Hotel Les Trois Rois

S Basler Luxushotel Les Trois Rois, früener Hotel drei Könige, isch äins vo de eltiste Hotel in dr Schwiz. Es lit diräkt am Rhii bi dr Middlere Brugg.

S Les Trois Rois isch e Baasler Kulturguet, wo für d Region vo Bedütig isch.

1681 isch s Huus zum erste Mol erwäänt worde, as „Heereherbärg und Gasthoof zu de drei Köönig“. S hütige Geböid isch 1844 im Stil vo dr Belle Époque noch de Blään vom Archidekt Amadeus Merian baut worde. Vo denn aa isch s Hotel immer wider däilwiis umbaut worde. Dr Thomas Straumann, e Groossindustrielle (Straumann Holding AG), het s Trois Rois 2004 vo dr Richemont-Grubbe kauft und het s wider in dr baulig Zuestand vo 1844 brocht. Mä het drbii nid alles innenooche uusegrisse und nume d Fassaade lo si, sondern alles Nöije Schicht für Schicht abdräit. D Moolereie im Iigangsberiich, wo mä gfunde het, und d Originaldabeete het mä restauriert. Am 20. März 2006 isch s Hotel wider eröffnet worde und het dr Naame Les Trois Rois überchoo. Es isch e Fümf-Stärn-Hotel und ghöört zu de Leading Hotels of the World. Im Septämber 2012 het dr Straumann bekannt gee, ass er sini Hotel well verchaufe.^[1]

Dr Napoleon Bonaparte, d Köönigin Elisabeth II., dr Pablo Picasso, dr Thomas Mann und vili anderi Brominänti us dr ganze Wält häi im Drei Köönig übernachdet^[2]. S bekanntiste Foti vom Theodor Herzl isch 1901 entstande, wo dr Herzl wäärend em 5. Zionistekongräss uf em Balkon vom Hotel gstande isch.

1. ↑ «Ich muss auch loslassen können», Basler Zeitung, 30. Septämber 2012
2. ↑ E churze Abriss vo dr Gschicht vom Hotel Archivlink (Memento vom 4. März 2016 im Internet Archive)

• Hotel Drei Könige Basel. Hôtel des Trois Rois, Bâle. The Three Kings Hotel in Basle. Publicit Viquerat, Yens-sur-Morges 1975.
• Maximilian Trier, Anne Nagel, Michael Leuenberger: Les Trois Rois. Einblicke in die Geschichte. Mit einem Essay von Andreas Morel. Schwabe, Basel 2006, ISBN 3-7965-2282-3 (kulturhistorische, architekturhistorische und gastronomiehistorische Aspekte)

 Commons: Hotel Les Trois Rois – Sammlig vo Multimediadateie

• Website vom Hotel
• Gschicht vom Hotel

47.5604397.587674Koordinate: 47° 33′ 37,6″ N, 7° 35′ 15,6″ O; CH1903: 611218 / 267758

Dä Artikel basiert uff ere fräie Übersetzig vum Artikel „Hotel_Les_Trois_Rois“ vu de dütsche Wikipedia. E Liste vu de Autore un Versione isch do z finde.