John Mayall

John Brumwell Mayall, (* 29. Novemba 1933 in Macclesfield, Cheshire, England; † 22. Juli 2024 in Kalifornien) war a Midbegrinda voum britischn Blues am Ofang vo de sechzga Joa. Zam midm Alexis Korner, isa oana vo de Vodan voum weißn Blues.

Da John Mayall is am 29. Novemba 1933 in da englischn Gloastod Macclesfield in da Nat vo Manchester af d Wejd kumma, weid weg vo da schwoazn amerikanischn BluesKuitua. Sei Voda woa a Jazzmusika und hod eam s Giddar, Bänscho und s Ukulelespuin zoagt. Scho 1950 hoda seine easchdn Gigs in Manchester kobt. No hoda zan Milidäa miasn und woa fia drei Joa in Korea. Dano isa 1955 afa Kunsthochschui ganga und hod a Ausbuidung zan Grafikdiseina gmochd.

1962 hoda a Bluesgruppm, de Powerhouse Four grind, de nocha in Blues Syndikat umgnennt woan is. Do hod a da Bassist John McVie mid gschpuit, am Midgrinda vo Peter Greens Fleetwood Mac 1967. 1963 hod da Mayall sei Bänd nomoi umgstejd und hods im Londoner Marquee Club untam Nama Bluesbreakers dahea brochd und so hoasts heid ano.^[1]

Mid da Zeid hom vui bekannte Musika bei de Bluesbreakers gspuit, Eric Clapton, Peter Green, John Mc Vie, Mick Taylor, spada Walter Trout und Coco Montoya.

2001 hoda sei 40-jarigs Bühnajubeläum gfeiad und hod mid de berihmndn Rock - und Bluesmusika Gary Moore, Chris Rea und Otis Rush, s Oibum All Along the Ride eigspuid. Sein 70. Gebuatsdog 2003, hod da John Mayall mid an Konzert in Liverpool gfeiat, wo a Eric Clapton, Mick Taylor und da Dschäßmusika Chris Barber mid gspuit hom. Bis heid spuit da Mayall mit seine Bluesbreakers no oawei in de USA, Eiropa und Australien, owa nua no in gloane Klubs oda gräßane Bluesfestln.

In de Hitparan gfind ma an John Mayall kam, owa sei Weak woa und is enoam fia de Weidaentwiglung voum Blues. Ea hod zoireiche Musika beeinflussd. 2005 hoda de Eanennung zan Officer of the Order of the British Empire griagt.

1. ↑ Rockmusiklexikon (Europa), Bd.1, Taurus Press 1986, S.487-491.

 Commons: John Mayall – Sammlung vo Buidl, Videos und Audiodateien

• Werke von und über John Mayall im Katalog der Deutschen Nationalbibliothek
• Offizielle Hoamseitn vom John Mayall
• Eintrag bei laut.de
• Bio- und Diskografie vom John Mayall
• Bsetzungslistn vo de Bluesbreakers
• Videointerview midm John Mayall (2008) (englisch)