temperatura. A enerxía era producida por células solares alimentando unha batería de níquel-cadmio. Os transmisores funcionaban a frecuencias de 54, 162, 216 e 324 MHz.^[3][1]

Transit 3A non chegou a órbita debido a un fallo no seu foguetes lanzadore, un Thor Ablestar, o 30 de novembro de 1960. Transit 3B foi lanzado xunto co satélite LOFTI 1 o 22 de febreiro de 1961, tamén mediante un Thor Ablestar, pero debido a un fallo dun compoñente electrónico os satélites non chegaron a separarse da última etapa do foguete, permanecendo o conxunto en órbita. Con todo, Transit 3B estivo transmitindo durante un tempo.^[4][1]

Tanto Transit 4A como 4B foron lanzados con éxito mediante foguetes Thor Ablestar, o primeiro o 29 de xuño de 1961 e o segundo o 15 de novembro dese mesmo ano. A diferenza dos anteriores Transit, estes tiñan forma de cilindro de 109 cm de diámetro e 79 cm de alto, cunhas masas de 79 (Transit 4A) e 86 kg (Transit 4B). A enerxía eléctrica que os alimentaba proviña das células solares que recubrían as súas superficies. Os dous satélites levaban a bordo tamén fontes de enerxía nucleares SNAP 3 experimentais.^[5][1]

Os tres satélites Transit de tipo 5A foron prototipos lanzados mediante foguetes Scout X-3 entre 1962 e 1963, co segundo satélite non chegando a órbita por fallo do foguete. Eran satélites máis pequenos que os anteriores, de forma cilíndrica e con catro paneis solares, ademais dun mastro despregable para estabilizar os satélites mediante gradente gravitatorio.^[6][1]

Os tres satélites Transit de tipo 5BN eran similares aos 5A pero estaban alimentados exclusivamente mediante fontes nucleares RTG de tipo SNAP-9A. O 1 e o 2 foron lanzados con éxito en 1963 mediante foguetes Thor Ablestar, mentres que o terceiro non chegou a órbita por un problema co foguete lanzador, despois do cal decidiuse que o resto de satélites Transit usarían paneis solares.^[7][1]

Transit-5C 1 foi lanzado o 4 de xuño de 1964 a bordo dun Scout X-4, mentres que a segunda unidade nunca foi lanzada. Era similar aos Transit 5A pero cun redeseño para maior eficiencia.^[8][1]

Transit-5E 1 foi lanzado o 28 de setembro de 1963 mediante un Thor Ablestar, tiña unhas maas de 59 kg e catro paneis solares. Foi un satélite adicado máis á investigación, para estudar a contorna doutros satélites Transit.^[9][1]

Transit-5E 2 foi lanzado o 21 de abril de 1964 mediante un foguete Thor Ablestar, pero non chegou a órbita por un fallo no foguete. A súa misión era similar á de Transit-5E 1.^[10][1]

Transit-5E 3 foi lanzado con éxito o 5 de decembro de 1963 mediante un foguete Thor Ablestar cunha misión similar a Transit-5E 1 e 2. Funcionou ata o 19 de xullo de 1964.^[11][1]

Transit-5E 4 debería ter tido unha misión similar ao resto de Transit-5E, pero finalmente foi cancelado.^[12][1]

Transit-5E 5 foi posto en órbita mediante un foguete Thor Ablestar o 13 de decembro de 1964. Como o resto de satélites da serie, era un satélite de investigación adicado a estudar a contorna do resto de satélites Transit.^[13][1]

Transit-O foi a denominación dos satélites Transit operativos. Lanzáronse 24 entre 1964 e 1988 dos 32 planificados inicialmente, cos oito restantes ou non sendo lanzados ou modificados para outras funcións.^[14][1]

Transat foi a denominación do satélite Transit-O número 11, modificado para servir tanto como satélite de navegación como para usar o sistema experimental SATRACK para mellorar a precisión dos mísiles Trident C4. Durante o uso deste sistema, o satélite recibía e retransmitía sinais GPS para simular un mísil orbital e poder avaliar equipamento de terra relacionado con SATRACK.^[15][16]

