Compositor

Un compositor ye aquella persona cola capacidá de faer composiciones musicales.^[1]

Ye'l que sabe escribir composiciones musicales según les regles del arte, onde básicamente entama una serie de soníos solos o arrexuntaos en forma d'acordes teniendo como base los parámetros de la teoría. El compositor dramáticu ye aquel que compón óperes. El compositor sinfónicu ye aquel que compón música sinfónica.^[2]

El compositor ye aquel qu'inventa música trabayando los soníos de forma imaxinativa col envís de poder crear la so propia música, ye'l que tien la capacidá de falar al traviés de los soníos. El falar podría dicise que ye l'equivalente a improvisar en música y escribir sería l'equivalente a componer. El compositor ye'l que constrúi la música. Ellabora un productu musical que depués puede interpretase en distintes ocasiones tamién por otres persones y dexa que pueda afitase nun soporte, por exemplu, grabáu.^[3]

Esto débese a que la música ye una forma artística efímera que precisa d'afitase de dalguna manera.^[4]

Ye por eso que'l compositor, anque dacuando utiliza la improvisación, la mayoría de les vegaes dexa un rexistru escritu de les sos composiciones.

Sabemos bien pocu de los compositores de les primeres dómines. Ente los pocos de los que tenemos noticia alcuéntrase Mesomedes de Creta, un compositor griegu d'empiezos del sieglu II. Los primeros intentos d'afitar l'altor de los soníos tuvieron llugar nel sieglu IX. Primitivamente la música calteníase por tradición oral y nun s'escribía. Del sieglu IX quédennos referencies de la fama de Ziryab, que les sos innovaciones musicales tuvieron tamién una fuerte influencia n'Hispania.

A pesar de que siempres esistieron compositores de música, nun tenemos rexistru de los sos nomes hasta la dómina medieval, cuando nel sieglu XI apaecieron los trovadores, que yeren músicos y poetes, esto ye, escribíen la lletra y componíen la música. Llamábense ministriles a los encargaos d'acompañar a los trovadores per aciu de preseos musicales.

Ún de los primeros trovadores de los que tenemos referencia n'Europa ye Guillermo de Poitiers, duque d'Aquitania, que vivió ente 1089 y 1127. Los trovadores del norte de Francia llamábense troveros y los alemanes Minnesänger, que significa cantores d'amor. N'AlemañaAlemaña esistíen los maestros cantores. Ente los más conocíos figuren Hans Sachs y Enrique von Meissen.

• Composición musical
• por sieglu
• Trovadores d'Alemaña
• Compositores de la Edá Media d'Alemaña
• Compositores de la Edá Media d'Italia