Eugène Rougon tabexik (suterot)

Eugène Rougon tabexik tir berpot ke Émile Zola sanegayan bak 1876, i teveafa karba ke Rougon-Macquart yasa nevatum.

Eugène Rougon tir taneafe nazbeikye ke Pierre Rougon isu Félicité. Koe Tufa ke Rougon yasa berpot azu Guinera azu Levrotira va Plassans, inafa gaderopafa tifcira merontion zo pimtayar : male Paris kelu, ine jupayar da gadikeem va gaderopafa nakila koe Plassans vofa widava rokoilkayar, isen Aristide Saccard berikye bedabloon erbugason va int tukulayar ; kan Faujas gertik jupayar da Plassans gin tiyir neyon gu gindafi roti.

Wetce pulodik ke Deux-Sèvres utca bal Toleafe Sokasane, va kevsokara ke 02/12/1851 ke Louis-Napoléon Bonaparte weber aze vanpir Sénat krinanik. Titi berpot, tir taneagadesik ke Sokaf Pirdot. Liza ba lana fruga ke puloda tozuwer. Kottan al pir inde va disukexa fu tcoker, ewa tickid aredjiara lodam atatcera, koka tir leve gindik, viele tulon pol ta ailkera va gindafe sersikye zo gobrudar. Viele Eugène Rougon va taneagadera va Sokaf Pirdot griflir kire su zo grikuvar, pune va turestasa levkobara ke inaf danusikeem ta direfa dimdenfira va roti tcoket, i ke blay. Kottel va intaf titis dulap batkane djuzanir. Skedegara ke Eugène Rougon va Clorinde Balbi tir vokafa, i va listafa italiikya diveavusa is stuvusa. In va inya co rokureyer voxe va inafa kurera va Delestang spupiapaf flibapik abdualbar kire va ayikya craker. Wori inya kozanir ise kobaver enide in va progera ke gindik di katrasir. Inya tir nubokepesik ise do Marsy gaderopaf kevlik ke Rougon va int dace rotplekur. Va blay gader.

Rougon gu levegara va bilmara ke Orsini ba 14/01/1858 va Napoléon III aun zo givar voxe meinde razdar nume va dilizera ke piza di isker. Volmusafa lidawicka impavantar : in gan gindik zo permudar ise va Elda ta Musuca mbi odiar, i va elda lize va Marsy ikarundar, kobenplekumbon va koaykara va vuda mo patecta. Batcoba tir pelava ke inafa klepa. Kan azilnuba bower ise va bewik ke blay koinker. Ugal tir ton laitera va sokasaneevik isu rezgalera. Oxura is udutura tid cugafa ba sopera va Martineau tegivsutesik abdiawalkes koe Niort.

Neyik ke Rougon ilfid kire va jugemeks re al seotad ise pestaled da ilamotasi roti va kottan toz dasar. Clorinde re tir fertik ke gindikye aze gu Rougon medjukureyes va int jaxadar.

Arti barda bak 1961, Rougon va bowere wetce playiskaf eldik dimdenfir. Tiyir ubzes pakoik voxe re al kadar nendasik va nuyotevafa gaderopa abduaskina gan Napoléon III. Zaleson va trakuray gu goaspil, va rotipoz tcedeson dimdenfir. Bocafa conya ke berpot tir mafelasa sebura ke Clorinde :« Arse til pockaf, rin !»

Koe bat berpot, Zola va belcekara ke gaderopikeem is arientikeem koe selt ke Toleaf Gindugal lasupimtar : turestas poz is winugaf feleem veges va roti is aneluca is peguca is niauca ke tarjanik. Zola va levetirotuca ke pulodikeem tove gindik mepuvoteson dere linger.

Eugène Rougon tir ayik vumben gan kuranira va roti, i gan veyafa adala ke Rougon yasa. Kore opelon blir, pune va miv roti dum exaksara va intafo po albackar. Va poraca ik kuluca me kaaneyar kiren roti vaon staper. In va zanivasik givliguckur voxe vaniksantutuson va sinyon dulap gadikyeon dere girubar. Va neyaf blay dadir, razdason inde kon gaderopik va anamikeem ruptecker. Detik kobad viele lasujupad da in va roti di vansar. Voxen kaaneyason kan roti ke tabexik, va intaf dulap anton djumalzanid nume nope yona kucilara vibad batvielu va dirkey gir.

Tana riafa axaca ke Eugène Rougon tir nope crakera va ayikya is gempuca linulara tove sinya. Tana tula tir dempa bas listafe Clorinde Balbi : aotcuca dem dofuguca is turestasa lyumara is nubokera is lickuca ok dace boga. Sinafa skedara va tan femap ke berpot tadled.

Tere Zola va rist ke gindaf aboyikeem koe Compiègne pimtapar. Tapega vanbedersana en tir volsafa gu sutuca lingena koe aryona karba ke Rougon-Macquart yasa nevatum. Zola kan to bata elimuca va oxuca is udutuca ke selt ke Toleaf Gindugal djukuranker.

• Émile Zola : Francavaf francaf suterotik ( 1840-1902 )
• (fr) Eugène Rougon tabexik, dene Wikisource ( xantokrent )

t · p · b Rougon-Macquart yasa, nevatum ke Zola
Les Rougon-Macquart, Histoire naturelle et sociale d'une famille sous le Second Empire ( Rougon-Macquart yasa, Tuwavafa is seltafa izva ke lana yasa bak Toleaf Gindugal )
1870-e sanda	La Fortune des Rougon ( Tufa ke Rougon yasa ) • La Curée ( Guinera ) • Le Ventre de Paris ( Jivot ke Paris ) • La Conquête de Plassans ( Levrotira va Plassans ) • La Faute de l'abbé Mouret ( Derka ke Mouret gertikye ) • Son Excellence Eugène Rougon ( Eugène Rougon tabexik ) • L'Assommoir ( Sagondexo )
1880-e sanda	Une page d'amour ( Lanu bu ke rena ) • Nana ( Nana ) • Pot-Bouille ( Pot-bouille ) • Au Bonheur des Dames ( Kalaxe ke weltikya ) • La Joie de vivre ( Blisa daava ) • Germinal ( Germinal ) • L'Œuvre ( An grot ) • La Terre ( Tawa ) • Le Rêve ( Klokaks )
1890-e sanda	La Bête humaine ( Ayasulemya ) • L'Argent ( Erba ) • La Débâcle ( Atitsura ) • Le Docteur Pascal ( Pascal kurmikye )