Ríu Beón

Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. Pues añadiles tu mesmu o avisar al autor principal del artículu na so páxina d'alderique pegando: {{subst:Avisu referencies|Ríu Beón}} ~~~~

Ríu Beón
Situación
País	España
Autonomía	Principáu d'Asturies
Tipu	ríu
Datos

El ríu Beón ye un ríu de la fastera oriental d'Asturies. Ñace na parroquia cabraliega de Santolaya y, dempués de formar un escobiu pel que se comuniquen Llanes y los conceyos del interior (Onís, Cabrales), entra nel conceyu llaniscu. Percuerre delles de les parroquies de la so zona central pa dir morrer a la playa de San Antolín, na parroquia de Naves.

El ríu ñaz cerca de la vega cabraliega de Tresbrandi, na falda septentrional d'El Picu'l Cantu, y baxa hacia l'oeste per tierres de L'Escobal, na parroquia cabraliega de Puertas. Nesa zona llámenlu ríu Muñumbreru y ríu Cerezu, como los caseríos que va atopando nel so camín hacia'l mar. Pasáu El Cerezu cambia de direición, y fluye hacia'l norte formando, al so pasu, l'escobiu del ríu Las Cabras, que ye'l nome que se-y da a esti ríu nel tramu que va dende La Robellada (Onís) hasta Meré (Llanes). L'escobiu, fondu y pindiu, aprovéchase pa comunicar, cola carretera AS-115, les tierres interiores de Llanes colos conceyos más interiores. En llegando al pueblu de Meré acaba la garganta y el ríu, a pasu más seliquino, va siguir camín del mar bañando les vegues de Meré (aú lu llamen ríu de Meré) y Torrevega (aú lu llamen ríu de Vega). Ente esos dos pueblos recibe, pela mandrecha, les agües d'un regatu, conocíu como ríu Caldueñu, que baxa del pueblu de Caldueñin.

Nel so últimu tramu al ríu yá-y llamen ríu Beón, y con esi nome pasa per La Puentenueva (ú recibe, pela manzorga, les agües del ríu Riensena), Vibañu y Rales. Nesi trayeutu va recoyendo l'agua de dellos regatos que-y aporten el so caudal definitivu. Con elli percuerre L'Agüera de Turancias y pasa a la vera del caseríu de Samartín p'acabar desembocando al mar Cantábricu na playa de San Antolín.