El Verdadero Iglesia de Jesus

El Verdadero Iglesia de Jesus es un iglesia independente que ya establice na Beijing, China del año 1917. Ahora, tiene este mas o menos uno y media millon de miembro na cuarenta y cinco naciones. Este iglesia parte del Pentecostal cristiano que ya principia na maga primera año del aca veinte siglo. Del año 1983, este iglesia ya principia na Filipinas. El maga miembro de este iglesia ta cree que todo las cosas ta ensiña El Nuevo Noticia necesita tiene referencia biblical para evita mal interpretacion. ellos hende ta cree con El Trinidad y en cambio ta adherirse con el doctrina na "nombre de Jesus" del maga solamente Pentecostal.

El dies principal doctrina de este Iglesia amo el maga siguente:

1. Espiritu Santo: "El quien ya recibi con el Espiritu Santo, un prueba que el persona hay puede conversa na maga diferente lenguaje, es un garantia na herencia de reino del cielo."

2. Bautismo: "El bautismo de agua es un sacramento por el perdona de los culpa y regeneración de la persona. El bautismo ta ocurri na agua vivo y natural como rio, mar, o manantial. El bautismo ta conduci na nombre del Señor Jesu Cristo y el persona ta recibi bautismo completamente sumido na agua con su cabeza y cara inclinao y abajo ta mira."

3. Santo Comunion: "El Santo Comunion es un sacramento que ta comemora con el muerte del Señor Jesu Cristo."

4. Lavada del maga pie: "El sacramento de lavada del maga pies ta dale oportunidad que el persona queda parte del Señor Jesus. Este sacramento ta dale tambien firmi acorda con el maga miembro que el maga gente debe ama con uno y otro, santidad, perdona y servicio."

5. Dia de Sabado: "El dia de Sabado, el aca-ciete dia del semana, es un dia bendito y santificado acerca del Dios. Con este dia ta observa bajo na gracia del Dios por el conmemoracion del creacion y salvacion del Dios con el mundo y con esperanza na descanzo eternal na vida que viene."

6. Jesu Cristo: "Jesu Cristo, el Palabra que ya queda laman, ya mori na cruz por el perdona del maga tiene culpa, ya levanta entre maga muerto na aca-tres dia y ya subi na cielo. Ele el unico salvador del mundo, el Creador del cielo y tiera y el solamente verdadero Dios".

7. El Santo Biblia: "El Santo Biblia que ta consisti de Daan y Nuevo Testamento es inspiracion desde'l Dios. El biblia amo el unico verdadero y guia por el vida cristiano".

8. Salvacion: "El salvacion estaba con el gracia del Dios por medio de fe. El maga creyente necesita depende con el Espiritu Santo por el santidad para con el honor del Dios y para con el amor del entero humanidad".

9. El Iglesia: "El Verdadero Iglesia de Jesus ya establice por el nuestro Señor Jesu Cristo por medio del Espiritu Santo durante el tiempo del 'ultimo aguacero' es un restorado verdadero iglesia del tiempo apostolico".

10. El Final Juzgamento: "El segundo venemos del Señor hay ocura na ultimo dia cuando hay abaja Ele na cielo para juzga con el entero mundo: el maga bueno hay recibi vida eternal y el maga malo hay condena eternamente".