Buku 2 Musa

1:1 On ma goargoar ni halak Israel, angka na ro tu tano Misir udur dohot si Jakkob; ro be do nasida dohot donganna sajabu. ᯀᯉᯬ᯲ ᯔ ᯎᯬᯀᯒ᯲ᯎᯬᯀᯒ᯲ ᯉᯪ ᯂᯞᯄ᯦᯲ ᯀᯘᯪ᯲ᯒᯀᯞᯩ᯲ ᯀᯰᯄ᯦ ᯉ ᯒᯬ ᯖᯮ ᯖᯉᯬ ᯔᯪᯘᯒᯪ᯲ ᯥᯑᯒᯮ᯲ ᯑᯬᯂᯖᯬ᯲ ᯘᯪ ᯐᯄ᯦᯲ᯄ᯦ᯅᯬ᯲ ᯒᯬ ᯅᯩ ᯑᯬ ᯉᯘᯪᯑ ᯑᯬᯂᯖᯬ᯲ ᯑᯬᯝᯉ᯲ᯉ ᯘᯐᯅᯮ

1:2 Si Ruben, Simeon, Lepi dohot Juda. ᯚᯪ ᯒᯮᯅᯩᯊ᯲, ᯚᯪᯔᯩᯥᯊ᯲, ᯞᯩᯇᯪ ᯑᯬᯄᯬᯖ᯲ ᯐᯮᯑ

1:3 Isasar, Zebulon dohot Benjamin.

1:4 Dan dohot Naptali, Gad dohot Aser.

1:5 Jadi saluhut hosa angka na ruar sian gonting ni si Jakkob pitupulu halak do; alai anggo si Josep, nunga di tano Misir hian.

1:6 Dung i mate ma si Josep dohot sude hahaanggina i dohot sandok na sansundut i.

1:7 Dung i lam torop mabue ma anak ni Israel, marpinompari nasida, jala lam deak, jala lam marhuaso situtu, pola gok tano i dibahen nasida.

1:8 Alai bangkit ma muse sada raja na imbaru gumomgom Misir, na so tumanda si Josep.

1:9 Jadi didok ma tu bangsona: Ida ma, nunga gabe sada bangso halak Israel, tumorop jala gumogo sian hita.

1:10 Tole ma, itabisuki ma nasida, asa unang be lam ganda; atek tung beha tubu hamusuon, jadi dohot nasida maon marbalik gabe satahi dohot musunta jala mangalo hita, jala haruar sian tano on.

1:11 Jadi dipabangkit ma angka mandur mangarodi nasida, asa dipaporsukporsuk nasida marhitehite ulaon na dokdok; gabe dipauli ma huta Pitom dohot Ramses bahen parpeopan ni ugasan ni raja Firaun.

1:12 Hape lam dipaporsukporsuk nasida, lam torop nasida jala rarat, gabe lam tahuton nasida mida halak Israel.

1:13 Jadi gogo ma dibahen halak Misir marhatobanhon halak Israel.

1:14 Jadi marsingkor ma diahap nasida dibahen renge ni ulaon, pauli tano liat bahen tano takko dohot dibahen nasa ulaon di balian ro di sude ulaonnasida na asing, na niulanasida sian utang na so tarjua.

1:15 Dung i ninna raja ni Misir ma tu angka sibaso ni halak Heber, goar ni na sada Sipra, goar ni na sada nari Pua.

1:16 Ninna ma: Molo diurupi hamu boru ni halak Heber laho mangintubu, jala diida hamu di atas sapa paridian, molo tung baoa bunu hamu, alai molo boruboru atenang pangolu hamu.

1:17 Alai mabiar do angka sibaso i mida Debata, jadi ndang dibahen nasida songon na nidok ni raja ni Misir i tu nasida, dipangolu nasida do angka posoposo baoa.

1:18 Jadi ditonahon raja ni Misir i ma angka sibaso, didok ma tu nasida: Boasa tung songon i bahenonmuna, tung dipangolu hamu angka posoposo baoa?

1:19 Jadi ninna angka sibaso i ma tu raja Firaun: Ndang songon boru Misir anggo boru Heber, ai togap do nasida, ndang dope ro sibaso i tumopot nasida, nunga sahat ditubuhon.

1:20 Jadi ala ni ditumpak Debata ma angka sibaso i, lam tamba ma bangso i, jala tongam situtu.

1:21 Jadi ala dihabiari angka sibaso i Debata, gabe dibahen ma angka bagas di nasida.

1:22 Dung i dipatik raja Firaun ma sandok na nirajaanna, ninna ma: Nasa posoposo baoa tu batang aek Nil ma danggurhon hamu, alai nasa parompuan pangolu hamu.

2:1 Dung i adong ma sada halak sian pomparan ni si Lepi jala dibuat sada boru Lepi bahen jolmana.

2:2 Dung i gabegabean ma jolmana i, jala ditubuhon anak sada. Jadi dung diida mansai uli rupana, ditabunihon ma ibana tolu bulan lelengna.

2:3 Alai dung so tarbunihonsa be, dibuat ma sada poti sian arung, jala dipauli huhut didamari, dung i dipeakkon posoposo i tu bagasan, ditaruhon ma i tu bagasan arung na di pasir ni batang aek i.

2:4 Alai jongjong ia ibotona i manatapnatap, asa diboto manang beha bahenonna tu ibana.

2:5 Dung i tuat ma boru ni raja Firaun naeng maridi di bagasan batang aek i: Sai mardalandalan di pasir ni aek i anggo angka naposona boruboru. Jadi dung diida poti na metmet i di tongatonga ni arung i, gabe disuru ma naposona mangalap.

2:6 Jadi dung diungkap, diida ma posoposo i jala ida ma sai tumatangis posoposo i, jadi asi ma rohana mida ibana, ninna ma: Sian angka posoposo ni halak Heber do on.

2:7 Dung i ninna ibotona i ma tu boru ni raja Firaun: Beha ia laho ahu manjou sada inaina panusuan sian boru ni halak Heber, asa dipasusu posoposo i di ho?

2:8 Jadi ninna boru ni raja Firaun ma tu ibana: Antong laho ma ho. Jadi laho ma angkora i, jala dijou ina ni posoposo i.

2:9 Dung i ninna boru ni raja Firaun i ma tu ibana: Boan ma posoposo on jala pasusu di ahu, hulehon pe upam. Jadi dibuat inaina i ma posoposo i, jala dipasusu.

2:10 Jadi dung magodang posoposo i, ditaruhon ma tu boru ni raja Firaun gabe diain ma i bahen anakna, jala dibahen goarna si Musa, ai sian aek do ibana huenet, ninna.

2:11 Dung i di angka ari i, dung magodang si Musa, ruar ma ibana tumopot angka hahaanggina i, asa diida pardangolannasida. Jadi diida ma sada halak Misir, na mambalbali sada halak Heber sian hahaanggina i.

2:12 Dung i dibereng ma humaliang, jadi dung diida, ndang adong jolma disi, gabe dibunu ma halak Misir i, jala dipanguspangus ibana tu horsik.

2:13 Ruar muse ibana di ari paduahon, jadi ida ma, dua halak Heber marbadai. Jadi ninna ma tu parsala i: Boasa balbalanmu donganmon?

2:14 Alai ninna bayo i ma: Ise pabangkit ho bahen sintua dohot panguhum di hami? Naeng bunuonmu ahu huroha, songon na binunum isi ni Misir i? Jadi mabiar ma si Musa, ninna ma: Tongon do, nunga tarbortik hata i.

2:15 Sar ma barita i tu raja Firaun, jadi dilului ma si Musa naeng bunuonna. Alai lintun ma si Musa sian jolo ni raja Firaun, mangulon ma ibana di tano Midian, hundul ibana di lambung ni sada sumur.

2:16 Alai pitu do boru ni malim di Midian, angka na ro manahui, asa digohi parsoburan, laho pasoburhon birubiru ni amanasida.

2:17 Alai ro ma angka parmahan mangonjaronjar nasida. Jadi hehe ma si Musa mangurupi nasida jala dipasobur birubirunasida i.

2:18 Ia dung sahat nasida tu si Reguel, amanasida i, ninna ibana ma: Boasa tung songon i tibu hamu muli sadari on?

2:19 Jadi didok nasida ma: Adong tahe sada halak Misir, na palua hami sian tangan ni angka parmahan i, huhut sai ditahui di hami jala dipasobur angka birubiru i.

2:20 Dung i didok ma tu angka boruna i; alai didia ibana? Boasa tung tading baoa i bahenonmuna? Jou hamu ibana, asa mangan sagusagu.

2:21 Jadi mangoloi ma si Musa maisolat di halak i, gabe dilean ma boruna si Zippora bahen jolma ni si Musa.

2:22 Ditubuhon ma sada anak, dibahen ma goarna si Gerson, ai paisolat do ahu di tano na pulik, ninna.

2:23 Dung i di laonlaon ni ari, mate ma raja ni Misir. Alai sai mangangguhi ma halak Israel dibahen renge ni ulaonnasida, jala sahat ma angguhangguknasida i tu jolo ni Debata sian parhatobanan i.

2:24 Dung i ditangihon Debata ma angguhangguknasida i, jala diingot padanna tu si Abraham, si Isak dohot si Jakkob.

2:25 Jadi ditatap Debata ma halak Israel i, jala ditanda nasida.

3:1 Alai diparmahan si Musa do birubiru ni si Jetro, simatuana i, malim di Midian, jala diadu angka birubiru i salpu halongonan i, sahat ro di dolok ni Debata, i ma dolok Horeb.

3:2 Dung i diida ma suruan ni Jahowa di bagasan api na marnalanala di tongatonga ni ramba. Dung i dibereng ma, jadi diida marsigorgor api di bagasan ramba i, alai ndang olo suda ramba i dipangan.

3:3 Jadi ninna si Musa ma: Ua laho ma ahu jumonok tahe, asa huida halongangan bolon on, ala ni aha umbahen so mosok ramba i.

3:4 Alai dung diida Jahowa ibana ro naeng manilik, joujou ma Debata sian tongatonga ni ramba i, ninna ma mandok ibana: Jo Musa, Musa! Dison do ahu, ninna.

3:5 Dung i ninna ma: Unang jumonok ho tuson, tanggali ma sipatum sian patmu, ai tano na badia do hajongjonganmon.

3:6 Dung i ninna muse: Ahu do Debata ni ompum, Debata ni si Abraham, Debata ni si Isak dohot Debata ni si Jakkob. Jadi dihungkupi si Musa ma bohina, ai mabiar do ibana mamereng Debata.

3:7 Dung i ninna Jahowa ma: Nunga tangkas huida pardangolan ni bangsongku na di tano Misir i, jala nunga hutangihon angguhangguknasida i maradophon angka na pasosaksosak nasida; ai nunga huboto parniahapannasida i.

3:8 Ala ni umbahen tuat Ahu paluahon nasida sian tangan ni halak Misir, jala paruarhon nasida sian tano on tu tano na denggan jala na lambas, tu tano habaoran ni susu dohot situak ni loba, tu tano inganan ni halak Kanaan dohot Het i dohot Amori dohot Perisi dohot Hevi dohot Jebusi.

3:9 On pe, ida ma, nunga sahat angguhangguk ni halak Israel tu Ahu, nunga huida huhut pangarupaon, na binahen ni halak Misir tu nasida.

3:10 On pe, laho ma ho, suruonku ma ho tumopot raja Firaun, asa di paruar ho bangsongku, halak Israel i sian Misir.

3:11 Alai ninna si Musa ma mandok Debata: Ise ma ahu pola, tung dapothononku raja Firaun i, tung paruaronku halak Israel sian Misir?

3:12 Alai ninna Ibana ma: Hudongani pe ho, jala on ma tandam paboa Ahu marsuru ho: Ia dung diparuar ho bangso i sian Misir, oloanmuna ma Debata di lambung dolok on.

3:13 Dung i ninna si Musa ma mandok Debata: Ida ma, ia dung sahat ahu di halak Israel, jala hudok tu nasida: Debata ni ompumuna marsuru ahu tu hamu, gabe didok nasida maon tu ahu: Ise do goarna? Beha ma dohononku tu nasida?

3:14 Dung i ninna Debata ma tu si Musa: Ahu nuaeng Ahu sogot. Dung i ninna muse: Songon on do dohononmu tu halak Israel: Jahowa marsuru ahu tu hamu.

3:15 Angkup ni didok Debata tu si Musa: Songon on do dohononmu tu halak Israel: Jahowa, Debata ni ompumuna, Debata ni si Abraham, Debata ni si Isak dohot Debata ni si Jakkob marsuru ahu tu hamu; i do goarhu ro di salelenglelengna jala goar parningotan di Ahu marsundutsundut.

3:16 Laho ma ho, paluhut ma angka sintua ni Israel, jala dok ma tu nasida: Jahowa, Debata ni ompumuna na huida i, Debata ni si Abraham, Isak dohot Jakkob, mandok: Nunga ditatap rohangku hamu, dohot na binahenna tu hamu di Misir.

3:17 Nunga pola hudok: Sai paruaronku do hamu sian pardangolan Misir, tu tano ni halak Kanaan, dohot Het i, Amori. Perisi, Hevi, dohot Jebusi, tu tano habaoran ni susu dohot situak ni loba.

3:18 Sai tangihononnasida do soaram, dung i laho ma ho dohot angka sintua ni halak Israel tumopot raja ni Misir, jala dohononmuna tu ibana: Jahowa, Debata ni halak Heber manjumpangkon hami. On pe, ua loas ma hami mardalan tu halongonan partoluarian, asa hupele hami Jahowa Debatanami.

3:19 Alai nunga huboto hian, ndang loason ni raja sian Misir hamu mardalan, nang marhitehite tangan na gogo.

3:20 Alai patoltolonku ma tanganku, asa huhonahon tu Misir sude halongangan, angka sibahenonku di tongatonganasida, jala dung songon i paluaonna ma hamu.

3:21 Dapotan asi ni roha pe bangso on sian halak Misir bahenonku, asa ia ruar nasida, unang ruar lumang boti.

3:22 Mangido ma ganup boruboru sian hombar bagasna dohot sian soranganna angka ulaula perak dohot ulaula sere dohot ulos, angka siampehononmuna tu anakmuna dohot tu borumuna, sintahanmuna sian Misir ma i.

4:1 Dung i ninna si Musa ma mangalusi: Ida ma, ra tung ndang porsea nasida di ahu, jala ndang tangihononna soarangki, dohononnasida ma tagamon: Ndang tutu diida ho Jahowa.

4:2 Jadi ninna Jahowa ma tu ibana: Aha do i na di tanganmi? Tungkot do i, ninna.

4:3 Dung i ninna Jahowa ma: Reongkon ma i tu tano! Jadi direongkon ma tu tano, gabe ulok ma i, jadi maporus ma si Musa maradophon ulok i.

4:4 Alai ninna Jahowa ma tu si Musa: Surdukkon ma tanganmi, jala tangkup ihurna. Jadi disurdukkon ma tanganna manangkupsa, jadi sumuang gabe tungkot di bagasan tanganna.

4:5 Porsea ma nasida bahenon ni, paboa naung diida ho Jahowa, Debata ni ompunasida, Debata ni si Abraham, Debata ni si Isak dohot Debata ni si Jakkob.

4:6 Angkup ni didok Jahowa tu ibana: Ua surukkon tanganmi tu bagasan gedekgedekmi. Jadi disurukkon ma tanganna tu bagasan gedekgedekna, jala dienet muse, ida ma, nunga puruon tanganna, mamontar songon hapur.

4:7 Dung i ninna Jahowa muse: Ulahi surukkon tanganmi tu gedekgedekmi, jadi diulahi tanganna tu gedekgedekna, jala dung dienet muse sian gedekgedekna, ida ma, nunga sumuang, songon sibukna hian.

4:8 Molo so porsea nasida di ho, jala ndang ditangihon soara ni tanda parjolo i, sai porsea do nasida bahenon ni soara ni tanda paduahon i.

4:9 Alai molo so porsea nasida dohot di tanda paduahon on jala ndang ditangihon soaram, tahui ma aek sian batang aek i, jala usehon tu tano na mahiang, gabe mudar ma aek na binuatmi sian batang aek i, dung ro di na mahiang i.

4:10 Alai ninna si Musa ma tu Jahowa: Iale Tuhanku, ianggo ahu ndang jolma parhata ahu, nang olat ni nantuari, nang olat ni nantuarisada, nang olat ni dung mangkatai Ho dohot naposom, ai dokdok do pamanganku jala hallang dilangku.

4:11 Dung i ninna Jahowa ma tu ibana: Tung ise ma mambahen marpamangan jolma i? Tung ise mambahen na ngungu manang na nengel, manang na marnida, manang na mapitung? Nda Ahu, Jahowa do?

4:12 On pe, laho ma ho, hudongani pe pamanganmi, hupodahon pe tu ho sidohononmu.

4:13 Dung i ninna si Musa muse: Iale Tuhan, ua suru ma manang ise lomo ni roham!

4:14 Jadi tarrimas situtu ma Jahowa mida si Musa, didok ma: Nda disi do si Aron, hahami, marga Lepi, huboto do pande ibana mangkatai, ida ma huhut, ipe ruar ibana manjumpangkon ho, ia dung ho diida, las ma rohana di bagasan.

4:15 Dung i pangkulingi ma ibana, jala tuturhon angka hata i tu pamanganna, hudongani pe pamanganmu dohot pamanganna, hupodahon pe tu hamu sibahenonmuna.

4:16 Ibana pe singkatmu mandok tu bangso i, ibana hira pamanganmu, jala ho hira Debatana.

4:17 Tiop ma dohot tungkot on di bagasan tanganmu, hitehitem mambahen angka tanda i muse.

4:18 Dung i laho ma si Musa, mulak tu si Jetro, simatuana i, didok ma tu ibana: Ua loas ma ahu laho, asa mulak ahu tu hahaanggingku, angka na di Misir, asa huida, manang na mangolu dope nasida. Dung i ninna si Jetro ma tu si Musa: Laho ma ho mardamedame.

4:19 Dung i ninna Jahowa ma tu si Musa di Midian: Laho ma ho mulak tu Misir, ai nunga mate sude halak, angka na tumahi hosam.

4:20 Jadi diboan si Musa ma jolmana dohot angka anakna, jala dipahundul nasida tu halode, asa mulak tu tano Misir. Ditiop si Musa huhut tungkot ni Debata di bagasan tanganna.

4:21 Dung i ninna Jahowa muse tu si Musa: Ingot ma di hamumulakmu tu tano Misir patupahon luhut halongangan, di jolo ni raja Firaun, angka na hupasahat tu tanganmu. Alai anggo Ahu patangkangonku ma rohana, asa unang diloas bangso i laho.

4:22 Dung i dohononmu ma tu raja Firaun: Songon on do hata ni Jahowa: Anakku sihahaan do Israel.

4:23 Alai hatangku tu ho: Loas ma anakku laho, asa dioloi Ahu. Molo tung manjua ho mangaloas ibana, ida ma, sai bunuonku do anak buhabajum.

4:24 Hape di tongan dalan dung sahat tu parbornginan, ro ma Jahowa manoro ibana, naeng mambunu.

4:25 Jadi dibuat si Zippora ma sada batu na tajom, jala disunat sibursibur ni anakna, jala direongkon tu lambung patna, jala ninna ma: Pangoli mudar do ho di ahu.

4:26 Jadi dipalua Jahowa ibana. Alai didok pe: Pangoli mudar, ala parsunaton i do.

4:27 Dung i ninna Jahowa ma tu si Aron: Laho ma ho manjumpangkon si Musa tu halongonan; jadi laho ma ibana, gabe pajumpang nasida di lambung dolok ni Debata, jala diumma ibana.

4:28 Jadi dipaboa si Musa ma tu si Aron sude hata ni Jahowa, na marsuru ibana dohot sude tanda, angka na tinonahonna tu ibana.

4:29 Jadi laho ma si Musa dohot si Aron, jala dipaluhut nasida ma sude angka sintua ni halak Israel.

4:30 Dung i dihatahon si Aron ma sude hata, angka na pinaboa ni Jahowa tu si Musa, jala dipatupa ma angka tanda di jolo ni bangso i.

4:31 Jadi porsea ma bangso i; jala dung dibege nasida panatap ni Jahowa di halak Israel, na tinatapna i pardangolannasida, mangunduk be ma nasida jala marsomba.

5:1 Dung i ditopot si Musa dohot si Aron ma raja Firaun didok ma: Boti tona ni Jahowa, Debata ni Israel: Loas ma laho bangsongki, asa marpesta nasida di Ahu di halongonan.

5:2 Dung i ninna raja Firaun ma: Ise do Jahowa, tung ingkon tangihononku soarana mangaloas laho Israel? Ndang hupabotoboto Jahowa, Israel pe ndang huloas laho.

5:3 Dung i ninna nasida ma: Na pajumpang do hami dohot Debata ni halak Heber, ua loas ma hami laho partoluarian tu halongonan, asa mamele hami tu Jahowa, Debatanami, asa unang dihonahon tu hami begu antuk manang podang.

5:4 Dung i ninna raja ni Misir i ma tu nasida: Ia ho ale Musa dohot Aron, boasa tung lolaanmuna bangso i sian ulaonnasida? Laho ma hamu tumopot rodimuna.

5:5 Angkup ni didok raja Firaun ma: Ida ma madeakku gariada bangso i di tano on, lam pasadionmuna nasida sian rodinasida.

5:6 Ala ni dilehon raja Firaun ma di na sadari i parenta tu angka mandur dohot tu angka juaratulis di tongatonga ni bangso i, ninna ma:

5:7 Ndang jadi be lehononmuna durame tu bangso i mambahen tano takko, songon siap ari; nasida sandiri ma laho papungupungu durame.

5:8 Alai anggo bilangan ni tano takko, angka na binahennasida songon siap ari, tong do pangidoonmuna sian nasida, unang orui hamu sian i, ai angka sigurbak ulu do nasida, umbahen mangangguhi nasida mandok: Laho ma hami mamele tu Debatanami.

5:9 Ingkon parengeon ulaon tu nasida, asa adong siulaonnasida, asa unang dipatangitangi hatahata gapgap.

5:10 Jadi ruar ma angka mandur ni bangso i dohot angka juaratulisna, angka didok nasida ma tu natorop i: Songon on do parenta ni raja Firaun: Ndang jadi be lehonon durame tu hamu.

5:11 Hamu ma laho mangalului durame di hamu, manang didia jumpang hamu; alai ndang jadi moru anggo sian ulaonmuna.

5:12 Jadi mampar ma na torop i tu sandok tano Misir papungupungu panabian singkat ni durame.

5:13 Jadi sai disosaksosak angka mandur i nasida, angka ninna ma: Pasun hamu ulaonmuna songon siap ari, songon uju na adong durame.

5:14 Jadi hona balbal ma angka sintua ni halak Israel, angka na pinabangkit ni mandur ni raja Firaun tu nasida, angka ninna ma: Boasa so dipasidung hamu bilanganmuna tano takko songon siap ari, nang nantuari nang sadari on?

5:15 Jadi ditopot angka sintua ni halak Israel ma raja Firaun, mangangguhi ma nasida ninna: Boasa ma tung songon i bahenonmu tu angka naposom?

5:16 Ndang be maruli durame angka naposom, sai bahen hamu tano takko, angka ninna mandok hami! Jala ida ma, hona linsing angka naposom, gabe dapotan dosa bangsom.

5:17 Alai ninna raja i ma: Angka sigurbak ulu do hamu tongon, umbahen sai didok hamu: Loas ma hami laho mamele tu Jahowa.

5:18 On pe, laho ma hamu, mangula ma hamu, ianggo durame ndang be lehonon tu hamu, alai sai lehon hamu bilangan ni tano takko i.

5:19 Jadi diida angka sintua ni halak Israel ma sorimagonasida i, ala didok: Ndang jadi oruanmuna sian tano takko pinaulimuna songon siap ari.

5:20 Dung i di na ruar i nasida sian jolo ni raja Firaun, didapot nasida ma si Musa dohot si Aron, angka na jongjong mandapothon nasida.

5:21 Angka didok ma tu nasida: Sai Jahowa ma marlulu dompak hamu dohot manguhum, ala binahenmuna hami hasomoran ni raja Firaun dohot angka naposona i mangalehon podang tu tangannasida mambunu hami.

5:22 Jadi mulak ma si Musa tumopot Jahowa, jala didok ma: Ale Tuhan, boasa ma tung paporsuhonmu bangso on? Boasa ma tung suruhononmu ahu tuson?

5:23 Ai olat ni dung bongot ahu tumopot raja Firaun mangkatai marhitehite goarmi, ganda do jahatna tu bangso on, jala ndang dipalua Ho bangsom.

6:1 Dung i ninna Jahowa ma tu si Musa: Idaonmu ma annon sibahenonku tu raja Firaun, ai marhitehite tangan na gogo loasonna ma hamu laho, jala marhitehite tangan na gogo onjaronna hamu sian tanona.

6:2 Angkup ni didok Debata ma tu si Musa: Ahu do Jahowa, ninna.

6:3 Jala hupapatar Ahu tu si Abraham, tu si Isak, dohot tu si Jakkob, margoar Debata na sun hinagogo, alai ndang dipabotoboto nasida ianggo goarhu Jahowa.

6:4 Hupahot do huhut padanhu tu nasida, mangalehon tu nasida tano Kanaan, tano paisolatannasida.

6:5 Jala nunga hutangihon angguhangguk ni halak Israel, angka na pinarhatoban ni halak Misir, jala marningot Ahu di padanhu.

6:6 Dibahen i paboa ma tu halak Israel: Ahu do Jahowa, jala paruaronku do hamu sian angka ulaon rodi ni halak Misir, jala paluaonku do hamu sian parhatobanonnasida, jala tobusonku do hamu marhitehite tangan na toltol dohot marhitehite angka uhum godang.

6:7 Jala ainonku do hamu gabe bangsongku, Ahu gabe Debatamuna; asa diboto hamu, Ahu do Jahowa, Debatamuna, na paruar hamu sian ulaon rodi ni Misir.

6:8 Asa hutogihon hamu tu tano naung humangmangkon lehononku tu si Abraham, si Isak dohot tu si Jakkob. Lehononku ma i bahen partalianmuna, Ahu do Jahowa.

6:9 Dung i dipaboa si Musa ma songon i tu halak Israel. Alai ndang ditangihon nasida si Musa dibahen hagogotan ni tondi dohot dibahen ulaon na renge i.

6:10 Jadi didok Jahowa ma tu si Musa, ninna ma:

6:11 Topot ma, dok ma tu Firaun, raja ni Misir, asa diloas halak Israel ruar sian tanona.

6:12 Alai ninna si Musa ma di jolo ni Jahowa: Ida ma, gari halak Israel ndang ditangihon ahu, didia ma tagamon tangihonon ni raja Firaun ahu? Jala pardila na hallang do ahu.

6:13 Jadi didok Jahowa ma tu si Musa dohot tu si Aron jala dilehon parenta dohononnasida tu halak Israel dohot tu Firaun, raja ni Misir, asa diparuar halak Israel sian tano Misir.

6:14 On ma angka horongna marompuompu. Angka anak ni si Ruben, buhabaju ni si Israel: si Hanok dohot si Pallu, Hezron dohot Karmi; i ma angka ompu Sian si Ruben.

6:15 Ia angka anak ni si Simeon: Jemuel, Jamin, Ohad, Jakin, Zohar dohot Saul, anak ni boru Kanaan; i ma angka ompu sian si Simeon.

6:16 Ia angka goar ni anak ni si Lepi mangihuthon ompunasida be: si Gerson, Kohat dohot Merari; ia umur ni si Lepi saratus tolupulu pitu taon lelengna.

6:17 Ia angka anak ni si Gerson: Libui dohot Simei mangihuthon ompunasida be.

6:18 Ia angka anak ni si Kohat: Amram, Isebar, Hebron dohot Usiel; ia umur ni si Kohat saratus tolupulu tolu taon lelengna.

6:19 Ia angka anak ni si Merari: Mahli dohot Musi. I ma angka ompu ni si Lepi mangihuthon partubuna.

6:20 Alai dibuat si Amram ma si Jokhebed, namboruna i bahen jolmana, gabe ditubuhon ma di ibana si Aron dohot si Musa. Ia umur ni si Amram saratus tolupulu pitu taon lelengna.

6:21 Ia angka anak ni si Isebar: Kora, Nepeg dohot Sikri.

6:22 Ia angka anak ni si Usiel: Misael, Elzapan dohot Sitri.

6:23 Alai dibuat si Aron ma si Eliseba, boru ni si Aminadab, iboto ni si Nahason bahen jolmana; jala ditubuhon di ibana si Nadab dohot si Abihu, si Eleasar dohot si Itamar.

