Street Parade

D Street Parade isch e Technoparade z Züri, wu em Zürisee noo goht.

Syter ass d Loveparade z Berlin yygstellt woren isch, isch si di grescht Techno-Party in dr Wält un au di zwotgrescht jehrlig Veraastaltig in dr Stadt Züri. D Street Parade wird in dr Regle am zwete Samschtig im Augschte durgfiert.

Di erscht Street Parade het am 5. Septämber 1992 stattgfunde, initiiert vum Mathematik-Studänt Marek Krynski un offiziäll bewilligt as Demonstration für Liebe, Frieden, Freiheit, Grosszügigkeit und Toleranz. Dr allererscht Street Parade Flyer isch vu dr DJ Viola gstaltet wore. Villicht 1'000 bis 2'000 Persone hän dert deilgnuu un sin hinter dr zwei Lovemobil hinterhär danzt. Hite cheme zue dr Street Paradade als bis zue eire Milion Mänsche, si isch dodermit fir Züri zuen eme wichtige Wirtschaftfaktor wore.

1992 isch d Paraderute am Limmatquai duregange un e Stuck wyt in dr Bahnhofstrass lang. Dr Start isch am Hechtplatz gsi, mit dr Marschrute iber Limmatquai, Rudolf-Brun-Bruck, Uraniastrass in d Bahnhofstrass bis Bäregass un mit Ziil am Basteiplatz. Eim vu dr bide Mobile isch zmitts im Umzug dr Strom uusgange, uf d Stimmig het sich des aber nit uusgwirkt. E Gegedemo us dr Huusbsetzerszene, wu verärgeret gsi isch, ass ihri Demo nit bewilligt woren isch, isch vu dr Bolizei, wu mit Schlagsteck un Schutzschild bewaffnet gsi isch, vum Umzug ewägghalte wore. Vor allem an dr Bahnhofstrass hän sich vil jungi Mänsche dr Techno-Dänzer spontan aagschlosse. Am Oobe het s derno di erscht Energyparty gee mit rund 6'000 Persone in dr SRO-Chugellagerfabrik z Oerlike.

1993 hän scho 10'000 Raver deilgnuu, d Parade isch bekannt un zuen eme Großaalass wore.

1994 het dr Zürcher Bolizeivorstand Robert Neukomm (SP) d Street Parade verbotte. D Street Parade sej z groß, z lut un diej d Stroße dräckig mache. Derzue diej si nume ne uuwesentlige Deil vu dr Bevelkerig inträssiere. Dr Neukomm het in syyre Ablähnig vum Gsuech au gschribe (Zitat), «dass die Innenstadt für solche Grossanlässe völlig ungeeignet ist». S het Pressekumferänze gee vum Marek Krynski un syym Aawalt Dr. Christian Widmer, wu ne 19-sytige Rekurs verfasst gha het - un vor em Zürcher Stadthuus het s nochenand an vier Mittwuche (derwylscht Dagige vum Stadtrot gee het) Pro-Street-Parade-Demonschtratione gee. Dr Neukomm isch zerscht bi syyre Ablähnig blibe, het d Initiante as «unwichtiges Grüppchen» bezeichnez un het schließli in eme Interview vorgschlaa, d Street Parade sott doch z Bärn oder z Basel stattfinde. Di grien Bolitikeri Monika Stocker isch em Neukomm as Vorsteheri vum Sozialdepartement byygstande un het uf di grß Drogegfohr hiigwise, w uno ihre Meinig vu dr Street Parade uusgieng. E Mehrheit vu dr Bevelkerig het aber kei Grund fir e Verbot gsäh. Wel s als Protescht gee het us dr Techno-Szene, us dr Bevelkerig un wäg dr Diskussion in dr Medie het d Stadtregierig ihre Verbot zruckzoge, het aber neji Uflage gmacht zue dr Durfierig, Lärmemissione, Abfall un Sicherheit. D Parade findet syterhär all Johr aafangs Augschte statt. D Rute vu dr Parade isch verleit wore un goht jetz iber d Quaibruck vum Mythequai z Wollishofe rund um s Seebecki vum Zürisee bis zue dr Hornbachstrass im Seefeldquartier.

