Velódromu

Un velódromu ye una pista artificial de forma de rectángulu arrondáu, coles curves peraltadas, onde s'apuesten competiciones de ciclismu en pista. La superficie suel ser de madera, anque tamién les hai de cementu y compuestos sintéticos. Los velódromos olímpicos tienen de tener un perímetru d'ente 250 y 600 metros y la media vuelta tien de dexar completar 1.000 metros exactos. Otros velódromos miden ente 133 y 500 metros.

Les bicicletes utilizaes en velódromos suelen ser de piñón fixu, ensin frenos y ensin rueda llibre (esto ye, nun puede parase de pedaliar ensin parar la bicicleta). Esto ayuda a maximizar la velocidá, amenorgar el pesu y evitar les frenaes sópites.

Aspeutos téunicos

La elevación nes curves, denomada peralte, dexa a los ciclistes caltener les sos bicicletes relativamente perpendiculares a la superficie, cuando se conduz a gran velocidá. La velocidá averada d'una bicicleta na curva puede superar los 80 km/h. El peralte intenta faer coincidir l'enclín natural de la bicicleta na curva. D'esta manera llógrase que la inercia o fuercia centrífuga sía en tou momentu casi perpendicular a la pista.

Los ciclistes, sicasí, nun viaxen siempres a la máxima velocidá. En ciertes carreres d'equipu (como la Madison) dellos ciclistes van más amodo. Por esta razón, el peralte tiende a ser de 10 a 15 graos menor a lo que se preve necesariu pa esaniciar la fuercia centrífuga. Amás les rectes tán llixeramente peraltadas p'amenorgar los cambeos nel enclín. Toes estos cambeos faen que la pista sía aplicable nun ampliu rangu de velocidaes y dexe a los ciclistes dar les curves ensin sópitos cambeos na direición, ameyorando'l so rendimientu.

Referencies

Enllaces esternos