6:24 Ia angka anak ni si Kora: Asir, Elkana dohot Abiasap; i ma angka ompu ni halak Kora.

6:25 Alai anggo si Eleasar, anak ni si Aron, dibuat do sada sian angka boru ni si Putiel bahen jolmana, jala ditubuhon di ibana si Pinehas; i ma angka horong ni halak Lepi marompuompu mangihuthon marganasida be.

6:26 I ma si Aron dohot si Musa, na pinangkulingan ni Jahowa mandok tu nasida: Togihon hamu ma halak Israel ruar sian tano Misir mangihuthon punguan nasida be.

6:27 Nasida ma angka na mandok tu Firaun, raja sian Misir, asa ditogihon nasida halak Israel ruar sian Misir, i ma si Musa dohot si Aron.

6:28 Jadi di na sadari i dipangkulingi Jahowa si Musa di tano Misir.

6:29 Didok Jahowa ma tu si Musa: Ahu do Jahowa, patolhas ma tu Firaun, raja ni Misir, sude hata na hutonahon tu ho.

6:30 Alai ninna si Musa ma di jolo ni Jahowa: Ida ma, pardila na hallang do ahu, didia ma tagamon tangihonon ni Firaun i ahu.

7:1 Alai ninna Jahowa ma tu si Musa: Ida ma, nunga hupabangkit ho gabe Debata ni raja Firaun, ia si Aron, hahami gabe panurirangmu.

7:2 Hatahononmu ma sude hata na hutonahon tu ho, jala si Aron hahami paboahon tu raja Firaun, asa diloas halak Israel ruar sian tanona.

7:3 Alai anggo Ahu, patangkangonku ma roha ni raja Firaun, asa hupatorop angka tanda dohot halongangan di tano Misir.

7:4 Jala ndang tangihonon ni raja Firaun hamu, asa huampehon tanganku tu Misir, jala huparuar angka punguanku, i ma bangsongku, halak Israel i sian tano Misir marhitehite uhum angka na balga.

7:5 Asa tung diboto halak Misir, Ahu do Jahowa, molo hupatoltol tanganku tu atas Misir, jala huparuar halak Israel sian tongatonganasida.

7:6 Jadi dibahen si Musa dohot si Aron ma, songon na tinonahon ni Jahowa tu nasida, songon i dibahen nasida.

7:7 Alai ualupulu taon ma umur ni si Musa, ia umur ni si Aron ualupulu tolu taon, di na mangkatai nasida dohot raja Firaun.

7:8 Dung i ninna Jahowa ma tu si Musa dohot tu si Aron songon on:

7:9 Molo didok raja Firaun mandok hamu: Patupa hamu sada halongangan, jadi dohononmu ma tu si Aron: Buat ma tungkotmi, jala timpalhon tu jolo ni raja Firaun, gabe ulok ma i.

7:10 Dung i ditopot si Musa dohot si Aron ma raja Firaun, jala dibahen nasida ma songon na tinonahon ni Jahowa, ditimpalhon si Aron ma tungkotna i tu jolo ni raja Firaun dohot tu jolo ni angka naposona, gabe ulok ma i.

7:11 Dung i ditonahon raja Firaun ma ro dohot angka partondung dohot angka parsibalik mata. Jadi dohot ma nasida, angka parsibalik mata ni Misir mambahen songon i marhitehite tabasnasida.

7:12 Dipantimpalhon be ma tungkotna, gabe ulok ma angka i; alai dibondut tungkot ni si Aron ma tungkotnasida i.

7:13 Jadi tangkang ma roha ni raja Firaun, jala ndang ditangihon nasida, songon na nidok ni Jahowa hian.

7:14 Dung i ninna Jahowa ma tu si Musa: Na tangkang do roha ni raja Firaun, dijua do mangaloas laho bangso i.

7:15 Laho ma ho sogot manogot i tumopot raja Firaun; ida ma na ruar do ibana tu aek, dapothon ma ibana tu pasir ni batang aek i, jala tiop ma di bagasan tanganmu tungkot na gabe ulok i.

7:16 Jala dok ma tu ibana: Jahowa, Debata ni halak Heber marsuru ahu tumopot ho mandok tu ho: Loas ma bangsongku laho, asa disomba Ahu di halongonan; alai ida ma, ndang ditangihon ho rasirasa nuaeng.

7:17 Boti didok Jahowa: Botoonmu ma sian tanda on, paboa Ahu do Jahowa: Ida ma, lipathononku ma tungkot na di bagasan tanganku tu aek na di bagasan batang aek i, jadi muba ma i gabe mudar.

7:18 Jadi mate ma dengke na di bagasan batang aek i, jala bau batang aek i, jala gialan halak Misir manginum aek sian batang aek i.

7:19 Dung i ninna Jahowa ma tu si Musa: Dok ma tu si Aron: Buat ma tungkotmi, jala patoltol tanganmi tu atas aek angka na di tano Misir, tu atas ni angka batang aek di nasida, tu atas ni angka halian aek, tu atas ni angka ambar dohot tu atas ni saluhut angka parpunguan aek, asa gabe mudar saluhut, gabe mudar di sandok tano Misir, nang di bagasan poting, nang di bagasan panguhatan.

7:20 Jadi dibahen si Musa dohot si Aron ma, songon na tinonahon ni Jahowa, dihindat ma tungkot i tu ginjang, jala dilipathon tu aek, na di bagasan batang aek i di jolo ni raja Firaun dohot di jolo ni angka naposona, jadi muba ma sude aek na di bagasan batang aek i, gabe mudar.

7:21 Jadi rage ma dengke, angka na di bagasan batang aek i jala bau batang aek i, jala ndang tarinum halak Misir aek na sian batang aek i, ai gabe mudar do i di sandok tano Misir.

7:22 Alai angka parsibalik mata ni Misir pe dibahen do songon i marhitehite tabasnasida, jadi laos tangkang ma roha ni raja Firaun, jala ndang ditangihon nasida, songon na nidok ni Jahowa hian.

7:23 Dung i humusor ma raja Firaun laho muli tu jabuna, laos so mangilala rohana, nang disi.

7:24 Alai saluhut halak Misir mangkali aek siinumon humaliang batang aek i, ai ndang tarinum nasida aek na sian batang i.

7:25 Pola gok pitu borngin lelengna, dung dilipati Jahowa badan i.

8:1 Dung i ninna Jahowa ma tu si Musa: Laho ma ho tumopot raja Firaun, jala dok ma tu ibana: Boti tona ni Jahowa: Loas ma laho bangsongki, asa disomba nasida Ahu.

8:2 Alai molo dijua ho mangaloas laho, ida ma, toruanku ma sandok gomgomanmu marhitehite angka tohuk.

8:3 Asa gumamang batang aek i dibahen tohuk, angka na manjangkiti jala bongot tu jabum dohot tu bilut podomanmu ro di hasurmu dohot tu bagas ni angka naposom dohot tu bangsom dohot tu tataringmi dohot tu pangananmu.

8:4 Jangkitan ni angka tohuk ma ho dohot bangsom ro di angka naposom.

8:5 Dung i ninna Jahowa ma tu si Musa: Dok ma tu si Aron: Patoltol ma tanganmu dohot tungkotmu tu ginjang ni angka batang aek, angka halian aek dohot tu ginjang ni angka ambar panangkokkon angka tohuk tu tano Misir.

8:6 Jadi dipatoltol si Aron ma tanganna tu ginjang ni aek angka na di Misir, gabe nangkok ma angka tohuk jala ditutup tano Misir.

8:7 Dung i dibahen angka parsibalik mata ma huhut songon i marhitehite tabasnasida, gabe dipanangkok ma angka tohuk di tano Misir.

8:8 Dung i dijou raja Firaun ma si Musa dohot si Aron, didok ma: Martangiang ma hamu tu Jahowa, asa dipadao angka tohuk i sian ahu dohot sian bangsongku, huloas bangso i, asa mamele nasida tu Jahowa.

8:9 Dung i ninna si Musa ma tu raja Firaun: Guru dokmu ahu, andigan ma ondihononku ho dohot angka naposom dohot bangsom asa diragehon angka tohuk i sian ho dohot sian angka jabum, holan di bagasan batang aek i tading.

8:10 Jadi ninna raja i ma: Antong marsogot ma. Songon na nidokmi ma ninna si Musa, asa tung ditanda ho, ndang adong manang ise songon Jahowa Debatanami.

8:11 Ingkon munsat angka tohuk i sian ho dohot sian angka bagasmu dohot sian angka naposom dohot sian bangsom; holan di bagasan batang aek i tading.

8:12 Jadi ruar ma si Musa dohot si Aron sian jolo ni raja Firaun, dung i mangangguhi ma si Musa tu Jahowa ala hata tohuk, angka na pinarona tu raja Firaun.

8:13 Jadi dibahen Jahowa ma songon na nidok ni si Musa, marragean ma angka tohuk i sian angka bagas, sian angka alaman dohot sian angka ladang.

8:14 Jadi dipagugun nasida ma angka bangke i margugungugun, gabe bau ma tano i.

8:15 Alai dung diida raja Firaun nunga lumumbang, gabe dipatangkang ma rohana, jala ndang ditangihon hatanasida, songon na nidok ni Jahowa hian.

8:16 Dung i ninna Jahowa ma tu si Musa: Dok ma tu si Aron: Patoltol ma tungkotmi, jala lipathon tu orbuk ni tano i, asa gabe rongit ranggas ma i di sandok tano Misir.

8:17 Jadi dibahen nasida ma songon i, dipatoltol si Aron ma tanganna tumiop tungkotna, jala dilipathon tu orbuk ni tano i, gabe rongit ranggas ma i di jolma dohot di pinahan; nasa orbuk ni tano i manjadi rongit ranggas di sandok tano Misir.

8:18 Angka parsibalik mata pe dibahen ma songon i marhitehite tabasnasida, parohon angka rongit ranggas nian, hape ndang tarjadisa. Jadi disonggopi angka rongit ranggas i ma jolma dohot pinahan.

8:19 Jadi ninna angka parsibalik mata ma tu raja Firaun: Jadijadian ni Debata do i. Alai laos tangkang do anggo roha ni raja Firaun, jala ndang ditangihon hatanasida, songon na nidok ni Jahowa hian.

8:20 Dung i ninna Jahowa ma tu si Musa: Pasogot ma manogot i hehe mandapothon tu jolo ni raja Firaun; ida ma, ruar do ibana laho tu aek, dok ma tu ibana: Songon on do tona ni Jahowa: Loas ma bangsongku laho, asa disomba nasida Ahu.

8:21 Ai molo so loasonmu bangsongku laho, ida ma paroonku ma dompak ho dohot dompak angka naposom dohot dompak bangsom dohot dompak angka bagasmu angka gulomitgulomit, asa gok gulomitgulomit angka bagas ni halak Misir dohot tano inganannasida i.

8:22 Marhasurungan ma bahenonku di ari na sasada i anggo tano Gosen inganan ni bangsongki, na so tupa adong disi gulomitgulomit, asa ditanda ho, paboa Ahu, Jahowa di tongatonga ni tano i.

8:23 Patindangonku ma haluaon di holangkolang ni bangsongku dohot bangsomu; marsogot ma masa tanda i.

8:24 Jadi dibahen Jahowa ma songon i; ro ma marhulalan angka gulomitgulomit tu bagas ni raja Firaun dohot tu bagas ni angka naposona, ro di sandok tona Misir; tung siap do tano i dibahen angka gulomitgulomit i.

8:25 Jadi dijou raja Firaun ma si Musa dohot si Aron, jala didok ma: Laho ma hamu mamele tu Debatamuna di tano on.

8:26 Alai ninna si Musa ma: Ndang jadi songon i bahenon, ai pantang ni halak Misir pelehononnami tu Jahowa Debatanami; ida ma, ia hupelehon hami pantang ni halak Misir di jolonasida, nda dangguran nasida ma hami dohot batu?

8:27 Loas ma hami mardalan tu halongonan partoluarian mamele tu Jahowa, Debatanami, songon na nidokna i tu hami.

8:28 Jadi ninna raja Firaun ma: Antong huloas pe hamu laho, asa mamele hamu tu Jahowa, Debatamuna, di halongonan, asal unang madaohu hamu laho, jala tangiangkon hamu ahu.

8:29 Dung i ninna si Musa ma: Ida ma, ruar ma ahu sian lambungmon, jala martangiang pe ahu tu Jahowa, asa dipadao marsogot angka gulomitgulomit i sian Firaun, sian angka naposona dohot sian bangsona, asal unang be dipaotooto Firaun hami, so loasonna bangso i laho mamele tu Jahowa.

8:30 Jadi ruar ma si Musa sian lambung ni Firaun, jala martangiang ibana tu Jahowa.

8:31 Jadi dibahen Jahowa ma songon na nidok ni si Musa, dipadao ma gulomitgulomit i sian Firaun, sian angka naposona dohot sian bangsona, ndang tading nanggo sada.

8:32 Hape dipatangkang raja Firaun do rohana, nang sahali on, jala ndang diloas laho bangso i.

9:1 Dung i ninna Jahowa ma tu si Musa: Laho ma ho tumopot Firaun jala dok ma tu ibana: Songon on do tona ni Jahowa, Debata ni halak Heber: Loas ma bangsongku laho, asa disomba nasida Ahu.

9:2 Ai molo manjua ho mangaloas nasida laho, sai gogo bahenonmu maniopi nasida.

9:3 Ida ma, mangonai ma tangan ni Jahowa tu pinahanmu na di ladang tu angka hoda, halode, unto, lombu dohot tu angka birubiru, hona bondil na rahat situtu.

9:4 Jala marhasurungan pamelok ni Jahowa di pinahan ni halak Israel sian pinahan ni halak Misir, ndang adong mate sian sandok pinahan ni halak Israel, nanggo sada.

9:5 Dung i dibuhul Jahowa ma tingkina, marsogot ma, ninna bahenon ni Jahowa na nidokna ondeng tu tano i.

9:6 Jadi marsogotna i dibahen Jahowa ma songon i: Marragean ma sandok pinahan ni halak Misir, alai sian pinahan ni halak Israel, ndang adong mate nanggo sada.

9:7 Jadi disuru Firaun ma maningkir, jala ida ma, ndang adong mate sian pinahan ni Israel, nanggo sada. Alai laos tangkang anggo roha ni Firaun, jala ndang diloas laho bangso i.

9:8 Dung i ninna Jahowa ma tu si Musa dohot tu si Aron: Gomaki hamu ma sirabun sian tataring, gok tanganmuna, jala disampakkon si Musa ma i dompak langit di jolo ni Firaun.

9:9 Asa gabe orbuk do i tu sandok tano Misir, jala songgop tu jolma dohot tu pinahan, gabe baro na mapultak, gabe ngenge na birong di sandok tano Misir.

9:10 Jadi digomahi nasida ma sirabun sian tataring, jala didapothon tu jolo ni Firaun, gabe disampakkon si Musa ma i dompak langit, manjadi baro ma i, ngenge na birong angka na mapultak di jolma dohot di pinahan.

9:11 Jadi ndang tarbahen angka parsibalik mata jongjong di jolo ni si Musa, dibahen angka baro i, ai baro on do nang angka parsibalik mata dohot sude halak Misir.

9:12 Alai dipatangkang Jahowa do anggo roha ni Firaun; jadi ndang ditangihon hatanasida, songon na nidok ni Jahowa hian tu si Musa.

9:13 Dung i ninna Jahowa ma tu si Musa: Pasogot ma manogot mandapothon tu jolo ni Firaun, jala dok ma tu ibana: Songon on do tona ni Jahowa, Debata ni halak Heber: Loas ma bangsongku laho, asa disomba nasida Ahu.

9:14 Ai anggo sahali on tongosonku ma saluhut torutorungku tu roham dohot tu angka naposom dohot tu bangsom, asa tung ditanda ho, na so adong songon Ahu on di sandok tano on.

9:15 Ai patoltolonku ma nuaeng tanganku jala honahononku ma tu ho dohot tu bangsom begu antuk, asa tung siap ho sian tano on.

9:16 Ala ni do antong umbahen na hupatindang ho, asa hupataridahon tu ho gogongku, jala asa tung tarbarita Goarhu di liat portibi on.

9:17 Sai datdatanmu dope mangalo bangsongki, ndang loasonmu nasida laho?

9:18 Ida ma, marsogot songon on paroonku ma udan ambolas na por situtu, na so dung masa songon i di tano Misir, olat ni ari haoojakna rasirasa nuaeng.

9:19 On pe suru ma papunguhon pinahanmu ro di sude ugasanmu na di ladang; nasa jolma dohot pinahan na jumpang di ladang, so pinapungu tu jabu, ia dapot ditinggang ambolas i nasida, rage ma i.

9:20 Manang ise sian angka naposo ni Firaun na mabiar mida hata ni Jahowa diluahon ma angka naposona dohot pinahanna tu jabu.

9:21 Alai manang ise na so marateatehon hata ni Jahowa, dipasombu ma angka naposona dohot pinahanna di ladang.

9:22 Dung i ninna Jahowa ma tu si Musa: Patoltol ma tanganmu dompak langit, asa ro udan ambolas tu sandok tano Misir, hona jolma dohot pinahan ro di nasa suansuanan di tano Misir.

9:23 Jadi dipatoltol si Musa ma tungkotna dompak langit, gabe diparo Jahowa ma ronggur dohot udan ambolas, sumiksaksiksak huhut hilap tu tano on. Jadi diparo Jahowa ma udan ambolas tu tano Misir.

9:24 Alai ro udan ambolas mardongan api na marhimpalhimpal di tonga ni ambolas i, na por situtu, ndang dung songon i masa di sandok tano Misir, olat ni dung gabe bangso Misir i.

9:25 Jadi ditinggang udan ambolas i ma sandok na di ladang di sandok tano Misir, sian jolma ro di pinahan ro di nasa suansuanan di ladang ditinggang udan ambolas i jala digashon ma sude hau di ladang.

9:26 Holan di tano Gosen, na niinganan ni halak Israel, ndang masa udan ambolas.

9:27 Dung i disuru Firaun ma manjou si Musa dohot si Aron, jala didok tu nasida: Nunga mardosa ahu anggo sahali on; na tigor do Jahowa, alai anggo ahu dohot bangsongki halak parjahat do.

9:28 Martangiang ma hamu tu Jahowa, nunga sae masa angka soara ronggur ni Debata dohot udan ambolas i, huloas pe hamu laho, asa unang be hamu tinggal dison.

9:29 Jadi didok si Musa ma tu ibana: Disi ruar ahu sian huta i, paherbangonku ma tanganku dompak Jahowa; mansohot ma angka soara ronggur, jala ndang be ro udan ambolas, asa tung ditanda ho, gok di Jahowa do tano on.

9:30 Alai anggo ho dohot angka naposom, huboto hian do na so mabiar hamu maradophon Debata Jahowa.

9:31 Ianggo hori dohot eme dapotsa ditinggang, ai boltok do ia eme, bibi ia hori.

9:32 Alai anggo singkoru eme dohot hadio ndang ditinggang, ai umpudi do i.

9:33 Dung i ruar ma si Musa sian lambung ni Firaun tu balian huta, jala dipaherbang tanganna dompak Jahowa, jadi mansohot ma angka soara ni ronggur dohot ambolas, udan i pe ndang be use tu tano i.

9:34 Alai dung diida Firaun naung mansohot udan dohot ambolas dohot angka soara ni ronggur dipatangkang rohana, ibana nang naposona.

9:35 Jadi laos tangkang roha ni Firaun, jala ndang diloas laho halak Israel songon na nidok ni Jahowa hian marhitehite si Musa.

10:1 Dung i ninna Jahowa ma tu si Musa: Laho ma ho tumopot Firaun, ai nunga hupatangkang rohana dohot roha ni angka naposona, asa hupatupa angka tandangkon di tongatongana.

10:2 Asa dipajojor ho sogot tu pinggol ni anakmu dohot pahompum, na hubahen i di Misir dohot tandangku angka na hupatindang di tongatonganasida, asa tung diboto hamu, Ahu do Jahowa.

10:3 Jadi laho ma si Musa dohot si Aron tumopot Firaun, jala didok ma tu ibana: Songon on do tona ni Jahowa, Debata ni halak Heber: Sadia leleng on juaonmu paundukkon roham maradophon Ahu? Loas ma laho bangsongku, asa disomba nasida Ahu.

10:4 Alai molo manjua ho mangaloas bangsongku laho, ida ma paroonku ma marsogot angka sihapor tu gomgomanmi.

10:5 Asa ditutup sihapor i sisik ni tano i, pola ndang tarida tano i jala panganonna ma ebaeba ni na malua, na tading di hamu sian udan ambolas i, jala gagatonna ma saluhut hau, angka na martumbur di hamu di ladang.

10:6 Jala gohan ni sihapor ma bagasmu dohot angka bagas ni saluhut naposom dohot angka bagas ni sandok halak Misir; na so dung songon i diida angka amam dohot angka ompum olat ni ari, dung adong nasida di tano on rasirasa sadari on. Dung i humusor ma si Musa jala ruar sian lambung ni Firaun.

10:7 Dung i didok angka naposo ni Firaun ma tu ibana: Sadia leleng on sambil on ni bayo on hita? Loas ma laho halak i, asa disomba nasida Jahowa, Debata nasida i; ndang dope mamoto roham naung mago Misir?

10:8 Jadi mulak ma si Musa dohot si Aron diboan tu jolo ni Firaun, gabe didok raja i ma tu nasida: Laho ma hamu, somba hamu ma Jahowa, Debatamuna i! Ise do tahe angka na laho i?

10:9 Dung i didok si Musa ma: Saluhut hami naeng laho angka dakdanaknami dohot na tuatuanami, udur dohot anaknami dohot borunami, birubirunami dohot lombunami, ai pesta ni Jahowa masa di hami.

10:10 Jadi didok raja i ma tu nasida: Songon pangaloashu di hamu dohot di posoposomuna laho, songon i ma pandongani ni Jahowa di hamu. Ida ma, nda na jat do tahi ni rohamuna?

10:11 Ndang songon i ua hamu angka baoa ma laho jala marsomba tu Jahowa, ai i do na pinangidomuna hian. Jadi dipabali ma nasida sian adopan ni Firaun.

10:12 Dung i ninna Jahowa ma tu si Musa: Patoltol ma tanganmu dompak tano Misir ala angka sihapor, asa manaek nasida tu tano Misir, jala digagat nasa suansuanan ni tano i, nasa na tinebahon ni udan ambolas i.

10:13 Jadi dipatoltol si Musa ma tungkotna tu ginjang ni tano Misir, gabe diparo Jahowa ma alogo sian purba tu tano i manipat sadari saborngin lelengna; tole manogotna i diboan alogo sian purba ma angka sihapor.

10:14 Jadi manaek ma angka sihapor tu sandok tano Misir jala songgop tu sandok gomgoman Misir mansai torop, ndang dung songon i tudosanna sihapor na sai laon, nang sogot.

10:15 Ai tung ditutup do sisik ni sandok tano i, pola holom tano i dibahen, gabe digagat ma sude suansuanan ni tano i ro di sude parbue ni hau, angka na tinebahon ni ambolas i, jadi ndang adong tading agia aha na rata di hau dohot di suansuanan ni ladang di sandok tano Misir.

10:16 Jadi humalaput ma Firaun manjou si Musa dohot si Aron, jala didok ma: Nunga mardosa ahu dompak Jahowa, Debatamuna i dohot dompak hamu.

10:17 On pe, sai marpamuati ma roham di dosangki sahali on dope, jala martangiang ma hamu tu Jahowa, Debatamuna, asa dipadao sian ahu holan hamatean on na ma.

10:18 Jadi ruar ma si Musa sian lambung ni Firaun, jala martangiang tu Jahowa.

10:19 Jadi, dipasuhar Jahowa ma alogo sian hasundutan mansai pur, gabe dilualua ma angka sihapor jala direongkon tu laut arung, ndang adong tading sihapor nanggo sada di sandok gomgoman Misir.

10:20 Alai dipatangkang Jahowa do roha ni Firaun, jala ndang diloas laho halak Israel i.

10:21 Dung i didok Jahowa ma tu si Musa: Patoltol ma tanganmu dompak langit asa masa na holom marimpotimpot tu tano Misir, pola dadapdadap jolma dibahen na holom.

10:22 Jadi dipatoltol si Musa ma tanganna dompak langit, gabe masa ma na holom marimpotimpot di sandok tano Misir tolu borngin lelengna.

10:23 Ndang diida manang ise donganna, jala ndang hehe manang ise sian ingananna, na tolu borngin i. Alai anggo di sandok halak Israel torang do di inganannasida.

10:24 Jadi dijou Firaun ma si Musa, jala didok ma: Laho ma hamu, marsomba ma hamu tu Jahowa, holan birubirumuna dohot lombumuna tading di bara, alai anggo anakkonmuna itenang mardalan rap dohot hamu.

10:25 Alai ninna si Musa ma: Ingkon lehononmu do tu tangannami dohot angka pelean sipotongon dohot pelean situtungon, sipelehononnami tu Jahowa, Debatanami.

10:26 Asa ingkon dohot do pinahannami mardalan rap dohot hami, ndang tading nanggo sada tambirik, ai sian i do buatonnami laho marsomba tu Jahowa, Debatanami; jala ndang huboto hami manang aha sisombahononnami tu Jahowa, paima sahat hami ro disi.

10:27 Alai dipatangkang Jahowa do roha ni Firaun, gabe ndang olo ibana mangaloas nasida laho.

10:28 Dung i ninna Firaun i ma tu si Musa: Laho ma ho sian lambungkon, jaga ho, unang be huida ho, ai sadari idaonmu bohingkon, ingkon mate ho bunuon.

10:29 Jadi didok si Musa ma: Songon na nidokmi ma, ndang be idaonku bohim.

11:1 Dung i didok Jahowa ma tu si Musa: Sada nari dope uhum i paroonku tu Firaun dohot tu Misir, dung i loasonna ma hamu laho sian i; ndada asal loasonna sudena, lam onjaronjaronna do hamu sian i.

11:2 Antong dok ma tu pinggol ni bangso i, asa dipangido be baoa dohot boruboru sian alealena be angka ulaula perak dohot ulaula sere.

11:3 Nunga disosoi Jahowa hian halak Misir marasi ni roha di bangso i. Si Musa pe halak na sangap situtu do di tano Misir, diida angka naposo ni Firaun diida na torop i.

11:4 Dung i ninna si Musa ma: Songon on do hata ni Jahowa: Marhira tonga borngin ruar ma Ahu umbolus tongatonga ni Misir.

11:5 Jadi mate ma nasa buhabaju di tano Misir, sian buhabaju ni Firaun, na hundul di habangsana hian, ro di buhabaju ni hatoban boruboru na di pudi ni pandudaan dohot sude buhabaju ni pinahan.

11:6 Jadi masa ma angguk badar di sandok tano Misir, na so dung masa songon i na sai laon, nang sogot pe.

11:7 Alai anggo di sude halak Israel ndang mahua nanggo biangna sada, songon i jolma ro di pinahan, asa tung ditanda hamu pamelok ni Jahowa di halak Israel sian halak Misir.

11:8 Dung i tuat ma saluhut angka naposomon tumopot ahu, jala sombaonnasida ma ahu mandok: Ruar ma ho dohot sandok bangso na sahat tu ho; dung salpu songon i ruar ma ahu. Jadi ruar ma si Musa sian lambung ni Firaun piripirion situtu.

11:9 Alai ninna Jahowa hian ma tu si Musa; ndang tagamon tangihonon ni Firaun hamu, asa tung torop halongangan angka sibahenonku di tano Misir.

11:10 Jadi nunga dibahen si Musa dohot si Aron sude angka halongangan on di jolo ni Firaun. Alai dipatangkang Jahowa do roha ni Firaun, gabe ndang diloas halak Israel laho sian tanona.

12:1 Dung i didok Jahowa hian ma tu si Musa dohot tu si Aron di tano Misir songon on.

12:2 Bulan on ma parmulaan manjujur angka bulan di hamu, i ma sipahasada di hamu sian angka bulan ni na sataon:

12:3 Dok hamu ma tu sandok luhutan ni Israel songon on: Di ari sampulu di bulan on, dibuat be ma sada anak ni birubiru marguru tu torop ni ripe na marsaompu, sada birubiru ganup ripe.

12:4 Alai molo maotikku na saripe so sudasa anak ni birubiru sada, dibuat ma i rap dohot hombar bagasna, na jumonok tu jabuna, marguru tu bilangan ni jolma, etongan tu sada birubiru marguru tu na tarpangansa be.

12:5 Alai ingkon anak ni birubiru tunggal na so marlindang, marumur sataon. Sian anak ni birubiru dohot sian hambing buatonmuna.