Im Ruckblick het s Verbot vum Neukomm un di effentlig Diskussion, wu drus entstande isch, dr Street Parade Community e wichtige Ufschwung gee. D Zyte vum spontane Underground-Raves sin aber verbyy gsi. E Deil vu dr Lyt, wu am Aafang derbyy gsi sin, wie z. B. d DJ Viola, hän sich wäg dr Professionalisierig un Kommerzialisierig vu dr Street Parade zruckzoge. 1994 isch zem erschte Mol e CD vereffentligt wore mit em Name Energy 94 Streetparade – The Disc.

1995 hän scho 150'000 Raver us em In- un Uusland deilgnuu. Zem erschte Mol isch mit dr Doppel-CD Street Parade 95 e eigeständigi CD zue dr Parade erschine.

1996 het dr Marek Krynski zämme mit dr Barbara Suter un em Christoph Soltmannowski dr Verein Street Parade Authorities grindet, wu dr Aalass ab do organisiert het. D Parade het hite zwor dr Karakter vun eme Volksfescht, juristisch giltet si aber allno as bolitischi Demonschtration. Des erspart dr Veraastaltern unter anderem d Sicherheitscheschte, wu d Stadt ibernimmt. Zem erschte Mol isch s jetz offiziäll Logo vu dr Street Parade brucht wore, e stilisiert P in eme Stärn.

1998 isch no dr Street Parade e Live-CD erschine, wu vun eim Love-Mobile diräkt ufgnuu woren isch.

1999 isch zem erschte Mol Radio Street Parade uf Sändig gange. Radio Street Parade het allmol rund zwo Wuche vor bis e baar Däg no dr Parade Technomusik gsändet, elektronischi Danzmusik un Interview mit DJ un Musiker, derzue Bricht rund um d Street Parade.

2000 Unter em Motto «believe in love» isch d Street Parade zem erschte Mol vum Schwyzer Färnseh SRF 1, vu 3sat un vu Tele 24 live iberdrait wore. Dr Dytsch Musiksänder VIVA het in dr Wuche derno zwostindigi Zämmefasige zeigt.

2001 het si mit iber eire Million Deilnämmer e Rekord ufgstellt. Dodermit isch d Zürcher Streetparade zem erschte Mol us em Schatte vu dr Berliner Loveparade drätte, wu in däm Johr au rund ei Million Bsuecher gha het.

2002 het s arg grängnet, was sich zem Deil uf d Stimmig uusgwirkt het.

2003 hän wider 900.000 Mänsche an dr Parade deilgnuu. Zem erschte Mol isch d Parade nit vum Mythequai zum Seefeldquarier gange, sundere umgchehrt. Die Änderig vu dr Zugrichtig isch zem Eine us Lärmschutzgrind durgfiertw wore, wel am Seefeldquartier meh Lyte wohne, zem Andere, wel z Wollishofe besseri Rute zum Ewägfahre git fir d Lovemobile.

2004 het d Street Parade wider 1'000'000 Deilnämmer gha.

2005 het s wider ei Million Deilnämmer gee. Radio Street Parade isch in finanziälli Not grote, dr Sänderbedrib het aber chenne grettet wäre vum Zürcher Lokalradiosänder Energy Zürich un dr Gratiszytig 20 Minuten.

2006 het d Street Parade unter em Motto Move your mind mit rund 800'000 Deilnämmer stattgfunde.

2007 het s d Street Parade zum 16. Mol gee unter em Motto «Respect!» fir e gwaltfrej Mitenandersyy. Mit rund 800'000 Raverinne un Raver sin s eppe glych vil Lyt gsi wie im vergangene Johr. Negativ in d Schlagzyyle isch d Street Parade chuu dur e Mässerrstächerej mit Dodesfolg.^[1]

2008 het d Streetparade am 9. Augschte stattgfunde. Ass sich d Uuswichs us em Vorjohr nit widerhole, het d Stadt Züri bi dr Organisatore uf Maßnahme drängt, wu d Situation hän solle beruehige. In dr Innestadt het s kei Sunderbewilligunge me gee fir zuesätzligi Bartheke uf effetligem Grund, s hän kei Lutsprächer me im Freje derfe ufgstellt wäreun d Frejnacht het nume um Innere vu dr Lokal gulte.^[2] Au d Mainstation-Party im Hauptbahnhof, wu nit diräkt mit dr Streetparade zämme hangt, isch nume no bis Mitternacht bewilligt wore un nit wie in dr Vorjohr bis am segsi dermorge. Mit em Motto Friendship het d Streetparade zuen eme fridlige un verantwortigsbewusste Umgang mit Mitmänsche un dr Umwält ufgruefe.

