Galassie

Une galassie e je un grant insiemi di stelis, sistemis, amàs e associazions stelârs, gas e polvars (che a formin il mieç interstelâr), leâts intun de fuarce di gravitât. Il non derive dal grêc γαλαξίας (galaxìas), che al significhe "di lat"; al è une clare alusion ae Via Lactea (tes denominazions tradizionâls furlanis Strade dal Paradîs, Strade di Rome, Strade di Jerusalem, Stradalbe, Stradon de Madone, Stradon di Viene a ROme), la Galassie par antonomasie, che a ‘nd fâs part il sisteme solâr.

Lis galassiis a son ogjets di dimensions une vore vastis, che a svariin des plui piçulis galassiis nanis, di pocjis desenis di milions di stelis, fin aes plui imponentis galassiis zigantis, che a rivin a contâ ancje mil miliarts di stelis, dutis che a orbitin ator ator a un comun centri di masse.

In sens storic, lis galassiis a son stadis categorizadis secont la lôr forme aparente, o sedi su la fonde de lôr morfologjie visuâl. Une tipologjie tant difondude e je chê elitiche, che, cemût che si pues capî dal non, e à un profîl a elìs. Lis galassiis spirâls invezit a àn une forme discoidâl cun struturis a spirâl che a partissin dal nucli. Lis galassiis cun forme iregolâr o insolite a son definidis galassiis particolârs; la lôr forme stranie e je pal solit il risultât dai efiets des interazions mareâls cu lis galassiis dongje. Se chestis interazions a son uen vore fissis, par vie de vicinance tra lis struturis galatichis, e pues jessi la fusion des dôs galassiis, che e risulte inte formazion di une galassie iregolâr. La colision tra dôs galassiis dispès e da origjin a fenomens fis di formazion stelâr.

Intal univiers che si pues osservâ a son probabilmentri plui di 100 miliarts di galassiis; la plui grande part e à un diametri fra 1000 e 100.000 parsec e a son par solit a separadis di distancis dal ordin di milions di parsec (megaparsec, Mpc). Il spazi intergalatic al è in part jemplât di un gas lizêr, cun densitât plui basse di un atom par metri cubi. La plui part des galassiis a son disponudis intal Univiers organizadis secont jerarchiis associativis precisis, des plui piçulis associazions, formadis di ciertis galassiis, ai amàs, ai plui imponents superamàs galatics. Chestis grandis struturis dispès a son disponudis dentri di corints enormis (tant che chê che si clame la Grande Muraie) e filaments, che a cenglin vueits imens dal Univiers.

A ben che no sedi ancjemò dal dut ben clâr, la materie scure e somee costituî cirche il 90% de masse di tante part des galassiis a spirâl, biel che pes galassiis elitichis si pense che cheste percentuâl e sedi minôr, svariant fra 0 e 50%. I dâts che a divegnin des osservazions a fasin pensâ che tal centri di tantis galassiis, ancje se no di dutis, a sedin busis neris.