12:6 Jala ingkon paradeonmuna do i ro di ari sampuluopat di bulan on. Dung i seaton ni sandok luhutan ni Israel ma i mareak bot ari.

12:7 Dung i buatonnasida ma sian mudar i jala daishononna tu na dua tiang parhinsuhinsuan dohot tu tohang ni angka bagas, parmanganonnasida i.

12:8 Asa panganonnasida ma juhut na pinanggang tu api di na saborngin i, mardongan sagusagu na so niigaran dohot ingkau paet panganonnasida.

12:9 Na so tupa tata panganonmuna i, manang na nilompa di bagasan aek, ingkon panggangon tu api do, uluna ro di haehaena dohot butuhana.

12:10 Jala ndang jadi tebahononmuna sian i ro di manogotna i. Tu api do mosokkononhon ebaebana ro di manogotna i.

12:11 Songon on do pangalahomuna laho manganhon: Gontingmuna marhohos, patmuna marsipatu, jala tungkotmuna di bagasan tanganmuna, marpanilu ma hamu manganhon; ai Paska ni Jahowa do i.

12:12 Ai bolusonku ma di na saborngin i tano Misir, jala bunuonku sandok buhabaju di tano Misir, sian jolma ro di pinahan, jala bahenonku ma angka uhum tu saluhut debata ni Misir, Ahu, Jahowa i.

12:13 Jadi mudar i ma gabe partinandaanmuna di bagas angka na niingananmuna i, molo huida mudar i, laosanku ma hamu, asa unang masa tu hamu uhum hamagoan, di na huhonahon tu tano Misir.

12:14 Bahen parningotanmuna ma ari sadari on jala pestahononmuna ma i marulaon tu Jahowa, gabe patik salelenglelengna ma i ro di pinomparmuna parulahononmuna.

12:15 Panganonmuna ma sagusagu na so niigaran manipat pitu ari lelengna, di ari parjolo daehonmuna igarigar sian bagasmuna ai sai na siaphononhon do sian Israel manang ise na manganhon na niigaran sian ari parjolo ro di ari papituhon.

12:16 Pansangon ma di ari parjolo luhutan na badia, di ari papituhon pe marluhutan na badia ma hamu: Ndang jadi bahenon agia aha ulaon disi, nda holan sipanganonna be na jadi hobason di hamu.

12:17 Sai ingot hamu ma angka sagusagu na so niigaran, ai di ari na sasada i do hutogihon angka punguanmuna ruar sian tano Misir; asa sai ingot hamu ari na sasada i bahen patik salelenglelengna ro di pinomparmuna.

12:18 Di bulan sipahasada, di ari sampulu opat mareak bot ari, panganonmuna ma sagusagu na so niigaran ro di ari duapulu sada i bodarina i.

12:19 Manipat na pitu ari lelengna, unang ma jumpang igarigar di bagasmuna. Ai sai siaphononhon do sian luhutan Israel manang ise na manganhon na niigaran, manang halak na buro manang isi ni tano i ibana.

12:20 Sandok na so jadi hamu manganhon sagusagu na niigaran; pangan hamu ma di sandok ingananmuna sagusagu na so niigaran.

12:21 Dung i dipio si Musa ma saluhut sintua ni Israel jala didok tu nasida: Pillit jala togu hamu ma di hamu angka anak ni birubiru i marguru tu torop ni ripemuna jala seat hamu Paska i.

12:22 Dung i buat hamu ma sarahutan sanggul, jala sornophon hamu tu mudar na di parbontaran i, jala daishon hamu tu tohang dohot tu na dua tiang sian mudar na di parbontaran i; alai unang ruar agia ise sian hamu sian pintu ni jabuna paima torang ari.

12:23 Ai mamolus ma Jahowa laho mambunu halak Misir. Jadi ia dung diida mudar di tohang dohot di tiang na dua i, gabe laosan ni Jahowa ma pintu i, ndang loasonna pangago i bongot tu jabumuna laho mambunu.

12:24 Antong ingot hamu ma hata i, gabe patik di ho dohot di angka anakmu ro di salelenglelengna.

12:25 Jala ia dung sahat hamu tu tano silehonon ni Jahowa tu hamu, songon na nidokna i, sai radoti hamu ma ulaon on.

12:26 Jala ia didok angka anakmuna tu hamu: Ulaon aha do on di hamu?

12:27 Dohononmuna ma: Pelean Paska do i di Jahowa, na nilaosanna i angka bagas ni halak Israel di Misir, di na binununa i halak Misir, alai dipalua anggo bagasta. Jadi dipaunduk bangso i ma nasida jala marsomba.

12:28 Dung i laho ma halak Israel jala dibahen nasida ma songon na tinonahon ni Jahowa tu si Musa dohot tu si Aron, songon i ma dibahen nasida.

12:29 Jadi marhira tonga borngin, dibunu Jahowa ma nasa buhabaju di tano Misir, sian buhabaju ni Firaun na hundul di habangsana hian, ro di buhabaju ni na tarhurung, na di bagas hurungan dohot nasa buhabaju ni pinahan.

12:30 Jadi hehe ma Firaun bornginna i, ibana dohot nasa naposona ro di sude halak Misir, gabe masa ma andung bolon di Misir, ai ndang adong bagas na so adong na mate di bagasan.

12:31 Jadi dijou raja i ma si Musa dohot si Aron laos bornginna i, ninna ma: Borhat ma hamu ruar sian tongatonga ni bangsongki, nang hamu, nang halak Israel; laho ma hamu marsomba tu Jahowa, songon na nidokmuna i.

12:32 Boan hamu ma dohot birubirumuna dohot lombumuna, songon na nidokmuna i, laho ma hamu, jala pasupasu hamu ma dohot ahu.

12:33 Jadi dionjaronjar halak Misir ma bangso i pahatophon ruar nasida sian tano i, ai angka ninna do: Mate hami maon luhutna.

12:34 Jadi diusung bangso i ma na niitakna, tagan so diigari, ditompi be balanga panggorengan.

12:35 Jadi dibahen halak Israel ma songon na nidok ni si Musa, dipangido hian ma sian halak Misir angka ulaula perak dohot ulaula sere dohot angka ulos.

12:36 Alai nunga disosoi Jahowa hian halak Misir marasi ni roha di bangso i gabe dilehon pinangidonasida i hira tabantaban do i diboan nasida sian halak Misir.

12:37 Asa borhat ma halak Israel sian Ramses tu Sukot arga onom ratus ribu halak toropna mardalan pat, so padohot angka dakdanak.

12:38 Torop ma dohot halak sileban nangkok rap dohot nasida, ro di angka birubiru dohot lombu dohot pinahan mansai godang.

12:39 Dung i dilompa nasida ma na niitak, na binoannasida sian Misir bahen sagusagu na so niigaran, ai ndang niigaran hian, ai na nionjaronjar do nasida sian Misir, jadi ndang sanga nasida, sipanganon na asing pe ndang adong dihobas.

12:40 Ia leleng ni halak Israel maringan di Misir, opat ratus tolupulu taon do.

12:41 Jadi dung salpu ma opat ratus tolupulu taon i, boho ma di ari na sasada i, ruar ma sandok punguan ni Jahowa sian tano Misir.

12:42 Parulahononhon ma borngin na sasada on di Jahowa, ala tinogihonna i nasida ruar sian tano Misir; parningotan di Jahowa ma borngin na sasada i parulahonon ni sandok halak Israel ro di pinomparnasida sogot.

12:43 Dung i ninna Jahowa ma tu si Musa dohot tu si Aron: On ma patik ni Paska: Na so tupa halak na buro manganhon sian i.

12:44 Alai nasa hatoban, na tinuhor ni hepeng, dung disunati hamu, jadi ma panganonna sian i.

12:45 Halak paisolat dohot sipangan gaji pe, ndang jadi manganhon sian i.

12:46 Di bagasan jabu ma i panganon; ndang jadi boanonmu sian juhut i ruar sian jabu tu alaman, jala ndang jadi ponggolhononhon holiholina nanggo sada.

12:47 Ingkon sandok luhutan Israel mambahen songon i.

12:48 Alai molo adong halak na buro sorang tu ho, jala naeng radotanna Paska i tu Jahowa, ingkon sunatonna jolo nasa baoa na sorang tu ibana; dung pe i asa jadi jumonok ibana laho mangaradoti, asa sobokkon isi ni tano i hian ibana; alai nasa na so sinunat ndang jadi manganhon sian i.

12:49 Sada patik ma di isi ni tano hian dohot di halak na buro, na manginsur di tongatongamuna.

12:50 Jadi saluhut halak Israel mambahen songon i, hombar tu na tinonahon ni Jahowa tu si Musa dohot tu si Aron, songon i dibahen nasida.

12:51 Asa di ari na sasada i ma ditogihon Jahowa halak Israel ruar sian tano Misir, marguru tu punguannasida.

13:1 Dung i didok Jahowa ma tu si Musa, songon on:

13:2 Parbadiai di Ahu nasa buhabaju, na parjolo ruar sian bortian di halak Israel, di jolma dohot di pinahan, Ahu do nampunasa.

13:3 Jadi didok si Musa ma tu bangso i: Ingot hamu ma ari sadari on, haruruarmuna sian Misir, sian bagas parhatobanan, ai marhitehite tangan na gogo diparuar Jahowa hamu sian i, so tung dipangan hamu na niigaran.

13:4 Sadari on do hamu ruar di bulan Abib.

13:5 Ia dung sahat hamu ditogihon Jahowa tu tano ni halak Kanaan dohot Het i dohot Amori dohot Hevi dohot Jebusi tano naung minangmangkonna tu angka ompum mangalehon tu hamu tano habaoran ni susu dohot situak ni loba, sai radoti hamu ma ulaon i di bulan on.

13:6 Pitu ari ma panganonmuna sagusagu na so niigaran di ari papituhon i ma pesta di Jahowa.

13:7 Sagusagu na so niigaran ma panganonmuna na pitu ari i; ndang jadi dapot idaon di hamu igarigar, jala ndang jadi dapot idaon di hamu igarigar di sandok gomgomanmu.

13:8 Paboaonmu ma tu anakmu di ari na sasada i songon on: Ala ni na binahen ni Jahowa di ahu, di na ruar i ahu sian Misir.

13:9 Asa bahen partinandaan di bagasan tanganmu ma i, jala bahen parningotan di adopan ni matam, asa tung di bagasan pamanganmu patik ni Jahowa, paboa Jahowa manogihon ho ruar sian tano Misir marhitehite tangan na gogo.

13:10 Dibahen i radoti ma patik on di hajujumpang ni tingkina martaontaon.

13:11 Ia dung sahat ho diboan Jahowa tu tano ni halak Kanaan, songon na minangmangkonna tu ho dohot tu angka ompum, jala nunga sahat dilehon tu ho.

13:12 Pasahatonmu ma tu Jahowa, nasa anak na parjolo ruar sian bortian ro di nasa buhabaju di pinahan, angka na di ho, ia tunggal, Jahowa do nampunasa.

13:13 Alai nasa buhabaju sian halode, tobusonmu ma dohot anak ni birubiru; alai molo so ditobus ho, punokkon rungkungna; nasa buhabaju sian jolma pe di angka anakmi, tobusonmu do.

13:14 Jala molo disungkun anakmu ho sogot, aha do on? Dohononmu ma tu ibana: Marhitehite tangan na gogo ditogihon Jahowa hami ruar sian Misir, sian bagas parhatobanan.

13:15 Ai uju dipatangkang Firaun rohana manjua mangaloas hami laho, jadi dibunu Jahowa ma nasa buhabaju ni tano Misir, sian buhabaju ni jolma ro di buhabaju ni pinahan: Ala ni do hupelehon tu Jahowa nasa buhabaju tunggal; alai nasa buhabaju di angka anakku hutobus do.

13:16 Jala bahen partinandaan di bagasan tanganmu do i, jala bahen parningotan di holangkolang ni matam, paboa naung marhitehite tangan na gogo Jahowa paruarhon hami sian Misir.

13:17 Jadi dung diloas Firaun bangso i laho, ndada ditogihon Debata nasida sian dalan tu tano ni halak Palistim, atek pe jumonok nian sian i, ai ninna roha ni Debata do: Atek tung sumolsol dirina maon bangso i, ia diida nasida hamusuon, gabe mulak nasida maon tu Misir.

13:18 Dibahen i mangaliat bangso i ditogihon Debata sian dalan tu halongonan mangihutihut laut arung. Jadi marsinjata be halak Israel nangkok sian tano Misir.

13:19 Diboan si Musa huhut holiholi ni si Josep, ai pola do dipatolon halak Israel hian, ninna do: Sai na tingkiron ni Debata hamu; boan hamu ma dohot holiholingku sian on.

13:20 Jadi borhat ma nasida sian Sukot, jala marsaro di Etham, di partalpahan ni halongonan.

13:21 Jala Jahowa mardalan di jolonasida, ia arian marhitehite ombun na marsijongjong manogihon nasida di dalan i, ia bornginna i marhitehite api na marsijongjong manulu nasida, asa tarbahen nasida mardalan arian dohot borngin.

13:22 Ndang dung morot sian jolo ni bangso i ombun na marsijongjong arian dohot api na marsijongjong bornginna i.

14:1 Dung i ninna Jahowa ma tu si Musa songon on:

14:2 Dok ma tu halak Israel, asa mamedu nasida jala marsaro tondong ni Pi-Hakirot, di holangkolang ni Migdol dohot laut, tondong ni Baal Zephon, apala tondong ni ma nasida marsaro mardonokkon laut.

14:3 Jadi dohonon ni Firaun ma taringot tu halak Israel: Nunga lilu nasida di tano i, nunga dihapit halongonan i nasida.

14:4 Jadi patangkangonku ma roha ni Firaun, asa dilele nasida, asa marmulia Ahu di Firaun dohot di sandok paranganna, asa ditanda halak Misir, Ahu do Jahowa. Jadi dibahen nasida ma songon i.

14:5 Jadi dung tarbortik tu raja ni Misir naung lintun bangso i, gabe muba ma roha ni Firaun dohot roha ni angka naposona i maradophon Israel, angka didok nasida ma: Boasa tung tabahen songon i tung italoas halak Israel laho malua sian rodinta.

14:6 Jadi dipasang ma huretana, jala diarahon bangsona.

14:7 Dipambuat ma huhut onom ratus hureta angka na pinillit dohot nasa hureta na di Misir dohot tolu halak be parmusu di atas ni saluhutna.

14:8 Ai dipatangkang Jahowa do roha ni Firaun, raja ni Misir, asa dilele halak Israel, angka naung ruar marhitehite tangan na timbul.

14:9 Jadi dilele halak Misir ma nasida, gabe dapotsa ma nasida marsaro mardonokkon laut; nasa hoda, hureta ni Firaun ro di parsihundulna dohot paranganna mardonokkon Pi-Hakirot do, tondong ni Baal Zephon.

14:10 Jadi dung jumonok Firaun, gabe manatap ma halak Israel, jadi ida ma, halak Misir mangeahi nasida, gabe mabiar situtu nasida. Jadi mangangguhi ma halak Israel tu Jahowa.

14:11 Angka didok nasida ma tu si Musa: Dibahen na so adong tanoman di Misir huroha, umbahen ditogihon ho hami laho mate di halongonan? Boasa tung songon i bahenonmu tu hami, tung togihononmu hami ruar sian Misir?

14:12 Nda hudok hami hian tu ho di Misir songon on: Pasombu ma hami diparhatoban halak Misir, ai dengganan diparhatoban halak Misir hami, sian na mate di halongonan.

14:13 Jadi didok si Musa ma tu bangso i: Unang hamu mabiar, marsihohot ma rohamuna, jala ida hamu hamuliaon ni Jahowa, sibahenonna tu hamu sadari on; ai halak Misir, angka na niidamuna sadari on, ndang be idaonmuna nasida ro di salelenglelengna.

14:14 Jahowa do marporang humongkop hamu, asal hohom hamu.

14:15 Dung i didok Jahowa ma tu si Musa: Boasa sai mangangguhi ho tu Ahu? Dokkon ma halak Israel, asa borhat nasida.

14:16 Alai anggo ho hindat ma tungkotmi, jala patoltol tanganmu tu atas laut, jala patolak, asa dibolus halak Israel tongatonga ni laut i, mardalan di na mahiang.

14:17 Alai anggo Ahu ida ma patangkangonku ma roha ni halak Misir, asa dieahi nasida halak Israel; asa marmulia Ahu di Firaun dohot di sandok paranganna, di huretana dohot di angka parsihundulna.

14:18 Asa tung ditanda halak Misir, Ahu do Jahowa, ia dung marmulia Ahu di Firaun, di huretana dohot di angka parsihundulna.

14:19 Dung i borhat ma suruan ni Debata, na mardalan di jolo ni punguan ni Israel, jala laho ibana tu pudinasida, hehe ma dohot ombun na marsijongjong sian jolonasida, jala jongjong tu pudinasida.

14:20 Jadi sahat ma tu holangkolang ni parsaroan ni halak Misir dohot parsaroan ni Israel. Jadi holom ma ombun i sambariba, jala manondangi borngin na sambariba nari, gabe ndang masipadonohan be nasida manipat saborngin i.

14:21 Dung i dipatoltol si Musa ma tanganna tu atas laut, gabe mabaor laut i dibahen Jahowa marhitehite alogo na pur sian purba manipat saborngin i pahiang laut i, gabe tolak ma angka aek i.

14:22 Jadi bongot ma halak Israel tu tongatonga ni laut di na mahiang i, jadi hira dorpi angka aek i di siamun dohot di hambirangnasida.

14:23 Dung i dieahi halak Misir i nasida, jala bongot sian pudinasida, nasa hoda ni Firaun, angka huretana dohot angka parsihundulna tu tongatonga ni laut.

14:24 Jadi marhira torang ari, dibereng Jahowa ma tu parangan ni halak Misir sian api dohot ombun na marsijongjong, gabe guntur ma parangan ni halak Misir i.

14:25 Jala diantuk angka galapang ni huretanasida, gabe maol ditogu. Dung i didok halak Misir ma: Maporus ma hita maradophon Israel, ai Jahowa dongannasida mangalo halak Misir.

14:26 Dung i didok Jahowa ma tu si Musa: Patoltol ma tanganmu tu atas laut, asa sumuang angka aek i lingkup tu halak Misir, tu angka huretana dohot tu angka parsihundulna.

14:27 Jadi dipatoltol si Musa ma tanganna tu atas laut, gabe sumuang ma laut i tu dalanna hian mareak torang ari, gabe maporus ma halak Misir manjumpangkon aek i gabe ditunggalingkon Jahowa ma halak Misir tu tongatonga ni laut.

14:28 Ai sumuang ma angka aek i jala dilungkupi angka hureta dohot angka parsihundul ro di sude parangan ni Firaun, angka na mangihuthon nasida tu bagasan laut, ndang adong teba sian nasida nanggo sada.

14:29 Alai anggo halak Israel mardalan di na mahiang, di tongatonga ni laut i jala gabe dorpi di nasida angka aek i di siamun dohot di sihambirangnasida.

14:30 Asa dipalua Jahowa di na sadari i halak Israel sian tangan ni halak Misir, gabe diida halak Israel ma mate halak Misir i di topi laut i.

14:31 Jadi dung diida halak Israel tangan na timbul, na binahen ni Jahowa tu halak Misir, gabe mabiar ma bangso i mida Jahowa, jala porsea nasida di Jahowa dohot di si Musa, naposona i.

15:1 Dung i diendehon si Musa dohot halak Israel ma ende on di Jahowa, angka didok nasida ma songon on: Marende ma ahu tu Jahowa, ai marmulia situtu Ibana; hoda dohot parsihundulna diusophon tu bagasan laut.

15:2 Jahowa do hatogaonku dohot pujipujianku jala manjadi hatuaonku. Ibana do Debatangku; pasangaponku ma Ibana. Debata ni damang do Ibana, patimbulonku ma Ibana.

15:3 Jahowa do Ulubalang bolon, Jahowa do Goarna.

15:4 Angka hureta ni Firaun ro di paranganna diusophon do tu bagasan laut. Parsihundul angka na pinillitna dilonongkon do tu bagasan laut arung.

15:5 Angka lung do manghungkupi nasida; lonong do angka nasida tu toru, songon batu.

15:6 Tangan siamunmi, ale Jahowa, marmulia di bagasan hagogoon; tangan siamunmu, ale Jahowa, mangaropuhi musu i.

15:7 Jala marhitehite hinatimbul ni hasangaponmu disiaphon Ho angka na mangalo Ho; dilaluhon Ho parpiarpiar ni rimasmu mansudahon nasida songon durame.

15:8 Marhitehite pallongos ni igungmu marlintonglintong angka aek i; marsijongjong angka galumbang, songon dorpi; mangibulibul ma angka lung di tongatonga ni laut.

15:9 Dung i ninna musu i ma: Leleonku, tangkuponku ma nasida, bagionku ma taban; sombu ma rohangku mida nasida, umpatonku ma podangku, siaphonon ni tanganku ma nasida.

15:10 Diombushon Ho hosam, gabe dilungkupi laut nasida, angka lonong ma nasida songon simbora tu bagasan aek angka na tongam.

15:11 Ise ma songon Ho, ale Jahowa di tongatonga ni angka debata? Ise ma songon Ho marmulia di bagasan habadiaon, na songkal marpujipujian, na mambahen halongangan?

15:12 Dung dipatoltol Ho tanganmu siamun, dibondut tano i nasida.

15:13 Ditogihon Ho marhitehite asiasim bangso na pinaluam on; dipatolhas Ho nasida marhitehite hatogaonmu tu bagasan inganan ni habadiaonmu.

15:14 Dibege angka bangso barita i, gabe angka dotdot nasida, manimbasnimbas ma halak Palistim.

15:15 Tarsonggot ma uju i angka raja ni Edom, angka hitir ma raja ni Moab; tahuton ma sude isi ni Kanaan.

15:16 Sai madabu ma tu nasida songgotsonggot dohot hatahuton; tarhatotong ma nasida, songon batu dibahen hinatimbul ni tanganmu, paima taripar bangsom, ale Jahowa; paima taripar bangsom, na tinobusmu.

15:17 Sai pamasuk ma nasida, jala lopokkon nasida tu dolok partalianmi, haojahan ni ingananmi na pinaulim, ale Jahowa; tu habadiaon, na pinajok ni tanganmu, ale Tuhan.

15:18 Jahowa do Raja ro di salelenglelengna.

15:19 Ai bongot tu bagasan laut do hoda ni Firaun dohot angka huretana ro di parsihundulna, jadi dipasuang Jahowa ma angka aek ni laut i mangalungkupi nasida; alai anggo halak Israel mardalan di na mahiang do nasida di tongatonga ni laut.

15:20 Dung i ditiop si Meryam boru panurirang, iboto ni si Aron odap sada di bagasan tanganna, jala ruar sude angka boruboru marudurudur mangihuthon ibana masitiop odapna be.

15:21 Jadi marende taripar ma si Meryam tu nasida; marende ma hamu tu Jahowa, ai marmulia situtu do Ibana; hoda dohot parsihundulna diusophon tu bagasan laut.

15:22 Dung i didokkon si Musa ma halak Israel borhat sian laut arung, asa mardalan nasida tu halongonan Sur; jadi mardalan ma nasida tolu ari di bagasan halongonan i, ndang jumpangan aek nasida.

15:23 Dung i sahat ma nasida tu Mara; alai ndang tarinum nasida aek sian Mara, ai na paet do i; ala ni do umbahen margoar Mara.

15:24 Jadi marmungutmungut ma bangso i dompak si Musa, ninna ma: Aha na ma siinumonnami?

15:25 Dung i mangangguhi ma si Musa tu Jahowa, gabe dipatuduhon Jahowa ma tu ibana sada hau, na nireongkonna tu aek, jadi tonggi ma aek i. Disi, ma dibahen tu nasida sada patik dohot uhum, jala disi ma nasida diunjuni.

15:26 Jala didok ma: Molo burju ditangihon ho soara ni Jahowa Debatam, jala diulahon ho na tigor di rohana, jala dipinggol ho angka patikna, jala diradoti ho sude angka uhumna: Ndang pamasaonku tu ho nanggo sada sahit, angka na hupamasa tu Misir, ai Ahu do Jahowa pandaonim.

15:27 Dung i sahat ma nasida tu Elim, adong do disi mual sampulu dua, jala pitupulu harambir, gabe marsaro ma nasida disi di lambung aek i.

16:1 Dung i borhat ma nasida sian Elim, gabe sahat ma sandok luhutan ni halak Israel tu halongonan Sin na di holangkolang ni Elim dohot Sinai di ari sampulu lima di bulan sipahadua, dung ruar nasida sian tano Misir.

16:2 Jadi marmungutmungut ma sandok luhutan ni halak Israel dompak si Musa dohot dompak si Aron di halongonan i.

16:3 Didok halak Israel ma tu nasida: Tung so mate hami dibunu tangan ni Jahowa di tano Misir, di na hundul hami di lambung hudon angka na marisi juhut, di na bosur hami mangan sagusagu; ai ditogihon hamu hami ruar tu halongonan on laho mambunu sandok luhutan on anturaparon.

16:4 Dung i ninna Jahowa ma tu si Musa: Ida ma paroonku ma tu hamu udan sagusagu sian banua ginjang, asa ruar bangso i jala dipapungu sae sadarina i, asa huunjuni nasida manang turuton nasida patikki manang ndang.

16:5 Alai jumpang paonomarihon, paulionnasida ma na binoannasida i, gabe silompit ma i martimbangkon na pinapungunasida siap ari.

16:6 Dung i didok si Musa dohot si Aron ma tu sude halak Israel: Bodari on ma botoonmuna Jahowa paruarhon hamu sian tano Misir.

16:7 Sogot manogot idaonmuna ma hasangapon ni Jahowa, ai nunga di bege Ibana parungutungutonmuna dompak Jahowa. Ai tung ise ma hami pola umbahen tung marmungutmungut hamu dompak hami?

16:8 Angkup ni didok si Musa ma: Molo dilehon Jahowa juhut panganonmuna bodari on jala butongan mangan sagusagu manogotna i, ala naung dibege Jahowa parungutungutonmuna, na marmungutmungut i hamu dompak Ibana, ai tung ise ma anggo hami pola? Ndada dompak hami hamu marmungutmungut, dompak Jahowa do.

16:9 Dung i didok si Musa ma tu si Aron: Dok ma tu sandok luhutan ni halak Israel: Pajonok hamu ma tu jolo ni Jahowa, ai nunga dibege parungutungutonmuna.

16:10 Jadi di na mangkatai si Aron tu sandok luhutan ni halak Israel, humusor ma nasida mamereng dompak halongonan, jala ida ma, tarida ma hasangapon ni Jahowa di bagasan ombun i.

16:11 Dung i ninna Jahowa ma tu si Musa songon on:

16:12 Nunga hubege parungutunguton ni halak Israel, dok ma tu nasida songon on: Marhira bodari panganonmuna ma juhut, jala manogotna i butongan hamu mangan sagusagu, asa tung diboto hamu, Ahu do Jahowa Debatamuna i.

16:13 Jadi dung bodari, ro ma marhulalan angka lote, tung ditutup do parsaroan i, jala manogotna i marpeahan nambur humaliang parsaroan i.

16:14 Jadi dung manaek nambur na marpeahan i, ida ma adong ma rarak di sisik ni halongonan i songon batu ni botik na tata metmetna dohot hibulna.

16:15 Jadi dung diida halak Israel, angka didok be ma tu donganna; Manhu? (Aha do i?) Ai ndang diboto nasida manang aha i. Alai ninna si Musa ma tu nasida: I ma sagusagu na nilehon ni Jahowa tu hamu bahen sipanganon.

16:16 Boti ma hata na tinonahon ni Jahowa: Papungu hamu sian i ganup marguru tu tukna panganonna, sasolup sasahalak, marguru tu bilangan ni toropmuna; ganup mambuat marguru tu isi ni undungundungna be.

16:17 Jadi dibahen halak Israel ma songon i, adong na papungu godang, adong na papungu otik.

16:18 Alai dung disolupi, gabe ndang adong lobian na papungu godang, jala ndang hurangan na papungu otik; ganup marguru tu na tarpangansa, dipapungu nasida.

16:19 Dung i didok si Musa ma tu nasida: Manang ise pe, unang dihirahon sian i tu marsogot.

16:20 Alai ndang ditangihon nasida hata ni si Musa, adong do deba marhirahon sian i tu marsogot, jadi gulokon ma i jala bau, gabe tarrimas ma si Musa tu nasida.

16:21 Alai dipapungu nasida ma sian i ganup sogot, marguru tu na tarpangansa be; alai disi las ari, gabe malala ma.

