Il Hobit

Il Hobit, o Lâ e Tornâ (in runis ᛁᛚ᛫ᚻᚩᛒᛁᛏ᛫ᚩ᛫ᛚᚪ᛫ᛖ᛫ᛏᚩᚱᚾᚪ, titul origjinâl in inglês: The Hobbit, or There and Back Again ᚦᛖ᛫ᚻᚩᛒᛒᛁᛏ᛫ᚩᚱ᛫ᚦᛖᚱᛖ᛫ᚪᚾᛞ᛫ᛒᚪᚳk᛫ᚪᚷᚪᛁᚾ ) al è un libri di fantasie par fruts scrit dal autôr inglês J. R. R. Tolkien.

Publicât ai 21 di Setembar dal 1937 cun une vore di entusiasim de critiche, al è stât nomenât pe Medae Carnegie e al à vint il premi dal New York Herald Tribune come miôr conte par fruts. Al reste un libri popolâr e un classic de leterature par fruts.

Il Hobit al è ambientât te Tiere di Mieç in Arda, l'univiers inventât di Tolkien, e al conte da la imprese dal hobit Bilbo Bèghins (di chi il titul) che al vinç une part dal tesaur tignût sot voli dal drâc Smaug. Il viaç al puarte Bilbo de so calme campagne te contee (Shire) in puescj plui paurôs e pericolôs.

La storie e je contade in te forme di une cercje a episodis, e tancj cjapitui a introdusin une gnove creature dal mont di Tolkien. Bilbo al madure, al slargje li sôs cognossincis e al ven simpri pi saç acetânt i siei cjaveçs romantic, sumiadôr e aventurôs, simpri cul siò umorisim e bon sens. La conte a rive al pic te Bataie de Cinc Armadis, indulà che tancj dai personaçs e dalis creaturis dai cjapitui prime a tornin fûr par cjapâ part tal conflit.

La cressite personâl e formis di eroisim a son temis centrai de storie, adun cun une trame di vuere. Chescj temis e àn puartât dai critics a pensà che Tolkien al vedi cjapât idee da la sô esperience te Prime Vuere Mondiâl par scrivi cheste conte. Li cognossincis di Tolkien di filologjie todescje e il siò interès par la mitologjie e li flabis a son dispès ritignudis influencis pa la scriture dal libri.

L'editôr, viodint il sucès dal libri, al à domandât al autôr une continuazion. Tolkien al stave za lavorânt al Signôr dai Anei come une storie indipendente, ma cun dai piçui cambiaments a Il Hobit al è rivât a adatâlu come siò naturâl proseguiment. Chestis piçulis ma impuartantis modifichis a son stadi integradis te seconde edizion.

Il libri nol à mai vût un câl di venditis. A son stâts fats tancj adataments par teatri, cine, radio, zûcs di taule e par ordenadôr.

Bilbo Bèghins, il protagonist, al è un rispietabil e risiervât hobit (un popul simil ai oms ma plui bas, cun pîts grancj e pelôs, che a vivin sot tiere; cuasi ducj a son contadins o zardinîrs).^[1] Durânt la so aventure, Bilbo al tabaie spes di ce che al è tal camarin a cjase sô e al varès simpri voie di mangjà di pi di ce che a i dan. Tal imprin al è pi un bagai che di jutori, ma dopo che al cjate un anel magjic li robis a cambiin.

Gandalf, un istari (strion) erant, al fas cognossi Bilbo a une comitive di tredis nanui. Dilunc dal viaç il strion al sparìs par risolvi atris afârs e al torne cu la comitive tai moments principâi de storie.

Thorin Scûd-di-rôl, il valorôs e presuntuôs capo de comitive di nanui e erêt dal ream nanul, bielzà distrut, sot dal Mont Solitari, al fâs une vore di erôrs te direzion, fasintsi judà di Gandalf e Bilbo par tirâsi fûr dalis rognis, ma a si dimostre un grant vuerîr.

Smaug al è un drâc che tancj agns fa al à cjapât il ream nanul dal nono di Thorin (Thrór) e che cumò al duar sul grant tesaur custodît li dentri.

A cjapin part te storie ancje tancj atris personaçs di varie impuartance, come i dodis atris nanui de comitive, doi tipos di elfs, oms, tròi, orcui, rai boconons, grandis acuilis, lôfs, Elrond il savint, Golum (une strane creature che a vîf in un lâc sot tiere), Beorn (un om che al si trasforme in ors) e Bard (un valorôs arcîr dal Lâc Lunc).