2009 sin drotz Räge, Chelti un Warnige wäg dr Schweine-Grippe einewäg rund 600'000 Persone zue dr Streetparade chuu. Im Vorfäld het s Bedänke in e Deil Medie gee, e Masseveraastaltig wie d Streetparade chennt zuen ere Verbreitig vu dr Schweinegrippe-Pandemi in dr Schwyz byydrage.^[3][4][5]

2010 het d Streetparade am 14. Augschte unter em Motto «Celebrate the Spirit of Street Parade» stattgfunde. Fir d Opfer vu dr Massepanik bi dr Loveparade z Duisburg het s e Schwyygeminut gee. Trotz ass Räge aagchindet gsi isch, sin rund 650'000 Lyt chuu.

2011 het d Streetparade am 13. Augschte unter em Motto «20 Years Love, Freedom, Tolerance & Respect» stattgfunde. 900'000 Raver und Zueschauer sind choo^[6].

2012 het d Stretparade am 11. Augschte unter dem Motto «Follow your heart» stattgfunde.

2013 het d Stretparade am 10. Augschte unter dem Motto «Dance for freedom» stattgfunde. Wie im Vorjohr sin rund 950'000 Lyt chuu.

2014 het d Street Parade am 2. Augschte un dodermit am erschte Augschte-Wuchenänd un nit wie sunscht an zwaite stattgfunde.

2015 isch d Street Parade wäge Böuarebte uf s letscht Wuchenänd im Augschte glait wore.

In dr Johr 2020 un 2021 isch d Street Parade wäge dr COVID-19-Pandemi abgsait wore.

Syt 1996 findet as Alternative zue dr Street Parade am nämlige Dag d Antiparade z Züri statt. D Ziil vu dr Antiparade sin ähnli wie bi dr Fuckparade z Berlin.

In dr Roote Fabrik findet analog zue dr Energy au d Lethargy statt.

Loveparade

• Davina Siegenthaler: Street Parade, Zürich ZH. In: Andreas Kotte (Hrsg.): Theaterlexikon der Schweiz. Band 3. Chronos, Zürich 2005, ISBN 3-0340-0715-9, S. 1766 f.
• Christoph Soltmannowski: Street Parade - das Buch. Werd Verlag, 2002, ISBN 3-85932-394-6

1. ↑ 20min.ch: Junger Mann an Street Parade 2007 erstochen (Memento vom 6. Novämber 2011 im Internet Archive), vum 12. Augschte 2007
2. ↑ nzz.ch: Die Street Parade soll leiser und nüchterner werden (Memento vom 12. Augschte 2009 im Internet Archive), vum 5. Augschte 2008
3. ↑ Archivierte Kopie. Archiviert vom Original am 2. August 2009; abgruefen am 11. August 2010. 
4. ↑ Archivierte Kopie. Archiviert vom Original am 2. August 2009; abgruefen am 11. August 2010. 
5. ↑ Archivierte Kopie. Archiviert vom Original am 11. August 2009; abgruefen am 11. August 2010. 
6. ↑ 900'000 Raver tanzen ums Seebecken (Memento vom 24. Septämber 2015 im Internet Archive) in: Tages-Anzeiger vom 13./14. August 2011
7. ↑ tagesanzeiger.ch: Zürich im Techno-Fieber (Memento vom 14. Dezämber 2015 im Internet Archive), vum 10. Augschte 2008

 Commons: Street Parade – Sammlig vo Multimediadateie

• Website vo der Street Parade

Dä Artikel basiert uff ere fräie Übersetzig vu dere Version vum Artikel „Street_Parade“ vu de dütsche Wikipedia. E Liste vu de Autore un Versione isch do z finde.