16:22 Jumpang paonomarihon, silompit ma dipapungu nasida sagusagu i, dua solup tu na sahalak. Jadi ro ma sude induk ni bangso i laho paboahon tu si Musa.

16:23 Jadi didok si Musa ma tu nasida: I do tona ni Jahowa antong. Marsogot do ari Sabbat, paradianan siparbadiaan di Jahowa: Pamasak hamu hian ma sipamasahonmuna, jala lompa hamu hian silompaonmuna; alai na lobi, pasimpan hamu ma bahen sipanganon marsogot.

16:24 Jadi dipasimpan nasida ma i tu marsogot, songon na tinonahon ni si Musa, gabe ndang olo bau manang gulokon di bagasan.

16:25 Dung i ninna si Musa ma: Pangan hamu ma i sadari on, ai ari paradianan ni Jahowa do sadari on; ndang adong jumpang hamu di ladang.

16:26 Onom ari lelengna papunguonmuna ma i, alai ari papituhon i ari paradianan do i, ndang adong jumpang disi.

16:27 Alai tole papituarihon ruar do deba sian bangso i naeng papunguhon, hape ndang adong jumpangsa.

16:28 Jadi ninna Jahowa ma tu si Musa: Sadia leleng on juaonmuna mangaradoti angka tonangku dohot patikku?

16:29 Ida hamu ma, nunga dilehon Jahowa ari paradianan i tu hamu; ala ni Ibana mangalehon tu hamu di ari paonomhon sagusagu sidua ari; asa mian hamu di ingananmuna be; unang adong ruar nanggo sahalak sian ingananna di ari papituhon i.

16:30 Jadi maradian ma bangso i di ari papituhon i.

16:31 Jadi Manna ma goarna dibahen halak Israel, ianggo rupana songon boni ni hatumbar, saksak, jala daina songon sagusagu na tinanggulean.

16:32 Dung i didok si Musa ma: On do hata na tinonahon ni Jahowa: Gohi hamu ma sasolup sian i sipajopon tu pinomparmuna sogot, asa diida nasida sagusagu na hupapanganhon tu hamu di halongonan, di na huparuar hamu sian tano Misir.

16:33 Jadi ninna si Musa ma tu si Aron: Buat ma sada tapongan, jala bahen tusi Manna gok sasolup, jala pajongjong tu jolo ni Jahowa, sipajopon di pinomparmuna.

16:34 Songon na tinonahon ni Jahowa tu si Musa, dipajongjong si Aron ma i tu jolo ni poti parpadanan i bahen parningotan.

16:35 Leleng ni opatpulu taon ma dipangan halak Israel Manna i, paima sahat nasida tu tano siinganannasida: Paima sahat nasida tu parbalohan ni tano Kanaan, sai Manna do dipangan nasida.

16:36 Ia sasolup (homer), saparsampulu ni saampang (epah) ma i.

17:1 Dung i borhat ma sandok luhutan ni halak Israel sian halongonan Sin, marguru tu pandokkon ni Jahowa pardalanonnasida i, gabe marsaro nasida di Rapidim; alai ndang adong aek siinumon ni bangso i disi.

17:2 Jadi dibadai bangso i ma si Musa, angka didok ma: Lehon hamu aek siinumonnami! Jadi didok si Musa ma tu nasida: Boasa ahu badaanmuna? Boasa unjunanmuna Jahowa?

17:3 Alai uasan di aek bangso i disi, gabe marmungutmungut nasida dompak si Musa, didok ma: Boasa tung paruaronmu hami sian Misir laho mambunu hami dohot anakkonnami ro di pinahannami dibahen uas?

17:4 Jadi mangangguhi ma si Musa tu Jahowa, ninna ma: Aha ma bahenonku tu bangso on? Otik nari dangguronnasida ma ahu dohot batu.

17:5 Jadi didok Jahowa ma tu si Musa: Bolus ma sian jolo ni bangso i, jala arahon deba sian angka sintua ni Israel bahen donganmu, jala boan ma tungkotmu, na nilipathonmu tu batang aek i, dung i laho ma ho.

17:6 Ida ma, jongjong ma Ahu disi di jolom di atas ni sada dolok batu di Horeb, lipati ma dolok batu i, gabe ruar ma sian i aek siinumon ni bangso i. Jadi dibahen si Musa ma songon i di adopan ni angka sintua ni Israel.

17:7 Jadi dibahen ma goar ni hajongjongan i Massa (pangunjunan) dohot Meriba (parbadaan), ala ni bada ni halak Israel, jala ala ni niunjunannasida Jahowa, na nidokna i: Di tongatonganta ulaning do Jahowa manang ndang?

17:8 Dung i ro ma Amalek, jala marmusu dompak Israel di Rapidim.

17:9 Dung i didok si Musa ma tu si Josua: Pilliti ma di hita angka baoa, jala borhat ma ho mandopangi Amalek; jongjong ma ianggo Ahu marsogot di punsu ni dolokdolok, patioptiop tungkot ni Debata di bagasan tanganku.

17:10 Jadi dibahen si Josua ma, songon na nidok ni si Musa tu ibana laho mandopangi Amalek; alai anggo si Musa dohot si Aron dohot si Hur nangkok do nasida tu punsu ni dolokdolok i.

17:11 Jadi saleleng dipaherbang si Musa tanganna tu ginjang, monang ma Israel, alai molo dipalenduk tanganna, monang ma Amalek.

17:12 Alai ngaolan ma tangan ni si Musa, gabe dibuat nasida ma batu sada, dibahen ma tu toruna, asa hundul ibana tusi; ro ma si Aron dohot si Hur tumungkol tanganna sambariba be; gabe hot ma tanganna i, paima mate mata ni ari.

17:13 Jadi dipatunduk si Josua ma Amalek dohot bangsona marhite sian baba ni podang.

17:14 Dung i didok Jahowa ma tu si Musa: Surathon ma i tu sada buku bahen parningotan, jala pasingothon ma tu pinggol ni si Josua, ai sai na siaphononku ma barita ni Amalek sian toru ni langit.

17:15 Dung i dipauli si Musa ma sada langgatan, dibahen ma goarna: Jahowa Nissi (Jahowa partonggolhu).

17:16 Angkup ni didok ma: Sintak tangan di atas habangsa ni Jahowa: Hamusuon tihus ma di Jahowa dompak Amalek marsundutsundut.

18:1 Jadi dung dibege si Jetro, malim di Midian, simatua doli ni si Musa, sude na binahen ni Debata tu si Musa dohot tu Israel bangsona i, na pinaruar ni Jahowa halak Israel sian Misir.

18:2 Jadi diboan si Jetro, simatua doli ni si Musa, ma si Zippora, jolma ni si Musa, na sinuruna i mulak.

18:3 Rap dohot anakna na dua i, goar ni na sada si Gerson, ai ninna do: Paisolat do ahu di tano ni halak na pulik.

18:4 Goar ni na sada nari si Elieser, ai Debata ni damang do pangurupingku, jala dipalua ahu sian podang ni Firaun.

18:5 Jadi sahat ma si Jetro, simatua doli ni si Musa dohot angka anakna dohot jolmana tu si Musa, tu halongonan, tu parsaroanna di lambung dolok ni Debata.

18:6 Dung i ditonahon ma tu si Musa: Nunga ro ahu, simatuam doli si Jetro tumopot ho udur dohot jolmam dohot anakna na dua i.

18:7 Jadi ruar ma si Musa manjumpangkon simatuana i, dipaunduk ma ibana di jolona, jala diumma ibana; jadi dung masisungkunan nasida taringot tu sonangna, gabe masuk ma nasida tu undungundung i.

18:8 Dung i dipajojor si Musa ma tu simatuana sude na binahen ni Jahowa tu Firaun dohot tu halak Misir ala ni halak Israel, ro di sude hasusaan na mangonai tu nasida di tongan dalan dohot na pinalua ni Jahowa nasida.

18:9 Jadi las ma roha ni si Jetro ala sude na denggan i, na binahen ni Jahowa tu Israel, na pinaluana i nasida sian tangan ni halak Misir.

18:10 Dung i ninna si Jetro ma: Pinuji ma Jahowa, na paluahon hamu sian tangan ni halak Misir dohot sian tangan ni Firaun; tung dipalua bangsona sian pandondon ni tangan ni halak Misir.

18:11 Nuaeng pe huboto, tumongam hape Jahowa sian nasa angka debata, ai hata na hinajungkathonnasida lingkup tu nasida.

18:12 Dung i dibuat si Jetro, simatua doli ni si Musa ma sada pelean situtungon dohot angka pelean sipotongon di Debata. Jadi ro ma si Aron dohot saluhut sintua ni Israel laho mangan sagusagu rap dohot simatua doli ni si Musa di jolo ni Debata.

18:13 Tole marsogotna i hundul ma si Musa laho manguhum bangso i, gabe jongjong ma bangso i di lambung ni si Musa sian manogotna ro di botari.

18:14 Alai dung diida simatua doli ni si Musa sude na binahenna i tu bangso i, ninna ma: Hata dia do i na binahenmu tu bangso i? Boasa sasada ho hundul, jala sandok bangso i jongjong di jolomu sian manogot ro di botari?

18:15 Jadi didok si Musa ma tu simatuana doli: Na ro do bangso i tumopot ahu laho manungkun uhum sian Debata.

18:16 Ai molo adong parhataannasida, ro do nasida tu ahu, gabe huuhumi nasida be jala hupabotohon angka patik ni Debata dohot angka podana.

18:17 Jadi didok simatua doli ni si Musa ma tu ibana: Ndang denggan na binahenmi.

18:18 Mandate ho maon, nang ho, nang bangso on na di jolomon, ai madokdokhu ulaon on di ho, ndang tarula anggo sasada ho.

18:19 On pe tangihon ma soarangkon, huparrohai pe ho, asa didongani Debata ho. Ho ma mandapothon Debata singkat ni bangso i, jala ho ma pasahathon angka hata i tu Debata.

18:20 Jala pasingothon tu nasida angka patik dohot angka poda, jala pabotohon tu nasida dalan sidalanannasida i dohot ulaon siulaonnasida i.

18:21 Alai anggo ho lulu i ma sian sandok bangso i baoa angka na marsihohot marroha, angka na mangkabiari Debata, baoa parroha na sintong, angka na mangkagigihon pangomoan na so turut, i ma pabangkit bahen induk gumomgom nasida marsasaribu, marsasaratus, marlimalimapulu, jala marsasampulu.

18:22 Asa nasida tongtong manguhumi bangso i; alai nasa hata na balga, tu ho ma diboan nasida, anggo nasa hata metmet nasida ma manguhumi, asa paneang siulaonmu, molo nasida donganmu mangusung.

18:23 Molo dibahen ho songon i, jala ro tona ni Debata tu ho manolopi, jadi manahan ma ho mangkajongjongkon, muli ma dohot sandok bangso on tu ingananna be mardamedame.

18:24 Jadi ditangihon si Musa ma soara ni simatuana doli, jala dipatupa sude na nidokna i.

18:25 Dung i dipillit si Musa ma baoa angka na marsihohot sian sandok Israel, jala dipabangkit nasida bahen induk ni bangso i gumomgom marsasaribu, marsasaratus, marlimalimapulu jala marsasampulu.

18:26 Asa nasida tongtong manguhumi bangso i, anggo hata na maol, tu si Musa ma boanonnasida, alai anggo hata metmet, nasida do manguhumisa.

18:27 Dung i diloas si Musa ma simatuana doli laho, gabe mulak ma ibana tu tanona.

19:1 Patolubulanhon dung ruar halak Israel sian tano Misir, di ari na sasada i sahat ma nasida tu halongonan Sinai.

19:2 Ai borhat do nasida sian Rapidim, gabe sahat nasida tu halongonan Sinai, laos marsaro nasida di halongonan i; disi do marsaro Israel tondong ni dolok i.

19:3 Dung i nangkok ma si Musa tumopot Debata. Jadi dijouhon Jahowa ma tu ibana sian dolok i, ninna ma: Songon on ma dohononmu tu pinompar ni si Jakkob, paboaonmu tu halak Israel.

19:4 Nunga diida hamu, na hubahen i tu halak Misir, na huboan i hamu hira di atas ni habong ni pidong raja wali pasahat hamu tu Ahu.

19:5 On pe molo ditangihon hamu soarangku, jala diradoti hamu padan na hubahen i, jadi hasianku ma hamu sian nasa bangso, ai gok di Ahu do liat portibi on.

19:6 Manjadi harajaon malimmalim ma hamu di Ahu, jala bangso na badia. I ma angka hata sidohononmu tu halak Israel.

19:7 Jadi ro ma si Musa, dijou ma angka sintua ni bangso i, jala diaturhon tu jolonasida sude angka hata ondeng, angka na tinonahon ni Jahowa tu ibana.

19:8 Jadi sahata ma sandok bangso i mangalusi, angka didok nasida ma: Saluhut na pinaboa ni Jahowa, bahenonnami ma. Jadi mulak ma si Musa mamboan angka hata ni bangso i tu Jahowa.

19:9 Dung i didok Jahowa ma tu si Musa: Ida ma, na ro ma Ahu tumopot ho di bagasan ombun manorop, asa dibege bangso i molo mangkatai Ahu dohot ho, asa porsea nasida dohot di ho ro di salelenglelengna. Jadi dipaboa si Musa ma angka hata ni bangso i tu Jahowa.

19:10 Dung i didok Jahowa ma tu si Musa: Laho ma ho tumopot bangso i, jala urasi nasida sadari on dohot marsogot asa ditaptap nasida ulosnasida.

19:11 Asa diri nasida di ari patoluhon, ai patoluarihon tuat ma Jahowa di jolo ni sandok bangso i tu punsu ni dolok Sinai.

19:12 Jala bahen parbolatan ni bangso i humaliang, nimmu ma: Jaga hamu, so tung dinangkohi hamu dolok i, manang manjama bonana i. Manang ise na jumama dolok i, ingkon mate ibana.

19:13 Ndang jadi dais tusi tangan ni manang ise, ingkon dangguron manang tullangon ibana mate; nang pinahan, nang jolma, ndang jadi pangoluon. Alai molo marsaringar soara ni sarune, jadi ma nangkohannasida dolok i.

19:14 Dung i tuat ma si Musa sian dolok i tumopot bangso i, jala diurasi bangso i, jala ditaptap nasida ma ulosnasida be.

19:15 Dung i ninna si Musa ma tu bangso i: Diri ma hamu tumagam ari patoluhon, unang ma jumonok manang ise tu jolmana.

19:16 Tole patoluarihon, disi torang ari, masa ma angka soara ronggur dohot hilap dohot ombun manorop di atas dolok i, jala soara ni sarune mansai gogo, gabe tarsonggot ma sandok bangso na di parsaroan i.

19:17 Dung i ditogihon si Musa ma bangso i ruar sian parsaroan laho manjumpangkon Debata, jala angka jongjong nasida solhot di bona ni dolok i.

19:18 Jadi martimus ma sandok dolok Sinai maradophon Jahowa na tuat tu atasna di bagasan api, jala manaek timusna i songon timus ni pamurunan, gabe humuntal situtu sandok dolok i.

19:19 Jadi dung lam ganda situtu gogo ni soara ni sarune, mangkatai ma si Musa, gabe dialusi Debata ibana marsoara ronggur.

19:20 Alai dung tuat Jahowa tu dolok Sinai, tu punsu ni dolok i, dijou Jahowa ma si Musa tu punsu ni dolok i, gabe nangkok ma si Musa.

19:21 Dung i didok Jahowa ma tu si Musa: Tuat ma ho, tingtingkon ma tu bangso i, asa unang ditahopi nasida handang i laho mandapothon Jahowa, naeng idaonna, gabe marmatean maon torop sian nasida.

19:22 Angka malim pe, angka na jumonok tu Jahowa, ingkon manguras nasida, asa unang diragehon Jahowa nasida.

19:23 Alai ninna si Musa ma tu Jahowa: Ndang tarbahen bangso i nangkok tu dolok Sinai, ai nunga dihatindangkon Ho tu hami, nimmu do: Handang i dolok i jala parbadiai ibana.

19:24 Dung i didok Jahowa ma tu ibana: Laho ma ho tuat; alai nangkok ho muse rap dohot si Aron; alai anggo angka malim dohot bangso i, unang ditahopi nasida handang i laho mandapothon Jahowa, asa unang rage nasida.

19:25 Jadi tuat ma si Musa mandapothon bangso i, jala dipaboa ma tu nasida.

20:1 Dung i diaturhon Debata ma sude angka hata on, ninna ma:

20:2 Ahu do Jahowa Debatam, na paruarhon ho sian tano Misir, sian bagas parhatobananmu.

20:3 Ndang jadi marangkup Ahu adong Debatam.

20:4 Ndang jadi bahenonmu di ho ganaganaan, manang sumansuman dia na di banua ginjang nang di tano on, ro di na di bagasan aek na di toru ni tano.

20:5 Ndang jadi ho marsomba tu nasida, manang oloanmu nasida, ai Ahu do Jahowa Debatam, Debata parrimas, na mangaluluhon hajahaton ni amaama tu angka anakna ro di sundut patoluhon dohot paopathon, angka na sogo roha di Ahu.

20:6 Alai asi do rohangku di angka na marriburibu, angka na mangkaholongi Ahu, angka na mangaradoti angka patikku.

20:7 Ndang jadi dohononmu goar ni Jahowa Debatam, anggo sian neang ni roha, ai sai na hona toru ni Jahowa do manang ise na mandok goarna sian neang ni rohana.

20:8 Ingot hamu ma ari Sabbat laho pabadiahonsa.

20:9 Onom ari ma hamu mulaulaon, jala bahenonmu nasa ulaonmu.

20:10 Alai anggo ari papituhon i, ari paradianan ni Jahowa Debatam do i. Ndang jadi bahenonmu disi agia aha ulaon, nang ho manang anakmu, manang borum, manang naposom lahilahi, manang naposom boruboru, ro di pinahanmu, nang na sorang tu ho, di bagasan hutam.

20:11 Ai di na onom ari do ditompa Jahowa langit dohot tano dohot laut dohot nasa isina, dung i maradian ma Ibana di ari papituhon i. Dibahen i do umbahen na dipasupasu Jahowa ari paradiananna i jala diparbadiai.

20:12 Ingkon pasangaponmu natorasmu, asa leleng ho mangolu di tano, na nilehon ni Jahowa Debatam tu ho.

20:13 Unang ho mambunu.

20:14 Unang ho mangalangkup.

20:15 Unang ho manangko.

20:16 Unang ho olo sitindangkon gabus maralohon donganmu.

20:17 Ndang jadi haliangan ni roham bagas ni donganmu. Ndang jadi haliangan ni roham jolma ni donganmu, manang naposona baoa manang naposona boruboru, manang lombuna, manang hodana, manang dia pe ugasan ni donganmu.

20:18 Jadi sandok bangso i marnida dohot umbege angka soara ronggur dohot hilap dohot soara ni sarune i dohot dolok na martimus i. Jadi dung diida bangso i, lumindak ma nasida jongjong mandaodao.

20:19 Angka didok ma tu si Musa: Ho ma angkupnami mangkatai, hutangihon hami pe, unang Debata mangkulingi hami, atek tung mate hami maon.

20:20 Alai ninna si Musa ma tu bangso i: Unang hamu mabiar, ai mangunjuni hamu do Debata umbahen na ro, asa di jolomuna biar mida Ibana, asa unang mardosa hamu.

20:21 Jadi jongjong ma bangso i mandaodao; alai anggo si Musa didapothon do tu na holom, na niinganan ni Debata.

20:22 Dung i ninna Jahowa ma tu si Musa: Songon on do dohononmu tu halak Israel: Nunga diida hamu, na hupangkulingi i hamu sian banua ginjang.

20:23 Dibahen i ndang jadi marangkup Ahu bahenonmu debatam, manang angka debata sian perak manang angka debata sian sere pe.

20:24 Langgatan sian tano sada bahenonmu di Ahu, bahen pamelean ni angka peleanmu situtungon dohot pelean hamauliateon, angka birubirumu dohot angka lombumu pelehononmu disi. Ai ia disi hupajok inganan parningotan di goarhu, tusi do topotonku ho jala pasupasuonku ho.

20:25 Alai molo naeng bahenonmu di Ahu sada langgatan sian batu, unang pauli sian batu na nidakdak, ai molo mangonai bosim tusi, gabe ramun maon.

20:26 Jala unang martangga ho manaek tu langgatanku, asa unang mullop na niabitanmu maradophon ibana.

21:1 Jala on do uhum, angka siaturhononmu tu jolonasida.

21:2 Molo dituhor ho sada hatoban baoa marga Heber, onom taon ma lelengna mangadop, alai anggo papitutaonhon ingkon malua boti ibana.

21:3 Molo panangkarnangkar ibana ro panangkarnangkar ibana ruar; molo marripe ibana ro, rap malua ibana dohot ripena.

21:4 Alai molo marripe ibana dibahen indukna, gabe ditubuhon anak manang boru di ibana, indukna i ma nampuna ripena dohot tubuna, holan ibana sandiri malua.

21:5 Alai molo sada hata ni hatoban i mandok: Holong do rohangku di indukhu, di jolmangku dohot di angka anakkonku, tagonan unang malua ahu.

21:6 Togihonon ni indukna ma ibana tu Debata patindangonna ma ibana tu pintu manang tu tiang, dung i turaon ni indukna ma pinggolna dohot turatura, jadi hatobanna ma ibana salelenglelengna.

21:7 Alai molo digadis manang ise boruna bahen hatoban, ndang jadi malua, songon halulua ni hatoban baoa.

21:8 Molo sogo roha ni indukna mida ibana, jala ndang marsinonduk mangan dibahen, ingkon tobuson ma i; alai anggo tung tu bangso sileban ndang guru rohana manggadis, ala naung diose padanna tu nasida.

21:9 Alai molo tu anakna nasida maroroan dibahen, uhum parboruon na ma bahenonna tu nasida.

21:10 Molo boruboru na asing dibuat bahen imbangna, ndang jadi oruanna sipanganonna, parulosonna dohot pargansionna.

21:11 Molo so dibahen uhum na tolu ondeng tu nasida, malua boti nasida, ndang sitobus.

21:12 Molo adong manang ise na mangompong jolma, pola mate, ingkon marutang hosa ibana.

21:13 Alai molo so diburu hian, tung Debata tardok patongonhon ibana tu tanganna so pangkirimanna, Ahu pe patuduhon haporusanna tu ho.

21:14 Alai molo piripirion manang ise dompak donganna, marbisuk pamununa di ibana, saratonmu ma ibana sian lambung ni langgatanku laho mambunu ibana.

21:15 Manang ise na mambunu amana manang inana, ingkon marutang hosa ibana.

21:16 Manang ise na mamangus jolma jala digadis, manang jumpang di tanganna dope, ingkon marutang hosa ibana.

21:17 Manang ise na mamburai amana manang inana, ingkon marutang hosa ibana.

21:18 Molo marbadai angka baoa, gabe dipungkulhon ma sada batu tu alona manang ditinju ibana, alai ndang pola mate, asal peak di podomanna.

21:19 Ia dung hehe muse ibana gabe mardalani di balian martungkottungkot, jadi lias ma na mambunu i, asal digarar halolahanna dohot upa pandaoni paima malum situtu.

21:20 Manang ise na mangompongi hatobanna baoa manang boruboru, gabe mate na niomponganna i, ingkon abulonna do.

21:21 Alai molo tung mangolu sadari manang dua ari nari ndang abulonna, ai hepengna na ma i.

21:22 Molo marbadai angka baoa, gabe tarsamar boruboru na humunti pagar, pola hatektehan sanggul, alai ndang nian mahua anggo hosana, ingkon marutang hepeng ma ibana, marguru tu pandok ni harajaan ni boruboru i tu ibana, jala lehononna tu angka panguhum.

21:23 Alai molo sanga mate, ingkon hosa do abul ni hosa.

21:24 Mata do abul ni mata, ipon do abul ni ipon, tangan do abul ni tangan, pat do abul ni pat.

21:25 Mabortu ma abul ni na mabortu, bugang do abul ni bugang, na punil abul ni na punil.

21:26 Molo dilipat manang ise mata ni hatobanna baoa manang boruboru, pola sega matana, ingkon paluaonna boti, abul ni matana i.

21:27 Suang songon i molo diropangkon ngingi ni hatobanna baoa manang boruboru, ingkon paluaonna boti abul ni iponna i.

21:28 Molo adong baoa manang boruboru ditambing sada jonggi, pola mate ibana, ingkon mate dangguron do jonggi i dohot batu, jala ndang jadi panganon sibukna, alai lias ma ianggo nampuna lombu i.

21:29 Alai molo panambing hian jonggi i sian na sai laon, diboto nampunasa i huhut, hape ndang diramoti, gabe dibunu jonggi ma baoa manang boruboru, ingkon mate dangguron jonggi i dohot batu, bunuon ma dohot nampunasa.

21:30 Alai molo pardengganan uhum marobo tu ibana, ingkon lehononna do partobus singkat ni hosana, marguru tu pangarobo ni uhum tu ibana godangna.

21:31 Laos uhum bongka ondeng do bahenon tu ibana, molo anak manang boru ditambing jonggi i.

21:32 Alai molo hatoban baoa manang boruboru ditambing lombu i, tolupulu ringgit ma lehonon ni nampunasa tu induk somangnasida i, jala ingkon mate dangguron ia jonggi i.

21:33 Molo adong manang ise patalak sada godung, manang tung dihali sada godung, hape ndang dilangkopi, gabe madabu ma tusi sada lombu manang halode.

21:34 Ingkon abulon ni nampuna godung i do, hepeng ma pasuangonna tu nampunasa, alai di ibana ma ianggo bangkena.

21:35 Molo ditambing jonggi ni na sahalak jonggi ni donganna, pola mate, gadisonnasida ma jonggi na mangolu i, jala parduaonna tuhorna, jonggi na mate i pe parduaonnasida do.

21:36 Alai anggo binoto hian na sai laon panambing jonggi i, hape ndang diramoti nampunasa, ingkon alianna do jonggi abul ni jonggi, di ibana ma anggo na mate i.

22:1 Molo ditangko manang ise sada jonggi manang birubiru, laos dipotong manang digadis, ingkon uhum pangalimai ma gararonna ia jonggi, uhum pangopati gararonna ia birubiru.

22:2 Molo dapot tartangkup panangko i laho mangarut nian, gabe hona balbal ibana pola mate, ndang siabulon mudarna.

22:3 Alai molo naung sanga hatorangan ari panangko i, abulon ma mudarna. Ingkon gararon ni panangko i luhutna; molo so adong di ibana gadison ma ibana ala tinangkona i.

22:4 Molo dapot di tanganna na tinangko i laos mangolu, silompit ma gararonna sian lombu ro di halode dohot birubiru.

22:5 Molo dipagagathon manang ise pinahanna tu hauma manang tu porlak anggur ni na asing, tung dipalua songon i pinahanna tusi, ingkon na dumenggan ni haumana dohot porlak anggurna gararhononna.

22:6 Molo rarat api gabe dapotsa handang, laos dipangan bunbunan manang eme na jongjong dope, ingkon gararon ni na pagalak api i do.

22:7 Molo dipalumehon manang ise tu donganna hepengna manang barangbarangna, gabe diarut sian jabuna, silompit ma gararon ni panangko, molo tung dapot.

22:8 Alai molo so dapot panangko i, boanon ma nampuna bagas i tu jolo ni Debata, atik tung beha laos ibana paganjang tanganna tu ugasan ni donganna.

22:9 Taringot tu nasa hata jahajaha, ala jonggi, ala halode, ala birubiru, ala ulos, ala manang aha pe na mago, gabe didok na mandok: Ahu do nampuna on, tu jolo ni angka panguhum boanon hatanasida be, silompit dua ma gararon ni panjoha tu alona ginorahon ni panguhum.

22:10 Molo dipalumehon manang ise tu donganna sada halode manang jonggi, manang birubiru, manang pinahan dia pe, gabe mate ma i, manang mabugang, manang diolat halak, ndang adong na marnidasa.

22:11 Ingkon mangmang tu Jahowa ma uhum di tongatonganasida na dua, atik tung beha tanganna laho tu ugasan ni donganna; ingkon jaloon ni nampunasa do, jala ndang gararon ni alona i.

22:12 Alai molo tung ditangko panangko sian ibana, ingkon gararonna do i tu nampunasa.

22:13 Molo tung digotil binatang, ingkon boanonna do tandana bahen sitindangi, ndang gararonna anggo na ginotil i.

22:14 Molo diinjam sahalak sian donganna manang aha, gabe mabugang manang mate, ndang diida nampunasa, ingkon gararonna do i.

