Apruinoar

Apruinoar oda Aprui-Ox (dt. Aprilnarr) is a Brauch am easchtn Aprui. Es gähd do drum, dass ma an dem Dog jemandn zun Noarn hoidn und eam nacha vaspoddn duad. Dozua ruaft ma moast: "Aprui, Aprui" oda a Sprichal wia "Apruinoar, Apruinoar bleibst a Noar bis afs Joar!"

Leichtglaibige Kinda san friacha gean in an Aprui gschickt worn mid da Afgob, dass s de Gwichda vo da Wossawoog do oda do hoin soitn oda de Oar vom Kiniglhosn.

Dea Brauch is easchtmois in Bayern belegt. Anno 1618 hoassts do, "jemandn in an Aprui schicka". Wo dea Brauch genau heakimmt is ned gsichad. Es is owa ned unwoarscheinli, dass da Apruinoar en Winta symbolisat, dea wo sei Mocht valuan hod und zan Noarn ghoidn wead.^[1]

• Ma schickt am 1. Aprui an Oxn, wohi ma wui; oft aa am 1. Mai an Oxn ins Hei. Schickt ma eam noh, is a glei wieda do; schickt ma eam weid wead a gscheid.
• Ogfiahd, mid Budan gschmiad, mid Kaas gleckt, hods da guad gschmeckt?
• A Apruinoar bleibt a Esl as ganze Joar.

• Vom Haydn hoassts, dass a am 1. Aprui geboan waa, sejm owa imma en 31. Meaz ogem ghobt häd, wei ra koa Apruinoar sei woitad.
• Da Christian Morgenstern hod gfoadad, dass da easchte Aprui zan nationain Feiadog wean soitad, damid des Aprui-schicka intensive pflegt wean dad.
• Fian Mark Twain soi da 1. Aprui a recht wichtiga Dog gwen sei. An dem Dog soit ma si seina Moanung noch dainnan, dass ma 364 Dog im Joar nix ois wia Noarn san.
• Am 1. Aprui 1705 hod da Theatadirektor am Hof vom russischn Zarn Peter I. de Hofgsejschoft zu ana Galavoastejung eiglodn. Wia da Vuahang afganga is, wor nua a Schuisl zan segn: « Heit is da easchte Aprui ». De feine Gsejschoft hod owa driwa ned glocht. Da Zar hod en Theatadirektor fristlos gfeiat.^[2]

 Commons: Apruinoarn – Sammlung vo Buidl, Videos und Audiodateien

• Apruischeaze vo Google
• Apruischeaz vo Amazon (eng.): 2015
• The Top 100 April Fool's Day Hoaxes of All Time

1. ↑ Der April öffnet Knospen und Herzen (Memento des Originals [1] vom 12. Mäerz 2016 im Internet Archive)  Info: Der Archivlink wurde automatisch eingesetzt und noch nicht geprüft. Bitte prüfe Original- und Archivlink gemäß Anleitung und entferne dann diesen Hinweis.@1@2Vorlage:Webachiv/IABot/www.donaukurier.de (donaukurier.de; Artike zan kaffa)
2. ↑ April, April! (Basler Zeitung)