Misión[1][2][3][4][5][6][7][8][9][10][11][12][13][14]	Data de lanzamento[1][2][3][4][5][6][7][8][9][10][11][12][13][14]	Foguete lanzador[1][2][3][4][5][6][7][8][9][10][11][12][13][14]	Notas[1][2][3][4][5][6][7][8][9][10][11][12][13][14]
Transit 1A	17 de setembro de 1959	Thor Able	Fallo
Transit 1B	13 de abril de 1960	Thor Ablestar	Éxito
Transit 2A	22 de xuño de 1960	Thor Ablestar	Éxito
Transit 3A	30 de novembro de 1960	Thor Ablestar	Fallo
Transit 3B	22 de febreiro de 1961	Thor Ablestar	Fallo parcial
Transit 4A	29 de xuño de 1961	Thor Ablestar	Éxito
Transit 4B	15 de novembro de 1961	Thor Ablestar	Éxito
Transit-5A 1	19 de decembro de 1962	Scout X-3	Éxito
Transit-5A 2	5 de abril de 1963	Scout X-3	Fallo
Transit-5A 3	16 de xuño de 1963	Scout X-3	Éxito
Transit-5BN 1	28 de setembro de 1963	Thor Ablestar	Éxito
Transit-5E 1	28 de setembro de 1963	Thor Ablestar	Éxito
Transit-5BN 2	5 de decembro de 1963	Thor Ablestar	Éxito
Transit-5E 3	5 de decembro de 1963	Thor Ablestar	Éxito
Transit-5BN 3	21 de abril de 1964	Thor Ablestar	Fallo
Transit-5C 1	4 de xuño de 1964	Scout X-4	Éxito
Transit-5E 2	21 de abril de 1964	Thor Ablestar	Fallo
Transit-5E 5	13 de decembro de 1964	Thor Ablestar	Éxito
Transit-O 1	6 de outubro de 1964	Thor Ablestar	Éxito
Transit-O 2	13 de decembro de 1964	Thor Ablestar	Éxito
Transit-O 3	11 de marzo de 1965	Thor Ablestar	Fallo
Transit-O 4	24 de xuño de 1965	Thor Ablestar	Éxito
Transit-O 5	13 de agosto de 1965	Thor Ablestar	Éxito
Transit-O 6	22 de decembro de 1965	Scout A	Éxito
Transit-O 7	28 de xaneiro de 1966	Scout A	Éxito
Transit-O 8	26 de marzo de 1966	Scout A	Éxito
Transit-O 9	19 de maio de 1966	Scout A	Éxito
Transit-O 10	18 de agosto de 1966	Scout A	Éxito
Transit-O 12	14 de abril de 1967	Scout A	Éxito
Transit-O 13	18 de maio de 1967	Scout A	Éxito
Transit-O 14	25 de setembro de 1967	Scout A	Éxito
Transit-O 18	2 de marzo de 1968	Scout A	Éxito
Transit-O 19	27 de agosto de 1970	Scout A	Éxito
Transit-O 20	30 de outubro de 1973	Scout A1	Éxito
Transit-O 11 (Transat)	28 de outubro de 1977	Scout D1	Éxito
Transit-O 24	3 de agosto de 1985	Scout G1	Éxito
Transit-O 30	3 de agosto de 1985	Scout G1	Éxito
Transit-O 27	16 de setembro de 1987	Scout G1	Éxito
Transit-O 29	16 de setembro de 1987	Scout G1	Éxito
Transit-O 23	26 de abril de 1988	Scout G1	Éxito
Transit-O 32	26 de abril de 1988	Scout G1	Éxito
Transit-O 25	25 de agosto de 1988	Scout G1	Éxito
Transit-O 31	25 de agosto de 1988	Scout G1	Éxito

Wikimedia Commons ten máis contidos multimedia na categoría:  Transit

• Thor Able
• Thor Ablestar
• Scout X-3
• Scout X-4
• Scout A
• Scout A1
• Scout G1
• Scout D1
• Transit Improvement Program