22:15 Alai molo tung diida nampunasa, ndang gararonna; molo tung paneoa ibana disi, seoana i do singkatna.

22:16 Molo didormai manang ise namarbaju na so oroan dope jala diangkupi modom, ingkon pintor lehononna bolina tusi jala buatonna bahen jolmana.

22:17 Alai molo manjua situtu amana mangalehon boruna tu ibana, timbangonna ma hepeng marguru tu godang ni boli ni namarbaju.

22:18 Ndang jadi pangoluon boruboru na marhapandean.

22:19 Ingkon bunuon do manang ise na pasaorsaor ibana modom tu pinahan.

22:20 Ingkon siaphononhon do manang ise na mamele debata sileban, nda holan tu Jahowa ibana mamele.

22:21 Ndang jadi sosahanmu halak dagang manang rupaonmu ibana; ai halak dagang do nang hamu na jolo di tano Misir.

22:22 Ndang jadi rupaon boruboru na mabalu manang anak lumanglumang.

22:23 Molo tung dirupa ho nasida, gabe mangangguhi nasida tu Ahu, sai na tangihononku do angguhangguknasida i.

22:24 Jadi marpiarpiar ma rimashu, jala bunuonku hamu marhitehite podang, gabe mabalu jolmamuna, gabe anak lumanglumang ia angka anakmuna.

22:25 Molo dipasali ho hepeng tu bangsongki, tu na pogos di lambungmi, unang ho songon halak sijalo bunga ni hepeng sian ibana, unang bahen marbunga hepengmu tu ibana.

22:26 Molo sindor dijalo ho ulos ni donganmu, ingkon paulahonmu tu ibana jumolo asa sundut mata ni ari.

22:27 Ai ulosna do bulusanna manangkas tu hulingkulingna, tung tudia ma ibana modom? Molo tung mangangguhi ibana tu Ahu, sai tangihononku di ibana, ai parasi ni roha do Ahu.

22:28 Ndang jadi buraanmu Debata, jala ndang jadi pulasanmu induk di bangsom.

22:29 Ndang jadi tiopanmu lobilobi ni emem manang anggurmu. Ingkon tu Ahu lehononmu anak buhabajum.

22:30 Suang songon i bahenonmu taringot tu lombum dohot angka birubirum. Pitu ari lelengna di lambung ni inana; di ari paualuhon i tu Ahu ma i lehononmu.

22:31 Ingkon halak na badia ma hamu di Ahu. Dibahen i ndang jadi panganonmuna juhut na ginotil ni binatang di ladang, ingkon tu jolo ni biang do timpalhononhon.

23:1 Ndang jadi pararatonmu barita gapgap, jala unang paherbang tanganmu rap dohot parjahat, gabe sitindangkon hageduhon.

23:2 Ndang jadi paihutonmu tahi torop laho manjahati, jala ndang jadi parpanguluanmu hata bada, manang manolopi hata torop laho papeolhon uhum.

23:3 Na pogos pe ndang jadi ampinanmu di pargulutanna.

23:4 Molo jumpang ho lombu ni musum, manang halodena lilu, ingkon mulak togihononmu tu ibana.

23:5 Molo diida ho halode ni halak na mangkagigihon ho mandate dibahen soratna, ndang jadi pasombuonmu peak, ingkon paheheonmu do i rap dohot binoanna.

23:6 Ndang jadi pailingonmu uhum tu halak na pogos hasolhotonmu di pargulutanna i.

23:7 Sai paholang ma ho sian hata gapgap, jala ndang jadi mate bunuonmu halak na lidang dohot na tigor, ai ndang olo Ahu mamintori halak parjahat.

23:8 Ndang jadi jaloonmu silehonlehon, ai papitung mata ni halak angka na tonggor hian nian anggo silehonlehon, jala dipapeol parhataan ni halak partigor.

23:9 Ndang jadi hilangonmu halak dagang, ai diboto hamu do roha ni halak dagang ala halak dagang nang hamu na jolo di tano Misir.

23:10 Onom taon padodot saburanmu tanomi, jala papunguonmu gogona.

23:11 Alai anggo papitutaonhon ingkon ulangonmu ma, jala patalunonmu, asa panganon ni angka na pogos sian bangsom, jala na tinebahonnasida jadi ma panganon ni binatang di ladang. Suang songon i do bahenonmu tu porlak anggurmu dohot tu hau jetunmu.

23:12 Onom ari ma lelengmu mangula ulaonmu, alai anggo di ari papituhon i ingkon maradian ma ho, asa maradian jonggim dohot halodem, maradian dohot anak ni hatobanmu dohot halak dagang pahosahon.

23:13 Sai radoti hamu ma sude na hupaboa i tu hamu. Ndang jadi paingotingotonmuna goar ni angka debata sileban, jala ndang jadi begeon sian pamanganmu.

23:14 Tolu hali di na sataon ho marari raya di Ahu.

23:15 Ingkon radotanmu ma ari raya ni sagusagu angka na so niasoman, pitu ari ma lelengna panganonmu sagusagu na so niasoman, songon naung hutonahon tu ho, pola hubuhu bulan Abib, ai di bulan i do ho ruar sian Misir. Alai ndang jadi idaonmu bohingkon so marisi pelean tanganmu.

23:16 Nang ari raya gotilon ni angka patumonaan ni na niulam, na sinaburmu di ladang. Nang ari raya hasisimpul ni suansuanan di ujung ni taon, ia dung dipapungu ho na niulam sian ladang.

23:17 Tolu hali di na sataon ingkon ro nasa baoa sian ho tu jolo ni Tuhan Jahowa.

23:18 Ndang jadi pelehononmu mudar ni pelean tu Ahu mardongan sagusagu na niasoman, jala ndang jadi peopon tu manogot tabotabo sian pelean ari raya tu Ahu.

23:19 Ingkon boanonmu do patumonaan sian tanomi masuk tu bagasan jabu ni Jahowa, Debatam. Ndang jadi lompaonmu anak ni hambingmu di bagasan aek ni susu ni inana.

23:20 Ida ma, sai suruonku do Suruan sada di jolom, asa diramoti ho di tongan dalan, jala ditogihon ho sahat tu inganan naung hupadiri di ho.

23:21 Sai jamoti ma dirim di adopanna, jala tangihon ma soarana, unang tung alo hamu ibana; ai ndang marpamuati rohana di angka pangalaosionmuna i, ai di bagasan dirina do Goarhu.

23:22 Alai molo ditangihon ho soarana sian nasa roham, jala dipatupa ho sude na hudok i, jadi Ahu mangalo angka alom, jala Ahu manosak angka na manosaknosak ho.

23:23 Molo mardalan Suruanki di jolom, jala ditogihon ho masuk tu tano ni halak Amori, Het i, Perisi, Kanaan, Hevi dohot Jebusi, jala Ahu mangaripashon nasida.

23:24 Ndang jadi ho marsomba tu debatanasida, jala ndang jadi oloanmu nasida, jala ndang jadi bahenonmu, songon na binahennasida i, ingkon rendephononmu situtu nasida, jala ropuhanmu situtu ganaganaan angka na pinajoknasida.

23:25 Alai ingkon oloanmuna do Jahowa Debatamuna i, jadi pasupasuonna ma sagusagum dohot tapianmu, jala pasalpuonku angka sahitsahit sian tongatongamuna.

23:26 Ndang jadi adong na hatektehan sanggul, nang na hol di tanomu; sai na gohanku do bilangan ni ariarim.

23:27 Sai suruonku do panonggotingku di jolom, jala godoranku do nasa bangso sitopotonmi, jala bahenonku do maporus nasa musum maradophon ho.

23:28 Jala suruonku ma angka uhum hamagoan di jolomi, asa dipabali halak Hevi, Kanaan dohot Het sian jolom.

23:29 Ndang di bagasan sataon nasida pabalionku sian jolom, asa unang gabe halongonan tano i, ganda maon dohot binatang di harangan pasarisarionmu.

23:30 Di laonlaon ni ari pe pabalionku nasida sian jolom, paima lam sopar ho, jala disoluk ho tano i.

23:31 Jala bahenonku ma parbalohan ni tanomu sian laut arung sahat ro di laut ni halak Palistim, jala sian halongonan sahat ro di batang aek i (Euprat). Ai pasahatonku do angka pangisi ni tano i tu tanganmuna, asa dipabali ho nasida sian jolom.

23:32 Ndang jadi angkupanmu nasida manang debatanasida marpadan.

23:33 Ndang jadi loasonmu nasida maringan di tanomu, asa unang mardosa ho dompak Ahu elaonnasida; ai molo tung oloanmu debatanasida i, sai na gabe jorgong do i di ho.

24:1 Dung i didok Jahowa ma tu si Musa: Nangkok ma hamu mandapothon Jahowa, ho dohot si Aron, Nadab dohot Abihu, ro di na pitupulu halak sintua ni Israel, mandaodao ma hamu marsomba Ahu.

24:2 Sasada si Musa pe jumonok mandapothon Jahowa, alai anggo nasida ndang jadi jumonok, bangso i pe ndang jadi nangkok rap dohot ibana.

24:3 Dung i ro ma si Musa, jala dipajojor tu bangso i saluhut hata ni Jahowa dohot sude angka uhum. Jadi sahata ma sandok bangso i mangalusi, didok nasida ma: Sude hata angka na pinaboa ni Jahowa, sai bahenonnami do.

24:4 Jadi disurathon si Musa ma sude hata ni Jahowa, jala dipasogot manogotna i, dipauli ma sada langgatan di bona ni dolok i dohot sampuludua tiang parningotan marguru sian na sampuludua marga ni Israel.

24:5 Dung i disuru ma angka dolidoli sian halak Israel, asa dipelehon nasida angka pelean situtungon dohot mamotongi lombu bahen angka pelean hamauliateon di Jahowa.

24:6 Dung i dibuat si Musa ma mudar i satonga, jala dibahen tu bagasan angka saoan; alai anggo mudar na satonganari, tu langgatan i do dipispishon.

24:7 Dung i dibuat ma pustaha parpadanan i, jala dijaha tu pinggol ni natorop i. Jadi didok nasida ma: Sude na nidok ni Jahowa, sai bahenonnami do, jala tangihononnami do.

24:8 Dung i dibuat si Musa ma mudar i, jala dipispishon tu na torop i, jala ninna ma: Ida ma, on ma mudar ni parpadanan i, naung pinahot ni Jahowa tu hamu ala saluhut hata ondeng.

24:9 Jadi nangkok ma si Musa dohot si Aron, si Nadab dohot Abihu ro di na pitupulu sintua ni halak Israel i.

24:10 Jadi diida nasida ma Debata ni Israel; ia sidegean ni patna, songon mata intan na rata riongna, jala songon rupa ni langit jumpa puasa bintang.

24:11 Jala ndang disurdukkon tanganna mangkahua angka sintua ni halak Israel. Jadi dung diida nasida Debata mangan dohot minum ma nasida.

24:12 Dung i ninna Jahowa ma tu si Musa: Nangkok ma ho mandapothon Ahu tu dolok on, disi ma ho, asa hulehon tu ho angka batu na marsurat dohot patik ro di uhum, angka naung husurati, sipodahononmu tu nasida.

24:13 Jadi hehe ma si Musa dohot si Josua parhaladona i, gabe nangkok ma si Musa tu dolok ni Debata.

24:14 Jala didok ma tu angka sintua i: Tading dison ma anggo hamu, paima mulak hami tu hamu. Antong si Aron dohot si Hur do di lambungmuna on; manang ise na marparkaro, tu nasida ma diboan.

24:15 Jadi dung sahat si Musa tu punsu ni dolok i, gabe dihungkupi ombun i ma dolok i.

24:16 Jadi mangulon ma hamuliaon ni Jahowa di punsu ni dolok Sinai, jala dihungkupi ombun i dolok i onom ari lelengna; tole papituarihon dijou ma si Musa sian bagasan ni ombun i.

24:17 Jala songon api na marjilam rupa ni hamuliaon ni Jahowa di punsu ni dolok i, diida halak Israel.

24:18 Jadi masuk ma si Musa tu bagasan ombun i laho nangkok tu dolok i gabe didolok i ma si Musa opatpulu ari opatpulu borngin lelengna.

25:1 Dung i ro ma hata ni Jahowa tu si Musa, ninna ma.

25:2 Paboa ma tu halak Israel mamboan tu Ahu silehonlehon, bahen pelean; sian ganup baoa na lomo roha, buatonmuna silehonlehon tu Ahu.

25:3 Alai on do silehonlehon, angka sibuatonmuna sian nasida: sere, perak dohot tombaga.

25:4 Tole abit sian bonang na rata langit dohot na rara dohot na merham, nang hain bontar na halus dohot imbulu ni hambing.

25:5 Tole angka bobak ni birubiru tunggal, angka na tinubar, tole bobak ni pitudar dohot hau pinasa.

25:6 Tole miak tu parpalitoan, miak na hushus pangkeon laho mamiahi dohot manutung daupa.

25:7 Tole angka mata intan simata unam dohot landus pangkeon tu baju epod dohot tu tutup andora.

25:8 Jala ingkon bahenonnasida di Ahu sada inganan na badia, asa maringan Ahu di tongatonganasida.

25:9 Sandok songon na hupatuduhon i tu ho, tiruan ni inganan dohot tiruan ni sude angka parhohasna, ingkon songon i bahenonmuna.

25:10 Alai bahenonnasida ma sada poti sian hau pinasa, tonga tolu asta unjurna, jala tonga dua asta bohangna, laos tonga dua asta ia timbona.

25:11 Ingkon lampisonmu ma i dohot sere na pita, sian bagasan dohot sian ruar lampisonmu, jala bahenonmu do bibirna marlaislais sere humaliang.

25:12 Jala tompaonmu ma tusi opat langgu sere, angka sibahenonmu tu suhina na opat i; dua langgu di na sambariba be.

25:13 Jala bahen ma haluhalu sian hau pinasa, ipe lampisonmu do i dohot sere.

25:14 Jala surakkon ma haluhalu i tu bagasan langgu, angka na lohot di poti i laho mangusung poti i.

25:15 Alai ingkon pasombuon do angka haluhalu i di bagasan angka langgu ni poti i, ndang jadi eneton sian i.

25:16 Jala pamasuhonmu tu bagasan poti i surat parjanjian, silehononku tu ho.

25:17 Ingkon bahenonmu huhut sada langkop pardengganan sian sere na pita; tonga tolu asta unjurna, jala tonga dua asta bohangna.

25:18 Ingkon bahenonmu huhut dua kerubim sian sere sangkimpal na tinopa, bahenonmu do i tu na dua tampahan ni langkop pardengganan i.

25:19 Jala bahen ma kerubim na sada tu tampahan na sada jala kerubim na sada nari tu tampahanna na sada nari; tubu sian bagasan langkop pardengganan i tolpus tu duru bahenonmuna angka kerubim i di na dua tampahanna.

25:20 Jala paherbangon ni angka kerubim habongna na dua i sian ginjang asa dihungkupi habongna i langkop pardengganan i, jala padompak be bohinasida, dompak langkop pardengganan i bohi ni angka kerubim mamereng.

25:21 Dung i bahenonmu ma langkop pardengganan i tu ginjang ni poti i, jala pamasuhonmu ma tu bagasan poti i surat parjanjian silehononku tu ho.

25:22 Jadi disi ma topotonku ho, asa mangkatai Ahu dohot ho sian ginjang ni langkop pardengganan i sian holangholang ni kerubim na dua i, angka na di ginjang ni poti parpadanan i taringot tu sude sitonahononku tu ho, paboaonmu tu halak Israel.

25:23 Ingkon bahenonmu dohot sada meja sian hau pinasa; dua asta unjurna, jala saasta bohangna, jala tonga dua asta timbona.

25:24 Jala lampisonmu ma i dohot sere na pita, jala bahenonmu martopi sere humaliang.

25:25 Jala bahenonmu tusi sada lais santopap bidangna humaliang, jala bahen laisna i martopi sere pinariponipon humaliang.

25:26 Jala bahen tusi opat langgu sere, sibahenonmu tu suhina na opat i, angka na di patna na opat i.

25:27 Ingkon jonok di toru ni lais bahenon angka langgu i bahen panuruhan ni haluhalu laho mangusung meja i.

25:28 Sian hau pinasa ma bahenonmu haluhalu i, jala lampisonmu dohot sere, i ma pangkeon mangusung meja i.

25:29 Jala bahenonmu ma pingganna dohot saoanna dohot hondina dohot mangkukna, bahen pangusean ni tuak tangkasan ma i; sian sere na pita ma i paulionmu.

25:30 Jala ingkon peakkononmu tongtong di meja i sagusagu na marhadohoan maradophon Ahu.

25:31 Ingkon bahenonmu huhut sada parpalitoan sian sere na pita, sangkimpal parpalitoan i topaonmu, ro di badanna, dangkana dohot butuhana, hansingna dohot bungana bahenon sian i.

25:32 Jala ingkon onom dangka ruar sian lambungna, tolu dangka sian na sambariba ni parpalitoan i, jala tolu dangka sian na sambariba nari.

25:33 Martolu butuha, songon bunga ni buapala ganup dangkana i bahenon, mardongan hansing dohot bunga; laos songon i do bahenon tu na onom dangka i, angka na ruar sian parpalitoan i.

25:34 Alai ingkon opat do butuha ni parpalitoan i bahenon, songon bunga ni buapala mardongan hansing dohot bunga.

25:35 Jala sahansing be di toru ni na dua dangkana, angka na ruar sian i; suang songon i sahansing be di toru ni dangkana na dua, angka na ruar sian i; suang muse sahansing be di toru ni dangkana na dua, angka na ruar sian i, gabe onom dangka ruar sian badan ni parpalitoan i.

25:36 Ai ingkon ruar sian i do angka hansingna dohot dangkana; luhutna i sian sangkimpal sere na pita do i.

25:37 Jala bahenonmu do pitu palitona, angka sibahenon tu ginjang, asa marsinondang angka i tu jolo.

25:38 Panurturna pe dohot pangintopina sian sere na pita do.

25:39 Sian satalenta sere na pita bahenonmu luhutna i, ro di parhohasna sudena i.

25:40 Jala ingot ma mambahensa tudos tu tiruan na niidam di dolok i.

26:1 Ia undungundung i ingkon bahenonmu do sian sampulu rimberimbe, sian bonang na nidua, jala na rata langit, jala na rara jala na merham, margombaran kerubim bahenonmu sitonunhonon ni parpunsa.

26:2 Ia unjur ni sada rimberimbe ingkon duapulu ualu asta do, ia bidangna opat asta; sisada suhat do saluhut angka rimberimbe i.

26:3 Limalima ma angka rimberimbe i padomuon, nasada tu donganna.

26:4 Jala bahenonmu do angka tali sangkutan na rata tu bibir ni rimberimbe parjolo i apala di pardomuanna, laos songon i do bahenonmu di bibir ni rimberimbe paduahon i bahen pardomuan paduahon.

26:5 Ingkon limapulu tali sangkutan bahenonmu tu rimberimbe na sada, jala limapulu tali sangkutan bahenonmu di ujung ni rimberimbe i, apala di pardomuanna paduahon; ingkon masijaloan do angka tali sangkutan, na sada tu donganna.

26:6 Jala bahenonmu do limapulu haithait sere laho patunggomhon angka rimberimbe i, na sada tu donganna, asa manjadi undungundung sada.

26:7 Bahenonmu ma huhut rimberimbe sian imbulu ni hambing bahen langitlangit di atas ni undungundung i; sampulu sada rimberimbe sisongon i bahenonmu.

26:8 Ia unjur ni sada rimberimbe tolupulu asta do, jala bidangna opat asta; sisada suhat do rimberimbe na sampulu sada i.

26:9 Jala padomuonmu pulik na lima rimberimbe, laos songon i pulik na onom rimberimbe, jala lompitonmu rimberimbe paonomhon, tongon di jolo ni undungundung i.

26:10 Jala bahenonmu limapulu tali sangkutan di bibir ni rimberimbe na sada parduru apala di pardomuanna, jala limapulu tali sangkutan di bibir ni rimberimbe na sada nari, di pardomuanna paduahon.

26:11 Jala bahenonmu do limapulu haithait tombaga, jala haithononhon ma angka haithait i tu angka tali sangkutan i laho padomuhon undungundung i gabe sada.

26:12 Alai anggo lobilobi ni rimberimbe sian langitlangit ni undungundung i, na satonga lobilobi ni rimberimbe i, laos gantung di pudi ni undungundung i.

26:13 Jala saasta di na sambariba, jala saasta di na sambariba nari sian lobilobi di unjur ni angka rimberimbe ni undungundung i; ingkon duansa gantung di lambung ni undungundung i bahen pangondingina angkup be di lambung.

26:14 Jala bahenonmu do di atas langitlangit ni undungundung i salampis sian bobak ni birubiru tunggal na tinubar, di atas ni muse salampis sian bobak ni pitudar.

26:15 Bahenonmu ma huhut angka papan sian hau pinasa bahen dorpi ni undungundung i, angka sipajongjongon.

26:16 Sampulu asta ganjang ni papan i, jala tonga dua asta bidang ni sada papan.

26:17 Ingkon mardua pasi ganup papan, baris be tu donganna; ingkon songon i ma bahenonmu saluhut papan angka na tu undungundung i.

26:18 Jala songon on do bahenonmu papan tu undungundung i: Ingkon duapulu papan sambariba tungkan dangsina.

26:19 Alai ingkon bahenonmu do opatpulu ojahan perak di toru ni na duapulu papan i, dua be ojahan di toru ni sada papan, marguru tu pasina na dua i.

26:20 Di na sambariba nari ni undungundung i pe, tungkan utara laos bahenon do duapulu papan.

26:21 Nang na opatpulu ojahanna perak, dua be ojahan di toru ni sada papan.

26:22 Alai di tampahan ni undungundung tungkan hasundutan, onom papan bahenonmu.

26:23 Jala dua papan bahenonmu di na dua suhi ni undungundung, di tampahanna parpudi.

26:24 Ingkon dua lampis ma i sian toru mardomu di ginjang marhitehite sadu langgu, songon i ma duansa di na dua suhi i.

26:25 Jadi ualu papan disi mardongan ojahanna perak sampulu onom toropna, dua be di toru ni sada papan.

26:26 Jala bahenonmu do angka ransangna sian hau pinasa, lima tu angka papan di na sambariba ni undungundung i.

26:27 Jala lima ransang tu angka papan di na sambariba nari ni undungundung i, jala lima ransang tu angka papan ni undungundung di tampahan parpudi ni tungkan hasundutan.

26:28 Jala ransang partonga na di dos tonga ni angka papan, ingkon torus sian suhi na sada tu suhi na sada nari.

26:29 Jala lampisonmu do angka papan i dohot sere, sabongna pe sian sere do bahenonmu, asa tusi pinabongot angka ransang; angka ransang i pe lampisonmu dohot sere.

26:30 Dung i pajongjongonmu ma undungundung i tudos tu tiruan na niidam di dolok i.

26:31 Dung i bahenonmu ma sada rimberimbe sian bonang na rata langit, jala na tinubar, jala na merham dohot sian hain na halus na nidua, margombaran kerubim bahenonmu sitonunhonon ni parpunsa tusi.

26:32 Dung i hirehononmu ma i tu opat tiang sian hau pinasa angka na nilampis dohot sere, jala marhaithait sere, jongjong di atas opat ojahan perak.

26:33 Alai bahenonmu do rimberimbe i tu toru ni haithait. Dung i pamasuk hamu ma tu bagasan rimberimbe i poti parpadanan, gabe rimberimbe i ma parholangan di hamu, di holangholang ni na badia dohot na songkal sahali.

26:34 Ingkon langkophononmu ma langkop pardengganan i tu atas poti parpadanan di bagasan na songkal sahali.

26:35 Alai anggo meja i tu balian ni rimberimbe bahenonmu, jala tondong ni meja i parpalitoan i di na sambariba ni undungundung i tungkan dangsina, asa tungkan utara ma bahenonmu meja i.

26:36 Bahenonmu ma huhut sada rimberimbe tutup ni pintu ni undungundung i sian bonang na rata langit dohot na tinubar dohot na merham dohot sian bonang na bontar na nidua sitonunon ni parpunsa.

26:37 Bahenonmu ma dohot lima tiang sian hau pinasa tu rimberimbe i, angka silampisonmu dohot sere jala marhaithait sere; tumpaonna ma huhut lima ojahanna sian tombaga.

27:1 Dung i bahenonmu ma sada langgatan sian hau pinasa, lima asta unjurna jala lima asta bohangna, asa maropat suhi langgatan i jala tolu asta timbona.

27:2 Martanduk ma bahenonmu di suhina na opat i; songon na tubu sian i angka tandukna jala lampisonmu do i dohot tombaga.

27:3 Bahenonmu ma dohot angka parsirabunanna dohot siuksiukna dohot mangkuk pamispisan dohot garpuna dohot parapiapianna; sian tombaga ma paulionmu saluhut ulaulana i.

27:4 Bahenonmu ma huhut sada handanghandangna sian tombaga marpangalaho songon na niangit, jala ingkon bahenonmu huhut tu jala i opat langgu sian tombaga tu suhina na opat i.

27:5 Ingkon bahenonmu do handanghandang i tu toru ni sidegedegean humaliang langgatan i sahat ro di parsitongaan ni langgatan i.

27:6 Dung i bahenonmu ma angka haluhalu tu langgatan i, haluhalu sian hau pinasa angka silampisonmu dohot tombaga.

27:7 Dung i pabongotonmu ma angka haluhalu i tu bagasan angka langgu, gabe marhaluhalu ma langgatan i angkup be laho mangusung.

27:8 Rumar di bagasan bahenonmu langgatan i sian angka papan, songon naung pinatuduhon ni Jahowa tu ho di dolok, songon i do bahenonmu.

27:9 Ingkon bahenonmu ma dohot sada alaman ni undungundung i di na sambariba tungkan dangsina, marrimberimbe sian bonang na bontar na nidua, saratus asta ganjangna di na sambariba.

27:10 Jala duapulu tiangna jala duapulu ojahanna sian tombaga, ianggo haithait ni angka tiang ro di ransangransangna perak do.

27:11 Songon i dohot di na sambariba tungkan utara ingkon marrimberimbe do, saratus asta unjurna jala duapulu tiangna jala ojahanna na duapulu i sian tombaga alai anggo haithait ni tiang i ro di ransangransangna perak do.

27:12 Alai anggo bohang ni alaman i tungkan hasundutan marrimberimbe silimapulu asta be ganjangna, sampulu tiangna jala sampulu ojahanna.

27:13 Ia bohang ni alaman di na sambariba tungkan habinsaran laos limapulu asta do.

27:14 Jadi sampulu lima asta rimberimbe di na sambariba haroroan i, tolu tiangna jala tolu ojahanna.

27:15 Di na sambariba nari pe laos sampulu lima asta rimberimbe i, tolu tiangna jala tolu ojahanna.

27:16 Alai di pintu tungkan alaman pe, ingkon adong do sada rimberimbe, duapulu asta ganjangna sian bonang na rata langit na rara tinubar dohot na merham dohot sian hain na halus na nidua sitonunhonon ni parpunsa tusi mardongan opat tiang dohot opat pat ojahanna.

27:17 Luhut angka tiang ni alaman humaliang ingkon mardomu do marhite sian ransangransang perak dohot haithait sian perak, alai anggo patna ingkon sian tombaga do.

27:18 Ia unjur ni alaman i ingkon saratus asta do, bohangna limapulu asta, timbona lima asta, paulion sian bonang na nidua, alai anggo pat ni tiang i ingkon tombaga do.

27:19 Luhut ulaula angka na pinangke di undungundung i mangaradoti ulaon marragamragam, ro di sude angka labangna dohot labang tu alaman i, ingkon sian tombaga do.

27:20 Alai anggo ho dohononmu huhut halak Israel asa diboan be tu ho miak jetun na niduda jala na tinapis bahen miak palito asa tongtong galak palito i.

27:21 Ingkon di bagasan undungundung parluhutan, di ruar ni rimberimbe, na mangolat poti parpadanan i pasangon ni Aron dohot angka anakna palito i olat ni bodari sahat ro di manogotna i di adopan ni Jahowa. I ma aturan na hot salelenglelengna di halak Israel ro di pinomparnasida i.

28:1 Dung i dohononmu ma Aron hahami, rap dohot angka anakna ruar sian tongatonga ni halak Israel ro jumonok tu ho, asa ibana mangaradoti tohonan malim di Ahu, i ma Aron dohot angka anakna: Nadab, Abihu, si Eleasar dohot si Itamar.

28:2 Dung i bahenonmu ma pangkean angka na badia di Aron hahami bahen hamuliaon dohot pajagarhon.

