Bacteroides

Bacteroides
Irudi gehiago
Sailkapen zientifikoa
Erreinua	Pseudomonadati
Filuma	Bacteroidota
Klasea	Bacteroidia
Ordena	Bacteroidales
Familia	Bacteroidaceae
Generoa	Bacteroides [[|]]
Datu orokorrak
Gram tindaketa	bakterio gram-negatibo

Bacteroides generoa bakterio Gram negatiboz osatuta dago, bazilo itxura dutenak. Genero honen bakterioak anaerobio hertsiak dira, eta ez dute esporarik sortzen. Heste-floraren kide garrantzitsuenetarikoak dira (gizakiaren gorotz gramo batean 10¹¹ mota honetako bakterioak baitaude).

Bacteroides-ek esfingolipidoak ditu bere zelula mintzean. Hori ez da ohikoa bakterioen artean, eukariotoengan gauza arrunta bada ere.

Animalia hausnarkarien errumenean funtsezko zeregina burutzen dute bakterio hauek, landare-polisakaridoen zelulosa hidrolizatzen baitute.

Bacteroides-en ezaugarri biokimiko nagusiak honako hauek dira:

• anaerobio hertsiak (O/H: -/+)
• katalasa (-)
• ez dute zitokromorik
• gluzidoak hartziten dituzte azido sukziniko eta azetikoa sortuz.

Bacteroides gehienak ez dira patogenoak, hesteetako saprofito eta jankide arruntak baizik. Bacteroides fragilis espeziea, hala ere, patogeno izan daiteke zenbait kasutan: esaterako, heste-flora normala gorputzaren atal esterilak inbaditzen dituenean, hesi anatomikoren bat puskatutakoan. Honelako kasuetan apendizitis, peritonitis eta septizemia eragiten ditu. Bakterioak erresintentzia handia du penizilina eta beste antibiotikoekiko, eta infekzioaren tratamendua korapilatsua izaten da sarritan.

Wikimedia Commonsen badira fitxategi gehiago, gai hau dutenak: Bacteroides