(inglês) «In a hole in the ground there lived a hobbit»	(furlan) «Intune buse sot tiere al viveve un hobit.»
(J. R. R. Tolkien, The hobbit)

Gandalf al met sù une fieste a cjase di Bilbo Bèghins, cence visâlu. A la fieste al invide une compagnie di dodis nanui (Dvalin, Balin, Chili, Fili, Dori, Nori, Ori, Oin, Gloin, Bifur, Bofur e Bombur) vuidâts di Thorin Scûd-di-rôl. I nanui a cjantin dal Mont Solitari e dal grant tesaur vuardât di Smaug, un drâc. Dopo il cjant Gandalf al fâs viodi la Mape di Thrór la che a si po viodi une puarte segrete tal flanc dal mont e al propon di ingaiâ Bilbo come scassinadôr par recuperà il tesaur che Smaug al veve robât lôr. I nanui a ridin a la idee, ma Bilbo, indignât, al acete ancje se a nol varès volût aventuris.

Il grup al zire par zonis salvadis de Tiere di Mieç, tant che Gandalf al à di salvâju dai tròi, fin a rivà a Valvierte (Rivendell) lì che Elrond ai conte alc di plui sui segrets de mape. Tentânt di passâ i Monts dai Nui a vegnin cjapâts dai orcui e puartâts sot tiere tal lôr côf. Ancjemò Gandalf al rive a salvâju, ma Bilbo a si piert e al cjate un anel par tiere. Pôc pi in la al incuintre Gollum e i doi a fasin une gare di induvinei: Bilbo al vinç e Gollum al à di fai viodi la strade par la fûr, ma al si inacuarç che chel atri i à robât l'anel. Bilbo al met su cence volê l'anel e al devente invisibil , cussì al scjampe e al torne dai nanui. Il grup al ven po dopo metût sot di un trop di lôfs, ma a son puartâts vie da un scuam di acuilis amîs di Gandalf. Prime di continuâ il viaç a si fermin a polsâ la di Beorn: un om che al po trasformâsi in ors.

La comitive a jentre tal Bosc Scûr (Mirkwood) cence Gandalf che al à atris afârs di distrigâ pi in ju a Dol Guldur. Tal bosc Bilbo prime al salve i nanui dai rais grandonons, e dopo dalis presons dai elfs dal bosc, simpri graciis al anel. Dongje dal Mont Solitari a cjatin in oms di Esgaroth sul Lâc Lunc, che a sperin che i nanui a inveredin la profezie de espulsion di Smaug. Rivâts al mont e vierte la puarte segrete Bilbo al jentre a viodi cemût che e je la situazion. Il drâc a si svee e al va a brusâ Esgaroth pensânt che nanui e oms a si sedin aleâts cuintri di lui. Un rusignûl però al vise Bard, une vuardie di Esgaroth, che al rive a copâ il drâc cund'une frece fate a pueste.

Cuant che i nanui a jentrin tal mont, Bilbo al cjate la Piere dal Re (Arkenstone), un cimeli di famee di Thorin, e a la plate. I elfs dal bosc e i oms di Esgaroth a asediein il mont domandânt une paie par vê judât i nanui a mandâ vie Smaug. Thorin al rifiute e, clamât il cusin dalis Culinis di Fiar, al rinfuarce la so posizion di Re sot dal mont. Bilbo al prove a cirì la pâs, ancje dant la Piere dal Re ai oms e elfs, ma chest al fasarà dome rabià di plui Thorin, che al bandirà Bilbo. Rivâts a chest pont la bataie a è inevitabile.

Gandalf al torne par visà ducj de rivade di un esercit di orcui e lôfs. I nanui, i oms e i elfs a si adunin, ma dome cu la vignude da li acuilis e di Beorn a rivin a vinci la Bataie dai cinc esercits. Thorin al môr te bataie, ma prime al rive a fa pâs cun Bilbo.

Il hobit al acete dome une piçule part di chel che ai spietarès dal tesaur, no coventâint, ma al torne a cjase cul siò gnûf anel e cun une gnove voie di zirà il mont.

Model:Reflist

1. ↑ Il Hobit, ch. 1 "Une cunvigne inspietade". "i siei pîts pelôs (ma ben lustrâts)"