28:3 Ingkon dohononmu ma tu sude halak angka na pistar marroha, angka naung Ahu manggohi rohana dohot tondi hapistaran, asa nasida paulihon angka pangkean di Aron laho pabadiahon ibana, asa ibana gabe malim di Ahu.

28:4 Alai on do pangkean angka sipaulionnasida: sada tutup andora, sada baju epod, sada baju parbalian, sada baju parbagasan na niangit, sada tumpal dohot sada hohos; ingkon nasida paulihon pangkean angka na badia di Aron hahami dohot di angka anakna, asa ibana gabe malim di Ahu.

28:5 Ingkon buatonnasida sere dohot bonang na rata langit, na tinubar jala na merham dohot hain na halus.

28:6 Ia baju epod i ingkon paulionnasida do sian sere dohot sian bonang na rata langit, na tinubar jala na merham dohot sian hain na halus na nidua sitonunhonon ni parpunsa.

28:7 Ingkon mardua pangabaraan epod i bahenonna sipatunggomon di tampahanna be.

28:8 Hohos ni epod i pe ingkon sisada hapandean do dohot baju i jala mardomu tusi, paulion sian sere dohot sian bonang na rata langit, na tinubar jala na merham dohot sian hain na halus na nidua.

28:9 Dung i ingkon buatonmu ma dua mata intan Unam jala uhirhononmu tusi goargoar ni anak ni Israel na sampuludua i.

28:10 Onom goarnasida di mata intan na sada, jala goar na onom nari tu mata intan paduahon mangihuthon partubunasida.

28:11 Songon panguhirhon ni halak pandakdak batu, angka na manguhir tintin sahap panguhironna di goar ni angka anak ni Israel tu mata intan na dua i, jala marbibir sere humaliang.

28:12 Dung i bahenonmu ma na dua mata intan i tu na dua pangabaraan ni epod i bahen batu parningotan di angka anak ni Israel, asa usungon ni Aron di atas abarana na dua i goargoarnasida di adopan ni Jahowa bahen parningotan.

28:13 Ingkon bahenonmu huhut angka haithait sere.

28:14 Paulionmu muse dua rante sian sere na pita, dos ganjangna, ingkon songon tali na nidua hapandeanna masijaloan jala haithononhon tu haithait i.

28:15 Angkup ni bahenonmu ma sada tutup andora paruhuman, suang songon hapandean ni baju epod bahenonmu tonunhonon ni parpunsa tusi sere, bonang na rata langit, na tinubar jala na merham dohot hain na halus na nidua.

28:16 Ingkon maropat suhi do i bahenon, jala dua lampis, sanjongkal ginjangna jala sanjongkal bidangna.

28:17 Jala ingkon gohanmu do i dohot opat rinte batu intan. Di rinte parjolo: Batu intan sardis, topasion, samarados.

28:18 Di rinte paduahon: Batu intan rubin, sapire, diaman.

28:19 Di rinte patoluhon: Batu intan opal, akat, ametist.

28:20 Di rinte paopathon: Batu intan krisolit, Unam dohot jaspis; jala ingkon marihot sere angka rintena i bahenon.

28:21 Jala ingkon jojor angka batu i mangihuthon partording ni na sampulu dua goar ni anak ni Israel, angka siuhirhonon ni halak pandakdak batu, pulik be goarna i mangihuthon na sampuludua marga ni Israel.

28:22 Ingkon bahenonmu huhut tu tutup andora angka rante dos ganjangna, songon tali na nidua hapandeanna sian sere na pita.

28:23 Bahenonmu huhut tu tutup andora i dua tintin sere jala bahenonmu na dua tintin i tu na dua tampahan ni tutup andora i.

28:24 Ingkon bahenonmu na dua rante na nidua sian sere tu bagasan tintin na dua i angka na di tampahan ni tutup andora i.

28:25 Alai anggo na dua ujung ni na dua rante na nidua i ingkon haithononmu do i tu na dua haithait jala patunggomonmu do i tu pangabaraan ni baju epod patondong be.

28:26 Ingkon bahenonmu muse dua tintin sere na asing jala lohothononmu do i tu na dua tampahan ni tutup andora, apala di pangkilimanna na tungkan baju epod i dingkan bagasan.

28:27 Bahenonmu muse dua tintin sere na asing jala lohothononmu do i tu na dua pangabaraan ni baju epod tungkan toru tongon di pardomuanna, di atas hohos ni baju epod.

28:28 Ingkon pudunhononhon muse tutup andora i rap dohot tintinna marhite sian bonang na rata langit tu tintin ni baju epod, asa hopos tu hohos ni baju epod jala unang tarbahen sirang tutup andora sian baju epod.

28:29 Jadi songon i ma usungon ni Aron goargoar ni anak ni Israel di atas parateateanna di bagasan tutup andora ni paruhuman, molo laho masuk ibana tu bagasan inganan na badia i bahen parningotan tongtong di adopan ni Jahowa.

28:30 Dung i bahenonmu ma tu bagasan tutup andora paruhuman: Urim dohot Tummim (hatiuron dohot hasintongan), asa di atas parateatean ni Aron do i laho masuk ibana tu adopan ni Jahowa; ingkon songon i tongtong paboanboanon ni Aron uhum ni halak Israel di atas parateateanna di adopan ni Jahowa.

28:31 Ingkon bahenonmu huhut baju parbalian di atas baju epod, sandok sian bonang na rata langit do i ditonun.

28:32 Jala parrungkunganna i di parsitongaanna, ingkon martopi na tinonun do i humaliang, songon topi ni baju partahanan, asa unang olo maribak.

28:33 Jala bahenonmu do tu rambuna humaliang angka parbue ni dalimo sian bonang na rata langit, na tinubar jala na merham, bahenon huhut marsolotan angka giringgiring sere humaliang.

28:34 Sai marsorinsorin do sada giringgiring sere dung i sada parbue ni dalimo humaliang di rambu ni baju parbalian i.

28:35 Ingkon solukkonon ni Aron bajubaju i laho marulaon ibana, asa tarbege soara ni giringgiring, molo masuk ibana tu bagasan inganan na badia i di adopan ni Jahowa dohot molo ruar ibana muse asa unang mate ibana.

28:36 Ingkon bahenonmu huhut sada sangkalia sian sere na pita, jala uhirhononmu tu bagasan songon panguhiron sahap: Habadiaon di Jahowa!

28:37 Jala palohotonmu do i marhite sian tali bonang na rata langit tu tumpal i, asa lohot di jolo ni tumpal ma i.

28:38 Asa di pardompahan ni Aron ma sangkalia i, asa Aron mamboan pardengganan ni nasa ugasan na badia, angka naung pinarbadiaan ni halak Israel marhite sian peleannasida, ingkon tongtong sangkalia i di pardompahanna, asa jumpangan asi ni roha halak Israel di adopan ni Jahowa.

28:39 Alai anggo baju parbagasan i ingkon paulionmu do i sian hain na halus, bahenonmu muse sada tumpal sian hain na halus; alai anggo hohosna ingkon angiton ni parpunsa do i.

28:40 Di angka anak ni Aron pe ingkon paulionmu do angka baju parbagasan, tole angka hohos dohot tumpal bahen hamuliaon dohot pajagarhon.

28:41 Ingkon solukkononmu do i tu Aron hahami dohot tu angka anakna, dung i miahanmu ma nasida jala gohanmu tangannasida pabadiahon nasida, asa nasida gabe malim di Ahu.

28:42 Angkupni bahen ma di nasida saraoal sian hain na bontar manghungkupi dagingna unang manangkas, olat ni ulu ni tot sahat ro di gonting ganjangna.

28:43 Ingkon pangkeon ni si Aron dohot angka anakna saraoal i laho masuk nasida tu undungundung parluhutan i, nang molo jumonok nasida tu langgatan laho marhalado di inganan na badia i, asa unang mangonai torutoru tu nasida gabe ingkon mate nasida. I ma aturan na hot salelenglelengna di halak Israel ro di pinomparnasida i.

29:1 Jala on do parturena bahenonmu tu nasida laho pasahathon tohonan tu nasida mangaradoti hamalimon di Ahu: Ingkon buatonmu sada jonggi naposo dohot dua birubiru tunggal na so marlindang.

29:2 Tole muse roti na so niasoman dohot sagusagu na so niasoman na marsaor miak dohot juada na so niasoman na marsapu miak; sian itak na lamot bahenonmu luhutna i.

29:3 Dung i bahenonmu ma angka i tu bagasan sada hirang, laos di bagasan hirang do angka i pelehononmu rap dohot jonggi naposo i dohot na dua birubiru tunggal i.

29:4 Dung i dohononmu ma si Aron dohot angka anakna ro jumonok tu pintu ni undungundung parluhutan i, laos didionmu ma nasida dohot aek.

29:5 Dung i buatonmu ma angka pangkean i jala solukkononmu tu Aron, baju parbagasan, baju parbalian, baju epod dohot tutup andora, jala ingkon hohosanmu do ibana dohot hohos ni baju epod.

29:6 Dung i bahenonmu ma tumpal i tu atas uluna, jala lohothononmu sangkalia habadiaon tu tumpal i.

29:7 Dung i buatonmu ma miak pamiahion, jala usehononmu tu atas uluna asa mamiahi ibana.

29:8 Dokkononmu ma huhut angka anakna ro jumonok, jala solukkononmu tu nasida baju parbagasan i.

29:9 Jala ingkon hohoshononmu tu nasida hohos i, tu Aron dohot tu angka anakna i, jala palohotonmu tumpal i tu ulunasida, i ma tanda paboa nasida mangaradoti hamalimon ro di salelenglelengna; ingkon laos gohanmu ma tangan ni Aron dohot angka anakna i.

29:10 Dung i dohononmu ma mamboan jonggi na poso i jumonok tu adopan ni undungundung parluhutan i, asa diampehon Aron dohot anakna i tangannasida tu atas ulu ni jonggi i.

29:11 Dung i seatonmu ma jonggi i di adopan ni Jahowa mardonokkon pintu ni undungundung parluhutan i.

29:12 Dung i buatonmu ma deba sian mudar ni jonggi i jala daishononmu do i marhite sian jarijarim tu angka tanduk ni langgatan i; alai anggo sandok mudar na tinggal i usehononmu do i tu pantar ni langgatan i.

29:13 Dung i buatonmu ma nasa pultahan panaputi ni raoanna dohot hirehire na ampe tu ateate dohot tu pia na dua i ro di pultahan na lohot tusi, ingkon laos tutungonmu ma i bahen daupa di atas langgatan i.

29:14 Alai anggo sibuk ni jonggi i, hulingkulingna dohot napana ingkon suda do i tutungonmu dohot api di balian ni parsaroan i, i ma gabe pelean pardosaon.

29:15 Dung i buatonmu ma sada birubiru tunggal, jala dohononmu si Aron dohot angka anakna mangampehon tangannasida tu atas ulu ni birubiru tunggal i.

29:16 Dung i seatonmu ma birubiru tunggal i jala buatonmu mudarna, laos pispishononmu ma i tu langgatan i humaliang.

29:17 Dung i saheanmu ma birubiru tunggal i, jala burionmu raoanna dohot patna, jala patoponmu ma i tu na margoarna dohot tu uluna.

29:18 Jala tutungonmu di atas langgatan sandok birubiru tunggal i bahen daupa; pelean situtungon ma i di Jahowa, uap na hushus ni pelean api tu Jahowa ma i.

29:19 Dung i buatonmu ma birubiru tunggal na sada nari, jala ia dung diampehon Aron dohot angka anakna i tangannasida tu atas ulu ni birubiru tunggal i.

29:20 Seatonmu ma birubiru tunggal i, jala buatonmu deba sian mudarna jala bahenonmu ma i tu pinggol ni Aron dohot tu pinggol siamun ni angka anakna, dohot tu ina ni tanganna siamun, dohot tu ina ni patna siamun; dung i pispishononmu ma mudar i tu langgatan i humaliang.

29:21 Dung i buatonmu ma deba sian mudar na di atas langgatan i dohot sian miak pamiahion i, jala pispishononmu ma i tu Aron dohot tu angka pangkeanna, tu angka anakna dohot tu angka pangkean ni anakna, asa badia Aron dohot angka pangkeanna, badia dohot angka anakna ro di pangkean ni angka anakna rap dohot ibana.

29:22 Dung i buatonmu ma pultahan sian birubiru tunggal i dohot ihurna ro di pultahan panaputi ni raoanna, nang hirehire na ampe tu ateate dohot pia na dua i rap dohot pultahan na lohot tusi ro di hae jolo dingkan siamun; ai birubiru tunggal sahatsahat ni tohonan ma i.

29:23 Angkupni buatonmu ma sangkimpal roti dohot sada sagusagu na marsaor miak dohot sada timpatimpa sian bagasan hirang isian roti na so niasoman, na di adopan ni Jahowa.

29:24 Jala ampehononmu ma luhutna i tu tangan ni Aron dohot tu tangan ni angka anakna i jala tatingtatingonmu ma i bahen pelean tatingan di adopan ni Jahowa.

29:25 Dung i buatonmu ma i sian tangannasida, jala tutungonmu bahen daupa di atas langgatan dongan ni pelean situtungon bahen uap na hushus di adopan ni Jahowa, bahen pelean api tu Jahowa ma i.

29:26 Dung i buatonmu ma andora sian birubiru tunggal sahatsahat ni tohonan tu Aron jala tatingtatingonmu ma i bahen pelean tatingan di adopan ni Jahowa, ingkon i ma gabe parjambaranmu.

29:27 Ingkon songon i urasonmu andora pelean tatingan dohot hae jolo bahen pelean tatingan, na tinating jala na hinindat sian birubiru sahatsahat ni tohonan na di Aron dohot di angka anakna i.

29:28 Ingkon manjadi uhum na hot ma i di Aron dohot di angka anakna ro di salelenglelengna turpukna sian halak Israel, ai pelean tatingan do on; ingkon pelehonon ni halak Israel do pelean tatingan i sian angka pelean hamauliateon, pinelehonnasida i bahen pelean tatingan di Jahowa.

29:29 Ia pangkean ni Aron angka na badia i, ingkon sahat tu angka anakna ma i dung salpu ibana, pangkeonnasida ma i uju laho mamiahi nasida pasahathon tohonan i tu nasida.

29:30 Ingkon pitu ari lelengna pangkeonna pangkean i manang ise sian angka anak ni Aron bangkit malim singkatna, asa jadi ibana masuk tu undungundung parluhutan i laho marhalado di inganan na badia i.

29:31 Ingkon buatonmu ma birubiru tunggal sahatsahat ni tohonan i, jala lompaonmu juhutna di bagasan inganan na badia i.

29:32 Dung i ingkon panganon ni Aron dohot angka anakna i ma juhut ni birubiru tunggal i rap dohot roti angka na di bagasan hirang i mardonokkon pintu ni undungundung parluhutan i.

29:33 Asa ingkon laos panganonnasida do pelean na mambahen pardengganan di nasida laho pasahathon tohonan tu nasida dohot pabadiahon dirinasida i; alai na so tupa anggo halak ruar manganhon sian i, ai na badia do i.

29:34 Molo tung adong na lobi sian juhut sahatsahat ni tohonan i manang sian roti sahat ro di manogotna i, ingkon tutungonmu do na lobi i di bagasan api; ndang jadi panganon ni manang ise, ai na badia do i.

29:35 Ingkon songon i do bahenonmu tu Aron dohot tu angka anakna i, sandok songon na hutonahon i tu ho: Ingkon pitu ari lelengna pasahatonmu tohonan i tu nasida.

29:36 Angkup ni ingkon ganup ari seaton sada lombu bahen pelean pardosaon pasimpul pardengganan i; ingkon urasonmu huhut langgatan pameleanna marhite sian pelean pardengganan pinelehonmu di atasna, dung i miahanmu ma langgatan i laho pabadiahonsa.

29:37 Ingkon pitu ari lelengna pelehononmu pelean pardengganan di langgatan i pabadiahonsa, asa tung manjadi na badia sahali; manang ise ma naeng jumonok tu langgatan i, ingkon na badia do.

29:38 Alai ingkon on do pelehononmu di atas langgatan i: dua anak ni birubiru sisataon be tongtong ganup ari.

29:39 Sada birubiru pelehononmu manogotna i, jala birubiru na sada nari pelehononmu marhira bodari.

29:40 Jala dongan ni anak ni birubiru parjolo i bahenonmu sasolup itak marsaor miak na tinutu arga sabale; angkup ni sapansung tuak anggur bahen pelean siinumon.

29:41 Ia anak ni birubiru na sada nari sipelehononmu marhira bot ari, suang songon pamelehonmi di pelean sipanganon dohot siinumon manogotna i pamelehonmi disi bahen uap na hushus dohot pelean situtungon di Jahowa.

29:42 I ma pelean situtungon na tongtong di pinomparmuna mardonokkon pintu ni undungundung parluhutan i di adopan ni Jahowa, tusi do huhut ro Ahu monopot hamu asa mangkatai ahu dohot ho disi.

29:43 Tusi ma Ahu ro marluhut rap dohot halak Israel jala hamuliaonki pabadiahon inganan i.

29:44 Ahu huhut pabadiahon undungundung parluhutan i rap dohot langgatan i; Ahu huhut pabadiahon si Aron dohot angka anakna gabe malim di Ahu.

29:45 Ahu huhut maringan di tongatonga ni halak Israel, asa Ahu gabe Debatanasida.

29:46 Asa tung diboto nasida, Ahu do Jahowa, Debatanasida i, naung manogihon nasida ruar sian tano Misir, asa maringan Ahu di tongatonganasida; Ahu, Jahowa, Debatanasida i.

30:1 Ingkon paulionmu huhut sada langgatan panutungan daupa; ingkon sian hau pinasa paulionmu i.

30:2 Saasta unjurna jala saasta bohangna, maropatsuhi tahe, jala dua asta timbona; ingkon ruar sian i huhut angka tandukna.

30:3 Jala ingkon lampisonmu do i dohot sere na pita, nang tutupna, nang dorpina humaliang dohot angka tandukna; ingkon bahenonmu huhut marbibir humaliang sian sere na pita.

30:4 Ingkon bahenonmu muse dua langgu sere di toru ni bibirna i; ingkon bahenonmu do i tahe di suhina na dua i angkup be, bahen panuruhan ni haluhalu, asa dapot usungon ni halak langgatan i.

30:5 Angka haluhalu i pe ingkon bahenonmu do sian hau pinasa jala lampisonmu dohot sere.

30:6 Jala pajongjongonmu do langgatan i di adopan ni rimberimbe, na mangolat poti panindangion i, di adopan ni langkop pardengganan i na di atas ni panindangion i, asa tusi Ahu ro marluhut rap dohot ho.

30:7 Ingkon manutung daupa angka na hushus di atasna Aron ganup sogot, ganup mangisi palito i ibana ingkon manutung daupa ibana.

30:8 Nang laho mamasang palito i Aron mareak bot ari, ingkon tongtong manutung daupa ibana di adopan ni Jahowa paingotingoton nang pinomparmuna.

30:9 Na so tupa hamu mamelehon di atasna daupa sileban, manang pelean situtungon, manang pelean sipanganon, manang mangusehon pelean siinumon tusi.

30:10 Ingkon Aron mambahen pardengganan di atas tandukna sahali sataon marhite sian mudar ni pelean pardosaon; i ma tutu ingkon sahali sataon ibana mambahen pardengganan di atasna paingotingoton ni pinomparmuna; ai na badia sahali do ibana di Jahowa.

30:11 Angkup ni didok Jahowa tu si Musa songon on:

30:12 Molo dibilangi ho torop ni sandok halak Israel mangihuthon bilangannasida i, ingkon ganup nasida mangalehon partobus ni hosana di Jahowa uju na binilangan nasida, asa unang songgop tu nasida torutoru uju na binilangan nasida.

30:13 On do tama lehonon ni ganup na masuk tu bilangan: satonga sekkel lehononna mangihuthon sekkel di inganan na badia; sasekkel mararga duapulu gera; na satonga sekkel i ingkon gabe pelean tatingan di Jahowa.

30:14 Manang ise naung binilangan olat ni na marumur duapulu taon tu ginjang, ingkon lehononna do pelean tatingan tu Jahowa.

30:15 Halak na mora ndang jadi gandaanna, jala halak na pogos ndang jadi oruanna mangalehon sisatonga sekkel i bahen pelean tatingan tu Jahowa bahen partobus ni hosanasida i.

30:16 Ingkon buatonmu perak partobus i sian halak Israel, asa lehononmu muse pature ulaon di undungundung parluhutan i, bahen parningotan di halak Israel di adopan ni Jahowa bahen pardengganan di tondimuna i.

30:17 Dung i ro muse ma hata ni Jahowa tu Musa songon on:

30:18 Ingkon bahenonmu huhut sada tong tombaga, ojahanna pe ingkon tombaga do bahen parburian, jala bahenonmu do i di holangholang ni undungundung parluhutan i dohot langgatan, jala bahenonmu do aek tu bagasan.

30:19 Asa anggo Aron dohot angka anakna i ingkon aek sian i buatonna mamburi tangan dohot patnasida.

30:20 Molo masuk nasida tu bagasan undungundung parluhutan i, ingkon jolo marburi nasida, asa unang mate nasida; suang songon i molo jumonok nasida tu langgatan i naeng marhalado laho manutung pelean situtungon bahen daupa tu Jahowa.

30:21 Ingkon jolo burianna tanganna dohot patna, asa unang mate nasida. I ma gabe uhum na hot di nasida ro di saleleng ni lelengna paingotingoton ni pinomparnasida huhut marsundutsundut.

30:22 Dung i ro muse hata ni Jahowa tu Musa songon on:

30:23 Alai anggo ho, buat ma di ho pamurpuri na dumenggan i, i ma: Pultak ni haminjon lima ratus sekkel boratna dohot ulumamis satongana, i ma duaratus limapulu sekkel dohot hasior laos dua ratus limapulu sekkel boratna.

30:24 Tole muse hau teja lima ratus sekkel mangihuthon sekkel di inganan na badia i dohot miak sian hau Jetun sabale.

30:25 Ingkon bahenonmu sian i miak pamiahion na badia, miak pulungpulungan na sinaor mangihuthon hapandean ni pande daon, miak pamiahion na badia ma i.

30:26 Ingkon miakkononmu ma i tu undungundung parluhutan i dohot tu poti parpadanan i.

30:27 Nang meja i ro di ulaulana sudena, tole parpalitoan rap dohot ulaulana, nang langgatan pardaupaan.

30:28 Tole muse langgatan pamelean ni pelean situtungon ro di ulaulana sudena dohot tong parburian ro di ojahanna.

30:29 Ingkon songon i bahenonmu pabadiahon angka i, asa gabe sun badia, ganup na manjama angka i ingkon gabe badia do.

30:30 Aron pe ro di angka anakna ingkon miahanmu do jala urasonmu nasida gabe malim di Ahu.

30:31 Dung i dohononmu ma tu halak Israel, songon on: Ingkon miak pamiahion na badia maon di Ahu ingoton ni pinomparmuna.

30:32 Ndang jadi usehononhon miak i tu daging ni manang ise jolma hian, parmasakna pe ndang jadi pasumanonmu, ai miak na badia do i, dibahen i ingkon badia do i di hamu.

30:33 Manang ise na pasuman parmasakna, manang tung diusehon tu halak sileban ingkon siap ibana bahenon sian bangsona.

30:34 Dung i ro muse hata ni Jahowa tu Musa: Buat ma di ho pamurpuri angka na hushus, gota ni haminjon, bungalawang, meang dohot daupa mamolin dos be do boratna.

30:35 Dung i bahenonmu ma sian i bahen miak daupa mangihuthon hapandean ni pande daon, saor ansim, pita dohot badia.

30:36 Dung i tutuonmu ma sian i mansai lamot jala bahenonmu sian i tu adopan ni poti parpadanan i di bagasan undungundung parluhutan i, asa ro Ahu manopot ho tusi; i ma na badia sahali di hamu.

30:37 Ia daupa sibahenonmu i, ndang jadi tiruonmu parmasakna di hamu sandiri; ingkon badia do i di ho lehonon tu Jahowa.

30:38 Manang ise na manuman parmasakna, asa paanggoanggoonna, ingkon siap do ibana bahenon sian bangsona.

31:1 Dung i ro muse ma hata ni Jahowa tu si Musa songon on:

31:2 Ida ma, nunga hujou sahalak na margoar Bezaleel, anak ni si Uri, i ma anak ni si Hur sian marga Juda.

31:3 Nunga pola hugoki rohana dohot Tondi ni Debata marhapistaran, marhapandean dohot marparbinotoan di bagasan saluhut ulaon i.

31:4 Mamingkiri hapandean na sumurung mamandei sere, perak dohot tombaga.

31:5 Huhut manguhir dohot mamijor batu intan, mamandei hau pe mambahen hapandean marragamragam.

31:6 Ianggo Ahu, ida ma nunga pola hubahen donganna, i ma Oholiab, anak ni si Ahisamakh, sian marga Dan; tu bagasan roha ni saluhut halak na pande, nunga hulehon roha hapandean, asa nasida mangulahon sude na hutonahon tu ho:

31:7 Tole undungundung parluhutan i, tole poti parpadanan i, ro di langkop pardengganan na di atasna i dohot sude ulaula di undungundung i.

31:8 Tole muse meja i ro di ulaulana, tole parpalitoan sian sere na pita ro di ulaulana sudena dohot langgatan panutungan daupa.

31:9 Tole langgatan pamelean ni pelean situtungon ro di ulaulana sudena, nang tong parburian dohot ojahanna.

31:10 Tole angka pangkean tohonan dohot pangkean angka na badia di malim Aron, tole pangkean ni angka anakna laho mangaradoti hamalimon.

31:11 Tole muse miak pamiahion i dohot daupa sian pamurpuri na hushus situtungon di inganan na badia; hombar tu sandok na hutonahon i tu ho bahenonnasida.

31:12 Dung i ro muse ma hata ni Jahowa tu si Musa songon on:

31:13 Dok ma tu halak Israel: Ingkon ingotonmuna do ari paradiananku: Ai i do tanda ni parpadanan di Ahu dohot di hamu ro di pinomparmuna, asa tung diboto hamu, Ahu do Jahowa na pabadiahon hamu.

31:14 Dibahen i sai ingot hamu ma ari Sabbat i, ai na badia do i di hamu; manang ise na mangaramuni ari Sabbat i, ingkon marutang hosa ibana: Ai manang ise na mangula ulaon disi, ingkon siap bahenon hosana sian tongatonga ni bangsona.

31:15 Ingkon onom ari lelengna mangula halak; alai anggo ari papituhon i, ari Sabbat paradianan na badia ma i di Jahowa; manang ise na mangula ulaon di ari Sabbat, ingkon marutang hosa ibana.

31:16 Dibahen i ingkon ingoton ni halak Israel ari Sabbat i, nang pinomparnasida laho pabadiahon ari Sabbat i, padan na hot ma i ro di salelenglelengna.

31:17 Ari Sabbat i ma tutu manjadi tanda di Ahu dohot di halak Israel ro di salelenglelengna. Ai di bagasan na onom ari ditompa Jahowa langit dohot tano on; alai anggo di ari papituhon i maradian ma Ibana jala dipasonang dirina.

31:18 Jadi dung sun Jahowa mangkatai dohot si Musa di atas dolok Sinai, dilehon ma tu ibana dua lei batu panuratan ni panindangion naung tarsurat marhite sian jarijari ni Debata.

32:1 Alai dung diida bangso i lelengna, asa tuat Musa sian dolok i, marluhut ma bangso i manopot Aron, ninna ma mandok ibana: Hehe ma ho, bahen ma di hami Debata, angka na manguluhon hami; ai ndang huboto na marhua hami manang si Musa on, baoa na manogihon hami ruar sian tano Misir.

32:2 Dung i didok Aron ma mandok nasida: Tanggali hamu ma antinganting sere, angka na di pinggol ni jolmamuna, anakmuna dohot borumuna, jala pamboan hamu ma angka i tu ahu.

32:3 Jadi sandok bangso i masitanggal antingantingna sere, angka na di pinggolnasida be, jala dipamboan do i tu Aron.

32:4 Dung i dijalo ibana ma angka i sian tangannasida, laos disinga ma rupana dohot panurat, i ma disuman mambahen sada lombu tuangan. Dung i didok nasida ma: On ma Debatamu, ale Israel! Naung manogihon ho ruar sian tano Misir.

32:5 Jadi dung diida Aron lombu i laos dipajok ma sada langgatan di adopanna, jala martingting ma Aron mandok: Marsogot ma ari raya di Jahowa.

32:6 Dung i dipasogot nasida ma manogotna i hehe, laos dipelehon ma angka pelean situtungon, diboan huhut angka pelean hamauliateon, dung i hundul be ma bangso i marmanganan dohot marminuman, hehe muse nasida laho manontori.

32:7 Dung i ro ma hata ni Jahowa tu Musa: Laho ma ho tuat! Ai nunga marroha mago bangsomi, na tinogihonmu ruar sian tano Misir.

32:8 Tibuna i nasida manimbil sian dalan naung hupatuduhon tu nasida! Nunga dibahen nasida di nasida sada lombu tuangan, nunga pola marsomba dohot mamele nasida tusi, jala nunga pola didok: On ma Debatamu, ale Israel! Angka naung manogihon ho ruar sian tano Misir.

32:9 Dung i ro muse hata ni Jahowa tu Musa: Nunga mananda rohangku di bangso on, jala ida ma, tung na tangkang do roha ni bangso on.

32:10 Nuaeng pe, loas ma Ahu, asa marsigorgor rimashu mangonai tu nasida jala huripashon nasida, asa ho hubahen gabe bangso na bolon.

32:11 Alai marhuraja ma anggo Musa di adopan ni Jahowa, Debatana, ninna ma: Boasa ma tung marsigorgor rimasmu, ale Jahowa mida bangsom naung tinogihonmu ruar sian tano Misir marhite sian hagogoon godang dohot marhite sian tangan na marhuaso?

32:12 Boasa ma tung dohonon ni halak Misir songon on: Mambahen nasida marhinamago, umbahen ditogihon nasida ruar, asa bunuonna nasida di dolok, jala ripashononna nasida sian atas tano on? Marpangulahi ma roham sian parpiarpiar ni rimasmu, sai marpamuati ma roham taringot tu jea na naeng pasonggoponmu tu bangsom.

32:13 Sai marningot ma roham di Abraham, di Isak dohot di Jakkob, angka naposomi, nunga pola maruari Ho tu dirim marbagahon tu nasida: Ahu patorophon sogot pinomparmuna, songon bintang angka na di langit, jala sandok tano on naung huparbagabaga i, ingkon lehononku do i tu pinomparmuna, bahen partalianna ro di salelenglelengna.

32:14 Jadi marpamuati ma roha ni Jahowa taringot tu hinamago naung nilumbahonna naeng bahenonna tu bangsona.

32:15 Dung i humusor ma Musa jala tuat sian dolok i huhut patioptiop di bagasan tanganna na dua lei panindangion i, angka na tarsurat angkup be di bulungna na dua i.

32:16 Jadijadian ni Debata do lei na dua i, surat i pe, surat ni Debata sandiri do i, na niuhirhonna tu lei na dua i.

32:17 Jadi dung dibege Josua soara ni bangso i marsuraksurak, ninna ma mandok Musa: Soara ni halak na tongtang do i di bagasan parsaroan i.

32:18 Alai ninna Musa ma: Ndada soara ni suraksurak boaboa ni hamonangan manang hataluan, soara ni halak na marende taripar do i anggo na hubege.

32:19 Alai dung jonok ibana tu parsaroan i, jala diida lombu i dohot tortor marhaliang, marsigorgor situtu ma rimas ni Musa, laos ditimpalhon ma sian tanganna lei na dua i, gabe mabola do i di bonandolok i.

32:20 Dung i dibuat ma lombu naung pinaulinasida i, jala ditutung di bagasan api, laos diduda mansai lamot, jala disirsirhon tu aek, jala didokkon halak Israel minum sian i.

32:21 Dung i ninna Musa ma mandok Aron: Aha huroha na binahen ni bangso on tu ho, umbahen paroonmu dosa na sai balga tu atasna?

32:22 Dung i ninna Aron ma: Unang tung marsigorgor rimas ni Tuanku tu ahu! Ai ditanda ho do roa ni bangso on marharohaon.

32:23 Angka didok nasida do mandok ahu: Bahen di hami debata, angka na manguluhon hami, ai ndang huboto hami manang na marhua si Musa on, baoa na manogihon hami ruar sian tano Misir.

32:24 Jadi ningku ma tutu mandok nasida: Manang ise na marsere, ditanggali ma i, jala dilehon tu ahu, dung i hutimpalhon ma i tu bagasan api, gabe ruar ma lombu on.

32:25 Jadi dung diida Musa naung gabe hijang bangso i, ai nunga dipahijong si Aron bahen haurahon maradophon halak alonasida i.

32:26 Jadi jongjong ma Musa di bahal ni parsaroan, laos ninna ma: Ro be ma tu ahu manang ise na mangalehon dirina tu Jahowa! Jadi marpungu ma tu lambungna saluhut halak Lepi.

32:27 Dung i ninna Musa ma tu nasida: Songon on do hata ni Jahowa, Debata ni Israel: Dibahen be ma podangna tu gontingna, dung i ulahulak hamu na sian harbangan on tu harbangan adui di parsaroan i, ingkon dibunu be ma ganup donganna dohot alealena dohot tondongna.

32:28 Jadi dibahen halak Lepi ma hombar tu hata ni si Musa, gabe marragean ma sian bangso i di na sadari i arga tolu ribu halak.

32:29 Ai nunga didok si Musa hian: Ingkon urasonmuna dirimuna sadari on di Jahowa! Ingkon ganup mangalo anakna, nang donganna, asa maruli pasupasu hamu sadari on sian Jahowa.

32:30 Tole manogotna i, didok Musa ma mandok bangso i: Mansai balga do dosa na binahenmuna i! On pe nangkok ma anggo ahu manopot Jahowa, anggiat tung dapot ahu pardengganan taringot tu dosamuna i.

32:31 Jadi dung mulak si Musa tu lambung ni Jahowa, ninna ma: Iale isuang! Nunga mardosa godang bangso on, ala naung binahennasida di nasida angka debata sian sere.

32:32 Nuaeng pe, sai marpamuati ma roham mida dosanasida i, alai molo so tarbahen, haru sesa nama dohot goarhu sian pustaha naung sinuratmi.

32:33 Alai ro ma hata ni Jahowa tu Musa: Manang ise naung mardosa dompak Ahu, goar ni do sesaonku sian pustahangku.

32:34 On pe laho ma ho, togihon ma bangso i tu tano naung hupaboa i tu ho; ida ma, ingkon Suruanki mardalan manguluhon ho! Alai ia dung jumpang ari pangaluluhonku, luluhononku ma tu nasida dosanasida i.

32:35 Jadi ditorui Jahowa ma bangso i ala naung binahennasida lombu i na pinauli ni Aron.

33:1 Dung i ro muse hata ni Jahowa tu Musa: Laho ma ho, borhat sian on, ho dohot bangso naung tinogihonmu ruar sian tano Misir laho tu tano naung pola huuarihon tu Abraham, Isak dohot Jakkob, uju hudok: Tu pinomparmu tano i lehononku.

33:2 Husuru pe Suruanku manguluhon ho, hupabali pe anggo halak Kanaan, Amori, Het i, Perisi, Hevi dohot Jebusi:

33:3 Ibana pe manogihon hamu tu tano habaoran ni susu dohot situak ni loba; ndang tarbahen anggo Ahu nangkok di tongatongamuna, ai bangso na tangkang marroha do ho, atik tung siap ho maon bahenonku di tongan dalan.

33:4 Jadi dung dibege bangso i hata na horas i, gondok ma rohanasida, jala ndang adong nanggo sahalak na mamangke pangkeanna hian.

33:5 Alai nunga didok Jahowa hian hatana anggo tu Musa, patolhasonna tu halak Israel: Bangso na tangkang marroha do hamu, nanggo satongkin Ahu nangkok di tongatongamuna, ingkon siaphononku do hamu. On pe ditanggali be ma pangkeanna sian ibana, asa huboto manang aha sibahenonku tu ho.

33:6 Jadi ditanggali halak Israel ma pangkeannasida be mandaodao sian dolok Horeb.

33:7 Alai anggo Musa dibuat ma undungundung i, jala dipajongjong ma i di balian holang sian parsaroan i, jala digoar ma i undungundung parluhutan. Dung i manang ise na naeng mangalului Jahowa, ingkon ruar Ibana tu undungundung parluhutan i na di balian ni parsaroan i.

33:8 Jadi molo jumpa ruar Musa laho manopot undungundung i, hehe be sandok bangso i, laos jongjong ganup di pintu ni undungundungna be, dituluthon nasida ma Musa sian pudi, paima masuk ibana tu bagasan undungundung i.

33:9 Ia dung masuk Musa tu bagasan undungundung i, tuat ma ombun na marsijongjong i, laos jongjong di bagasan pintu ni undungundung, jala mangkatai Jahowa dohot Musa.

33:10 Jadi sandok bangso i marnida ombun na marsijongjong i jongjong di bagasan pintu ni undungundung i, gabe hehe be ma sandok bangso i, laos marsomba nasida ganup di pintu ni undungundungna be.

33:11 Dung i mangkatai ma Jahowa dohot Musa adop bohi be, songon sada baoa na mangkatai dohot alealena; dung i mulak ma Musa tu parsaroan i, alai anggo parhaladona Josua, anak ni Nun dolidoli i, ndang morot sian tongatonga ni undungundung i.

33:12 Dung i ninna Musa ma tu Jahowa: Ida ma, nunga didok Ho mandok ahu: Togihon ma bangso on nangkok, alai ndang dipabotohon Ho tu ahu manang ise na naeng suruhononmu donganku, nunga nian didok Ho: Ahu mananda ho pola ro di goar! Jala nunga jumpangan asi ni roha ho maradophon Ahu.

33:13 Nuaeng pe, molo tutu naung jumpangan asi ni roha ahu maradophon Ho, ua pabotohon ma tu ahu dalanmu, asa tung tangkas Ho hutanda, paboa naung jumpangan asi ni roha ahu maradophon Ho; jala ida ma parripem do bangso on.

33:14 Dung i ninna Jahowa ma: Ingkon Bohingku donganmu mardalan, asa hutogihon ho tu hasonangan.

ᯑᯰᯮ ᯤ ᯉᯉᯪ᯲ᯉ ᯐᯂᯬᯋ ᯔ: ᯀᯰᯪᯂᯉᯬ᯲ ᯅᯂᯰᯪᯂᯮ ᯑᯬᯝᯉ᯲ᯔᯮ ᯔᯒ᯲ᯑᯞᯉ᯲, ᯀᯘ ᯂᯮᯖᯬᯎᯪᯂᯉᯬ᯲ ᯂᯬ ᯖᯮ ᯂᯘᯬᯉᯝᯉ᯲.

33:15 Alai ninna Musa ma tu Jahowa: Molo so tongtong Bohimi manguluhon hami, unang nian togihon hami nangkok sian on.

33:16 Ai tung marhite sian aha ma dapot tandaon, paboa naung jumpangan asi ni roha ahu maradophon Ho, ahu dohot parripem on? Nda marhite sian na nidongananmu hami mardalan, paboa marhasurungan ahu dohot parripem on maradophon nasa bangso angka na di atas tano on?

33:17 Dung i ninna Jahowa ma tu Musa: Nang hata on na nidokmu ondeng, bahenonku do i, ala naung jumpangan asi ni roha ho maradophon Ahu, jala Ahu mananda ho pola ro di goar.

33:18 Dung i ninna Musa ma: Ua pataridahon ma tu ahu hamuliaonmi!

33:19 Alai ninna Jahowa ma: Ahu pabolushon saluhut hatuaonku sian jolo ni bohim, jala Ahu manjouhon Goar ni Jahowa di adopanmu; na martalup ni roha do Ahu sogot di halak naung tinalupan ni rohangku; jala na marasi ni roha do Ahu sogot di halak naung niasian ni rohangku.

33:20 Angkup ni didok Jahowa: Ndang tarbahen ho anggo tung marnida apala Bohingkon, ai ndang tarbahen manang ise jolma hian marnida Ahu, laos mangolu ibana.

33:21 Angkup ni didok Jahowa: Ida ma, adong sada hajongjongan mardonokkon Ahu, ingkon disi ho jongjong di atas dolok batu!

33:22 Jadi dung mamolus hamuliaonku, bahenonku ma ho tu bagasan sada rigat ni dolok batu i, laos hungkuphononku tanganku tu ho paima salpu Ahu mamolus.

33:23 Ia dung hupatait tanganku, idaonmu ma Ahu sian pudi; alai anggo apala Bohingkon ndang jadi idaon ni manang ise!

34:1 Dung i ninna Jahowa ma tu Musa: Dakdak ma di ho dua lei batu angka na suman tu parjolo i, asa Ahu manurathon tusi hata angka naung tarsurat di lei parjolo i, angka binolahonmi.

34:2 Ingkon hobas ma ho sogot manogot i, asa sogot ho nangkok tu dolok Sinai, laos jongjong disi ho di adopanku, di punsu ni dolok i.

34:3 Jala ndang jadi nanggo sahalak nangkok rap dohot ho, jala ndang jadi tarida nanggo sahalak di atas ni sandok dolok i; birubiru pe manang lombu ndang jadi manjampal mardonokkon dolok on.

34:4 Dung i didakdak Musa ma dua lei batu, na suman tu parjolo i, jala dipasogot ibana manogotna i hehe asa nangkok tu dolok Sinai, songon na tinonahon ni Jahowa tu ibana, laos diboan ma na dua lei batu di bagasan tanganna.

34:5 Jadi tuat ma Jahowa di bagasan sada ombun, laos jongjong Ibana disi di lambungna, huhut joujou marhitehite Goar ni Jahowa.

34:6 Jadi mamolus ma Jahowa sian adopan ni Musa huhut Ibana joujou: Jahowa, Jahowa do Debata na talup jala na asi roha, lambat tarrimas, jala godang denggan basana dohot habonaronna.

34:7 Na pahothon denggan basana i pola marriburibu sundut jala marpamuati rohana mida hajahaton, pangalaosion dohot dosa, alai ndang loasonna malua sian uhum anggo halak parsala, sai na luluhononna do hajahaton ni amaama tu angka anakna dohot pahompuna ro di sundut patoluhon dohot paopathon.

34:8 Jadi hapogan ma Musa manungkap tu tano laos marsomba.

34:9 Huhut mandok: Molo sapala jumpangan asi ni roha ahu maradophon Ho, ale Tuhan, ua sauduran ma Tuhan i mardalan di tongatonganami! Ai bangso na tangkang marroha do bangso on, alai sai marpamuati ma roham di hajahatonnami dohot di dosanami, sai bahen ma hami parjambaranmu.

34:10 Dung i ninna Jahowa ma: Ida ma, Ahu mambahen padan di adopan ni sandok bangso on; Ahu mambahen halongangan, angka na so dung masa di sandok tano on dohot di tongatonga ni saluhut angka bangso parbegu, ingkon sandok bangso donganmi marnida jadijadian ni Jahowa, ai na songkal sahali do i na naeng bahenonku tu ho.

34:11 Antong pajop ma di bagasan roham na hutonahon i tu ho sadari on. Ida ma, Ahu pe pabalihon maradophon ho halak Amori, Kanaan, Het i, Perisi, Hevi dohot Jebusi.

34:12 Sai jaga ma dirim, na so tupa marpadanpadan ho tu halak isi ni tano sisoluhonmu, asa unang gabe jorgong nasida di tongatongami.

34:13 Ingkon lohaonmuna do langgatannasida i, ingkon segaanmuna ajiajiannasida, jala tabaonmuna sombaonnasida i.

34:14 Ai ndang jadi ho marsomba tu Debata sileban; ai targoar do Jahowa Parlulu, ala Debata Parlulu do Ibana.

34:15 Na so tupa bahenonmu padan tu halak isi ni tano i, ia marmainan nasida mangihuthon debatanasida i, manang mamele nasida tu debatanasida i, gabe diela ho asa panganonmu sian pelean na pinelehonna i.

34:16 Ndang jadi buatonmu sian borunasida bahen jolma ni anakmu, atik tung marmainan borunasida maon mangihuthon debatanasida i, gabe tarela dohot anakmu maon marmainan mangihuthon debatanasida.

34:17 Ndang jadi bahenonmu di ho angka debata tuangan.

34:18 Ingkon tongtong ho marari raya sagusagu na so niasoman. Ingkon pitu ari lelengna panganonmu sagusagu na so niasoman, songon na hutonahon i tu ho di tingki naung binuhul bulan Abib; ai di bulan Abib do ho ruar sian Misir.

34:19 Nasa buhabaju Ahu do nampunasa, nang nasa buhabaju tunggal sian pinahanmu, nang lombu, nang birubiru.

34:20 Alai anggo buhabaju ni halode ingkon tobusonmu do i marhite sian birubiru; alai molo so ditobus ho ingkon ponggolhononmu do rungkungna. Nasa buhabaju ni angka anakmu ingkon tobusonmu do i. Alai ndang jadi idaonmu Bohingkon so marisi pelean tanganmu.

34:21 Ingkon onom ari lelengmu mangula, alai anggo di ari papituhon i ingkon maradian ho; di tingki masa ni paninggalaon pe nang di gotilon, ingkon maradian ho.

34:22 Ari raya sipitu borngin i pe ingkon ingotonmu do, boanonmu ma disi patumonaan ni na niulam; tole muse ari raya hasisimpul ni suansuanan di ujung ni taon.

34:23 Tolu hali di na sataon, ingkon ro nasa baoa sian ho tu adopan ni Tuhan Jahowa, Debata ni Israel.

34:24 Ia dung hupabali angka bangso parbegu maradophon ho, jala hupalambas tano ingananmu, ndang jadi nanggo sahalak mangkaliangi tanom saleleng ho nangkok naeng marnida Bohi ni Jahowa Debatam sitolu hali i di bagasan sataon.

34:25 Ndang jadi durushononmu mudar ni pelean tu Ahu mardongan sagusagu na niasoman; jala ndang jadi marborngin peopon tu manogot anggo pelean di ari raya Paska.

34:26 Ingkon taruhononmu do patumonaan sian tanomi tu jabu ni Jahowa, Debatam. Ndang jadi lompaonmu anak ni hambingmu di bagasan aek ni susu ni inana.

34:27 Dung i ninna Jahowa ma tu Musa: Surathon ma angka hata on, ai marguru tu angka hata on do padan na hubahen i tu ho dohot tu Israel.

34:28 Jadi sai disi ma Musa rap dohot Jahowa pola opatpulu ari opatpulu borngin lelengna, ndang mangan sagusagu ibana jala ndang minum aek. Dung i disurathon Ibana ma sude hata ni padan i, hata na sampulu i tu lei batu.

34:29 Jadi di na tuat i Musa sian dolok Sinai, huhut patioptiop na dua lei panindangion di bagasan tanganna di na tuat i ibana sian dolok i, alai ndang diboto Musa naung marsinondang sisik ni bohina i, ala naung mangkatai ibana dohot Jahowa.

34:30 Jadi dibereng Aron dohot sude halak Israel ma Musa, hape ida ma, nunga marsinondang sisik ni bohina, gabe mabiar nasida ro jumonok tu ibana.

34:31 Jadi dijou Musa ma nasida, gabe mulak nasida tu ibana, Aron dohot sude induk ni luhutan i, laos mangkatai ma Musa dohot nasida.

34:32 Jadi dung songon i ro ma jumonok sude halak Israel; gabe dipatolhas Musa ma tu nasida sude hata na pinaboa ni Jahowa tu ibana di dolok Sinai.

34:33 Jadi dung tolhas hata i dihatahon Musa tu nasida, dibahen ma sada pangkuphupi tu bohina.

34:34 Alai molo masuk muse Musa tu adopan ni Jahowa naeng mangkatai dohot Ibana dipasisi ma pangkuphupi i paima ruar ibana muse. Jadi dung ruar ibana dihatahon ma tu halak Israel hata na tinonahon tu ibana.

34:35 Jadi diida halak Israel ma bohi ni Musa, pola marsinondang sisik ni bohi ni Musa, gabe dipasuang Musa ma pangkuphupi i tu bohina, paima masuk ibana muse mangkatai dohot Jahowa.

35:1 Dung i dipaluhut Musa ma sandok luhutan ni halak Israel, jala ninna ma mandok nasida: On do hata angka na tinonahon ni Jahowa siulahononmuna.

35:2 Ingkon onom ari lelengmu mangula ulaon, alai anggo ari papituhon i, ari Sabbat paradianan na badia ma i di Jahowa. Manang ise na mangula ulaon di ari na sasada i, ingkon marutang hosa ibana.

35:3 Ndang jadi hamu mangopan api di bagasan sude ingananmuna anggo di ari Sabbat i.

35:4 Dung i didok Musa ma tu sandok luhutan ni halak Israel songon on: On do hata na tinonahon ni Jahowa tu hamu:

35:5 Jalo hamu na sian hamu silehonlehon bahen pelean tatingan di Jahowa, ganup sian lomo ni rohana mamboan pelean tatingan di Jahowa: sere, perak dohot tombaga.

35:6 Tole abit sian bonang na rata langit dohot na rara dohot na merham, nang hain bontar na halus dohot imbulu ni hambing.

35:7 Tole bobak ni birubiru tunggal angka na tinubar, tole bobak ni pitudar dohot hau pinasa.

35:8 Tole miak tu parpalitoan, miak na hushus pangkeon laho mamiahi dohot manutung daupa.

35:9 Tole angka mata intan unam dohot simata landus bahenon tu baju epod dohot tu tutup andora.

35:10 Jala manang ise na pantas marroha di tongatongamuna, ingkon ro be mangulahon sandok na tinonahon ni Jahowa:

35:11 Pauli inganan na badia i rap dohot undungundungna, langitlangitna, haithaitna, papanna, ransangransangna, angka tiangna dohot ojahanna.

35:12 Tole poti parpadanan i rap dohot haluhaluna, langkop pardengganan i dohot rimberimbe.

35:13 Tole meja i rap dohot haluhaluna ro di sandok ulaulana ro di roti na marhadohoan.

35:14 Tole parpalitoan i bahen panondang i ro di ulaulana, angka palitona dohot miak tu palito i.

35:15 Tole muse langgatan pardaupaan i rap dohot haluhaluna, nang miak pamiahion dohot pamurpuri bahen daupa na hushus ro di rimberimbe tutup ni pintu laho masuk tu inganan na badia i.

35:16 Tole langgatan pamelean ni pelean situtungon rap dohot handanghandangna sian tombaga, angka haluhaluna dohot sandok ulaulana, tong parburian dohot ojahanna.

35:17 Tole rimberimbe tu alaman i rap dohot tiangna dohot ojahanna; nang rimberimbe tutup ni bahal haroroan tu alaman i.

35:18 Tole angka labang tu inganan na badia i dohot tu alaman i rap dohot angka talina.

35:19 Tole angka pangkean tohonan laho marhalado di inganan na badia i, angka pangkean ni malim Aron na badia i rap dohot pangkean ni angka anakna laho mangaradoti hamalimon.

35:20 Dung i ruar ma sandok luhutan ni halak Israel sian adopan ni Musa.

35:21 Jadi ro be ma ganup na tarsunggul rohana dohot ganup na martondi na girgir, diboan be ma pelean tatingan tu Jahowa pangkeon tu ulaon pauli undungundung parluhutan i dohot tu sandok ulaon siradotan disi dohot tu pangkean angka na badia i.

35:22 Jadi ro be ma, angka baoa dongan ni angka parompuan, sude tahe angka na girgir marroha, diboan be ma leangna dohot antingantingna dohot tintinna dohot horunghorungna, ro di ulaula sere marragamragam, jala ganup mamelehon sere bahen pelean tatingan tu Jahowa.

35:23 Manang ise pe na umpeop abit sian bonang na rata langit dohot na rara dohot na merham, nang hain bontar na halus dohot imbulu ni hambing, tole bobak ni birubiru tunggal angka na tinubar dohot bobak ni pitudar, diboan be ma i.

35:24 Manang ise na umpeop perak manang tombaga diboan be ma i guguanna bahen pelean tatingan tu Jahowa; jala manang ise na umpeop hau pinasa ditaruhon be ma i pangkeon tu sandok ulaon tohonan marragamragam.

35:25 Nang saluhut inaina angka na torang marroha mangganti be do dohot tanganna sandiri, jala diboan be na ginantina i, abit sian bonang na rata langit dohot na rara dohot na merham, nang hain bontar na halus.

35:26 Jala nasa parompuan angka na tarsunggul rohana jala na marhapistaran, mangganti imbulu ni hambing ma nasida.

35:27 Alai anggo angka induk i, diboan be ma mata intan unam dohot simata landus bahenon tu baju epod dohot tu tutup andora.

35:28 Tole muse parmurpuri dohot miak tu parpalitoan dohot miak na hushus pangkeon laho mamiahi dohot manutung daupa.

35:29 Nasa baoa dohot parompuan sian halak Israel angka na tarsunggul rohana be gabe girgir mamboan silehonlehon manumpak ulaon marragamragam, na tinonahon ni Jahowa marhite sian si Musa, sibahenon ni halak Israel bahen pelean tu Jahowa.

35:30 Dung i ro ma hata ni Musa tu halak Israel: Ida hamu ma, nunga pola dijou Jahowa sahalak na margoar Bezaleel, anak ni si Uri, i ma anak ni si Hur sian marga Juda.

35:31 Nunga pola digohi Tondi ni Debata rohana i marhapistaran, marhapandean dohot marparbinotoan mangaradoti saluhut ulaon i.

35:32 Asa dipingkiri rohana hapandean na sumurung laho mamandei sere, perak dohot tombaga.

35:33 Huhut manguhir dohot mamijor batu intan, mamandei hau pe mambahen hapandean marragamragam.

35:34 Angkup ni nunga dibasabasahon Jahowa hamaloon tu bagasan rohana mangajari halak na asing, ibana dohot si Oholiab, anak ni si Ahisamakh sian marga Dan.

35:35 Nunga digohi Jahowa rohanasida dohot hapistaran laho mambahen hapandean marragamragam, mamandei hau, mamunsa dohot mangangit abit sian bonang na rata langit, na rara dohot na merham, nang hain bontar na halus, tole hapandean ni partonun, asa dibahen nasida hapandean marragamragam, jala dipingkirpingkiri rohanasida hapandean angka na sumurung.

36:1 Jadi tole ma Bezaleel dohot Oholiab ro di sude baoa angka na pistar marroha, angka naung maruli rohana hapistaran dohot hapandean sian Jahowa, marmulahon mambahen hapandean marragamragam mangaradoti tohonan di inganan na badia i, hombar tu saluhutna na tinonahon ni Jahowa.

36:2 Ai nunga dijou Musa hian Bezaleel dohot Oholiab ro di sude baoa angka na pistar marroha, angka naung maruli rohana hapistaran sian Jahowa, nang sude naung tarsunggul rohana ro jumonok mangaradoti ulaon i.

36:3 Jadi dibuat nasida ma sian adopan ni Musa saluhut pelean tatingan, angka naung binoan ni halak Israel manumpak ulaon mangaradoti tohonan di inganan na badia i, asa paulionna; alai sai didatdati nasida dope ganup sogot mamboan silehonlehon guguan lomo ni rohana i tu Musa.

36:4 Jadi ro be ma sude pande, angka na mangula sandok ulaon di inganan na badia i, ganup sian ulaon na niulanasida be.

36:5 Didok nasida be ma tu Musa songon on: Magodangku do guguan na binoan ni bangso i, lobi sian na tarpangke hasea tu ulaon tohonan i, naung tinonahon ni Jahowa sibahenon i.

36:6 Jadi didokkon Musa ma martingting tu sandok parsaroan i, songon on: Unang be didatdati hita on, nang baoa nang parompuan mangalehon guguan manumpak ulaon pauli inganan na badia i! Jadi dipasohot bangso i ma mamboan.

36:7 Ai nunga tung singkop ulaula tu sandok ulaon sipaulion i, marlobilobi gariada.

36:8 Jadi tole ma sude halak na pistar marroha, angka siula ulaon i pauli undungundung i, i ma sampulu rimberimbe sian bonang na nidua, na rata langit, na rara jala na merham, margombaran kerubim, hapandean na binahen ni parpunsa.

36:9 Ia unjur ni rimberimbe i sadasada duapulu ualu asta do, ia bidangna opat asta; sisada suhat do saluhut angka rimberimbe i.

36:10 Limalima angka rimberimbe i dipadomu, na sada tu donganna.

36:11 Dibahen huhut angka tali sangkutan na rata tu bibir ni rimberimbe parjolo i apala di pardomuanna, laos songon i muse dibahen di bibir ni rimberimbe paduahon i bahen pardomuan paduahon.

36:12 Limapulu tali sangkutan dibahen tu rimberimbe na sada, jala limapulu tali sangkutan muse dibahen di ujung ni rimberimbe i, apala di pardomuanna paduahon; jadi masijaloan ma angka tali sangkutan, na sada tu donganna.

36:13 Dibahen muse ma limapulu haithait sere laho patunggomhon angka rimberimbe i, na sada tu donganna, i ma manjadi sada undungundung.

36:14 Dibahen muse ma angka rimberimbe sian imbulu ni hambing bahen langitlangit di atas ni undungundung i; sampulu sada rimberimbe sisongon i dibahen.

36:15 Ia unjur ni rimberimbe sadasada tolupulu asta do jala bidangna opat asta; sisada suhat do rimberimbe na sampulu sada i.

36:16 Jala dipatunggom pulik na lima rimberimbe i, laos songon i pulik rimberimbe na onom nari.

36:17 Dibahen muse ma limapulu tali sangkutan di bibir ni rimberimbe na sada parduru apala di pardomuanna, jala limapulu tali sangkutan di bibir ni rimberimbe na sada nari, di pardomuanna paduahon.

36:18 Dibahen muse ma limapulu haithait tombaga laho padomuhon undungundung i gabe sada.

36:19 Dibahen muse ma di atas langitlangit ni undungundung i salampis sian bobak ni birubiru tunggal na tinubar, di atas ni muse salampis sian bobak ni pitudar.

36:20 Dibahen muse ma angka papan sian hau pinasa bahen dorpi ni undungundung i, angka sipajongjongon do.

36:21 Sampulu asta ganjang ni papan i, jala tonga dua asta ia bidang ni sada papan.

36:22 Mardua pasi ganup papan, baris be tu donganna, songon i do dibahen saluhut papan angka na masuk tu undungundung i.

36:23 Jala songon on do dibahen parmasuk ni angka papan tu undungundung i: Duapulu papan sambariba tungkan dangsina.

36:24 Dibahen do huhut opatpulu ojahan perak di toru ni na duapulu papan i, dua be ojahan di toru ni sada papan, marguru tu pasina na dua i.

36:25 Di na sambariba nari ni undungundung i pe, tungkan utara dibahen muse duapulu papan.

36:26 Nang na opatpulu ojahanna perak, dua be ojahan di toru ni sada papan.

36:27 Alai di tampahan ni undungundung tungkan hasundutan, onom papan dibahen.

36:28 Dibahen muse papan dua nari di na dua suhi ni undungundung i, di tampahanna parpudi.

36:29 Jadi dua lampis ma i sian toru mardomu di ginjang pinadomu ni sada langgu; songon i ma dibahen duansa di na dua suhi i.

36:30 Jadi ualu papan ma disi mardongan ojahanna perak sampulu onom toropna, dua be di toru ni sada papan.

36:31 Dibahen muse ma angka ransangransang sian hau pinasa, lima tu angka papan di na sambariba ni undungundung i.

36:32 Laos lima ransangransang tu angka papan di na sambariba nari ni undungundung i, laos lima ransangransang tu angka papan ni undungundung i di tampahanna parpudi tungkan hasundutan.

36:33 Dibahen ma huhut ransangransang partonga na di dos tonga ni angka papan, torus sian suhi na sada tu suhi na sada nari.

36:34 Dilampis muse ma angka papan i dohot sere, sabongna pe sian sere do dibahen, asa tusi pabongoton angka ransangransang; angka ransang i pe dilampis do dohot sere.

36:35 Dipauli muse ma sada rimberimbe sian bonang na rata langit, jala na tinubar, jala na merham dohot sian hain na halus na nidua, margombaran kerubim do i dibahen, tinonunhon ni parpunsa tusi.

36:36 Dung i dihirehon ma i tu opat tiang sian hau pinasa angka na nilampis dohot sere, jala marhaithait sere, jala dituang tusi opat ojahan perak.

36:37 Dipauli muse ma sada rimberimbe bahen tutup ni pintu ni undungundung i sian bonang na rata langit dohot na tinubar dohot na merham dohot sian bonang na bontar na nidua, tinonunhon ni parpunsa.

36:38 Dibahen muse ma lima tiang rap dohot haithaitna; dilampis muse ma angka uluna nang rungkungna dohot sere, jala ditumpa lima ojahanna sian tombaga.

37:1 Dung i Bezaleel sandiri ma paulihon poti i sian hau pinasa, tonga tolu asta unjurna, jala tonga dua asta bohangna, laos tonga dua asta dohot timbona.

37:2 Dung i dilampis ma poti i dohot sere na pita, sian bagasan dohot sian ruar, jala dibahen huhut bibirna marlaislais sere humaliang.

37:3 Ditumpa huhut tusi opat langgu sere tu suhina na opat i, dua langgu di na sambariba be.

37:4 Dibahen muse ma haluhalu sian hau pinasa, jala dilampis do i dohot sere.

37:5 Disurukkon ma haluhalu i tu bagasan langgu angka na lohot di poti i, laho mangusung poti i.

37:6 Dibahen muse ma sada langkop pardengganan sian sere na pita, tonga tolu asta unjurna, jala tonga dua asta bidangna.

37:7 Dibahen muse ma dua kerubim sian sere sangkimpal na tinopa, dibahen do i tu na dua tampahan ni langkop parpadanan i.

37:8 Kerubim na sada tu tampahan na sada, jala kerubim na sada nari tu tampahanna na sada nari; tubu sian bagasan langkop pardengganan i tolpus tu duru dibahen angka kerubim i di na dua tampahanna.

37:9 Jala dipaherbang angka kerubim i ma habongna na dua i sian ginjang, asa dihungkupi habongnasida langkop pardengganan i, jala padompak be bohinasida, dompak langkop pardengganan i bohi ni angka kerubim i mamereng.

37:10 Dipauli muse ma sada meja sian hau pinasa, dua asta unjurna, jala saasta bidangna, jala tonga dua asta timbona.

37:11 Dilampis ma i muse dohot sere na pita, jala dibahen martopi sere humaliang.

37:12 Dibahen muse ma tusi sada lais santopap bidangna humaliang, dibahen muse laisna i martopi sere pinariponipon humaliang.

37:13 Jala ditumpa tusi opat langgu sere, angka na binahenna tu suhina na opat i, angka na di patna na opat i.

37:14 Jonok di toru ni lais i do angka langgu i bahen panuruhan ni haluhalu laho mangusung meja i.

37:15 Sian hau pinasa ma angka haluhalu i dibahen, jala dilampis ma i dohot sere, i ma pangkeon mangusung meja i.

37:16 Dipauli ma huhut ulaula sipangkeon di atas meja i: angka pingganna, saoanna, hondina dohot mangkukna, bahen pangusean ni tuak tangkasan ma i; sian sere na pita do i dipauli.

37:17 Dipauli muse ma sada parpalitoan sian sere na pita, sangkimpal parpalitoan i ditopa, ro di badanna, dangkana dohot butuhana, hansingna dohot bungana.

37:18 Onom dangka ruar sian lambungna, tolu dangka, sian na sambariba ni parpalitoan i, jala tolu dangka sian na sambariba nari.

37:19 Martolu butuha, songon bunga ni buapala ganup dangkana i, mardongan angka hansing dohot bunga; laos songon i do dibahen tu na onom dangka i, angka na ruar sian parpalitoan i.

37:20 Alai opat do butuha ni parpalitoan i, songon bunga ni buapala mardongan hansing dohot bunga.

37:21 Jala sahansing be di toru ni na dua dangkana angka na ruar sian i; suang songon i sahansing be di toru ni dangkana na dua, angka na ruar sian i; suang muse sahansing be di toru ni dangkana na dua, angka na ruar sian i; gabe onom dangka ruar sian badan ni parpalitoan i.

37:22 Ruar do sian i angka hansingna dohot dangkana, luhutna i sian sangkimpal sere na pita i do dipauli.

37:23 Dipauli muse ma pitu palitona rap dohot panurturna dohot pangintopina sian sere na pita.

37:24 Sian satalenta sere na pita parpalitoan i dipauli, ro di parhohasna i sudena.

37:25 Dipauli muse ma langgatan pardaupaan sian hau pinasa, saasta unjurna, jala saasta bohangna, maropat suhi tahe, jala dua asta timbona, ruar huhut sian i angka tandukna.

37:26 Jala dilampis do i dohot sere na pita, nang tutupna, nang dorpina humaliang dohot angka tandukna; dibahen do i huhut marbibir humaliang sian sere na pita.

37:27 Dibahen muse dua langgu sere di toru ni bibirna i di lambungna na dua i angkup be, bahen panuruhan ni haluhalu, asa dapot usungon ni halak langgatan i.

37:28 Alai sian hau pinasa haluhalu i dipauli, jala dilampis do i dohot sere.

37:29 Dipamasak huhut miak pamiahion na badia i dohot daupa sian pamurpuri na so sinaor, mangihuthon hapandean ni pande daon.

38:1 Dung i dipauli muse ma langgatan pamelean ni pelean situtungon sian hau pinasa, lima asta unjurna, laos lima asta bohangna, asa maropat suhi do, jala tolu asta timbona.

38:2 Dibahen ma huhut opat tandukna di suhina na opat i, songon na tubu sian i angka tandukna, jala dilampis do i dohot tombaga.

38:3 Dipauli ma huhut sude ulaula tu langgatan i: parsirabunanna, siuksiukna, mangkuk pamispisanna, garpuna dohot parapiapianna; sian tombaga do dipauli saluhut ulaulana i.

38:4 Dibahen ma huhut tu langgatan i sada handanghandang sian tombaga, marpangalaho songon jala na niangit di toru ni sidegedegean humaliang langgatan i sahat ro di parsitongaan ni langgatan i.

38:5 Ditumpa huhut opat langgu tu suhina na opat i mardomu tu handanghandang tombaga i bahen panuruhan ni angka haluhalu.

38:6 Dipauli ma angka haluhalu i sian hau pinasa, jala dilampis do i dohot tombaga.

38:7 Dung i dipabongot ma angka haluhalu i tu bagasan langgu angka na di lambung ni langgatan i, asa dapot usungon ni halak langgatan i marhite sian i; rumar do langgatan i dibahen sian angka papan.

38:8 Dipauli muse ma tong parburian i sian tombaga, ojahanna pe tombaga do, sian angka sorminan pinangke ni parompuan angka na marpungu di lambung pintu ni undungundung parluhutan i marhaladoi.

38:9 Dipauli muse ma alaman ni undungundung i di na sambariba tungkan dangsina, tole muse angka rimberimbe ni alaman i sian bonang na bontar na nidua, saratus asta ganjangna.

38:10 Tole tiangna na duapulu i dohot ojahanna na duapulu i sian tombaga; alai anggo haithait ni angka tiang i ro di ransangransangna perak do.

38:11 Suang songon i di na sambariba tungkan utara laos marrimberimbe do, saratus asta unjurna, tole tiangna dohot ojahanna duapulu be do sian tombaga; alai anggo haithait ni angka tiang i ro di ransangransangna perak do.

38:12 Alai anggo bohang ni alaman i tungkan hasundutan, limapulu asta ganjang ni rimberimbe i, sampulu tiangna, laos sampulu ojahanna; alai anggo haithait ni angka tiang i ro di ransangransangna perak do.

38:13 Ia bohang ni alaman i na tungkan habinsaran laos limapulu asta do.

38:14 Jadi sampulu lima asta rimberimbe i di na sambariba haroroan i, tolu tiangna laos tolu ojahanna.

38:15 Di na sambariba nari pe laos suang songon i do; gabe dos di na dua bariba ni pintu haroroan tu alaman i ganjang ni rimberimbe i sampulu lima asta be, tolu tiangna laos tolu ojahanna.

38:16 Saluhut rimberimbe ni alaman i humaliang sian hain na halus na nidua do.

38:17 Ia ojahan ni angka tiang i tombaga do, alai anggo haithait ni angka tiang i dohot ransangransangna perak do; ia angka uluna na nilampis do dohot perak; alai anggo ransangransangna perak do, angka na mardomu tu tiang ni alaman i.

38:18 Alai anggo rimberimbe tutup ni pintu ni alaman i hapandean ni parpunsa do i pinaulina sian bonang na rata langit, na tinubar dohot na merham dohot sian hain na halus na nidua, duapulu asta ganjangna, lima asta timbona dohot bidangna mangihuthon suhatsuhat ni angka rimberimbe ni alaman i.

38:19 Tiangna na opat i dohot ojahanna na opat i sian tombaga do; alai anggo haithaitna dohot ransangransangna sian perak, anggo ulu ni angka tiang i nilampis do dohot perak.

38:20 Saluhut labang tu inganan na badia i dohot tu alaman i humaliang sian tombaga do.

38:21 On do aturan ni saluhut na pinalaho pauli inganan na badia i, undungundung parluhutan i, na binilangan, nidokkon ni Musa, binilangan ni halak Lepi angka na marpandapotan tu Itamar, anak ni malim Aron.

38:22 Asa si Bezaleel, anak ni Uri, i ma anak ni Hur, marga Juda patupahon saluhutna na tinonahon ni Jahowa tu Musa.

38:23 Ia donganna mangula i ma Oholiab, anak ni Ahisamakh, marga Dan; pande do ibana mandakdak batu, manguhir dohot mamunsa bonang na rata langit, na tinubar dohot na merham, nang pauli hain na halus.

38:24 Saluhut sere na suda pinangkena tu sandok ulaon pauli inganan na badia i, i ma sere guguan bahen pelean tatingan duapulu sia talenta do dohot pitu ratus tolupulu sekkel mangihuthon sekkel di inganan na badia.

38:25 Ia godang ni perak na ginugu ni luhutan na binilangan saratus talenta dohot saribu pitu ratus pitupulu lima sekkel, mangihuthon sekkel di inganan na badia.

38:26 Sabeka sasahalak, i ma satonga sekkel mangihuthon sekkel di inganan na badia sian saluhut jolma na masuk bilangan olat ni na marumur duapulu taon tu ginjang, i ma onom ratus ribu dohot tolu ribu lima ratus limapulu halak toropna.

38:27 Suda do saratus talenta perak laho manuang angka ojahan ni inganan na badia dohot angka ojahan ni rimberimbe, boho saratus talenta, sasatalenta tu sada ojahan.

38:28 Alai sian na saribu pitu ratus pitupulu lima sekkel perak i dipauli do angka haithait tu angka tiang i, jala dilampis angka uluna tole angka langguna ditumpa sian i.

38:29 Ia godang ni guguan tombaga bahen pelean tatingan pitupulu talenta dohot dua ribu opat ratus sekkel dokdokna.

38:30 Dipauli sian i angka ojahan ni pintu undungundung parluhutan i, tole langgatan tombaga dohot handanghandang tombaga na masuk tusi ro di saluhut ulaula tu langgatan i.

38:31 Tole muse angka ojahan ni alaman i humaliang dohot ojahan ni bahal ni alaman i ro di sude labang tu inganan na badia i dohot sude labang tu alaman i humaliang.

39:1 Dipauli nasida huhut angka pangkean tohonan laho marhalado di inganan na badia i sian bonang na rata langit, na tinubar dohot na merham; dipauli huhut pangkean na badia angka sisolukkonon ni si Aron, songon na tinonahon ni Jahowa hian tu Musa.

39:2 Dipauli ma baju epod i sian sere dohot sian bonang na rata langit, na tinubar jala na merham dohot sian hain na halus na nidua.

39:3 Dinanggari nasida ma sere i gabe purada laos diirisi ma i manjadi bonang, asa dapot tonunhonon ni parpunsa saor tu bonang na rata langit, na tinubar dohot na merham, saor muse tu hain na halus.

39:4 Dibahen nasida huhut dua pangabaraan di baju epod i, jala dipatunggom di tampahanna be.

39:5 Tole muse hohos ni epod i, sisada hapandean do i dohot baju i laos mardomu tusi, jadijadian sian sere dohot sian bonang na rata langit, na tinubar jala na merham dohot sian hain na halus na nidua songon na tinonahon ni Jahowa tu si Musa.

39:6 Dung i dipabongot nasida ma angka batu intan unam angka na nirusuk dohot tali sere, jala diuhirhon tusi songon uhiran sahap goargoar ni anak ni Israel na sampuludua i.

39:7 Dung i dibahen nasida ma angka batu intan i tu na dua pangabaraan ni baju epod i, bahen batu parningotan di angka anak ni Israel, songon na tinonahon ni Jahowa tu si Musa.

39:8 Dibahen nasida huhut tutup andora i, suang songon hapandean ni baju epod ditonunhon parpunsa tusi sere, bonang na rata langit, na tinubar jala na merham dohot hain na halus na nidua.

39:9 Maropat suhi do i dibahen jala dua lampis, sanjongkal ganjangna jala sanjongkal bidangna.

39:10 Jala digohi nasida do i dohot opat rinte batu intan. Di rinte parjolo: batu intan sardis, topasion dohot samarados.

39:11 Di rinte paduahon: batu intan rubin, sapire dohot diaman.

39:12 Di rinte patoluhon: batu intan opal, akat, dohot ametist.

39:13 Di rinte paopathon: batu intan krisolit, Unam dohot jaspis; jala marihot sere angka rinte i dibahen humaliang.

39:14 Jala jojor angka batu i mangihuthon partording ni na sampuludua goar ni anak ni Israel, angka na niuhirhon ni halak pandakdak batu, pulik be goarna i, mangihuthon na sampuludua marga ni Israel.

39:15 Dung i dibahen nasida huhut tu tutup andora i angka rante dos ganjangna, songon tali nidua hapandeanna sian sere na pita.

39:16 Dibahen nasida huhut ihot sere dohot dua tintin sere, dibahen muse na dua tintin i tu na dua tampahan ni tutup andora i.

39:17 Jala dibahen nasida do na dua rante na nidua sian sere tu bagasan tintin na dua i, angka na di tampahan ni tutup andora i.

39:18 Alai anggo na dua ujung ni na dua rante na nidua i dihaithon nasida do i tu haithait na dua i jala dipatunggom do i tu pangabaraan ni baju epod i patondong be.

39:19 Dibahen nasida muse dua tintin sere na asing, jala dilohothon do i tu na dua tampahan ni tutup andora i, apala di pangkilimanna na tungkan baju epod i dingkan bagasan.

39:20 Dibahen muse dope dua tintin sere na asing, jala dilohothon do i tu na dua pangabaraan ni baju epod i tungkan toru tongon di pardomuanna, di atas hohos ni baju epod i.

39:21 Jadi dipudunhon nasida ma tutup andora i rap dohot tintinna marhite sian bonang na rata langit tu tintin ni baju epod, asa hopos tu hohos ni baju epod i, jala unang tarbahen sirang tutup andora sian baju epod, songon na tinonahon ni Jahowa tu Musa.

39:22 Dipauli muse ma baju parbalian di toru ni baju epod i, sandok sian bonang na rata langit do i ditonun.

39:23 Jala parrungkunganna i di parsitongaanna, jala martopi na tinonun parrungkungan i humaliang, songon topi ni baju partohonan, asa unang olo maribak.

39:24 Dibahen nasida huhut tu rambuna humaliang angka parbue ni dalimo sian bonang na rata langit, na tinubar jala na merham huhut na nidua.

39:25 Dibahen nasida huhut angka giringgiring sian sere na pita, i ma disolothon tu holangholang ni angka parbue ni dalimo humaliang di rambu ni baju parbalian i.

39:26 Sai marsorinsorin do sada parbue ni dalimo dung i sada giringgiring tuk humaliang, sisolukkononhon do i laho marulaon na badia songon na tinonahon ni Jahowa tu Musa.

39:27 Dipauli nasida huhut angka baju parbagasan sian hain na halus, sipangkeon ni Aron dohot angka anakna i.

39:28 Tole muse tumpal ni sintua ni malim sian hain na bontar ro di angka talitali ni malim sian hain na bontar do, saraoalna pe sian hain na bontar na nidua do.

39:29 Hohos i pe dipauli do i sian hain na nidua dohot sian bonang na rata langit, na tinubar dohot na merham, hapandean ni parpunsa do i, songon na tinonahon ni Jahowa tu Musa.

39:30 Dibahen nasida huhut sangkalia i, tumpal habadiaon i sian sere na pita jala diuhirhon tusi, songon panguhiron sahap: Habadiaon di Jahowa!

39:31 Jala dilohothon tusi tali bonang na rata langit, asa dipadomu tu tumpal i sian ginjang songon na tinonahon ni Jahowa tu Musa.

39:32 Jadi songon i ma hasusun ni sandok ulaon pauliuli inganan na badia i, undungundung parluhutan i; dibahen halak Israel do antong sude hombar tu na tinonahon ni Jahowa, songon i dibahen nasida.

39:33 Dung i diboan nasida ma inganan na badia i tu Musa, i ma: undungundung i ro di sude ulaulana, angka haithaitna, papanna, ransangransangna, tiangna dohot ojahanna.

39:34 Tole muse langitlangitna sian bobak ni birubiru tunggal na tinubar, tole muse sian bobak ni pitudar, tole muse rimberimbe bahen tutupna i.

39:35 Tole muse poti panindangion i ro di haluhaluna dohot langkop pardengganan i.

39:36 Tole muse meja i ro di sude ulaulana dohot sagusagu na marhadohoan.

39:37 Tole muse parpalitoan sian sere na pita i ro di angka lampuna, aturanna ro di sude ulaulana dohot miak tu palito i.

39:38 Tole muse langgatan sere i, miak pamiahion i, daupa na hushus i ro di rimberimbe bahen tutup ni pintu ni undungundung i.

39:39 Tole muse langgatan tombaga i ro di handanghandang tombaga angka na masuk tusi, haluhaluna ro di sude parhohasna, tong parburian i ro di ojahanna.

39:40 Tole muse angka rimberimbe ni alaman ro di angka tiangna dohot ojahanna, nang rimberimbe tutup ni bahal ni alaman i, ro di angka talina, labangna dohot sude ulaula mangaradoti ulaon di bagasan inganan na badia i, undungundung parluhutan i.

39:41 Tole muse angka pangkean tohonan laho marhalado di bagasan inganan na badia i, angka pangkean na badia di malim Aron dohot angka pangkean di angka anakna laho mangaradoti hamalimon.

39:42 Luhutna i hombar tu hata na tinonahon ni Jahowa tu si Musa, laos songon i dipasidung halak Israel sandok ulaon i.

39:43 Dung i ditingkir Musa ma sandok ulaon i, gabe ida ma, nunga sun dibahen nasida; songon na tinonahon ni Jahowa tu Musa laos songon i dibahen nasida. Dung i dipasupasu Musa ma nasida.

40:1 Dung i ro ma hata ni Jahowa tu si Musa, songon on:

40:2 Di artia bulan sipahasada ingkon pajongjongonmu inganan na badia, undungundung parluhutan i.

40:3 Ingkon bahenonmu tu bagasan ni poti panindangion i, jala hungkupanmu poti i dohot rimberimbe.

40:4 Ingkon boanonmu huhut meja i tu bagasan, jala patordingonmu sipatordingon hian di atasna; boanonmu huhut parpalitoan i tu bagasan jala pasangonmu angka palitona.

40:5 Ingkon pajongjongonmu huhut langgatan pardaupaan sian sere di adopan ni poti panindangion i, jala tipak gantungonmu rimberimbe tutup ni pintu ni inganan na badia i.

40:6 Alai anggo langgatan pamelean ni pelean situtungon ingkon pajongjongonmu do di jolo pintu ni inganan na badia i, undungundung parluhutan i.

40:7 Ia tong parburian i ingkon pajongjongonmu do di holangholang ni undungundung parluhutan i dohot langgatan i, laos bahenonmu aek tu bagasan.

40:8 Dung i pajongjongonmu ma rimberimbe ni alaman i humaliang, gantungonmu dohot rimberimbe tutup ni bahal ni alaman i.

40:9 Dung i buatonmu ma miak pamiahion i jala miakkon tu inganan na badia i dohot tu sude ugasan na di bagasanna i, jala urasonmu do i ro di sude ulaulana, asa gabe na badia angka i.

40:10 Ingkon miahanmu dohot langgatan pamelean ni pelean situtungon ro di sude ulaulana, jala urasonmu langgatan i, asa langgatan i gabe na badia sahali.

40:11 Ingkon miahanmu dohot tong parburian i ro di ojahanna jala urasonmu do i.

40:12 Dung i boanonmu ma Aron dohot angka anakna i ro jumonok tu pintu ni undungundung parluhutan i, jala didionmu nasida dohot aek.

40:13 Dung i solukkononmu ma tu Aron angka pangkean na badia i, jala miahanmu ibana, jala urasonmu, asa ibana mangaradoti hamalimon di Ahu.

40:14 Boanonmu huhut angka anakna ro jumonok, jala solukkononmu tu nasida angka baju na marhadohoan.

40:15 Laos miahanmu ma dohot nasida, songon na miniahanmu amanasida i, asa nasida mangaradoti hamalimon di Ahu; ia pamiahion na tu nasida i ingkon manjadi tanda hamalimon do i salelenglelengna ro di pinomparnasida sogot.

40:16 Jadi dipatupa si Musa ma sude songon na tinonahon ni Jahowa tu ibana songon i do dibahen.

40:17 Saut ma di artia bulan sipahasada paduataonhon dung ruar sian Misir dipajongjong nasida inganan na badia i.

40:18 Jadi dung dipajongjong Musa sandiri inganan na badia i, dibahen dohot angka ojahanna jala dipamasuk tusi angka papanna, dibahen muse ransangransangna jala dipajongjong angka tiangna.

40:19 Jala dipaherbang angka rimberimbe ni undungundung i tu atas inganan na badia i, jala dipeakkon tutup ni undungundung i tu atasna, songon na tinonahon ni Jahowa tu si Musa.

40:20 Dung i dibuat ma lei panindangion i jala dipeakkon tu bagasan poti i, disurukkon ma dohot haluhalu i tu poti i dibahen muse ma langkop pardengganan i tu atas ni poti i.

40:21 Dung i diboan ma poti i tu bagasan inganan na badia i jala digantungkon rimberimbe i bahen tutup ni poti panindangion i, songon na tinonahon ni Jahowa tu Musa.

40:22 Dung i dipajongjong ma meja i tu bagasan undungundung parluhutan i di lambung inganan na badia i tungkan utara di balian ni rimberimbe i.

40:23 Jala dipatording di atasna sipatordingon hian, i ma sagusagu di adopan ni Jahowa, songon na tinonahon ni Jahowa tu Musa.

40:24 Dipajongjong ma dohot parpalitoan i tu bagasan undungundung na badia i tondong ni meja i di lambung inganan na badia i tungkan dangsina.

40:25 Dipagalak ma dohot angka palito i di adopan ni Jahowa, songon na tinonahon ni Jahowa hian tu Musa.

40:26 Dipajongjong muse ma langgatan sere i tu bagasan undungundung parluhutan i di jolo ni rimberimbe i.

40:27 Jala di tutung di atasna daupa na hushus marragamragam songon na tinonahon ni Jahowa hian tu Musa.

40:28 Digantungkon ma dohot rimberimbe tutup ni pintu laho tu inganan na badia i.

40:29 Alai anggo langgatan pamelean ni pelean situtungon dipajongjong do i di pintu haroroan tu inganan na badia i, undungundung parluhutan i, jala dipelehon di atasna pelean situtungon dohot pelean sipanganon, songon na tinonahon ni Jahowa hian tu si Musa.

40:30 Dipajongjong dohot tong parburian i di holangholang ni undungundung parluhutan i dohot langgatan i, laos dibahen tusi aek parburian.

40:31 Asa laos aek sian i buaton ni si Musa. Si Aron dohot angka anakna i mamburi tangannasida dohot patnasida.

40:32 Molo masuk nasida tu bagasan undungundung parluhutan i, jala molo ro nasida jumonok tu langgatan i, ingkon jolo marburi nasida, songon na tinonahon ni Jahowa hian tu si Musa.

40:33 Dipajongjong muse ma rimberimbe ni alaman i humaliang inganan na badia i dohot langgatan i, jala digantungkon rimberimbe tutup ni bahal ni alaman i. Jadi sun ma sandok ulaon i dipasidung si Musa.

40:34 Dung i ro ma ombun i manghungkupi undungundung parluhutan i, jala hamuliaon ni Jahowa manggohi inganan na badia i.

40:35 Pola ndang tarbahen si Musa laho bongot tu bagasan undungundung parluhutan i, ai sai mangulon do ombun i di atasna, jala hamuliaon ni Jahowa manggohi inganan na badia i.

40:36 Molo tung manaek ombun i sian atas inganan na badia i, borhat ma halak Israel i mardalan, manulus sandok dalannasida i.

40:37 Alai molo so manaek ombun i, ndang borhat nasida, sahat ro di ari hananaekna i.

40:38 Ai sai di atas ni inganan na badia i ombun ni Jahowa ia arian jala api do di atasna ia bornginna i dipaidaida sandok pinompar ni Israel di sude dalannasida i.